Revelation 4

Mossi Moore (KÃAB-PAALGÃ KOE-NOOGO)

← Chapter 3 Jump to: Chapter 5 →

1Dẽ poore, mam gesame, la haya! Mam yãa kʋɩleng sẽn pak arzãn pʋga. La pipi koɛɛg ning sẽn wẽnd baorg mam sẽn da wʋm t'a gomd ne maamã yeela maam yaa: Rʋ yĩngr ka, la mam na n kɩtame tɩ fo yã bũmb nins sẽn ya tɩlɛ tɩ wa zĩndã.

2Tao-tao bala, Sɩɩg-sõng pida maam. La ade, geer n da be arzãn pʋga, la ned n dag n zao geerã zugu.

3Ned ning sẽn zao-a geerã zugã dag n wẽnda wa kug sẽn be yõod n boond tɩ zaspe la sardoan. La saag-gomtɩʋʋg sẽn wẽnd wa kugr sẽn boond tɩ emerood n dag n gũbg geerã.

4La gɛy pisi la a naas n dag n gilg ge-kãsengã, la kãsem-dãmb pisi la a naas n zao b zutu, n yer fu-peelse, la b n fõg sãnem maanf-rãmba.

5Sa-yãgbo, la kelemse, la sa-kelems n yit geerẽ wã. Fɩtl-dãmb a yopoe n be geerã taoor n wit ne pãnga. Bãmb yaa Wẽnnaam sɩɩs a yopoe wã.

6Geerã taoor daag n gãnega bũmb sẽn pɩnd wa vɛɛre, n tud n ya wa kiristalle. La geerã sʋk ne sẽn gũbg geerã fãa, bõn-vɩɩs a naas n be be n pid ne nin taoor la poorẽ.

7Pipi bõn-vɩɩgã wẽnda wa gɩgemde, la yiib soabã wẽnda wa nag-bila la tãab soaba neng wẽnda wa ninsaal nenga, la naas soaba wẽnda wa panantugr sẽn yɩgda.

8Bõn-vɩɩs a naasã ned kam fãa tara pɩgs a yoobe, la b pida ne nin zĩiga fãa, la b pʋgẽ me. Wĩndg la yʋngo b yetame tɩ: Sõngo, sõngo, Zu-soab a Wẽnnaam sẽn Tõeya fãa wã yaa sõngo. Bãmb da beeme la b bee moasa la b watame, n ka basdẽ ye.

9La wakat ning bõn-vɩɩs a naasã sẽn na n waoog sẽn zao-a geerã zugu, n vɩ zamaan o zamaana, la b zẽk b yʋʋre, la b pʋʋs-b barkã,

10kãsem-dãmbã pisi la a naasã na n wõgemda sẽn zao-a geerã zugu la b sẽn vɩ zamaan o zamaana taoore, n waoogd-ba, la b na n lobda b maanf-rãmba geerã taoor la b yetẽ:

11Tõnd Zu-soaba la d Wẽnnaam, yãmb n zems tɩ reeg ziiri, la waoogre, la pãnga. Bala, yãmb n naan bũmb fãa, la yaa yãmb daab yĩng la y naan-b tɩ b beẽ.

← Chapter 3 Jump to: Chapter 5 →