Luke 11

Marwari Bible

1यीसु किणी जगा पराथना कर रियौ हो। अर जद वो पराथना कर चुकौ, तो उणरै चेलौ मे ऊं एक नै उण ऊं कयौ, “हे परभु, ज्यौ यूहन्‍ना आपरै चेलौ नै पराथना करणी सिखाई व्यौंही म्हौ नै भी थूं सिखा दे।”

2यीसु उणनै कयौ, “जद थै पराथना करौ, तो कैवौ, ‘हे पिता, थारौ नाम पवितर मान्यौ जावै, थारौ राज आवै।

3म्हांरी दिन भर री रोटी हर दिन दिया कर।

4म्हौरै गुनाह माफ कर, क्यूंकै म्हौ भी अपणै हरैक अपराधी नै माफ करौ हो, अर म्हौ नै कठिन परीकसा मे मती पड़नै दे।’ ”

5अर यीसु उणौनै कयौ, “मांनौ, थौरे मे ऊं किणी रौ एक दोसत है, अर थै आधी रात रा उणरै खनै जायनै कैवौ, ‘हे दोसत म्हनै तीन रोटियो दे।

6क्यूंकै म्हारौ एक दोसत अबार यात्रा ऊं म्हारै खनै आयौ है, अर म्हारै खनै उणरै सांमै परोसनै रै वास्तै कीं कोनीं है।’

7अर विचार करौ। उण दोसत नै मांय ऊं जबाब दियौ, ‘म्हनै तंग मत कर, दरवाजो बंद हो चुकौ है, अर म्हारै टाबर म्हारै खनै बिस्तर मे है, इण वास्तै म्हैं उठनै थनै दे नीं सकूं।’

8म्हैं थांनै बताऊं हूं, वो जे नीं उठैला अर थांनै कीं नीं दैला, बल्कि वो थौरो दोसत है, थौरे लगातार बिना सरम किए मांगता रैवण ऊं वो ऊभौ होवैला, अर थौरी जरुत हो उतौ उठनै दैला।

9“इण वास्तै म्हैं थौरे ऊं कैवूं हूं, की मांगो, तो थांनै दियौ जावैला। ढ़ूंढ़ो, तो थै पाओला। खटखटाओ, तो थौरे लियै खोलयो जावैला।

10क्यूंकै जिकौ कोई मांगे है, उणनै मिळै है। अर जिकौ ढ़ूंढ़े है, वो पावै है। अर जिकौ खटखटावे है, उणरै लियै खोलयो जावैला।

11“थौरे मे ऊं ऐड़ौ कुण पिता होवैला, की जद उणरौ बेटौ रोटी मांगे, तो उणनै भाठा दे? या मछली मांगे, तो मछली रै बदळै मे सांप दे?

12अर जे वो इंडा मांगे तो उणनै बिच्छू दे?

13जद थै भूंडा होयनै थौरे टाबरौ नै बड़िया चीजों देणी जांणौ हो, तो सरगिए पिता अपणै मांगणवाळौ नै पवितर आतमा क्यूं नीं दैला?”

14जद यीसु एक गूंगा बणाणवाळी दुस्ट आतमा नै निकाळ रियौ हो, ज्यौ ही दुस्ट आतमा बारै निकळी, तो वो गूंगो बोलण लागौ। भीड़ रा लोग इण ऊं घणौ अचूम्बो कियो।

15पण उणमे ऊं कईक लोगां कयौ, “ओ तो दुस्टआतमाओ रै सरदार री मदद ऊं दुस्टआतमाओ नै निकाळै है।”

16बल्कि दूजै लोगां उणनै परखणै रै वास्तै किणी सरगिए निसाणी री मांग किनी।

17पण यीसु, उणौरै मन री बातां नै जांणनै, उणौ ऊं कयौ, “जिण जिण राज मे फूट होवै है, वो राज उजड़ जावै है। अर जिण घर मे फूट होवै है, वो घर नास हो जावै है।

18जे सैतान अपणै ही विरोधी हो जाए, तो उणरौ राज कीकर बण्यौ रैला? क्यूंकै थै म्हारै बारै मे तो कैवौ हो, की म्हैं सैतान री मदद ऊं दुस्ट आतमाओ नै निकाळूं हूं।

19भला जे म्हैं बालजबूल री मदद ऊं दुस्ट आतमाओ नै निकाळूं हूं, तो थौरा चेला कीण री मदद ऊं निकाळै है? इण वास्तै वे इज थौरो न्याव चुकावैला।

20बल्कि जे म्हैं दुस्ट आतमाओ नै परमेसर री ताकत ऊं निकाळूं हूं, तो ओ साफ है की परमेसर रौ राज थौरे तांई आ पूगौ है।

21“जद एक ताकतवर मिनख पूरी तरैह सस्तर बांधनै आपरै घर री रकसा करै है तो उणरौ माल सुरकसित रैवै है।

22बल्कि जद कोई उण ऊं बढ़नै ताकतवर उण माथै हमलो करनै उणनै हरा दैवै है तो वो उणरै सगळै सस्तरो नै, जिण माथै उणनै विसवास हो, उण ऊं खो लेवे है अर लूट रै माल रौ वे आपस मे बांट लेवे है।

23“जिकौ म्हारै साथै नीं है, म्हारै विरोध मे है अर वो जिकौ म्हारै साथै भेळा कोनीं करै, बिखेरे है।

24“जद दुस्ट आतमा किणी मिनख मे ऊं बारै निकळ जावै है तो रिंदरोही मे आराम खोजती फिरै है, अर जद आराम नीं पावै तो कैवै है, ‘म्हैं अपणै उणीज घर मे पाछी जाऊं जठै ऊं म्हैं निकळी ही।’

25अर वो पाछी जायनै उण घर नै साफ सुथरो अर सजायोड़ो पावै है।

26तद वो आयनै अपणै ऊं और भूंडी सात आतमाओ नै अपणै साथै ले आवै है, अर वे उणमे घुसनै रैवास करनै लागै है। इण तरैह उण मिनख री पैली री हालत ऊं करते दूबारी हालत घणी खराब हो जावै है।”

27जद यीसु ऐ बातां कैह ही रियौ हो, तो भीड़ मे ऊं एक लुगाई उठी अर ऊंचै सबद मे कयौ, “वो गरभ धन्य है, जिणमे थूं रियौ, वो मां धन्य है, जिणै थनै दूध पिलायो।”

28इण खातर उणै कयौ, “हां, पण धन्य वो है जिकौ परमेसर रा वचन सुणै है अर उण माथै चालै है।”

29ज्यौ ज्यौ भीड़ बढ़ री ही, तो यीसु कयौ, “इण जुग रा लोग भूंडा है। ऐ कोई निसाणी देखणी चावै है। बल्कि इणौनै योना रै निसाणी रै सिवाय और कोई निसाणी नीं दी जावैला।

30ज्यौ योना नीनवे रै लोगां रै लियै निसाणी ठैरयो, व्यौंही मिनख रौ बेटौ भी इण जुग रै लोगां रै लियै निसाणी ठैरैला।

31दखण री राणी न्याव रै दिन इण जुग रै लोगां रै साथै उठनै, उणौनै दोसी ठैरावैला, क्यूंकै वो राजा सुलैमान रै ग्यांन सुणणै रै वास्तै धरती री आखरी तांई आई। अर देखौ एठै वो है जिकौ सुलैमान ऊं भी मोटो है।

32नीनवे रा लोग न्याव रै दिन इण जुग रै लोगां रै साथै ऊभा होयनै, उणौनै दोसी ठैरावैला। क्यूंकै उणौ योना रौ परचार सुणनै मन फिरायो। अर देखौ, एठै वो है, जिकौ योना ऊं भी मोटो है।

33“कोई मिनख दीयौ लगायनै उणनै लूकाय या किणी बरतन रै मांय कोनीं राखै, बल्कि वो उणनै भींत माथै राखै है, ताकी मांय आवणवाळै नै उजाळौ मिळै।

34थारै सरीर रौ दीयौ थारी आंख है, जद आंख भली है तो थारौ सरीर भी उजाळौ है। पण जद आंख भूंडी है, तो थारौ सरीर भी अंधारौ है।

35इण वास्तै सावचेत रैणौ, की जिकौ उजाळौ थौरे मे है, वो अंधारौ नीं हो जावै।

36इण वास्तै जे थारौ सगळौ सरीर उजाळौ हो, अर इणरौ कोई भी भाग मे अंधारौ नीं रैवै, तो सगळौ ऐड़ौ उजाळौ होवैला, ज्यौ उण वगत होवै है, जद दीयौ अपणी चमक ऊं थनै उजाळौ देतो हो।”

37जद यीसु बातां कर रियौ हो, तो किणी फरीसी नै उण ऊं अरज की, म्हारै एठै खाणौ खा। अर वो मांय जायनै खाणौ खाणै बैठग्या।

38बल्कि जद उण फरीसी नै ओ देख्यौ की खाणौ खाणै ऊं पैला उणै आपरा हाथ नीं धोया तो उणनै घणौ अचूम्बो होयौ।

39इण खातर परभु उण ऊं कयौ, “थै फरीसी थाळी अर कटोरी नै ऊपर ऊपर तो मांजो हो, पण थौरे मांय लालच अर दुस्टता भरी है।

40अर गैलौ लोगां, जिणै बारै रा भाग बणाया, कांई उणै मांय रा भाग कोनीं बणाया?

41पण हां, जिकौ कीं थारै खनै है, वो गरीबो नै दे दे। पछै थारै लियै सगळौ कीं पवितर हो जावैला।

42“हे फरीसियों, थांनै हाय, क्यूंकै थै अपणै पोदीनै अर सुदाब बुटी अर हरैक जड़ी बुटी रौ दसवो हिस्सो तो देवो हो, पण न्याव नै अर परमेसर रै परैम नै टाळ देवो हो। जरुरी हो की इणनै भी करता रैवता अर उणनै भी नीं छोड़ता।

43“हे फरीसियों, थांनै हाय, क्यूंकै थै यहूदी पराथना घरो मे खास आसन चावौ हो, अर बजारौ मे सौभा अर नमस्कार लेणो थांनै भावै है।

44“थांनै हाय, क्यूंकै थै उण छिपयोड़ी कबरौ रै ज्यूं हो, जिण माथै लोग चालै है, पण जांणै कोनीं की नीचे कबर है।”

45तद एक न्याव सास्तरी यीसु नै कयौ, “हे गुरु, जद थूं ऐड़ी बातां कैवै है तो म्हौरी बेजती करै है।”

46यीसु कयौ, “हे न्याव सास्तरियों, थांनै भी हाय, क्यूंकै थै लोगां माथै ऐड़ौ बोझ घालौ हो जिणनै उठाणौ मुसकिल है। अर थै खुद उण बोझ नै एक आंगळी तांई नीं लगाणी चावौ।

47“थांनै हाय, थै उण भविसयदाताओ री कबरौ बणाओ हो, जिणनै थौरे वडेरा मारया हा।

48इण ऊं थै ओ दिखाओ हो की थै थौरे वडेरा रै उण कांमां ऊं सहमत हो। क्यूंकै उणौ तो उणौनै मारया अर थै उणौरी कबर बणाई।

49इण वास्तै परमेसर री बुद्धि नै भी कयौ है, ‘म्हैं उणौरै खनै भविसयदाताओ अर प्रेरितों नै भेजूंला। अर वे उण मे ऊं कईको नै मार दैला अर कईको नै सतावैला।’

50ताकी जगत रै सरूआत ऊं जितरा भी भविसयदाताओ रौ लोई बहायौ गियो है, उणरौ हिसाब इण पीढ़ी रै लोगां ऊं लियौ जावैला।

51हाबिल री मौत ऊं लैयनै जकरयाह री मौत तांई जिकौ परमेसर रै मिंदर अर वेदी रै बीच मे घात किया हा। म्हैं थौरे ऊं साची कैवूं हूं, उणौरौ लेखौ इण वगत रै लोगां ऊं लियौ जावैला।

52“हे न्याव सास्तरियों, थांनै हाय, क्यूंकै थै ग्यांन री कुंजी ले तो ली है। पण उणमे नीं तो थै खुद परवेस कियो अर परवेस करनैवाळौ नै भी रोक दिया।”

53अर जद यीसु उठै ऊं चाल दियौ तो वे धरम सास्तरी अर फरीसी लोग उण ऊं घणी दुसमनी राखणै लागा। घणी बातां रै बारै मे वे उण ऊं उलटा सवाल करनै लागा।

54क्यूंकै वे उणनै उणरी किणी बात ऊं फसाणै री कोसीस मे लागयोड़ा हा।

← Chapter 10 Jump to: Chapter 12 →