Revelation 6

Mossi Moore (KÃAB-PAALGÃ KOE-NOOGO)

← Chapter 5 Jump to: Chapter 7 →

1Pe-bilã sẽn sok soagdg a yembr sogds a yopoe wã sʋkã, mam gesame, la mam wʋma bõn-vɩɩs a naasã ned a yembr sẽn gom ne koɛɛg sẽn wẽnd wa sa-kɛleng n yeel yaa: Wa!

2Mam gesame, la mam yãa wed-moaag sẽn ya pɛɛlga. Sẽn zao-a weefã ra zãada tãpo, la b kõo yẽ maanfo. La a kẽnga wa tõaagda, n na n tõoge.

3Pe-bilã sẽn sok soagdg a yiib soabã, mam wʋma bõn-vɩɩg a yiib soabã sẽn yeel yaa: Wa!

4La wed-moaag a to kõbg sẽn ya miuug wa bugum yiime. La b kõo sẽn da zao-a yẽ wã pãn-tõog t'a yiis dũni laafɩ, tɩ nebã kood taaba. La b kõo yẽ zabr sʋ-kãsenga.

5La bãmb sẽn sok soagdg a tãabẽ soabã, mam wʋma bõn-vɩɩg a tãabẽ soabã sẽn yeel yaa: Wa! Mam gesame, la mam yãa wed-moaag sẽn ya sablga. Sẽn zao-a yẽnda wã dag n zãada balãns a nugẽ.

6La mam wʋma bũmb sẽn wẽnd wa koɛɛg bõn-vɩɩs a naasa sʋka. A da yetame yaa: bɩle bɛɛl ne wũmbl na n koosa hal deniye. Orz ne wũmbl a tãab na n koosa deniye. La sã n ya kaamã la divẽ wã, ra sɩɩs-b ye.

7Pe-bilã sẽn sok soagdg a naas soabã, mam wʋma bõn-vɩɩg a naas-n-soaba koɛɛg sẽn yeel yaa: Wa!

8Mam gesame la mam yãa wed-moaag t'a kõbgã ya kẽeg-kẽega. Sẽn da zao-a yẽnda wã yʋʋr boondame t'a kũum, la kɩɩm-kulg ra pʋgda yẽnda. La b kõo bãmb pãn-tõog tɩ b tõog dũniyã ned a yembr neb a naas fãa sʋk n kʋ-b ne zabr sʋʋga, la kom, la bãase, la ne dũniyã we-rũmsi.

9Pe-bilã sẽn sok soagdg a nu soabã, mam yãa b sẽn dag n kʋ neb nins Wẽnnaam koɛɛgã poorẽ la b sẽn kɩs kasetã yĩngã sɩɩs sẽn be tẽn-kugrã tẽngre.

10Bãmb zẽka b koees ne pãng n yeel yaa: Zu-soben-sõng la sɩd soaba, yãmb na n gũume hal tɩ ta dabʋr tɩ y yaool n kao duniyã nebã bʋʋdo, la y rok y sũur tõnd zɩɩma raagr yĩnga?

11B kõo bãmb ned kam fãa fu-pɛɛlga, la b yeel-b tɩ b kel n vʋʋs wakat bilf yɛsa, hal tɩ bãmb tʋmd-n-taasã ne b ba-biisã b sẽn na n kʋ wa b sẽn kʋ bãmbã sõor pidi.

12Pe-bilã sẽn sok soagdg a yoob soabã, mam gesame. Tẽn-digimdg kãseng n zĩndi. Wĩndga lebga sableg diga wa bot sẽn wʋg ne rũm-sableg kõbdo, la kiuugã zãng lebga wa zɩɩm,

13la yĩngr ãdsã sʋʋga tẽngã zug wa kankang sob-kãseng sẽn wẽ t'a kankam yorge.

14Sa-gãongã looga wa sebr b sẽn pili. La tãmsã fãa ne tẽns nins koomã sẽn gũbgã sersa b zĩisẽ.

15Dũni rĩm-dãmbã la a nin-kãsemse la a sodaas nanamse la a arzegs rãmba la a pãens rãmba la a yemse, ne burkĩmbã, b fãa soonda tãms bogdẽ la tãms pĩis sʋka.

16La b yeta tãmsã ne pĩisã tɩ b lʋɩ n põd-ba, n solg-b tɩ b zãag ne sẽn zao-a geerã zugã gesgo la ne pe-bilã sũ-puugri.

17Bala, Wẽnnaam ne pe-bilã sũ-puugrã ra-kãsengã taame, la ãnna n na n tõog n põse?

← Chapter 5 Jump to: Chapter 7 →