Revelation 18

Mossi Moore (KÃAB-PAALGÃ KOE-NOOGO)

← Chapter 17 Jump to: Chapter 19 →

1Rẽ zugẽ, mam yãa malɛk a to sẽn tar pãn-kãseng sẽn yi arzãn n sigda, n tar noor sõama la a zĩirã kõo dũniyã vẽenem.

2Malɛkã zẽka a koɛɛg ne pãng n yeele: A lʋɩɩme! A lʋɩɩme! Babilon kãsengã lʋɩɩme! Yẽ lebga zĩn-dãmb yiri, la zĩ-dẽgd fãa, la bõn-yɩgd rẽgd fãa neba sẽn kis zĩiga,

3Soolem dãmba fãa sẽn yũ Wẽnnaam sũ-puugr wa divẽ yẽ yoobã yĩnga, tɩ dũni rĩm-dãmb maan yoob ne yẽnda, la tɩ dũni lɛɛbdb tũnug yẽ nag-teedã pãng n lebg arzegs rãmba.

4La mam wʋma koɛɛg a to sẽn yi arzãn n yeele: Mam neba, yi-y tẽngã pʋga, tɩ y da wa n naag n maan yel-wẽn ning a sẽn maandã, la tɩ y da wa n naag yẽnda n paam tood nins sẽn na n paam-a wã ye.

5Bala, yẽ yel-wẽna zamame hal n tãag arzãna, la Wẽnnaam tẽega a ka-tɩrlem tʋʋmã yelle.

6Yao-y yẽnda wa yẽ sẽn yao wã, la y lebs-a a tʋʋmã naoor a yiibu! Wamd ning pʋgẽ a sẽn kiigã, kiig-y-yã a woto naoor a yiib n kõ-a.

7Yẽ sẽn waoog a meng n kẽ nagma pʋgẽ n ta zĩig ningã, kɩt-y t'a toogã ne a sũ-sãoongã ta a boto. Tɩ bõe, a yeta a sũurẽ yaa: Mam zĩi wa rĩm-poaka, mam ka pʋgkõore, la mam kõn tol n paam kũum sũ-sãoong ye.

8Rẽnda yĩngã, yẽ toodã na n waa daar a yen pʋgẽ: bãag sẽn na n kʋ-a, sũ-sãoongo, kom, la bugum na n dɩ-a lame. Bala, Zu-soab a Wẽnnaam, sẽn kaood-a yẽ bʋʋdã yaa pãn-kẽeng soaba.

9Dũniyã rĩm-dãmb nins fãa sẽn maan yoob ne tẽn-kãngã, la b paam te-neeb ne yẽ wã sã n wa yã tẽngã sẽn dɩt bugmã bug-zõose, b na n yãbame n wiis a yĩnga.

10Bãmb sẽn zoet rabeem tɩ yẽ toogã na n wa paam bãmbã yĩnga, b na n yalsa yɩɩg n yeel yaa: Kato! Kato! Tẽn-kãsengã, Babilon tẽng sẽn tar pãnga! Fo sɩbgr waa wakat a yen pʋgẽ bala.

11La dũni fãa toandb yãbdame n wiisd yẽ yĩnga, ned baa a yen sẽn ka le raad bãmb koosmã yĩnga:

12Yaa sãnem, la wanzuri, la kug sẽn be yõod wʋsgo, la pɛrl dãmba, la lẽ peen-sõamyã, la peen-miu-kẽese, la peen fʋlfʋle, la pɛɛl sẽn ya miuug-mas, la raoog buud fãa sẽn tar yũ-noogo, la teoog buud fãa sẽn maan ne wob-yẽna, la teed buud fãa sẽn maan ne raad sẽn be yõod wʋsgo, la sẽn maan ne zũudu, la kutu, la kug sẽn boond tɩ marbre,

13kanell la ra-pegd buud sẽn tar yũ-noogo, la zẽ-biis sẽn kõt yũ-noogo, la tɩdare, la vãad buud sẽn boond tɩ miir, la wisdu, la divẽ, la kaam, la zom-bãanega, la koodo, la niis ne piisi, la wed-moose, la terok-rãmba, hal baa ninsaalba.

14Fo sẽn da rat bũmb ning ne f sũur fãa wã loog n basa foom. Bõn-sõamy wã fãa, wall bõn-neebã menemame n bas foom, la ned kõn leb n yã-b abada.

15Toandb nins sẽn tũnug Babilon n lebg arzegs rãmbã sẽn zoet rabeem ne toog ning sẽn na n paam tẽn-kãngã yĩngã, b na n yalsa yɩɩga, n yãbe, n maan sũ-sãoongo.

16Bãmb na n yeelame yaa: Kato! Kato! Tẽn-kãsengã sẽn dag n yer fu-neeba la fu-miu-kẽese la fut sẽn ya miid mas n nags a meng ne sãnem ne kug sẽn be yõodo la pɛrl dãmba! Wakat a yen pʋgẽ bala, b sãama arzegs wʋsg a woto.

17Koom kogond zu-soben-dãmba fãa ne neb nins fãa sẽn be koom kogondã pʋsã, la koom kogondã pʋg tʋmtʋmdbã ne neb nins fãa sẽn tolemd ne koom kogondã dag n yasa yɩɩga,

18la b sẽn yã bugmã sẽn dɩt tẽngã bug-zõosã, b kelmame n yeele: Tẽn-bʋg n dag n wẽnd tẽn-kãsengã?

19Bãmb da yugda b zut tom, n yãbda n maand sũ-sãoong wa kũum n ki, la b kelemdẽ n yetẽ: Kato! Kato! Tẽn-kãseng ning sẽn dag n tar paoong wʋsg tɩ neb nins fãa sẽn tar koom kogond ko-kãsengã zugã tũnug be n lebg arzegs rãmbã, wakat a yen pʋgẽ bala, a lebga rasempʋɩɩga.

20Arzãna, maan sũ-noog ne bũmb ning sẽn paam-a wã. Yãmb me sẽn welg toor Wẽnnaam yĩnga, la tẽn-tʋmdba la Wẽnnaam no-rɛɛsdbã, maan-y sũ-noogo. Bala Wẽnnaam sẽn kao tẽngã bʋʋdã, b roka yãmb sũuri.

21Dẽ, malɛk sẽn tar pãng tebga kugr sẽn wẽnd neer sẽn ya bedr n lob-a ko-kãsengã pʋgẽ n yeele: B na n tusa Babilon sẽn ya tẽn-kãsengã a woto ne pãng n lubi, la ned kõn leb n yãnd-a yɛs ye.

22La ned kõn leb n wʋm pend-wẽedba, la yʋʋmba, la wɩɩs ne bar-pɛɛbdbã rãamd fo pʋgẽ ye. Ned kõn leb n yã nug-tʋʋmd buud baa a yen soab beene ye, la ned kõn leb n wʋm neer rãamd beene ye.

23Fɩtl vẽenem kõn leb n yãg be ye, la ned kõn le wʋm pʋg-paal sɩd ne a pʋg-paalã koees beene yɛs ye. Bala, fo toandbã dag n yaa dũni nin-kãsemse, fo belga soolem dãmba fãa ne f bagrã.

24La b yãa Wẽnnaam no-rɛɛsdbã ne nin-sõamyã, la neb nins fãa b sẽn kood dũniyã zugã zɩɩm fo pʋgẽ.

← Chapter 17 Jump to: Chapter 19 →