Luke 22 — Marwari Bible

19पछै उणै रोटी ली अर धन्यवाद दियौ। उणै उण रोटी नै तोड़नै उणौनै देते होयौ कयौ, “आ म्हारी देह है, जिकौ थौरे वास्तै दी जावै है। म्हारी याद मे ऐड़ौ ही करणौ।”

20यूं ही जद वे खाणौ खा चुकिया तो उणै कटोरो उठायौ अर कयौ, “ओ प्यालो म्हारै उण लोई रै रूप मे एक नई वाचा है, जिणनै थौरे वास्तै उंडेलियो है।

21बल्कि सुणौ, म्हनै जिकौ धोखे ऊं पकड़ावैला, उणरौ हाथ एठैज मेज माथै म्हारै साथै है।

22क्यूंकै म्हैं, मिनख रौ बेटौ, तो मारयो ही जाऊंला ज्यौ उणरै लियै ठैरायौ गियो है, बल्कि धिकार है, उण मिनख नै जिणरै जरियै म्हैं पकड़ायौ जाऊंला।”

23तद वे आपस मे पूछण लागा, “म्हौ मे ऊं कुण है, जिकौ ओ कांम करैला?”

24उणमे ओ विवाद भी होयौ, “म्हौ मे ऊं कुण सबां ऊं मोटो समझयो जावै है?”

25यीसु उणौनै कयौ, “दूजी जातियो रा राजा उणौ माथै कठोर राज करै है। पण वे राजा अपणै आप नै लोगां रा दोसत कैवै है।

26पण थै ऐड़ा नीं होणौ। बल्कि जिकौ थौरे ऊं मोटो है, वो छोटे रै ज्यूं अर जिकौ परधान है, वो सेवक रै ज्यूं बणै।

27क्यूंकै मोटो कुण है। वो जिकौ खाणै री मेज माथै बैठौ है या वो जिकौ उणनै परोसे है? कांई वो नीं जिकौ खाणै री मेज माथै बैठौ है? पण म्हैं थौरे बीच मे सेवक रै ज्यौ हूं।

28“पण थै वो हो, जिकौ म्हारी परीकसाओं मे हरैक वगत म्हारै साथै रिया हा।

29अर म्हैं थांनै व्यौंही एक राज दे रियौ हूं, ज्यौ म्हारै परम पिता नै इणनै म्हनै दियौ हो।

30व्यौंही म्हैं भी थौरे वास्तै ठैराऊं हूं, ताकी, थै म्हारै राज मे म्हारी मेज माथै खाओ पीयो, बल्कि सिंहासणौ माथै बैठनै इजरायल री बारैह गोत्र रौ न्याव करौ।

31“समौन, हे समौन, सुण, थां सगळौ नै गेहूं रै ज्यौ पटकनै रै वास्तै सैतान नै ठान लियौ है।

32बल्कि म्हैं थौरे वास्तै पराथना की है, की थौरो विसवास डगमगाए नीं, अर जद थूं पाछौ आए तो थारै विसवासी भाइयो री हीमत बढ़ै।”

33बल्कि समौन यीसु ऊं कयौ, “हे परभु, म्हैं थारै साथै जेळ जावण अर मरण वास्तै तैयार हूं।”

34यीसु कयौ, “हे पतरस, म्हैं थारै ऊं कैवूं हूं, की आज कुंकड़ो बांग नीं दैला जैड़ी तांई थूं तीन बार म्हारौ इन्कार करैला, की थूं म्हनै कोनीं जांणै।”

35अर यीसु आपरै चेलौ ऊं कयौ, “म्हैं थांनै जद बिना बटुए, बिना थैले या बिना चपलो रै भेज्या हा, तो कांई थांनै किणी चीज री कमी रही ही?” उणौ कयौ, “किणी चीज री कोनीं।”

36यीसु उणौनै कयौ, “पण अबार जिण किणी रै खनै कोई बटुओ है, वो उणनै ले ले अर वो थैलो भी ले चालै। अर जिणरै खनै तरवार नीं हो, वो आपरौ कुड़तौ तांई बेचनै उणनै मोल ले लेवे।

37क्यूंकै म्हैं थौरे ऊं कैवूं हूं, की जिकौ पवितर सास्तर मे लिख्योड़ौ है, की ‘वो अपराधियो रै साथै गिण्यौ है’, उणरौ म्हारै मे पूरौ होणौ जरुरी है। क्यूंकै म्हारै बारै मे बातां पूरी होण वाळी है।”

38उणौ कयौ, “हे परभु, देख, एठै दो तरवारो है।” यीसु उणौनै कयौ, “घणी है।”

39वो उठै ऊं उठनै हमेसां रै ज्यूं जैतून रै भाखर माथै जावण वास्तै रवाना हो गिया, अर उणरा चेला भी उणरै लारै रवाना हो गिया।

40यीसु जद उण जगा माथै पूगा तो उणै उणौनै कयौ, “पराथना करौ की थांनै परीकसा मे नीं पड़नो पड़ै।”

41अर वो किणी भाठै नै जितौ आगौ फेंकयो जा सकै है, लगोलग उणौ ऊं उतरौ आगौ न्यारौ जातौ रियौ। पछै वो गोडा टेकनै पराथना करनै लागौ।

42“हे परम पिता, जे थारी इछा हो तो इण कटोरे नै म्हारै ऊं आगौ हटा ले, तौभी म्हारी कोनीं, बल्कि थारी इछा पूरी हो।”

43तद एक सरगदूत उठै परगट होयौ जिकौ उणनै सामरथ देतो हो।

44उठै यीसु घणै संकट मे व्याकुल होयनै और ही घणै मन ऊं पराथना करनै लागौ। अर उणरौ पसीनो मांनौ लोई री मोटी मोटी बूंदो रै ज्यूं धरती माथै पड़ रियौ हो।

45अर जद वो पराथना ऊं उठनै अपणै चेलौ रै खनै आयौ, तो उणै उणौनै सौग मे थाकनै सोयोड़ा पाया।

46तो यीसु उणौनै कयौ, “थै सो क्यूं रिया हो? उठो अर पराथना करौ की थै किणी परीकसा मे नीं पड़ो।”

47वो ओ बोल ही रियौ हो की एक भीड़ आई, यहूदा जिकौ बारैह चेलौ मे ऊं एक हो, उणरी अगुवाई कर रियौ हो। वो यीसु नै चूमनै रै वास्तै उणरै खनै आयौ।

48यीसु उणनै कयौ, “हे यहूदा, कांई थूं चूमो लैयनै म्हनै, मिनख रै बेटे, नै धोखे ऊं पकड़ानै जा रियौ है?”

49यीसु रै साथियो जद देख्यौ की कांई होवणवाळौ है, तो कयौ, “हे परभु, कांई म्हौ तरवार ऊं वार करौ?”

50अर उणमे ऊं एक नै तो महायाजक रै दास ऊपर वार करनै उणरौ जीमणौ कांन ही उडा दियौ।

51बल्कि यीसु तुरत कयौ, “अबै बस करौ।” अर यीसु उणरै कांन नै छू नै सावळ कियो।

52तद यीसु माथै चढ़ाई करनै आया परधान याजकौ, मिंदर रा अधिकारियों अर यहूदी मुखियौ ऊं कयौ, “कांई थै म्हनै डाकू जांणनै तरवारो अर डंडा लैयनै निकळिया हो?

53मिंदर मे म्हैं हरैक दिन थौरे साथै हो, बल्कि थै म्हारै हाथ नीं लगायो। पण ओ वगत थौरो है। अंधारै रौ राज करनै रौ वगत है।”

54उणौ यीसु नै बंदी बणा लियौ अर उठै ऊं ले गिया। अर वे महायाजक रै घर ले गिया। अर पतरस थोड़ो छेटी ऊं उणरै लारै लारै आ रियौ हो।

55अर जद वे आंगणै मे वादी बाळनै भेळा बैठा, तो पतरस भी उणौरै बीच मे बैठ गियो।

56अर एक दासी उणनै वादी रै उजाळै मे बैठौ देखनै उणरी तरफ ताकनै कैवण लागी, “ओ मिनख भी उणरै साथै हो।”

57पण पतरस ओ कैहन इन्कार कियो, “हे नारी, म्हैं उणनै कोनीं जांणूं।”

58थोड़ी जेज पछै एक मिनख उणनै देखनै कयौ, “थूं भी तो उणौ मे ऊं एक है।” बल्कि पतरस बोल्यौ, “भला मिनख, म्हैं वो कोनीं हूं।”

59कोई घंटे भर पछै एक दूजै मिनख विसवास रै साथै कैवण लागौ, “पको ओ भी तो उणरै साथै हो। क्यूंकै देखौ ओ भी गलील वासी है।”

60पतरस कयौ, “भला मिनख, म्हैं कोनीं जांणूं थूं किणरै बारै मे बात कर रियौ है।” उण घड़ी वो बातां कर ही रिया हा की तुरत कुंकड़े बांग दी।

61तद परभु मुड़नै पतरस री तरफ देख्यौ, अर पतरस नै परभु री बात याद आई जिकौ उणै कही ही, “आज कुंकड़े रै बांग दैणै ऊं पैला, थूं तीन बार म्हारौ इन्कार करैला।”

62अर पतरस उठै ऊं बारै निकळनै जोर जोर ऊं रोवण लागौ।

63जिण मिनखौ रै यीसु नै पकड़योड़ौ हो, वे उणरी बेजती कर करनै ठोक रिया हा।

64अर यीसु रै आंख्यां ऊपर पटी बांधनै उण ऊं पूछण लागा, “भविसयवांणी करनै बता की थनै कीणै ठोकियो।”

65उणौ यीसु री बेजती करनै रै लियै उण ऊं वळै घणी बातां उणरै विरोध मे कही ही।

66जद दिन उगौ तो लोगां रा मुखिया अर परधान याजकौ अर सास्तरी भेळा होया, अर यीसु नै आपरी महासभा मे लैयनै गिया।

67उणौ यीसु ऊं पूछयौ, “म्हौ नै बता कांई थूं मसीह है?” यीसु उणौनै कयौ, “जे म्हैं थौरे ऊं कहूं तो थै म्हारौ विसवास कोनीं करौला।

68अर जे पूछूं तो थै जबाब कोनीं दो ला।

69बल्कि अबै ऊं म्हैं, मिनख रौ बेटौ, परम पिता परमेसर रै जीमणी तरफ बिठायौ जाऊंला।”

70वे सगळा बोल्या, “तो कांई थूं परमेसर रौ बेटौ है?” यीसु उणौनै कयौ, “थै आप साचौ कैवौ हो, क्यूंकै म्हैं हूं।”

71तद उणौ कयौ, “अबै अपांनै किणी रै गवाई री जरुत कोनीं है, क्यूंकै म्हौ आप ही इणरै मूंडै ऊं सुण लियौ है।”