Revelation 16

Mossi Moore (KÃAB-PAALGÃ KOE-NOOGO)

← Chapter 15 Jump to: Chapter 17 →

1Mam wʋma koe-kãseng sẽn yi wẽnd-doogẽ wã n yeel malegs a yopoe wã yaa: Kẽng-y n tɩ kiig-y Wẽnnaam sũ-puugrã sẽn be laas a yopoe wã pʋsã dũniyã zugu.

2Pipi soabã kẽngame n tɩ kiig sẽn be yẽ laagẽ wã dũniyã zugu. La nod-kɛgeng sẽn ya toaag yõka neb nins sẽn dag n tar rũngã gʋlsem bãnde la b wõgemded bõn-naandgã taoorã.

3Malɛk a yiib-n-soaba kiiga sẽn be yẽ laagẽ wã ko-kãsengã pʋgẽ, la a lebga zɩɩm wa kũum zɩɩm. La bõn-vɩɩs nins fãa sẽn dag n be ko-kãsengã pʋgã kiime.

4Malɛk a tãab-n-soabã kiiga sẽn be yẽ laagẽ wã kʋɩlsã ne ko-bundsã pʋse, la b lebga zɩɩm.

5La mam wʋma ko-rãmbã malɛkã sẽn yeel yaa: yãmba, soab ning sẽn dag n be, la sẽn be moasã, n welg toorã, yãmb sẽn kao bʋʋdã a woto wã zemsame.

6Bala, bãmb daaga neb nins sẽn welg toorã la yãmb no-rɛɛsdbã zɩɩm, la yãmb kõ-b-la zɩɩm tɩ b yũ. Rẽ segda ne bãmba.

7La mam wʋma koɛɛg sẽn yi tẽn-kugrẽ wã n yeel yaa: Hakɩɩka, Zu-soab a Wẽnnaam sẽn Tõeya fãa, yãmb bʋʋda kaoob yaa sɩda la tɩrga.

8Malɛk a naas-n-soabã kiiga sẽn be yẽ laagẽ wã wĩntoogã zugu. La b kõo wĩntoogã pãng t'a yõog ninsaalbã ne bugum,

9la tʋʋl-kãseng yõoga nebã. Bãmb paooga Wẽnnaam ning sẽn tar-a noor ne to-kãensã yʋʋre, la b ka tek yam n kos sugr n na n kõ Wẽnnaam waoogr ye.

10Malɛk a nu soabã kiiga sẽn be yẽ laagẽ wã rũngã geerã zugu. La yẽ soolemã lebga lik bida. Toogã kɩtame tɩ ninsaalbã rũmd b zɛlma.

11La toodã ne noadã sẽn tar bãmbã yĩnga, b paooga arzãnã Wẽnnaamã, la b ka tek yam n kos sugr b tʋʋm wẽnsã yĩng ye. Sũ-puugr laaga (16.1)

12Malɛk a yoob-n-soabã kiiga sẽn be yẽ laagẽ wã kʋɩl-kãseng ning sẽn boond tɩ Efartã zugu. La kʋɩlgã koom kʋɩɩme tɩ lebg sor rĩm-dãmb nins sẽn yit yaangã yĩnga.

13Mam yãa sɩ-rẽgd a tãab sẽn wẽnd wa loms sẽn yit dargõ wã noorẽ la rũngã noorẽ la belgr no-rɛɛsã noorẽ.

14Bãmb yaa sɩɩse, zĩn-dãmb sẽn maand bõn-yɛɛsdse, la sẽn kẽngd dũni gill fãa rĩm-dãmbã nengẽ n na n tɩ tigs-b Wẽnnaam sẽn tõe fãa ra-kãsenga sẽn ya zabr daarã yĩnga.

15Ad mam wata wa wagre. Bark bee ned ning sẽn ka gõe la sẽn yer a futu, sẽn na yɩl la a da kẽn beelle, la tɩ nebã kõn ya a yãndã zugu.

16B tigma nanamsã zĩig a yen sẽn boond ne Hebre goam tɩ Harmagedõ.

17Malɛk a yopoe soabã kiiga sẽn be yẽ laagẽ wã pemsma pʋga. La koe-kãseng yii geerẽ wã, wẽnd-doogẽ wã n yeel yaa: Maaname n sa!

18La sa-yãgb ne koeese, la sa-kelems ne tẽn-digimdg sẽn ya kãseng zĩndame, la hal ninsaalb sẽn be dũni zug tɛka, tẽn-digimdg sẽn ya kãseng a woto nan ka tol n zĩnd ye.

19Tẽn-kãsengã welga zĩis a tãabo. Soolem toay-toayã tẽns lʋɩɩme, la Wẽnnaam tẽega Babilon kãsengã yelle, n na n kɩt t'a yũ bãmb sũ-puug-kãsengã divẽ wã sẽn be laagẽ wã.

20Koomã sẽn gũbg tẽns ninsã fãa zoeeme, la ned ka leb n yã tãmsã ye.

21La sapɩlem zɩslem sẽn kolg kɩlo pis-naas yii yĩngr n dʋʋg ninsaalbã zutu. La sapɩlmã toog yĩnga, nebã paooga Wẽnnaam. Bala to-kãng talla pãng tɩ looge.

← Chapter 15 Jump to: Chapter 17 →