Luke 6

Marwari Bible

1ऐड़ौ होयौ की यीसु अर उणरा चेला यहूदियो रै सब्त रै दिन खेतो मे ऊं जावता हा, उण वगत यीसु रा चेला चालता चालता गेहूंं रै बालों नै तोड़नै मसळ मसळ नै खावणै लागा।

2जद फरीसियों यीसु नै कयौ, “देख, थारा चेला ओ कांम क्यूं कर रिया है। जिकौ कांम आज अपांरै कायदे ऊं सब्त रै दिन नीं कर सकौ?”

3यीसु जबाब दियौ, “कांई थै ओ कदैई कोनीं पढ़यो की जद अपांरा वडेरा दाऊद अर उणरा साथियो नै भूख लागी तो दाऊद कांई करयौ?

4वो परमेसर रै मिंदर मे जायनै भेट री रोटियां खाई अर आपरा साथियो नै भी दी। जिणनै कायदे ऊं सिरफ याजक ही खा सकै।”

5वळै यीसु उणौनै कयौ, “म्हैं, मिनख रौ बेटौ, आराम रा दिन रौ भी धणी हूं।”

6अर ऐड़ौ होयौ एक वळै आराम रै दिन यीसु यहूदी पराथना घर मे जायनै उपदेस देवण लागौ। उठै एक ऐड़ौ मिनख हो जिणरौ जीमणौ हाथ सुखोड़ो हो।

7सास्तरी अर फरीसी ओ देखणै री ताक मे हा, की यीसु आराम रै दिन किणी नै सावळ करै है की कोनीं करै। ताकी वे यीसु माथै दोस लगानै रौ मौकौ पा सकै।

8पण यीसु उणौरै मन रा विचारो नै जांणता हा, इण वास्तै यीसु सुखे हाथ वाळै मिनख ऊं कयौ, “उठ अर सगळौ रै सांमै ऊभौ हो जा।” वो उठयौ अर ऊभौ हो गियो।

9यीसु सास्तरियों अर फरीसियों ऊं कयौ, “म्हैं थौरे ऊं पूछूं हूं की आराम रै दिन कायदे ऊं कांई करणौ चौखौ है? भलौ करणौ या बुरौ करणौ? जीव नै बचाणौ या नास करणौ?”

10अर यीसु नै च्यांरूमेर उण सगळौ री तरफ निजर दी अर पछै उण मिनख ऊं कयौ, “थारौ हाथ आगै कर।” उणै व्यौंही कियो अर उणरौ हाथ सावळ हो गियो।

11पण सास्तरी अर फरीसी आपे ऊं बारै होयनै आपस में विवाद करनै लागा की, “अपां इण यीसु रै साथै कांई करौ?”

12उण दिनां में ही यीसु भाखर माथै पराथना करनै निकळिया अर परमेसर ऊं पराथना करणै मे पूरी रात बिताई।

13जद दिन ऊगो, तो वे आपरा चेलौ नै बुलायनै उण मे ऊं बारैह चेलौ नै चुण लिया अर उणौनै प्रेरित कयौ।

14वे ऐ है समौन जिणरौ नाम यीसु पतरस राख्यौ अर उणरौ भाई अन्‍द्रियास अर याकूब अर यूहन्‍ना अर फिलिप्पुस अर बरतुल्मै,

15अर मती अर थोमा अर हलफाई रौ बेटौ याकूब अर समौन जिकौ जेलोतेस जाणिजतो हो।

16अर याकूब रौ बेटौ यहूदा अर यहूदा इस्‍करियोती, जिकौ यीसु नै विसवासघात करनै पकड़ायौ।

17जद यीसु उण बारैह चेलौ रै साथै भाखर ऊं उतर नै चौरस जगा में आयनै ऊभा होया, तो उणौनै सांमै उणौरै चेलौ री भीड़ अर पूरा यहूदिया अर यरुसलेम अर सूर अर सैदा रा समंदर रै किनारै घणा लोग आयनै भेळा होया।

18यीसु रा उपदेस सुणणै अर आपरी बिमारियों ऊं सावळ होणै यीसु खनै उठै आयोड़ा हा। वे लोग ओ सुण नै भी आया हा, की यीसु दुस्ट आतमाओ लागोड़े लोगां नै भी सावळ करै है।

19वे सगळा यीसु रै हाथ लगावणो चावता हा, क्यूंकै उणमे ऊं सामरथ निकळनै सगळौ नै सावळ करती ही।

20जद यीसु आपरै चेलौ रै सांमै देखनै कयौ, “धन्य हो थै, जिकौ दीन हो, क्यूंकै परमेसर रौ राज थौरो है।

21धन्य हो थै, जिकौ अबै भूखा हो, क्यूंकै थांनै धपावेला। धन्य हो थै, जिकौ अबै रोवो हो, क्यूंकै थै आंणंद करौला।

22धन्य हो थै, जद म्हैं, मिनख रा बेटा, नै मानणा रै खातर लोग थौरे ऊं बैर राखैला, अर थांनै समाज ऊं निकाळ दैला अर थौरी बेजती करैला अर थांनै गळत कैवैला।

23“उण दिन आंणंद रै साथै उछळजो, क्यूंकै देखौ, थौरे वास्तै सरग मे मोटो फळ है। याद राखौ उणौरै वडेरा भविसयदाताओ रै साथै ऐड़ौ ही कियो हो।

24पण हाय थौरे माथै, जिकौ धनवान हो, क्यूंकै थांनै पूरौ सुख चैन मिळ रियौ है।

25पण हाय थौरे माथै, जिकौ अबै धापोड़ा हो, क्यूंकै थै भूखा रैवौला। हाय थौरे माथै, जिकौ अबै आंणंद करौला, क्यूंकै थै सोग करौला अर रोवोला।

26हाय, थौरे माथै, जद सगळा मिनख अबै थांनै भला कैह, क्यूंकै उणौरा वडेरा झूठै भविसयदाताओ रै साथै भी ऐड़ौ ही किया करता हा।

27“पण म्हैं थांनै सुणणै वाळौ नै कैवूं हूं, की अपणै बैरियो ऊं भी परैम राखौ। जिकौ थौरे ऊं घिरणा करै है, उणौरौ भलौ करौ।

28जिकौ थांनै बुराई दे, उणौनै आसीस दो। जिकौ थौरे साथै चौखौ व्यवहार नीं करै, उणरै वास्तै पराथना करौ।

29जिकौ थौरे एक गाल माथै थप्पड़ मारै तो दूजोड़ौ गाल भी उणरै आगै कर दो। जे कोई थौरो कोट ले लेवे तो उणनै अपणौ कुड़तौ भी ले लेणे दो।

30जिकौ कोई थौरे ऊं मांगे, उणनै दो। अर जिकौ कोई थौरी चीज जबरदस्ती ले ले, तो उण ऊं पाछी मत मांगो।

31जैड़ौ थै चावौ हो की लोग थौरे साथै करै, वैड़ौ इज थै भी लोगां रै साथै करौ।

32“जे थै थौरे ऊं परैम राखणवाळौ ऊं परैम राखौ तो आ कोई मोटी बात कोनीं। क्यूंकै पापी भी अपणै परैम राखणवाळौ रै साथै परैम राखै है।

33जे थै थांरी भलाई करणैवाळै री भलाई करौ हो, तो इणमे कांई मोटी बात है? क्यूंकै पापी भी ऐड़ौ करै है।

34जे थै उणनै उधार दो, जिण ऊं थांनै भी पाछी मिलनै री आसा रै, तो इण में भी कांई मोटी बात है? क्यूंकै पापी पापियो नै भी उधार दैवै है, की उतौ ही पाछौ मिळै।

35अपणै बैरियो ऊं परैम करौ, भलाई करौ। अर पाछा नीं मिलणा री आस ऊं उधार दो। इण ऊं थांनै मोटो फळ मिळैला अर थै परमेसर री औळाद बणौला। क्यूंकै वे जिकौ उणौनै धन्यवाद दैवै उणौ माथै ही नीं पण भूंडै लोगां माथै भी दया करै है।

36जैड़ा थौरा परम पिता दयाळु है, वैड़ा ही थै भी दयाळु बणौ।

37“किणी माथै दोस मत लगाओ, तो थौरे माथै भी दोस नीं लगायो जावैला। किणी रौ न्याव मत करौ, तो थौरो भी न्याव नीं करैला। माफ करौ, तो थांनै भी माफी मिळैला।

38दूजौ नै देवोला, तो थांनै भी दियौ जावैला। इतौ ही नीं पण पूरा नाप ऊं दबा दबायनै अर हिला हिलायनै अर ढ़ूळतोड़ो थांनै दियौ जावैला। क्यूंकै जिण नाप ऊं थै नापो हो, उण नाप ऊं ही थौरे वास्तै नापेला।”

39पछै यीसु उणौनै एक दिस्टांत कयौ, “कांई आंधौ, आंधा नै मारग बता सकै? जे ऐ ऐड़ौ करै तो कांई दोनूं ही खाडा मे कोनीं पड़ैला?

40कोई भी चेलौ आपरै गुरु ऊं मोटो कोनीं, पण जिकौ कोई मिनख पूरी तरैह कुसल हो जावै, तो वो आपरै गुरु रै ज्यूं बण जावै है।

41“थूं थारै भाई री आंख मे तिणके नै क्यूं देखे है, जद खुद री आंख मे लकड़ी थनै कोनीं दिखे?

42जद थनै थारी मोटी गलतिया नीं दिखे, तो पछै थूं कीकर थारै भाई री नेनी गळती देख सकै। हे चालबाज, पैला खुद री मोटी गलतिया सुधार ले पछै थारै भाई री नेनी गलतिया नै सुधारनै मे मदद कर लेजे।

43“कोई भी चौखौ रुंखड़ौ ऐड़ौ कोनीं जिणरै खराब फळ लागै अर कोई खराब रुंखड़ौ कोनीं जिणरै चौखा फळ लागै।

44हर एक रुंखड़ौ आपरै फळ ऊं ओळखिजै, क्यूंकै लोग झाड़ियौ ऊं अंजीर कोनीं तोड़े, अर नीं किणी बोरड़ी ऊं लोग अंगूर उतारे है।

45भलौ मिनख आपरै मन रा भलै भंडार ऊं भली बातां निकाळै अर नगटो मिनख आपरै मन रा भंडार ऊं नकटी बातां निकाळै। क्यूंकै जिकौ मन मे भरयोड़ौ है वो इज मूंडै माथै आवै।

46“जद थै म्हारौ कैणौ नीं मांनौ, तो क्यूं म्हनै हे परभु, हे परभु कैवौ हो?

47जिकौ कोई म्हारै खनै आवै अर म्हारी बातां सुणनै मांनै है, म्हैं थांनै बताऊं की वो किणरै ज्यूं है।

48वो उण मिनख रै जैड़ौ है, जिकौ घर बणाते वगत ऊंडी नीव खोदनै भाटा ऊं भरी। जद बाढ़ आई तो पांणी उण घर रै लागौ पण उण घर नै हिला नीं सकयौ। क्यूंकै वो पको बणयोड़ो हो।

49पण जिकौ सुण नै भी नीं मांनै, वो उण मिनख रै जैड़ौ है जिकौ धोरा मे बिना नीव रौ घर बणायौ। जद उण घर रै पांणी लागौ तो वो तुरत पड़गो अर वो पड़नै पूरौ नास हो गियो।”

← Chapter 5 Jump to: Chapter 7 →