Revelation 21

Mossi Moore (KÃAB-PAALGÃ KOE-NOOGO)

← Chapter 20 Jump to: Chapter 22 →

1Mam yãa yĩngr paalga la dũni paalga, bala, dẽenem yĩngrã ne dẽenem tẽngã loogame, la ko-kãsengã ka leb n be yɛs ye.

2La mam yãa tẽn-sõngã, Zeruzalɛm paalgã sẽn yi Wẽnnaam nengẽ n sigda, la a wẽnda wa pag sẽn nags a meng a sɩd yĩnga.

3Mam wʋma koe-kãseng sẽn yi geerẽ wã n yeele: Ad Wẽnnaam yirã bee ninsaalb sʋka. Wẽnnaam na n zĩnda ne nebã. Bãmb na n yɩɩ Wẽnnaam neba, la Wẽnnaam mengã na n paa ne bãmba.

4Wẽnnaam na n yẽesa nintãm fãa sẽn be b ninẽ wã. Kũum kõn le zĩnd ye, la sũ-sãoong wall yãbre, wall toog kõn leb n zĩnd ye, bala, dẽenem bũmba fãa loogame.

5Ned ning sẽn zao geerã yeelame yaa: Ade, mam maanda bũmba fãa paalse. La b yeel yaa: Gʋlse, bala, gom-kãensã yaa vẽenega la b yaa sɩda.

6Bãmb yeela maam yaa: Maaname! Maam la Alfa la Omega, Sɩngre la Sɛɛbo. Mam na n kõo ned ning ko-yũud sẽn tarã vɩɩm ko-bundmã zaalem.

7Ned ning sẽn na n tõogã pʋɩɩr na n yɩɩ a woto: Mam na n yɩɩ Wẽnnaam, la yẽ na n yɩɩ mam biiga.

8La sã n ya ne rabeembã, la ka-tẽeb rãmbã, la tʋʋm-dẽgd maandbã, la nin-kʋʋdba, la nin-yoaadbã, la tɩ-maandbã, la wẽn-naands pʋʋsdbã, la zĩri yagdbã fãa, bãmb pʋɩɩr na n yɩɩ tɩ kẽ bugum mogrẽ wã, zĩig ning kidbr sẽn dɩtã. Rẽ yaa kũum a yiib soabã.

9Dẽ poore, malegs a yopoe wã sẽn da zãad laas a yopoe sẽn pid ne yaoolem tood a yopoe wã ned a yembr waa n goma ne maam n yeel yaa: Wa tɩ m na n wilg-f la pʋg-paalã, pe-bilã pagã.

10Malɛkã rɩka maam m yamẽ n kẽng tãn-kãseng sẽn ya luglg zugu. La a wilga maam tẽn-sõngã sẽn ya Zeruzalɛmã sẽn yi yĩngri, Wẽnnaam nengẽ n sigdã.

11Tẽngã da tara Wẽnnaam zĩirã. Yẽ rasãndã dag n wẽnda wa kugr sẽn be yõod wʋsg neerlem, wa kugr sẽn boond tɩ zaspe n tõnd wa vɛɛre.

12A rag n tara lal-kãseng sẽn ya zãondgo. A rag n tara zag-noey piig la a yiibu, tɩ malegs piig la yiib be zag-noeyẽ wã. Yʋy n da gʋls b zutu: Yaa Israyɛl buud piig la a yiibã yʋya.

13Zag-noey a tãab n be yaanga, t'a tãab be rɩtgo, t'a tãab be goabga, t'a tãab be nin-taoore.

14Tẽngã lalg mee yẽbgr piig la a yiib zugu, la b gʋlsa pe-bilã tẽn-tʋmdb piig la yiibã yʋy yẽbg-kãens zutu.

15Malɛk ning sẽn dag n gom-a ne maama dag n tara makdg sẽn ya sãnem dasaare, n na n mag tẽngã ne a zag-noeyã la a lalgã.

16Tẽngã ra yaa maoko, t'a woglmã ne a yalmã zem taaba. Malɛkã maga tẽngã ne sãnem dasaarã: Yaa kɩlo tus a yi. A woglmã ne a yalmã la a zãntlemã rag n zema taaba.

17Yẽ maka lalgã: A yaa kãntɩɩs koabg la pis-naas la a naase, ninsaal kãntɩɩga, sẽn ya a yembr ne malɛkã kãntɩɩga.

18Lalga mee ne kugr sẽn boond tɩ zaspe, la tẽngã yaa sãnem halaal sẽn wẽnd wa vɛɛr halaale.

19Tẽngã lalgã yẽbgrã rag n nagsa ne kug buud fãa sẽn be yõodo. Pipi yẽbgrã yɩɩ ne zaspe, la yiib-n-soabã yɩɩ ne kugr sẽn boond tɩ safɩɩre, la tãab-n-soabã yɩɩ ne kugr sẽn boond tɩ kalsedoan, la naas-n-soabã yɩɩ ne kugr sẽn boond tɩ emeroode,

20la a nu soabã yɩɩ ne kugr sẽn boond tɩ sadonigsi, la a yoob soabã yɩɩ ne kugr sẽn boond tɩ sardoan, la a yopoe soabã yɩɩ ne kugr sẽn boond tɩ kirzolit, la a nii soabã yɩɩ ne kugr sẽn boond tɩ beril, la a wɛ soabã yɩɩ ne kugr sẽn boond tɩ topaaze, la piig soabã yɩɩ ne kugr sẽn boond tɩ kirzopraaze, la piig la a yen soabã yɩɩ ne kugr sẽn boond tɩ hiyasẽnte, la piig la a yiib soabã yɩɩ ne kugr sẽn boond tɩ ametist.

21Zag-noeyã piig la yiibã yɩɩ ne kugr sẽn boond tɩ pɛrle. Zag-noor fãa yaa kug-yende. Tẽngã soay yaa sãnem halaale, n tõnd wa vɛɛre.

22Mam ka yã wẽnd-doog tẽngã pʋg ye, bala, Zu-soab a Wẽnnaam sẽn Tõeya fãa wã la pe-bilã me yaa tẽngã wẽnd-doogo.

23Tẽngã ka baood tɩ wĩntoog bɩ kiuug yãg beene ye, bala, Wẽnnaam ziirã kõt-a-la vẽenem, la pe-bilã yaa a fɩtla.

24Soolem dãmbã na n kẽna bãmb vẽenemẽ wã, la dũni rĩm-dãmbã na n waa ne b zĩirã beene.

25Tẽngã zag-noey kõn pag wĩndg ye, yʋng ka na n zĩnd beene ye.

26B na n talla soolem dãmba ziirã la b waoogrã n wa beene.

27Bũmb sẽn ya rẽgdo, wall ned ning sẽn maan wẽnga wall a yagd zĩrẽ kõn kẽ be ye. Yaa neb nins yʋy sẽn gʋls pe-bilã vɩɩm sebrẽ wã bal n na n kẽ.

← Chapter 20 Jump to: Chapter 22 →