Revelation 3

Mossi Moore (KÃAB-PAALGÃ KOE-NOOGO)

← Chapter 2 Jump to: Chapter 4 →

1Gʋls Sard wẽnd-doogã gũud n yeel-a yaa: Ad soab ning sẽn tar Wẽnnaam sɩɩs a yopoe la ãds a yopoe wã sẽn yeta: "Mam bãnga yãmb tʋʋmã. Yãmb yʋʋr yiime tɩ y vɩɩme la y yaool n yaa kũum.

2Maan gũusgu la f kɩt tɩ sẽn be fo pʋgẽ n nan ka ki wã leb n yẽege. Bala, mam mikame tɩ yãmb tʋʋmã ka zems mam Wẽnnaamã taoor ye.

3Dẽ wã, bɩ y tẽeg yãmb sẽn deeg koɛɛgã la y wʋm-a to-to wã, tall-y-yã-a la y kos sugri. Yãmb sã n ka gũusi, mam na n waa yãmb nengẽ wa wagdre, la yãmb ka na n bãng sẽn ya wakat ning la mam na n wa n ling yãmbã ye.

4Baoosgo, yãmb tara neb kẽer Sard sẽn ka rẽgem b fut ye. Bãmb na n kẽna ne maam ne fu-peelse, bãmb sẽn zems tɩ kẽn ne maamã yĩnga.

5Ned ning sẽn na n tõogã na n yeelga fu-peels a woto. Mam ka na n yẽes yẽ yʋʋrã vɩɩm sebrã pʋgẽ ye, la mam na n boola yẽ yʋʋrã m ba la malegsã taoore."

6Bɩ ned ning sẽn tar-a tʋb kelg bũmb ning Sɩɩg-sõng sẽn togsd wẽnd-dotã.

7Gʋls Filadɛlfi wẽnd-doogã gũud n yeel-a yaa: Ad bũmb sõmblem soabã, sɩd soabã, sẽn tar-a a Daviid kʋɩlen-bilã, soab ning sẽn pakd tɩ ned ka tõe n pagã, soab ning sẽn pagd tɩ ned ka tõe n pakã sẽn yeta:

8"Mam bãnga yãmb tʋʋmã. Gese, mam ninga kʋɩleng sẽn pak yãmb taoore tɩ ned ka tõe n pag-a ye, tɩ bala yãmb pãngã paoodame, la yãmb talla mam koɛɛgã, la y ka kɩɩs mam yʋʋrã ye.

9Ade, mam na n ninga neb nins sẽn ya a Sʋtãan tũudbã yãmb nugẽ. Bãmb boonda b mens tɩ Zuif-rãmba tɩ yaool n ka sɩd ye, bala b yagda zĩrĩ. Gese, mam na n kɩtame tɩ b wa n wõgemd yãmb taoore, la b bãng tɩ mam nonga yãmba.

10Yãmb sẽn tall mam koɛɛg ning sẽn kɩt tɩ yãmb nangd pãng mam pʋgẽ wã yĩnga, mam me na n kogla yãmb wakat ning makrã sẽn na wa dũniyã tɛk fãa n mak nebã sẽn be a zugã.

11Mam wata tao-tao. Gãd-y bũmb nins yãmb sẽn tarã kãenkãe, tɩ ned da reeg yãmb maanfã ye.

12Mam na n kɩtame tɩ ned ning sẽn tõog-a wã lebg ra-luk mam Wẽnnaamã roog pʋga, la yẽ kõn le yi be ye. Mam na n gʋlsa mam Wẽnnaamã yʋʋre, la m Wẽnnaamã tẽng sẽn ya Zeruzalɛm paalg sẽn yit mam Wẽnnaamã nengẽ arzãn n sigdã yʋʋr yẽ zugu, la m gʋls mam yʋ-paalegã yẽ zugu."

13Bɩ ned ning sẽn tar kelg bũmb nins Sɩɩg-sõng sẽn yet wẽnd-dotã.

14Gʋls Laodise wẽnd-doogã gũud n yeel-a yaa: Ad bũmb ning sẽn ya-a Ãmina, la kaset soab sẽn ya tɩrga, la sɩd soaba, sẽn naan-a Wẽnnaam bõn-naandsã sẽn yeta:

15"Mam bãnga yãmb tʋʋmã. Yãmb ka maasga la y ka tʋʋlg me ye. Mam nongẽ la yãmb sẽn dag n na n yaẽ tʋʋlga wall maasga.

16Woto, yãmb sẽn ya zalzal n ka maasg la y ka tʋʋlgã yĩnga, mam na n wʋka yãmb m noorẽ.

17Yãmb sẽn yet tɩ yãmb yaa arzegs rãmba, tɩ y paama arzegse la yãmb ka le rat baa fʋɩ wã yĩnga, la yãmb sẽn ka mi tɩ y yaa nimbãan-neba, n be namsg pʋgẽ la y ya naong rãmba la y zoẽnse la bɛɛlã yĩnga,

18mam sagenda yãmb tɩ y ra sãnem mam nengẽ, sẽn zug ne bugum, tɩ y tõe n lebg arzegs rãmba, la y ra fu-peels mam nengẽ, tɩ y tõe n paam n yeelge, n lud y yãnd n da yɩ a zaal ye, la y ra nin kaam mam nengẽ n sõog y ninã tɩ y tõe n yã.

19Mam lengda neb nins fãa mam sẽn nonge, la m sɩbgd-ba. Dẽ wã, bɩ y nang pãnga la y tek yam n kos sugri.

20Ade, mam yasa rig-noorẽ n kabsdẽ. Ned sã n wʋm mam koɛɛgã n pak kʋɩlengã, mam na n kẽe yẽ roogẽ n dɩ ne yẽnda la yẽ na n dɩɩ ne maam.

21Mam na n kɩtame tɩ ned ning sẽn tõogã zĩnd ne maam mam geerã zug wa mam sẽn tõoge, n zao ne m ba b geerã zugã."

22Bɩ ned ning sẽn tar tʋb kelg bũmb ning Sɩɩg-sõng sẽn yet wẽnd-dotã.

← Chapter 2 Jump to: Chapter 4 →