Revelation 14

Mossi Moore (KÃAB-PAALGÃ KOE-NOOGO)

← Chapter 13 Jump to: Chapter 15 →

1Mam gesame, la m yãa pe-bilã sẽn yik n yas Siyõ tãngã zugu, tɩ neb tus koabg la tus pis-naas la a naas sẽn da tar pe-bilã yʋʋr ne b ba wã yʋʋr sẽn gʋls b rĩyẽ wã be ne bãmba.

2Mam wʋma koɛɛg sẽn yi arzãna, n wẽnd wa ko-kãsems koɛɛga, wa sa-kɛleng kãseng bʋrgo, la rãamd ninga mam sẽn wʋma ra wẽnda wa pend-wẽebd sẽn wẽed b pendse.

3B yɩɩnda yɩɩn-paalg geerã taoore, la bõn-vɩɩs a naasã ne kãsem-dãmbã taoore. Ned ba a yen ra ka tõe n zãms yɩɩllã ye, sã n ka neb 144.000 sẽn dag n paam fãagr dũni zugã.

4Yaa neb nins sẽn ka rẽgem b mens ne pagbã, bala b ka sãam ye. Bãmb na n pʋgda pe-bilã n dabd zĩig ninga fãa b sẽn dabda. B raa bãmb n yiis neba sʋka, tɩ b yɩ wa dẽenem biis Wẽnnaam ne pe-bilã yĩnga,

5la zĩrĩ ka tol n zĩnd b noeyẽ ye. Rõadg ka be b zut ye.

6Mam yãa malɛk a to sẽn yɩgd n pɩʋʋgd yĩngri: A dag n tara koe-noog sẽn paad wakat sẽn kõn sa, n na n togs neb nins sẽn be tẽng zugã, soolem fãa, buud fãa, goam buud fãa neba, la tẽng fãa neba.

7Yẽ, zẽka a koɛɛg n yetẽ yaa: Zoe-y Wẽnnaam dabeem la y waoog bãmba. Bala wakat taame tɩ bãmb na n kao bʋʋdo. Wõgemd-y soab ning sẽn naan-a yĩngr la tẽngã, ko-kãseng ne ko-bundsã taoore.

8Malɛk a to sẽn ya yiib-n-soab pʋglame n yetẽ yaa: A lʋɩɩme! A lʋɩɩme! Babilon kãsengã sẽn kɩt tɩ soolem dãmba fãa yũ yẽ yoobã sẽn ka koakã divẽ wã lʋɩɩme.

9Malɛk a to sẽn ya tãab-n-soab pʋgla bãmb ne koe-kãseng n yeele: Ned sã n wõgemd rũngã ne a bõn-naandgã taoore, la a sã n deeg bãndã a dĩirẽ wall a nug zugu,

10yẽ soab me na n yũu Wẽnnaam sũ-puugrã divẽ sẽn ka pulli tɩ b kiig bãmb sũ-puugr laagẽ wã. La yẽ na n paama namsg bugmẽ la kidbr pʋga, maleg-sõamy wã ne pe-bilã taoore.

11Bãmb namsgã bug-zõos zẽkda zamaan o zamaane. La wĩndg ne yʋngo, neb nins sẽn wõgemded rũngã ne a bõn-naandgã taoorã, la ned ning sẽn deeg-a yẽ yʋʋrã bãndã ka tol n tar vʋʋsem ye.

12Woto yĩnga, nin-sõamy wã tog n nanga pãnga, n sakd Wẽnnaam tõodã la b tall tẽeb ne a Zezi.

13Mam wʋma koɛɛg sẽn yi arzãn n yetẽ: Gʋlse: sẽn sɩng ne moasã, bark bee kũum nins sẽn kiid Zu-soaba tũudum pʋgẽ wã zutu. Sɩɩg-sõng yetame tɩ n-ye, tɩ b tõe n bas b tʋʋmã n vʋʋse, bala bãmb tʋʋmã pʋgd-b lame.

14Mam gesame la m yãa sawad-pɛɛlga, la ned sẽn wẽnd wa ninsaal n dag n zao sawadgã zugu. A rag n fõgena a zug sãnem maanfo, la a zãad goeoog sẽn dɩt a nugẽ.

15Malɛk a to yii wẽnd-doogẽ wã n zẽk a koɛɛg n gom ne sẽn zao-a sawadgã ne pãng n yeel yaa: Yulumd f goeoogã n wʋre. Wʋrb wakat taame, bala, bõn-koaadlã sẽn be tẽng zugã bɩɩme.

16La sẽn zao-a sawadgã zugã yulumda a goeoogã tẽngã zugu, la b tigsa tẽng zug bõn-koaadlã.

17Malɛk a to yii wẽnd-doogã sẽn be arzãnã pʋgẽ. Yẽ me rag n tara goeoog sẽn dɩte.

18Malɛk a to sẽn dag n tar pãn-tõog ne bugum yii tẽn-kugrẽ wã, n zẽk a koɛɛg n yeel malɛk ning sẽn zãad goeoog sẽn dɩtã yaa: Yulumd f goeoogã sẽn dɩtã, n yãgs nasaar-sibã sẽn be tẽng zugã gĩna, bala, a sibã bɩɩme.

19Malɛkã yulumda a goeoogã tẽngã zugu. A yãgsa nasaar-sibã sẽn be tẽng zugã biisi n lob-b divẽ wẽkr kogl kãsengã sẽn ya Wẽnnaam sũ-puugr zĩigẽ wã pʋga.

20La b taba koglgã pʋgẽ tẽngã kɛɛnga, la zɩɩm yii koglgẽ wã n zoe. A zulmã tata wiid salba, la a zoeeme n ta kɩlo kobs-tã.

← Chapter 13 Jump to: Chapter 15 →