Luke 12

Marwari Bible

1अर जद हजारो री भीड़ होई, एठै तांई की एक दूजै माथै पड़ रिया हा, तो वो सबां ऊं पैला आपरै चेलौ ऊं कैवण लागौ, “फरीसियों रै खमीर ऊं, जिकौ उणौरी चाल है, उण ऊं बचनै रहीजौ।

2कीं ढ़कयोड़ौ कोनीं, जिकौ खोलयो नीं जावैला। अर नीं कीं छुपयोड़ो है, जिकौ जांण्यौ नीं जावैला।

3इण वास्तै हरैक वो बात जिकौ थै अंधारै मे कही है, उजाळै मे सुणी जावैला। अर एकांत कमरो मे जिकौ कीं भी थै चुपचाप किणी रै कांन मे कही है, वो मकानो री छतो माथै ऊं परचार कियो जावैला।

4“बल्कि म्हारै दोसतो, म्हैं थौरे ऊं कैवूं हूं, की थौरे सरीर नै मार सकै है, पण उणरै पछै और कीं नीं कर सकै उणौ ऊं मती डरौ।

5म्हैं थांनै याद दिलाऊं हूं, की थांनै कीण ऊं डरणौ चाहीजै। उण परमेसर ऊं डरौ जिकौ थांनै मार नै नरक मे नोखणै री ताकत राखै है। हां, म्हैं थांनै बताऊं हूं, उणीज ऊं डरौ।

6कांई दो पईसो री पांच चिड़िया कोनीं बीके? तौभी परमेसर उणमे ऊं एक नै भी कोनीं भूलता।

7अर सुणौ, थौरे माथा रा एक एक बाल तांई गिण्योड़ा है। लोगां ऊं डरौ मती, थै घणी चिड़ियो ऊं बढ़नै हो।

8“म्हैं थौरे ऊं कैवूं हूं, जिकौ कोई मिनखौ रै सांमै म्हनै मांनै है, उणनै म्हैं, मिनख रौ बेटौ, भी परमेसर रै सरगदूतो रै सांमै मांनैला।

9पण जिकौ मिनखौ रै सांमै म्हनै मना करै है उणरौ परमेसर रै सरगदूतो रै सांमै मना कर दी जावैला।

10अर हरैक उण मिनख नै तो माफ कर दियौ जावैला जिकौ म्हैं, मिनख रै बेटौ, रै विरोध मे कोई सबद बोले है, बल्कि जिकौ पवितर आतमा री निंदा करै है, उणनै माफ नीं कियो जावैला।”

11“जद वे थांनै यहूदी पराथना घर, हाकिमों अर अधिकारियों रै सांमै ले जाये तो चिंता नीं करणी की म्हौ कीण रीति ऊं या कांई जबाब दो, या कांई कैवौ।

12क्यूंकै पवितर आतमा उण घड़ी थांनै सिखा दैला, की कांई कैणौ चाहीजै।”

13पछै भीड़ मे ऊं उण ऊं किणी कयौ, “हे गुरु, म्हारै भाई ऊं पिता री जायदाद रौ बंटवारौ करनै रौ कैह दो।”

14यीसु उण ऊं कयौ, “हे भला मिनख, म्हनै थौरो न्याव करणैवाळौ या बंटवारौ करणैवाळौ कीणै बणायौ है?”

15यीसु उण ऊं कयौ, “सावचेत रैवौ, अर हरैक तरैह रै लोभ ऊं अपणै आप नै आगौ राखौ। क्यूंकै जरुत ऊं घणौ धन होवण ऊं जीवन रौ आधार नीं होवै।”

16पछै उणै उणनै एक दिस्टांत कथा सुणाई, “किणी धनवान री धरती माथै घणौ धान होयौ।

17तद वो अपणै मन मे विचार करनै लागौ, ‘म्हैं कांई करूं? म्हारै खनै धान राखणै रै वास्तै जगा तो है कोनीं।’

18“अर उणै कयौ, ‘म्हैं ओ करूंला। म्हैं अपणी भखारियो नै तोड़नै उणौ ऊं मोटी बणाऊंला अर अपणै सगळै धान अर सामान नै उणमे राखूंला।

19अर अपणी आतमा ऊं कैवूंला, अरै म्हारी आतमा अबै घणी चौखी चीजों, घणै बरसो रै लियै थारै खनै राखूं हूं, घबरा मती, खा, पी, अर सुख ऊं रैह।’

20“पण परमेसर उण ऊं कयौ, ‘हे गैला, इण रात थारौ प्रांण थारै ऊं ले लियौ जावैला। तद जिकौ कीं थैं भेळौ करयौ है, वो किणरौ होवैला?’

21“ऐड़ौ ही वो मिनख भी है जिकौ अपणै वास्तै धन भेळौ करै है, पण परमेसर री निजर मे वो धनवान कोनीं है।”

22पछै उणै आपरै चेलौ ऊं कयौ, “इण वास्तै म्हैं थौरे ऊं कैवूं हूं, अपणै प्रांण री चिंता मती करौ, की म्हौ कांई खाओला, अर अपणै सरीर री चिंता मती करौ की म्हौ कांई पेरोला।

23क्यूंकै खाणै ऊं प्रांण, अर कपड़ो ऊं सरीर घणौ बढ़नै है।

24कौवों नै देखौ, वे नीं बोए है, नीं वे काटे है, नीं उणौरै खनै भंडार है अर नीं धान रा कोठा है। तौभी परमेसर उणौनै खाणौ दैवै है। थै तो कौवों ऊं घणा किमती हो।

25थौरे मे ऊं ऐड़ौ कुण है, जिकौ चिंता करणै ऊं अपणी उमर मे एक घड़ी भी बढ़ा सकै है?

26इण वास्तै जे थै इण छोटे कांम नै भी नीं कर सकौ, तो और बातां रै लियै क्यूं चिंता करौ हो?

27“कमोद नै देखौ, वे कीकर उगै है? नीं वे मेनत करै है, नीं काते है। तौभी म्हैं थौरे ऊं कैवूं हूं की सुलैमान अपणै सगळै वैभव मे, उण मे ऊं किणी एक रै ज्यौ भी नीं सज सकयौ।

28इण वास्तै जे परमेसर मैदान री घास नै, जिकौ आज एठै है अर जिणनै काले ही लाय मे फूंकी जावैला, परमेसर ऐड़ै गाभौ ऊं सजावै है तो हे थोड़े विसवास करणैवाळौ थांनै तो वो और ही घणा गाभा पैरावैला।

29अर थै इण बात री खोज मे नीं रैवौ, की कांई खाओला अर कांई पीओला, अर नीं वेम करौ।

30क्यूंकै संसार रा लोग इण सगळी चीजों री खोज मे रैवै है। अर थौरो पिता जांणै है, की थांनै इण चीजों री जरुत है।

31पण उणरै राज री खोज मे रैवौ, तो ऐ चीजों भी थांनै मिळ जावैला।

32“हे छोटे झुंड डरौ मती, क्यूंकै थौरो परम पिता थांनै सरग रौ राज देवण नै तैयार है।

33अपणी जायदाद बेचनै धन गरीबो मे बांट दो। अपणै खनै ऐड़ी थैलियो राखौ जिकौ पुराणी नीं पड़ै, मतलब सरग माथै ऐड़ौ धन भेळौ करौ जिकौ घटे नीं अर जिणरै नैड़ौ चोर नीं जावै, अर नीं कीड़ा बिगाड़े।

34क्यूंकै जठै थौरो धन है, उठै थौरो मन भी लागोड़ो रैवैला।

35“करम करनै हमेसां तैयार रैवौ। अर अपणौ दीयौ लगाए राखौ।

36अर उण लोगां रै ज्यौ बणौ जिकौ ब्याव रै खाणै ऊं पाछा आते अपणै मालिक रै इन्तजार मे रैवै है ताकी, जद वो आये अर द्धार खटखटाये तो वे तुरत उणरै लियै द्धार खोल सकै।

37“धन्य है वे सेवक, जिणौनै मालिक आयनै जागता पाए। म्हैं थौरे ऊं साची कैवूं हूं, की वो भी उणौरी सेवा रै वास्तै कमर बांधनै उणौनै खाणै री चौकी माथै खाणै रै वास्तै बिठावैला। वो आवैला अर उणौनै खाणौ जिमावैला।

38जे वो रात रै दूजै पहर या तीजै पहर मे आयनै उणौनै जागता पाए, तो वे सेवक धन्य है।

39इण बात रै लियै पका रैवौ, की जे घर रै मालिक नै ओ ध्यांन होवतो की चोर कीण घड़ी आवैला, तो वो उणनै अपणै घर मे चोरी नीं करणै देतो।

40थै भी तैयार रैवौ क्यूंकै म्हैं, मिनख रौ बेटौ ऐड़ी घड़ी आवैला जिणनै थै सोच भी नीं सकौ।”

41तद पतरस पूछयौ, “हे परभु, ओ दिस्टांत कथा थूं म्हौरै लियै कैह रियौ है या सगळौ रै लियै?”

42परभु कयौ, “वो विसवास लायक अर समझदार भंडारी कुण है, जिणरौ मालिक उणनै नौकर चाकरो माथै सरदार ठैराए की उणौनै सही वगत खाणौ दे।

43वो सेवक धन्य है जिणनै उणरौ मालिक जद आवै तो उणनै वैड़ौ इज करते पावै।

44म्हैं थौरे ऊं साची कैवूं हूं, की वो उणनै अपणी सगळी जायदाद रौ सरदार ठैरावैला।

45जे वो सेवक अपणै मन मे सोचे की म्हारौ मालिक तो आवण मे घणौ मोड़ो कर रियौ है, अर वो दूजै दास अर दासियो नै मारणा पीटना सरू कर दे अर खाणै पीणै अर पियकड़ होवण लागै,

46तो उण सेवक रौ मालिक ऐड़ै दिन आ जावैला, जिणरी वो सौचतो तांई कोनीं। एक ऐड़ी घड़ी जिणरै बारै मे वो अणचेत है। पछै वो उणरा टुकड़ा टुकड़ा कर दैला अर उणनै अविसवासियो रै साथै ठैरावैला।

47“वो सेवक जिकौ अपणै मालिक री इछा जांणै है, अर उणरै लियै तैयार नीं रैवतौ या ज्यौ उणरौ मालिक चावै है, व्यौंही नीं करै, उण सेवक माथै घणी मार पड़ैला।

48बल्कि वो जिणनै आपरै मालिक री इछा रौ ग्यांन नीं अर कोई ऐड़ौ कांम कर दे जिकौ मार पड़नै लायक हो तो उण सेवक नै हळकी मार पड़ैला। क्यूंकै हरैक उण मिनख ऊं जिणनै बोहत घणौ दियौ गयो है, उण ऊं घणौ लियौ जावैला। जिण लोगां नै परमेसर घणौ सौपयो है, उण लोगां ऊं परमेसर घणौ ही मांगेला।

49“म्हैं धरती माथै एक अग्‍नि लगाणै आयौ हूं। म्हारी इती इछा है की वो कदैई आज तांई लाग जाती।

50म्हारै खनै एक दुख रौ बतिस्मो है जिकौ म्हनै लेणो है। जद तांई ओ पूरौ नीं हो जातौ, म्हैं कितौ उदास हूं।

51कांई थै समझौ हो की म्हैं धरती माथै मिलाप कराणै आयौ हूं? कोनीं बल्कि अलग कराणै आयौ हूं।

52क्यूंकै इण ऊं आगै एक घर रै पांच लोग एक दूजै रै विरोध हो जावैला। तीन दो रै विरोध मे अर दो तीन रै विरोध मे हो जावैला।

53पिता, बेटे रै विरोध मे, अर बेटौ, पिता रै विरोध मे, मां, बेटी रै विरोध मे, अर बेटी, मां रै विरोध मे, सासु, बहूं रै विरोध मे, अर बहूं, सासु रै विरोध मे हो जावैला।”

54अर उणै भीड़ ऊं कयौ, “जद बादळ नै पच्छिम ऊं उठता देखौ हो, तो तुरत कैवौ हो, की बरसात आवैला अर ऐड़ौ ही होवै है।

55अर जद दखण हवा चालै है, तो थै कैवौ हो, लूं चालै ला, अर ऐड़ौ ही होवै है।

56हे पापियो, थै धरती अर आभै रै रूप मे भेद कर सकौ हो, पण इण जुग रै बारै मे क्यूं भेद करणौ नीं जांणता?

57“अर थै आप ही फैसलो क्यूं नीं कर लेता, की उचित कांई है?

58जद थै अपणै विरोधी रै साथै अधिकारियों रै खनै जा रिया हो तो मारग मे ही उणरै साथै समझौतो करणै री कोसीस करौ। नीं तो कठैई ऐड़ौ नीं हो की वो थांनै न्यायधीस रै सांमै खींच ले जाए, अर न्यायधीस थांनै अधिकारी नै सौंप दे। अर अधिकारी थांनै जेळ मे बंद कर दे।

59म्हैं थांनै बताऊं हूं, थै उठै ऊं तद तांई नीं छूट सकौ जद तांई आखरी पाई पाई रौ हिसाब नीं चुका दो।”

← Chapter 11 Jump to: Chapter 13 →