Luke 7

Marwari Bible

1जद यीसु लोगां नै आपरी बातां सुणा दी, अर पछै कफरनहूंम मे गिया।

2उठै कफरनहूंम मे एक सूबेदार रौ एक सेवक हो जिकौ उणरौ विसवास लायक हो, वो बीमारी ऊं मरण वाळौ हो।

3सूबेदार यीसु री बातां सुणनै यहूदी मुखिया नै यीसु खनै आ विनती करणै भेज्या की आयनै म्हारै दास नै सावळ करै।

4मुखिया यीसु रै खनै आयनै उण ऊं विनती करनै कयौ, “सूबेदार इण लायक है की थै उणरै सेवक नै सावळ करौ।

5क्यूंकै वो अपणै लोगां ऊं परैम करै है। अर उणै ही म्हौरै वास्तै पराथना घर बणायौ है।”

6यीसु उणौरै साथै गियो, पर जद वे घर ऊं थोड़ाक आगा हा, तो सूबेदार आपरै दोसतो नै यीसु खनै ओ कैह भेज्या, “हे परभु थै तकलीफ मत देखौ। क्यूंकै म्हैं इण लायक कोनीं हूं, की थै म्हारै घर आओ।

7इण खातर म्हैं अपणै आप नै इण लायक ही कोनीं समझयो, की थौरे खनै आऊं। पण थै इतौ ही कैह दो तो म्हारौ सेवक सावळ हो जावैला।

8म्हैं भी दूजा साहब रै नीचे कांम करूं हूं अर सिपाई म्हारै हाथ मे है। जद एक नै कैवूं ‘जा’ तो वो जावै है अर जद दूजै नै कैवूं ‘आ’ तो वो आवै। इण तरैह म्हारा सेवक नै कैवूं हूं, ‘ओ कर’ तो वो करै है।”

9ओ सुणनै यीसु अचूम्बो करयौ, अर वो पाछौ मुड़नै भीड़ ऊं कयौ जिकौ उणरै लारै आई ही, “म्हैं थौरे ऊं कैवूं हूं, की ऐड़ौ विसवास तो म्हैं इजरायल रै लोगां मे भी कोनीं देख्यौ।”

10यीसु खनै भेज्यौड़ा लोग जद सूबेदार रै घरै पाछा गिया, तो उणरा सेवक नै सावळ देख्यौ।

11थोड़े दिनां रै पछै यीसु नाईन नाम रा नगर मे गियो उणरा चेला अर घणी भीड़ उणरै साथै ही।

12जद वे नगर री पोळ खनै पोचिया तो नगर मे ऊं लोग एक लास नै लैय आवतै देख्यां, जिकौ एक विधवा रै एकाएक बेटे री ही। अर नगर रै घणा ही लोग उणरै साथै हा।

13उणनै देखनै परभु नै विधवा माथै दया आई, अर उणै कयौ, “रौ मत।”

14यीसु अरथी खनै आयनै अरथी नै हाथ लगायो तो कांधिया रूकगा। यीसु कयौ, “हे मोटियार, म्हैं थारै ऊं कैवूं, उठ जा।”

15इतौ कैवता ही मुड़दो जीवतौ हो गियो अर बोलण लागौ। यीसु उणनै उणरी मां नै सौंप दियौ।

16इण बात ऊं उठै डर छायगो अर वे परमेसर री बड़ाई करनै कैवण लागा, “अपांरै बीच मे एक महान भविसयदाता परगट होयौ है। अर परमेसर आपरै लोगां माथै करपा करी है, परमेसर आपरै लोगां नै बचावणै आया है।”

17यीसु री आ बात पूरै यहूदिया अर आजू बाजू रै सगळै गांवों मे फैलगी।

18यूहन्‍ना नै उणरा चेला ऐ सगळा समाचार दे दिया।

19तो यूहन्‍ना आपरा चेलौ मे ऊं दो नै बुलायनै परभु यीसु खनै ओ पुछणै भेज्या, “कांई आवण वाळा मसीह थै इज हो, या पछै म्हौ दूजा री बाट जोवो?”

20यूहन्‍ना रा चेला यीसु खनै आयनै पूछयौ, “म्हौ नै यूहन्‍ना बतिस्मो देवणवाळौ थौरे खनै ओ पूछणै भेजिया है, ‘कांई आवण वाळा मसीह थै इज हो, या पछै म्हौ दूजै री बाट जोवो?’ ”

21उण घड़ी यीसु घणै लोगां री बिमारियों सावळ करी, अर दुखौ ऊं छुड़ाया, दुस्ट आतमाओ ऊं छुड़ाया अर आंधौ नै आंख्यां दी।

22यीसु यूहन्‍ना रै चेलौ नै कयौ, “जिकौ कीं थै देख्यौ अर सुण्यौ है, जायनै यूहन्‍ना नै कैह दो, आंधा देखे, लंगड़ा चालै, कोढ़ियो रौ कोढ़ झड़ै है, बोळा सुणण लागा है, मुड़दा जीवता होवै है अर गरीबो नै सुभ संदेस सुणावै है।

23अर धन्य है वो, जिकौ म्हारै माथै विसवास करै।”

24जद यूहन्‍ना रा भेज्यौड़ा चेला गिया परा तो यीसु यूहन्‍ना रै बारै मे लोगां ऊं कैवण लागौ, “थै रिंदरोही मे कांई देखणै गिया हा? कांई हवा ऊं झुलता डोका?

25नीं, तो पछै थै कांई देखणै गिया हा? कांई चौखा गाभा पैरयोड़ा मिनख नै? देखौ, जिकौ मलमल रा गाभा पैरै अर सुख विलास में रैवै वे रिंदरोही मे नीं पण मेहलो मे रैवै है।

26तो पछै थै कांई देखणै गिया हा? कांई किणी भविसयदाता नै? इतोई नीं भविसयदाता ऊं मोटे नै देखणै गिया हा।

27ऐ वे इज है, जिणरै बारै मे लिख्योड़ौ है, ‘देख, म्हैं म्हारै दूत नै थारै आगै आगै भेजूं हूं, जिकौ थारै आगै आगै मारग सीधौ करैला।’

28म्हैं थौरे ऊं कैवूं हूं, जिकौ लुगाई रै पेट ऊं जनमियौ है, उण मे ऊं कोई भी यूहन्‍ना ऊं मोटो कोनीं है। पण जिकौ परमेसर रै राज में छोटे ऊं छोटौ है, वो यूहन्‍ना ऊं मोटो है।”

29सगळा लोग अर चुंगी लेवण वाळा भी यूहन्‍ना ऊं बतिस्मो लेयनै ओ मांन लियौ की परमेसर रौ मारग साचौ है।

30पण फरीसी अर व्यवस्था रै जांणकारो नै यूहन्‍ना ऊं बतिस्मो नीं लेन जिकौ परमेसर उणौरै बारै में सौच राखियौ हो उणै भी नकार दियौ।

31यीसु पछै कयौ, “म्हैं इण पीढ़ी रै लोगां नै कीण रै बराबर बताऊं?

32वे उण टाबरौ रै जैड़ा है, जिकौ बजार में बैठोड़ा एक दूजा नै हाका करनै कैवै है, ‘म्हैं थौरे वास्तै बांसली बजाई, पण थै नीं नाचिया। म्हैं थौरे वास्तै सोग रा गीत गाया, पण थै नीं रोया।’

33यूहन्‍ना बतिस्मो देवणवाळौ आयौ, जिकौ नीं तो रोटी खावै, अर नीं ही दाखरस पीवै अर थै कैवौ हो, ‘उणमे दुस्ट आतमा है।’

34म्हैं, मिनख रौ बेटौ, आयौ अर थै कैवौ हो, ‘देखौ, पेटु अर पियकड़ मिनख, चुंगी लेवणवाळौ रौ अर पापियो रौ दोसत है।’

35पण जिकौ साची मे परमेसर रा टाबर है वे ही जांण सकै है, की म्हैं अर यूहन्‍ना जिकौ करयौ वो समझदारी रौ कांम हो।”

36पछै कोई फरीसी यीसु ऊं विणती करी के म्हारै साथै खाणौ खाओ, तो वो उण फरीसी रै घर जायनै खाणौ खाणै बैठा।

37उण नगर मे एक पापी लुगाई ही, उणै ओ जांणनै की यीसु फरीसी के घर में खाणौ खाणै बैठा है तो वां संगमरमर री सीसी में मूगौ अंतर लेन आई।

38वां यीसु रै पगां खनै, लारै ऊभी रैन, रोवती होई उणरै पगां नै आपरै आसुओ ऊं धोवण लागी अर आपरै माथै रा बालों ऊं बार बार पौछती, अर उणरै चरणौ नै चूमती अर उण माथै अंतर चोपड़ती।

39ओ देखनै जिकौ फरीसी यीसु नै आपरै घर खाणौ खाणै बुलाया हा, आपरै मन मे सौचणै लागौ, “अगर यीसु भविसयदाता होता तो ओ जांण जाता के, आ लुगाई जिकौ उणौनै हाथ लगावै है, वां कुण है अर कैड़ी है? क्यूंकै आ तो पापी लुगाई है।”

40यीसु उणरी मन री बात जांणनै उण ऊं कयौ, “हे समौन, म्हैं थारै ऊं कीं कैवणौ चावूं हूं।” तो समौन बोल्यौ, “हे गुरु, कैवौ।”

41यीसु कैवण लागा, “किणी साहूकार रै दो करजदार हा। एक मे पांच सौ चांदी रा सिक्‍का अर दूजोड़े मे पचास चांदी रा सिक्‍का मांगतो हो।

42जद उणौरै खनै दैणै वास्तै की नीं हो, तो वो दोनो नै माफ कर दिया। अबै बता, उणौमे ऊं कुण घणौ परैम राखैला?”

43समौन जबाब दियौ, “म्हारी समझ ऊं, वो जिणौरो घणौ करजौ माफ करयौ।” यीसु कयौ, “थूं सही सोच्यौ।”

44पछै यीसु उण लुगाई सांमै मुड़नै समौन ऊं कयौ, “कांई थूं इण लुगाई नै देखे है? म्हैं थारै घर मे आयौ अर थूं म्हारा पग धोवण पांणी तांई नीं दियौ। पण आ तो म्हारै पगां नै आसुओ ऊं धोया अर आपरै बालों ऊं पूछिया है।

45थूं म्हनै मांन ऊं गळे नीं लगायो। पर आ तो जद ऊं म्हैं अठै आयौ हूं म्हारै पगां नै चूमना नीं छोड़या है।

46थूं म्हारै माथा ऊपर तेल नीं लगायो, पर आ म्हारै पगां माथै अंतर चोपड़ियो है।

47इण वास्तै म्हैं थारा ऊं कैवूं हूं, इणरा पाप जिकौ घणाई हा, माफ होया है। क्यूंकै आ घणौ परैम करयौ है। पण जिणरा थोड़ा पाप माफ होया है, वो थोड़ो परैम करयौ है।”

48अर उण लुगाई नै कयौ, “थारा पाप माफ होया।”

49तो जिकौ लोग उणरै साथै खाणौ खाणै बैठा हा, वे आप आपरै मन में सोचणै लागा के, “ओ कुण है जिकौ पापों नै भी माफ करै है?”

50पण वे उण लुगाई नै कयौ, “थारै विसवास नै थनै बचाई है। जा राजी खुसी ऊं जा।”

← Chapter 6 Jump to: Chapter 8 →