Revelation 17

Mossi Moore (KÃAB-PAALGÃ KOE-NOOGO)

← Chapter 16 Jump to: Chapter 18 →

1Dẽ poore, malegs a yopoe wã sẽn da zãad laas a yopoe wã, b ned a yembr waa n goma ne maam n yeele: Wa tɩ m na n wilga foom pʋg-yood kãsengã sẽn zĩ ko-kãsemsã zutã bʋʋdo.

2Yaa ne yẽnda la dũniyã rĩm-dãmbã maan yoobo, la dũni nebã ra yũu yẽ yoobã divẽ tɩ b nens yilim.

3Malɛkã rɩka maam m tagsgã pʋgẽ n kẽng weoogẽ. La mam yãa pag sẽn zao rũng sẽn ya miuug mass, n pid ne yʋɩ sẽn paoogd Wẽnnaam, la a tara zut a yopoe ne yɩɩl piiga.

4Pagã ra yera fuug sẽn ya miu-kẽega la miuug mass n nags a meng ne sãnem la kuga b raab sẽn ya toogo, la pɛrl dãmba. Pagã ra zãada sãnem laag a nugẽ, la laagã ra pida ne tʋʋm wẽnse la ne pagã yoobã rẽgdo.

5Yʋʋr n da gʋls pagã rĩirẽ, yaa yel-solemde: Babilon kãsengã, dũni pʋg-yoaadbã ne tʋʋm-wẽns ma.

6Mam yãame tɩ neb nins sẽn welg toore, la a Zezi kaset dãmbã zɩɩm yilimd pagã nenga. Mam sẽn yãnd-a wã, linga mam wʋsgo.

7La malɛk soka mam yaa: Bõe yĩng tɩ ya lingr ne foom? Mam na n togsa foom pagã ne rũng ning sẽn zɩt yẽnda, n tar zut a yopoe ne yɩɩl piigã yel-solemdã.

8Rũng ning fo sẽn yã wã rag n beeme, la a ka leb n beẽ ye. A na n yii bog-zulungẽ wã n kẽng sãoong zĩigẽ. La dũni neb nins yʋy sẽn ka gʋls vɩɩm sebrã pʋgẽ hal dũni naaneg wẽndẽ wã sã n yã rũngã, a na n yɩɩ lingr ne bãmba, rũngã sẽn dag n be, n wa ka leb n beẽ la a na n leb n pukã yĩnga.

9Bãngr sẽn yɩt ne yam n tog n zĩnd ka: Zut a yopoe wã yaa tãms a yopoe nins pagã sẽn zao b zutã.

10Leb n yaa rĩm-dãmb a yopoe. Bãmb b nu n lʋɩ t'a yembr beẽ, t'a to wã nan ka wa nand ye, la a sã n wa wa, a tog n dɩɩ naam wakat bilfu.

11Rũng ning sẽn dag n be, n ka leb n be wã meng yaa rĩm a nii soaba. Yẽ me yaa rĩm-dãmb a yopoe wã ned a yembre. La a rabda sãoong zĩigẽ.

12Yɩɩl piigã fo sẽn yã wã yaa rĩm-dãmb piig sẽn nan ka reeg soolem ye, la b reegda pãn-tõog wa rĩm-dãmbã lɛɛr a yen yĩng ne rũngã.

13Bãmb yam yaa a yembre, la b kõta rũngã b pãngã ne b pãn-tõogã.

14Bãmb na n zaba ne pe-bilã. La pe-bilã na n tõog-b lame, tɩ bõe bãmb yaa zu-soben-dãmb Zu-soaba la rĩm-dãmba Dĩma. La neb nins b sẽn boolã, neb nins b sẽn tũusã ne neb nins sẽn maand sɩda, n be ne pe-bilã na n tõog-b lame me.

15Malɛkã yeela maam yaa: koom nins fo sẽn yã tɩ pʋg-yoodrã zĩ b zutã yaa neba la neb kʋʋndo, la soolem dãmba la goam buud toay-toay neba.

16Yɩɩl piigã fo sẽn yã wã, n paas rũngã na n kisga pʋg-yoodrã, n dees a futã n bas-a a zaala, la b wãb a nemdã, la b ning-a bugum t'a rɩ tẽma.

17Bala, Wẽnnaam ninga bãmb sũyã pʋs tɩ b maan Wẽnnaam daabo, la b naag taab yam a yembre, n dɩk b naamã n kõ rũngã hal tɩ Wẽnnaam goamã wa paam pidsgu.

18La pagã fo sẽn yã wã yaa tẽn-kãseng ning sẽn so-a dũniyã rĩm-dãmbã.

← Chapter 16 Jump to: Chapter 18 →