Revelation 22

Mossi Moore (KÃAB-PAALGÃ KOE-NOOGO)

← Chapter 21 Jump to:

1Malɛkã wilga maam vɩɩm koomã kʋɩlga, kʋɩlg sẽn pɩnd wa vɛɛre, la a yita Wẽnnaam ne pe-bilã geerẽ wã.

2Vɩɩm tɩɩgã be tẽngã sʋka la kʋɩlgã kɩrems a yiibẽ wã. A womda naoor piig la a yiibu, a womda a biisã kiuug fãa. Tɩɩgã vãad tar n maagda soolem toay-toayã neb bãase.

3Wẽnnaam sẽn kãab bũmb wẽng kõn leb n zĩnd be ye. Wẽnnaam ne pe-bilã geer na n zĩnda tẽngã pʋga. Bãmb tʋmtʋmdbã na n waooga bãmba,

4b na n yãa Wẽnnaam nenga, la Wẽnnaam yʋʋrã na n zĩnda bãmb dĩyẽ.

5Yʋng kõn le zĩnd ye, la nebã kõn dat fɩtl vẽenem wall wĩntoog vẽenem ye, bala, Zu-soab a Wẽnnaam n na n yɩɩ bãmb vẽenem. La bãmb na n dɩɩ naam zamaan o zamaana.

6Malɛkã yeela maam yaa: Sãmbg ka be gom-kãens pʋgẽ ye, la b yaa sɩda. Zu-soabã sẽn ya no-rɛɛsdbã sɩɩs Wẽnnaamã tʋma b malɛk t'a wilg bãmb tʋmtʋmdbã bũmb nins sẽn tog n zĩnd bilf sã n paase.

7La a Zezi yeelame: Gese, bilf sã n paas bala mam na n waame. Bark bee ned ning sẽn sakd seb-kãngã bãngr goamã zugu.

8Yaa maam a Zã n wʋm bõn-kãense la m yã-ba. La mam sẽn wʋm bõn-kãens la m yã-bã, mam wõgemda malɛk ning sẽn da wilgd-b maamã taoor n na n waoog-a.

9La a yeela maam yaa: Ra saag n maan a woto ye! Mam yaa fo tʋmd-n-taaga, la Wẽnnaam no-rɛɛsdbã sẽn ya fo ba-biisã tʋmd-n-taaga, la neb nins sẽn sakd seb-kãngã goamã tʋmd-n-taaga. Waoog Wẽnnaam!

10Dẽ poore malɛkã yeela maam yaa: Da solg seb-kãngã pĩnd-n-bãngr goamã ye! Bala, b pidsgã wakat kolgame.

11Bɩ ned ning sẽn ya ka-tɩrlem soab kell n paas a ka-tɩrlemã, tɩ ned ning sẽn ya tʋʋm dẽgd soab kell n dẽgem a meng n paase, tɩ ned ning sẽn ya tɩrg kell n maan tɩrlem n paase, tɩ ned ning sẽn ya yolgemd kell n yɩ yolgemd n paase!

12A Zezi yeelame: Gese, bilf bal sã n paase, mam na n waame, la mam zãada keoor n watẽ n na n keo ned kam fãa wa sẽn zems a tʋʋmde.

13Maam la Alfa la Omega, dẽenem la yaoolem, Sɩngre la Sɛɛbo.

14Bark bee neb nins sẽn pegsd b futu, sẽn na n yɩl la b paam noor tɩ rɩ vɩɩm tɩɩgã biisi la b tũ tẽngã noey n kẽ tẽngã pʋgẽ wã zutu.

15Tʋʋm dẽgd maandbã, ninsaan-baasã, tɩ-rɩtbã, nin-yoaadbã, nin-kʋʋdbã, wẽnd-naands pʋʋsdbã, la ned ning fãa sẽn nong zĩrĩ la sẽn yagd zĩri paada yɩng n ka kẽ tẽngã pʋgẽ ye.

16Maam a Zezi n tʋm m malɛk t'a wa n kis yãmb bõn-kãens kaset wẽnd-dotã pʋse. Mam yaa a Daviid tɩ-tobeng la a yagenga, la yibeoog ãd-yãgdga.

17Sɩɩg-sõng ne pʋg-paalã yetame yaa: Wa-y yã! Bɩ ned ning sẽn wʋmd-a yeel tɩ: Wa-y-yã! Bɩ ko-yũud sẽn tar a soab wa, la sẽn dat-a bɩ a reeg vɩɩm koom zaalem!

18Mam yeta ned ning fãa sẽn wʋmd seb-kãnga bãngr goamã tɩ ned sã n paas bũmb be, Wẽnnaam na n paasa tood nins b sẽn bils seb-kãngã pʋgẽ wã yẽ sɩbgrã zugu.

19La ned sã n boog bãngr gom-kãensã sebrã goama, Wẽnnaam na n deega pʋɩɩr ning yẽ sẽn da na n paam ne vɩɩm tɩɩgã la tẽn-sõngã b sẽn bils seb-kãngã pʋgẽ wã n bas-a.

20Ned ning sẽn kɩt-a bõn-kãensã kasetã yetame yaa: N-ye, bilf bal sã n paase mam na n waame. Ãmina! Zu-soab a Zezi, wa-y-yã!

21Bɩ Zu-soab a Zezi barkã zĩnd ne yãmb fãa.

← Chapter 21 Jump to: