Revelation 8

Mossi Moore (KÃAB-PAALGÃ KOE-NOOGO)

← Chapter 7 Jump to: Chapter 9 →

1Pe-bilã sẽn sok soagdg a yopoe soabã, arzãn pʋg yɩɩ sɩddd tɩ kolg lɛɛr pʋɩ-sʋka.

2Mam yãa malegs a yopoe sẽn yas Wẽnnaam taoorã, la b kõ-b-la bard a yopoe.

3La malɛk a to n waa n yalsa tẽn-kugrã zugẽ. Yẽ ra zãada wisd laag sẽn ya sãnem. B kõo yẽ tɩdar wʋsg t'a naag ne nin-sõamyã fãa pʋʋsg n yõog sãnem tẽn-kugrã sẽn be geerã taoorã zugu, tɩ yɩ maoongo.

4Tɩdarã bug-zõos naaga ne nin-sõamyã pʋʋsg n yi malɛkã nugẽ n zẽk yĩngri, Wẽnnaam taoore.

5Malɛkã rɩka wisd laagã n pids-a ne tẽn-kugrã zug bugmã n lob-a tẽngã zugu. Sa-kelemse la kelemse la sa-yãgbo la tẽn-digimdg zĩndame.

6La malegs a yopoe wã sẽn da zãad bard a yopoe wã seglame n na n peeb bardã.

7Pipi malɛkã peeba baorgo. La sapɩlem ne bugum sẽn kalem ne zɩɩm zĩndame, la b lob-b-la tẽng zugu. Tẽngã pʋɩɩr a yembr tãab sʋk rɩɩ bugum, tɩɩg a yembr tãab sʋk dɩɩ bugum, la mo-maasã fãa rɩɩ bugum. Bardo (8.6)

8Malɛk a yiib-n-soabã peeba baorgo. La b loba bũmb sẽn wẽnd wa tãn-kãseng sẽn dɩt bugum ko-kãsengã pʋga. La ko-kãsengã pʋɩɩr a yembr tãab sʋk lebga zɩɩm.

9La bõn-naands nins sẽn dag n be ko-kãsengã pʋgẽ n vɩ wã pʋɩɩr a yembr tãab sʋk kiime. La koom kogondã pʋɩɩr a yembr tãab sʋk sãamame.

10Malɛk a tãab-n-soabã peeba baorgo. La ãd-kẽeng sẽn dɩt bugum wa bug-vɩleng n yii yĩngr n lʋɩ. Yẽ lʋɩɩ ko-zoetmã pʋɩɩr a yembr tãab sʋk zugu, la ko-bundsã pʋɩɩr a yembr tãab sʋk zugu.

11Ad-kãng yʋʋr boondame t'a Zẽnem. La koomã pʋɩɩr a yembr tãab sʋk lebga zẽnem, la koomã sẽn lebg zẽnemã kʋʋ ninsaalb wʋsgo.

12Malɛk a naas-n-soabã peeba baorgo. La wĩntoogã pʋɩɩr a yembr tãab sʋka, la kiuugã pʋɩɩr a yembr tãab sʋka, la ãdsã pʋɩɩr a yembr tãab sʋk pãng saame, sẽn na yɩlg la pʋɩɩr a yembre tãab sʋk lebg lika, tɩ wĩndg vẽenem pãng boog sẽn tat pʋɩɩr a yembr tãab sʋka, tɩ yʋng vẽenem pãng boog a woto.

13Mam gesame, la m wʋma sɩl-kẽeng sẽn yɩgd sa-gãnã sʋka, n zẽk a koɛɛg ne pãng n yetẽ yaa: Toogo! Toogo! Ninsaalbã sẽn be tẽng zugã na n paama toogo, bardã a taabã malegs sẽn na n peebã koees yĩnga.

← Chapter 7 Jump to: Chapter 9 →