Revelation 7

Mossi Moore (KÃAB-PAALGÃ KOE-NOOGO)

← Chapter 6 Jump to: Chapter 8 →

1Dẽ poore, mam yãa malegs a naas sẽn yas dũniyã kɩrems a naasã. Bãmb da yõka dũniyã sobd a naasã, sẽn na yɩl tɩ b ra wẽ tẽngã wall ko-kãsengã wall tɩɩg baa a yembr ye.

2La mam yãa malɛk a to sẽn yi yaang n zẽkdẽ, la yẽ ra zãada Wẽnnaam sẽn vɩ wã bãn-ningdga. Malɛkã zẽka a koɛɛg n kelem n yeel malegs a naasã b sẽn da kõ noor tɩ b maan tẽngã ne ko-kãsengã wẽngã yaa:

3Da maan-y tẽngã wall ko-kãsengã wall tɩɩsã bũmbu, hal tɩ tõnd paam n ning d Wẽnnaamã tʋmtʋmdbã rĩyã bãnde.

4La mam wʋma neb nins b sẽn ning bãndã sõore. Yaa neb tus koabg la tus pis-naas la a naase, a Israyɛl buudã fãa kambã sʋka.

5A Zuda buudã neb b sẽn ning bãndã sõor tus piig la a yiibu. A Rubɛn buudã me yaa neb tus piig la a yiibu. A Gaad buudã me yaa neb tus piig la a yiibu,

6a Azɛɛr buudã me yaa neb tus piig la a yiibu, a Neftali buudã me yaa neb tus piig la a yiibu, a Manase buudã me yaa neb tus piig la a yiibu,

7a Sɩmyõ buudã me yaa neb tus piig la a yiibu, a Levi buudã me yaa neb tus piig la a yiibu, a Isakaar buudã me yaa neb tus piig la a yiibu,

8a Zabilõ me yaa neb tus piig la a yiibu, a Zozɛf buudã me yaa neb tus piig la a yiibu, a Bɛnzame buudã me yaa neb tus piig la a yiibu.

9Dẽ poore, mam gesame, la mam yãa neb kʋʋng wʋsg ned sẽn ka tõe n sõd n sɛ ye, sẽn yi soolem dãmba fãa pʋse, buud fãa pʋse, tẽns toay-toay fãa pʋse, la sẽn gomd goam buud toor-toore. Bãmb dag yera fu-peelse la b zãad koms vãad b nusẽ n yas geerã taoore la pe-bila taoore.

10Bãmb dag n zẽkda b koees ne pãng n yetẽ: Fãagrã bee ne tõnd Wẽnnaam sẽn zao geerã zugã, la ne pe-bilã.

11La malegsã fãa ra yas n gũbga geerã ne kãsem-dãmbã la bõn-vɩɩs a naasã. Bãmb wõgemdame n fõgen b nens tẽng geerã taoor n waoog Wẽnnaam

12n yetẽ yaa: Ãmina! Pẽgre, la ziiri, la yam la bark pʋʋsgo, la waoogre, la pãn-tõogo, la pãng yaa tõnd Wẽnnaamã n so zamaan o zamaana! Ãmina!

13Dẽ, kãsem-dãmbã ned a yembr gomame n sok maam yaa: Neb nins sẽn yeelg fu-peelsã yaa ãnna rãmba, la b yita yɛ?

14Mam leoka yẽ yaa: M zu-soaba, yãmb n mi. La a yeela maam yaa: Yaa neb nins sẽn yi to-kãsengã pʋgẽ wã. Bãmb pegsa b fut pe-bilã zɩɩmẽ tɩ b lebg peelse.

15Yaa woto yĩng n kɩt tɩ b be Wẽnnaam geerã taoore, n tʋmd Wẽnnaam tʋʋmd wĩndg la yʋng bãmb roogã pʋgẽ. Ned ning sẽn zao-a geerã zugã na n zĩnda ne bãmba n gũ-ba.

16Kom kõn le yõk-ba, ko-yũud kõn leb n yõk-ba, la wĩntoogo, wall tʋʋlg kõn leb n wẽ-b ye.

17Bala, Pe-bilã sẽn be geerã sʋkã na n dɩlga bãmba, la b tall-b n kẽng vɩɩm ko-bunds zĩisẽ, la Wẽnnaam na n yẽesa nintãm b ninẽ.

← Chapter 6 Jump to: Chapter 8 →