Revelation 1

Mossi Moore (KÃAB-PAALGÃ KOE-NOOGO)

Jump to: Chapter 2 →

1Woto yaa a Zezi Kirist vẽnegr Wẽnnaam sẽn kõ bãmb tɩ b wilg b nonglem yemsã bũmb nins sẽn tog n zĩnd wakat bilf sã n paase. La a Zezi Kirist tʋma b malɛk t'a wilg b tʋmtʋmd a Zã bõn-kãense.

2Yaa yẽnda n yɩ kaset soaba, n togs nebã Wẽnnaam goama la a Zezi Kirist kasetã, n wilg bũmb nins fãa yẽ sẽn yã wã.

3Bark bee neb nins sẽn karemd pĩnd-n-bãngr gom-kãensã wã zutu, la neb nins sẽn kelgda la b sakd bũmb nins sẽn gʋls tɩ be a pʋgẽ wã zutu. Bala wakatã kolgame.

4Maam a Zã n tʋmd seb kãnga wẽnd-dot a yopoe wã sẽn be Azi Porvẽnsã pʋgẽ wã. Bɩ soab ning sẽn be, la sẽn dag n be la sẽn watã, n paas sɩɩs a yopoe wã sẽn be bãmb geerã taoorã, la a Zezi Kirist sẽn ya kaset soab sẽn ya tɩrga, la pipi soab Wẽnnaam sẽn vʋʋg n bas kũum la dũniyã rĩm-dãmba Rĩmã ning yãmb zut barka, la b kõ-y bãane. Soab ning sẽn nonga tõndo, n pek tõnd ne b zɩɩmã

6n yiis d yel-wẽna, n maan tõnd tɩ d lebg soolem maan-kʋʋdb bãmb ba a Wẽnnaam yĩngã, bãmb n tog ne ziiri la pãng zamaan o zamaane! Ãmina!

7Ade bãmb wata ne sawato. Ninsaal fãa na n yãa bãmba, hal baa ne neb nins sẽn dag n kõs bãmbã. La buuda fãa sẽn be dũni zugã na n wiisa bãmb yĩnga. N-ye! Ãmina!

8Zu-soab a Wẽnnaam yetame yaa: Maam yaa Alfa la Omega, soab ning sẽn be moasa, la sẽn dag n be la sẽn wata, soab ning sẽn tõeyã fãa wã.

9Maam a Zã sẽn ya yãmb ba-biiga la sẽn naag yãmb n paamd namsgo, la sẽn naag yãmb n tar pʋɩɩr ne Wẽnnaam soolem, la m naag n maood a Zezi tũudmã pʋgẽ wã, mam dag n bee Patmoos sẽn ya tẽng koom sẽn gũbgi, Wẽnnaam goamã la a Zezi kasetã yĩnga.

10Zu-soaba daare, Sɩɩg-sõng pida maam, la mam wʋma koe-kãseng sẽn wẽnd baorg koɛɛg m poorẽ.

11A da yetame yaa: Gʋls bũmb nins fo sẽn ne wã sebr zug n tʋm wẽnd-dot yopoe wã sẽn be Efɛɛse, la Ismirn la Pɛrgam la Tɩyatɩɩr la Sard la Filadɛlfi ne Laodise.

12Mam wẽnemdame n na n ges ned ning sẽn da gomd-a ne maamã. La mam sẽn wẽnemde, mam yãa sãnem fɩtl-dogends a yopoe,

13la ned sẽn be fɩtl-dogends a yopoe wã sʋka, n wẽnd Ninsaal Bi-ribla. B rag n yera fuug sẽn sig n ta b nao wã, la b ra sẽbga b yãoog ne sãnem sẽbdga.

14B zugã zoobd rag n yaa peels wa pe-kõbdo la wa lamdo. B ninã ra yaa wa bug-witim.

15B naowã ra yaa wa zũud b sẽn zug boaag pʋgẽ t'a mooge, la b koɛɛgã ra yaa wa ko-kãsemsã bʋrgo.

16Bãmb da zãada ãds a yopoe ne b rɩtgo. Zabr sʋʋg sẽn tar noey a yiib sẽn dɩt n da yit bãmb noorẽ wã. La bãmb nengã ra yaa wa wĩntoogo wakat ning a sẽn yãgd ne a pãng tɛkã. Fɩtl dogends a yopoe (1.12)

17Mam sẽn yãnd-bã, mam lʋɩɩ b taoor n ya wa kũum. Bãmb tika maam ne b nug-rɩtg n yeel yaa: Da maan rabeem ye!

18Mam yaa dẽenem la yaoolem soaba, soab ning sẽn vɩ. Mam dag n kiime, la ad-ma, mam vɩɩme, zamaan o zamaane. Mam tara kũum ne kɩɩm-kulg kʋɩlen-biisi.

19Dẽ wã, gʋls bũmb nins fo sẽn yã, bũmb nins sẽn be moasã, la bũmb nins sẽn na n yaool n maanã.

20Ad ãds a yopoe wã fo sẽn yã mam rɩtgã ne sãnem fɩtl-dogends a yopoe wã yel-solemdã võore: Ãds a yopoe wã yaa wẽnd-dot a yopoe sẽn be tẽms a yopoe wã gũudba, la sãnem fɩtl-dogends a yopoe wã yaa wẽnd-dot a yopoe wã sẽn be tẽms a yopoe wã.

Jump to: Chapter 2 →