Luke 9

Marwari Bible

1पछै यीसु बारैह चेलौ नै एक साथै बुलाया अर उणौनै सगळी दुस्ट आतमाओ अर बिमारियों नै आगी करणै री सामरथ अर अधिकार दियौ।

2अर उणौ नै परमेसर रै राज रौ परचार करनै, अर बिमारों नै सावळ करनै रै लियै भेज्या।

3यीसु उणौ नै कयौ, “आपरी यात्रा रै लियै वे कीं साथै नीं ले। नीं डंडों, नीं झोळो, नीं रोटी, नीं रूपिया अर नीं कोई दूजी जोड़ी कुड़तौ।

4अर जिण किणी रै घर मे जाओ उठीज रौ, अर उठीज ऊं रवाना होवो।

5जिकौ कोई लोग थांनै स्वीकार नीं करै तो जद उण नगर नै छोड़ौ तो उणरै विरोध गवाई रै रूप मे अपणै पगां री धूड़ झाड़ दो।”

6तद वे उठै ऊं चाल नै हरैक गांव गांव सुभ संदेस सुणाता, अर लोगां नै सावळ करता होया यात्रा करनै लागा।

7अर जद गलीली देस रौ राजा हेरोदेस नै ओ ठाह पड़ियौ तो डर गियो, क्यूंकै किता लोगां कयौ, “यूहन्‍ना मरयोड़ौ मे ऊं जी उठयौ है।”

8अर कईक लोगां कयौ, “एलियाह देठाळौ दियौ है।” कीं और कैह रिया हा, “भविसयदाता मे ऊं कोई जी उठयौ है।”

9पण हेरोदेस कयौ, “म्हैं यूहन्‍ना रौ तो माथो कटवा दियौ हो, अबै ओ कुण है, जिणरै बारै मे ऐड़ी बातां सुणूं हूं?” अर उणै उणनै देखणै री इछा करी।

10पछै जद प्रेरित पाछा आया तो उणौ जिकौ कीं करयौ हो, सगळौ यीसु मसीह नै सुणायो। तद वो उणौ नै उठै ऊं अपणै साथै लैयनै चुपचाप बैतसैदा नाम रै एक नगर मे गिया।

11ओ जांणनै भीड़ उणरै लारै वहीर होयगी। अर यीसु उणौ ऊं आंणंद ऊं मिळियौ, अर उणौ ऊं परमेसर रै राज री बातां करनै लागौ। अर जिकौ लोग सावळ होणा चावता हा, उणौनै सावळ किया।

12जद दिन ढ़ळण लागौ, तो बारैह चेलौ आयनै यीसु ऊं कयौ, “भीड़ नै रवाना करौ, ताकी वे आजू बाजू रै गांवों अर बस्तियो मे जायनै आसरो अर खाणौ पा सकै, क्यूंकै म्हौ एठै सुनी जगा मे हो।”

13यीसु उणौनै कयौ, “थै इज इणौनै खावण नै कीं दो।” उणौ कयौ, “म्हौरै खनै पांच रोटियो अर दो मछली नै छोड़नै कीं कोनीं है। पण हां, जे म्हौ जायनै इण सगळै लोगां रै लियै खाणौ मोल लो, तो हो सकै है।”

14वे लोग तो पांच हजार मिनखौ रै बराबर हा। यीसु आपरै चेलौ ऊं कयौ, “उणौनै पचास पचास करनै झुंड मे बिठा दो।”

15उणौ वैड़ौ इज कियो, अर सगळौ नै बिठा दिया।

16पछै यीसु पांच रोटियो अर दो मछलियो नै लैयनै सरग री तरफ देखतौ होयौ परमेसर रौ धन्यवाद दियौ अर पछै उणरा टुकड़ा करतौ होयौ उणै आपरै चेलौ नै दिया की वे लोगां नै परोसे।

17तद सगळा लोग खायनै धाप गिया अर बचयोड़े टुकड़ों ऊं उणरै चेलौ बारैह छाबड़िया भरिया।

18जद वो अकेले मे पराथना कर रियौ हो, अर चेला उणरै साथै हा, तो उणै चेलौ ऊं पूछयौ, “लोग म्हारै बारै मे कांई कैवै है?”

19चेलौ जबाब दियौ, “कोई यूहन्‍ना बतिस्मो देवणवाळौ, अर कोई कैवै एलियाह, अर कोई ओ भी कैवै है की पुराणै भविसयदाता मे ऊं कोई जी उठयौ है।”

20यीसु उणौनै कयौ, “पण थै म्हनै कांई कैवौ हो?” पतरस जबाब दियौ, “परमेसर रौ मसीह।”

21तद यीसु उणौनै चितायनै कयौ, “ओ किणी नै नीं कैवणौ।”

22अर यीसु कयौ, “म्हैं, मिनख रै बेटे, रै लियै जरुरी है, की वो घणौ दुख उठाए, अर मुखिया अर परधान याजकौ अर सास्तरियों द्धवारा नकार नै मरवा दियौ जाये। अर पाछौ तीजै दिन जीवतौ कर दियौ जावैला।”

23उणै सगळै चेलौ ऊं कयौ, “जे कोई म्हारै लारै आवणौ चावै है तो उणनै अपणै आप ऊं मना करै अर उणनै हरैक दिन खुद रौ क्रूस उठाणौ होवैला। तो वो म्हारै लारै चालै।

24क्यूंकै जिकौ कोई अपणौ प्रांण बचाणौ चावैला वो उणनै खोवैला, पण जिकौ कोई म्हारै लियै अपणौ प्रांण खोवैला वोहीज उणनै बचावैला।

25जे मिनख सगळै जगत नै हासल कर दे बल्कि खुद रौ प्रांण खो दे या भटक जाये, तो उणनै कांई फायदो है?

26जिकौ कोई म्हारै ऊं अर म्हारी बातां ऊं सरमावैला, म्हैं, मिनख रौ बेटौ, भी जद आपरी, अर आपरै पिता परमेसर री, अर पवितर सरगदूतो री, महिमा समेत आवैला, तो उण ऊं सरमावैला।

27म्हैं थौरे ऊं साची कैवूं हूं, एठै कईक ऐड़ा ऊभा है, जिकौ तद तांई मौत रौ स्वाद नीं चाखेला, जद तांई परमेसर रै राज नै देख नीं ले।”

28इण बातां रै कोई आठ दिन पछै वो पतरस, यूहन्‍ना अर याकूब नै साथै लैयनै पराथना करनै रै लियै भाखर माथै गिया।

29जद वो पराथना कर रियौ हो, तो उणरै मूंडै रौ रूप बदळ गियो। अर उणरा गाभा सफेद होयनै चमकन लागा।

30उठै उण ऊं बातां करता होया दो मिनख परगट होया। वे मूसा अर एलियाह हा।

31जिकौ अपणी महिमा रै साथै परगट होया हा, अर यीसु रै मौत रै बारै मे बात कर रिया हा जिणनै वो यरुसलेम मे पूरी करणै वाळौ हो।

32पतरस अर उणरौ साथी गेहरी ऊंग मे हा, अर जद वे जागा तो उणौ यीसु री महिमा नै देखी अर उणौ उण दो जणौ नै भी देख्यां जिकौ उणरै साथै ऊभा हा।

33जद वे उणरै खनै ऊं जावण लागा, तो पतरस यीसु ऊं कयौ, “हे मालिक, म्हौरौ एठै रैणौ भलौ है। म्हौ तीन तम्बू बणाओ, एक थारै वास्तै, एक मूसा रै वास्तै, अर एक एलियाह रै वास्तै।” वो कोनीं जांणै हो, की वो कांई कैह रियौ है।

34वो ऐ बातां कर ही रियौ हो की एक बादळ आयौ अर उणै उणनै आपरी छाया मे घेर लियौ। ज्यौ ही उण माथै बादळ छाया, वे डर गिया।

35अर उण बादळ मे ऊं ओ सबद निकळियौ, “ओ म्हारौ बेटौ है, इणनै म्हैं चुणयौ है, इणरी सुणौ।”

36ओ सबद होयौ तो उणौ यीसु नै ऐकलौ पायो। वे इणरै बारै मे चुप रिया। उणौ जिकौ कीं देख्यौ हो, उण रै बारै मे उण वगत किणी ऊं कीं नीं कयौ हो।

37अर दूजै दिन जद वे भाखर ऊं नीचे उतरिया, तो एक घणी भीड़ उण ऊं आ मिळी।

38तद भीड़ मे ऊं एक मिनख चिलायनै कयौ, “हे गुरु, म्हैं थारै ऊं विनती करूं हूं, की म्हारै बेटे ऊपर करपा दिस्टी कर, क्यूंकै वो म्हारौ एकाएक बेटौ है।

39अणचेत एक दुस्ट आतमा उणनै पकड़ लेवे है, अर वो चीख उठै है। उणनै दुस्ट आतमा ऐड़ौ मरोड़े है की उणरै मूंडै ऊं झाग निकळ आवै है। वो उणनै कुचलनै मुसकिल ऊं छोड़ै है।

40अर म्हैं थारै चेलौ ऊं अरज करी, की उणनै बारै निकाळै, पण वे निकाळ नीं सकया।”

41तद यीसु जबाब दियौ, “हे अविसवासी अर हठीले लोगां, म्हैं और किता दिन थौरे साथै रैवूंला अर कद तांई थौरी सहन करूंला? अपणै बेटे नै एठै ले आ।”

42वो छोरौ आ ही रियौ हो की दुस्ट आतमा उणनै पटकनै मरोड़ियो, पण यीसु दुस्ट आतमा नै हाका करिया अर छोरै नै सावळ करनै उणरै पिता नै सौंप दियौ।

43अर सगळा लोग परमेसर रै सामरथ ऊं अचूम्बो कर रिया।

44तद यीसु आपरै चेलौ ऊं कयौ, “अबार जिकौ म्हैं थौरे ऊं कैह रियौ हूं, उण बातां ऊपर ध्यांन दो। म्हैं, मिनख रौ बेटौ, मिनख रै हाथौ पकड़ायौ जावण वाळौ है।”

45बल्कि वे इण बात नै समझ नीं सकया। आ बात उणौ ऊं छुपयोड़ी ही की वे जांण नीं पाया, अर वे उण बात रै बारै मे उण ऊं पूछणै ऊं डरता हा।

46पछै यीसु रै चेलौ रै बीच मे ओ विवाद होवण लागौ, “म्हौरै मे सबां ऊं मोटो कुण है?”

47यीसु नै उणौरै मन रौ विचार जांण लियौ। अर एक टाबर नै लेयनै आपरै खनै ऊभौ करयौ।

48अर उणौ ऊं कयौ, “जिकौ कोई म्हारै नाम ऊं इण टाबर नै स्वीकार करै है, वो म्हनै स्वीकार करै है, वो म्हनै भेजणै वाळै नै स्वीकार करै है। क्यूंकै जिकौ थौरे मे ऊं सगळौ ऊं छोटौ है, वोहीज सगळौ ऊं मोटो है।”

49तद यूहन्‍ना कयौ, “हे मालिक, म्हौ एक मिनख नै थारै नाम ऊं दुस्ट आतमाओ नै निकाळते देख्यौ, अर म्हौ उणनै मना करी, क्यूंकै वो म्हौरै साथै होयनै थारै लारै नीं चालै।”

50यीसु उणौ ऊं कयौ, “उणनै मना मती करौ। क्यूंकै जिकौ थौरे विरोध मे नीं, वो थौरे पकस मे ही है।”

51जद उणनै सरग मे ले जावण रौ वगत आयौ तो वो यरुसलेम जावण रौ पको करनै चाल दियौ।

52उणै आपरै लोगां नै पैला ही भेज दिया हा। वे जाता रिया अर उणरै वास्तै तैयारी करनै एक सामरी गांव मे पूगा।

53बल्कि सामरियो उठै उणरौ आदर सत्कार नीं कियो, क्यूंकै वो यरुसलेम जा रियौ हो।

54जद उणरा चेला याकूब अर यूहन्‍ना ओ देख्यौ तो वे बोल्या, “हे परभु कांई थूं चावै है की म्हौ आग्या दो की आभै ऊं अग्‍नि बरसे अर उणौनै भसम कर दे?”

55पण उणै पाछौ मुड़नै चेलौ नै हाका करनै कयौ, “थै कोनीं जांणौ की थै कैड़ी आतमा रा हो।

56क्यूंकै म्हैं, मिनख रौ बेटौ, लोगां रै प्रांणौ रौ नास करनै नीं बल्कि बचाणै रै वास्तै आयौ है।” अर वे किणी दूजै गांव मे जाता रिया।

57जद वे मारग मे जा रिया हा, तो किणी उण ऊं कयौ, “थूं जठै भी जावैला, म्हैं थारै लारै चालूं ला।”

58यीसु उणौ ऊं कयौ, “लोंकियो रै खनै बील होवै है। अर आभै रै पंखैरूओ रा आळा होवै है बल्कि मिनख रै बेटे नै माथो घालनै री भी जगा कोनीं है।”

59उणै किणी दूजै ऊं कयौ, “म्हारै लारै आजा।” बल्कि वो मिनख बोल्यौ, “हे परभु, म्हनै जावण दे ताकी म्हैं पैला म्हारै पिता नै बूर नै आऊं।”

60तद यीसु उण ऊं कयौ, “मरयोड़ौ नै अपणै मुड़दा बूरण दे, थूं जा अर परमेसर रै राज री घोसणा कर।”

61पछै किणी और भी कियो, “हे परभु, म्हैं थारै लारै चालूं ला बल्कि पैला म्हनै म्हारै घरवाळौ ऊं विदा ले आवण दे।”

62इण खातर यीसु उण ऊं कयौ, “ऐड़ौ कोई भी जिकौ हळ माथै हाथ राखणै रै पछै लारै देखे है, परमेसर रै राज रै लायक कोनीं है।”

← Chapter 8 Jump to: Chapter 10 →