Luke 1 — Marwari Bible

1लाडला भाई थियुफिलुस, घणा लोग उण बातां रौ इतिहास लिखणै री कोसीस करी, जिकौ कीं बातां अपांरै बीच में होई।

2ऐ बातां वे लोग अपांरै खनै पोंचाई जिकौ सरूआत ऊं इण बातां नै आंख्यां रै सांम्ही होते देखी अर वे परमेसर रै वचन रा सेवक हा।

3इण वास्तै, हे महोदय थियुफिलुस, म्हनै भी ओ चौखौ लाग्यो के, म्हैं उण सगळी बातां रौ पूरौ हाल, सरूआत ऊं, सावचेती रै साथै, जांच नै थारै वास्तै लेण ऊं लिखूं।

4जिण ऊं थूं ओ जांण ले के, ऐ बातां जिकौ थैं सीखी है, कैड़ी पकी है।

5यहूदिया देस रै राजा हेरोदेस री वेळा अबिय्याह रै लोगां मे जकरयाह नाम रौ एक याजक हो, अर उणरी लुगाई भी हारून वंस री ही। उणरौ नाम इलीसिबा हो।

6वे दोनूं परमेसर रै सांम्ही धरमी हा, अर परभु री सगळी आग्याओं अर विधियों माथै निरदोस चालनवाळा हा।

7उणौरै कोई टाबर कोनीं हा, क्यूंकै इलीसिबा बांझड़ी ही, अर वे दोनूं बूढ़ा हा।

8जद जकरयाह रै समाज रै मिंदर मे याजक रै कांम री बारी ही, अर वो परमेसर रै सांम्ही उपासना रै लियै तैयार हो।

9तो याजकौ री रीत रै अनुसार उणरै नाम री चिठ्ठी निकळी की, परभु रै मिंदर में जायनै धूप करै।

10धूप करणै री वगत लोगां री सगळी मंडली बारै पराथना कर री ही।

11उण वगत परभु रौ एक सरगदूत धूप री वेदी रै जीमणी तरफ ऊभौ जकरयाह नै देठाळौ दियौ।

12जकरयाह ओ देखनै घबरा गियो अर उण माथै डर छायगो।

13पण सरगदूत उणनै कयौ, “हे जकरयाह, डर मत। क्यूंकै परमेसर थारी पराथना सुण ली है। अर थारी लुगाई इलीसिबा ऊं थारै खातर एक बेटौ होवैला, अर थूं उणरौ नाम यूहन्‍ना राखजै।

14थनै आंणंद अर खुसी होवैला। अर घणा लोग उणरै जनम रै खातर खुस होवैला।

15क्यूंकै वो परभु री निजर में महान होवैला। अर दाखरस अर नसे री चीजों पीवणी मना है। अर आपरी मां रा गरभ ऊं इज पवितर आतमा ऊं भरयोड़ौ होवैला।

16अर इजरायल रै घणै लोगां नै उणरै परभु परमेसर री तरफ फेरैला।

17वो एलियाह री आतमा अर सामरथ मे होयनै परभु रै आगै आगै चालै ला। वो पिताओ रौ मन उणरी औळादों री तरफ पाछौ फेर दैला। अर वो आग्या नीं मांनणैवाळौ नै धरमियो री समझ माथै लावै ला, अर परभु रै लिए लायक परजा तैयार करैला।”

18जकरयाह सरगदूत ऊं पूछयौ, “ओ म्हैं कीकर जांणूं? क्यूंकै म्हैं तो बूढ़ो हूं। अर म्हारी लुगाई भी बूढ़ी होयगीं है।”

19सरगदूत उणनै जबाब दियौ, “म्हैं जिबराईल हूं, जिकौ परमेसर रै सांम्ही ऊभौ रैवूं हूं। अर म्हैं थारै ऊं बातां करणै अर थांनै ओ सुभ संदेस सुणाणै खातर भेज्यौ गियौ हूं।

20अर देख जिण दिन तांई ऐ बातां पूरी नीं हो जावै, उण दिन तांई थूं गूंगो रैला, अर बोल नीं पावैला, इण वास्तै की थूं म्हारी बातां जिकौ अपणै वगत माथै पूरी होवैला, विसवास कोनीं कियो।”

21अर लोग जकरयाह री बाट जोता हा अर अचूम्बो कर रिया हा की वो मिंदर मांय इती जेज क्यूं लगा रियौ है।

22जद वो बारै आयौ, तो उणौ ऊं बोल नीं सकयौ। तो वे जांण गिया, की उणै मिंदर मांय कोई दरसण होया है। अर वो उणौ ऊं इसारा करतौ रियौ, अर गूंगो इज रैह गियो।

23जद उणरै सेवा रा दिन पूरा हो गिया, तो वो घरै जातौ रियौ।

24इण दिनां रै पछै उणरी लुगाई इलीसिबा जापायती होई। अर पांच महीनै तांई अपणै आपनै लूकाय राखी,

25अर उणै कयौ, “मिनखौ में म्हारी बेजती आगी करणै रै खातर परभु नै इण दिनां मांय म्हारै माथै करपा करी है।”

26छठै महीनै मांय परमेसर री तरफ ऊं जिबराईल सरगदूत गलील रै नासरत नगरी मांय एक कुंवारी रै खनै भेज्यौ गियौ हो,

27जिणरी सगाई दाऊद रै घराणै रै यूसुफ नाम रै मिनख रै साथै होयोड़ी ही। उण कुंवारी रौ नाम मरियम हो।

28अर सरगदूत उणरै खनै आयनै कयौ, “थांनै नमस्कार, थारै माथै परमेसर री करपा होई है, परभु थारै साथै है।”

29आ बात सुणतै ही मरियम घणी घबराई, अर सौचणै लागी के, “ओ कीण तरैह रौ नमस्कार है?”

30तो सरगदूत उण ऊं कयौ, “हे मरियम, डर मत! क्यूंकै परमेसर री करपा थारै माथै होई है।

31सुण, थूं जापायती होवैला, अर थारै एक बेटौ पैदा होवैला। थूं उणरौ नाम यीसु राखजै।

32वो महान होवैला। अर परम परधान परमेसर रौ बेटौ कैलावैला। अर परभु परमेसर उणरै वडेरा दाऊद रौ सिंहासण उणनै दैला।

33अर वो याकूब रै वंस माथै हमेसां राज करैला, अर उणरै राज रौ कदैई अंत नीं होवैला।”

34मरियम सरगदूत नै कयौ, “ओ कीकर होवैला? म्हैं तो अजी तांई कुंवारी हूं।”

35सरगदूत उणनै जबाब दियौ, “की पवितर आतमा थारै माथै उतरैला, अर परम परधान री सामरथ थारै माथै छाया करैला। इण वास्तै जिकौ पैदा हौणवाळौ है, वो परमेसर रौ बेटौ कैलावैला।

36अर सुण, थारी रिसतेदार इलीसिबा रै भी बुढ़ापे में बेटौ हौण वाळौ है, ओ उणरौ, छठौ महीनो है जिणनै सगळा बांझड़ी कैवता हा।

37क्यूंकै परमेसर रै लिए कीं भी असंभव कोनीं है।”

38मरियम कयौ, “म्हैं परभु री दासी हूं। म्हनै थारै वचन रै अनुसार होवै।” तद सरगदूत उणरै खनै ऊं जातौ रियौ।

39उण दिनां मांय मरियम उठै ऊं हाथोहाथ इज भाखरो रै देस में यहूदिया रै एक नगरी मांय गी।

40अर जकरयाह रै घर मांय जायनै इलीसिबा नै नमस्कार करिया।

41ज्यौ ही इलीसिबा मरियम रौ नमस्कार सुण्यौ, त्यौं ही उणरै पेट मांय टाबर उछळियौ, अर इलीसिबा पवितर आतमा ऊं भरगी।

42वां जोर ऊं कयौ, “थूं सगळी लुगाईयां में सबां ऊं धन्य है अर थारै पेट मे जिकौ टाबर है वो भी धन्य है।

43आ करपा म्हारै माथै कीकर होई के, परभु री मां म्हारै खनै आई है?

44देख, ज्यूं ही थारा नमस्कार रौ सबद म्हारै कांनो में पड़िया, व्यौंही म्हारै पेट में टाबर आंणंद ऊं उछलनै लाग्यौ।

45धन्य है थूं जिकौ ओ विसवास करयौ के, जिकौ बातां परभु री तरफ ऊं उणनै कही ही वो पूरी होयगीं।”

46तद मरियम कयौ, “म्हारौ प्रांण परभु री बड़ाई करै है।

47अर म्हारी आतमा म्हारौ उद्धार करणवाळा परमेसर ऊं आणन्दित है।

48क्यूंकै वे म्हारै माथै करपा करी है, जिकौ उणौरी दासी हूं, इण वास्तै देखौ, अबै ऊं सब जुग जुग रा लोग म्हनै धन्य कैवैला।

49क्यूंकै ताकतवर परमेसर म्हारै खातर मोटा मोटा कांम करिया है। अर उणरौ नाम पवितर है।

50अर उणरी दया उण माथै, जिकौ उण ऊं डरै है, पीढ़ी ऊं पीढ़ी बणी रैवै है।

51वे आपरी ताकत दिखाई है, अर जिकौ अपणै आप नै मोटा समझता हा, उणौनै तितर-बितर कर दिया।

52वे राजा महाराजा नै सिंहासण ऊं पटक दिया है अर दीन दुखियों नै ऊंचा उठाया है।

53वे भूखो नै चौखी चीजों ऊं धपाया, अर धनवानो नै खाली हाथ कर दिया।

54परमेसर नै वे बातां याद री, जिकौ वे अपांरै वडेरा अबराहम अर उणरै पीढ़ी ऊं करी ही, ‘म्हैं आपरी दया अबराहम अर उणरै वंस माथै हमेसां करूंला।’ इण वास्तै वे आपरा सेवक इजरायल नै संभाळ लियौ है।”

56मरियम लगोलग तीन महीना इलीसिबा रै साथै रैयनै आपरै घर पाछी गी।

57तद इलीसिबा रै जापा रौ वगत पूरौ होयौ तो वां एक बेटे नै जनम दियौ।

58उणरा पड़ोसी अर रिसतेदार ओ सुणनै के, परभु उण माथै मोटी दया करी है तो, वे भी उणरै साथै राजी होया।

59अर ऐड़ौ होया की आठवे दिन वे टाबर रौ खतनो करणै आया अर उणरौ नाम उणरै पिता रै नाम माथै जकरयाह राखण लाग्या।

60पण इलीसिबा बोली, “नीं, बल्कि इणरौ नाम यूहन्‍ना राखौ।”

61अर उठै जिकौ लोग हा वे कयौ, “थारा रिसतेदारो मांय कोई भी इण नाम रौ कोनीं है।”

62तो वे आपरै पिता ऊं इसारो करनै पूछयौ, “थूं इणरौ नाम कांई राखणौ चावै है?”

63तो जकरयाह लिखणै वास्तै पाटी मांगी अर लिख्यौ, “इणरौ नाम यूहन्‍ना है।” तो सगळौ नै अचूम्बो होयौ।

64उणीज वैळा तुरत जकरयाह री जीभ खुलगी अर वो पाछौ बोलण लागौ अर परमेसर री बड़ाई करणै लागौ।

65अर जठै आ बात फैलगी, उठै आजू बाजू रैवण वाळा में डर छायगो अर ऐ चरचा यहूदिया रै सगळै भाखर वाळा देस में फैलगी।

66आ बात सुणणै वाळौ इणरै बारै मे मन मे विचार करण लागा के, “ओ टाबर कैड़ौ होवैला?” क्यूंकै परभु रौ हाथ उणरै माथै हो।

67यूहन्‍ना रा पिता जकरयाह पवितर आतमा ऊं भरिजगा, अर भविसयवांणी करणै लाग्या।

68“इजरायल रा परभु परमेसर री जय हो, वे आपरा लोगां माथै दिस्टी करी अर उणौ रौ छुटकारो करयौ।

69आपरै सेवक दाऊद रै वंस मे अपांरै खातर एक ताकतवर उद्धार करणै वाळै नै भेज्यौ है।

70ज्यूं उणै आपरै पवितर भविसयदाताओ रै दवारा जिकौ जगत रै सरूआत ऊं होता आया है, कयौ हो।

71अरथावूं म्हौरै दुसमनो ऊं, अर म्हौरै सगळै बैरियो रै हाथ ऊं म्हांरौ उद्धार कियो है।

72की म्हौरै वडेरा माथै दया करनै अपणी पवितर वाचा नै याद करै।

73अर वो सौगन जिकौ उणै म्हौरै पिता अबराहम ऊं खाई ही।

74वो म्हौ नै दुसमनो रै हाथ ऊं छुड़ावैला, ताकी अपां बिना डर ऊं,

75पूरी जिन्दगी पवितरता अर धरम रै साथै परमेसर रै सांम्ही सेवा कर सकौ।

76अर हे टाबर थूं परम परधान रौ भविसयदाता कैलावैला, क्यूंकै थूं परभु रै आगै आगै चालै ला अर उणरौ मारग तैयार करैला।

77परमेसर रा लोगां नै उद्धार रौ ग्यांन दे, जिकौ उणौरै पापों री माफी ऊं मिळैला।

78ओ म्हौरै परमेसर री उण मोटी करपा ऊं होवैला। जिणरै खातर ऊपर ऊं अपां माथै सवार रौ उजाळौ उगैला।

79की अंधारै अर मौत री छाया में बैठण वाळै नै उजाळौ दे, अर म्हौरै पगां नै खुसी रै मारग मे सीधा चलाए।”

80अर वो टाबर मोटो अर आतमा में मजबुत होवतो गियो, अर इजरायल रा लोगां रै सांम्ही आवणा ऊं पैला तांई रिंदरोही में रियौ।