Daniel 1

Nuer Bible © Bible Society in South Sudan 1998,2012

Jump to: Chapter 2 →

1Kɛ diɔ̱ɔ̱k runi ruëc kua̱r Juda ni Yɛ-ɣo-ya-kim, cu Nɛ-bu-kad-nɛ-dhar in la kuäär Bɛ̈-bi-lɔn ben kä Jɛ-ru-tha-lɛm kä cuɛ jɛ go̱l.

2Kä cu Kuäär ni Kuoth kuäär Juda ni Yɛ-ɣo-ya-kim la̱th tetni Nɛ-bu-kad-nɛ-dhar, kɛɛl kɛ tha̱a̱ŋ kuakni luaak Kuɔth. Kä cuɛ kɛ nööŋ ro̱o̱l Bɛ̈-bi-lɔn duëël kuɔthdɛ. Kä cuɛ kuak tɔ̱tɔ̱ la̱th guäth tɔ̱wä kuɔthdɛ.

3Kä cu kuäär bo̱o̱th ji̱ kɔaarɛ mi cɔal i̱ Ac-pɛ-nadh ja̱k kɛ ɣöö bɛ naath wä nööŋ kä ji̱ I-thɛ-rɛl thok duëël kuäärä kɛnɛ thok duëël in riäŋ ji̱kɛ.

4Kä akɛ la ŋuɛ̈tni ti thil diw, akɛ tekɛ maan pua̱a̱ny, akɛ tekɛ pɛl kɛnɛ ŋäc ŋɔaani. Kä akɛ la nɛy ti ŋa̱ckɛ la̱t dhɔr kua̱r, kä akɛ ŋi̱eeckɛ kɛ thok ji̱ Bɛ̈-bi-lɔn.

5Kä cu kuäär kɛ moc mi̱th ni rɛy mi̱thnikɛ, kɛnɛ kɔaŋ rɛy kɔaaŋnikɛ. Kɛ ɣöö bakɛ ŋi̱eec kɛ run da̱ŋ diɔ̱k, kɛ thuɔ̱k runi da̱ŋ diɔ̱k tɔ̱tɔ̱, bikɛ kuäär ben lätikä.

6Rɛy ŋuɛ̈tni tɔ̱tɔ̱ cua Da-ni-yel kɛnɛ Ɣä-nɛ̈n-yaa, kɛ Mi-ca-el kɛnɛ Ä-dhar-yaa, kɛn diaal kɛ ji̱ thuɔk duëël Juda.

7Kä cu bo̱o̱th ji̱ kɔaar kua̱r kɛ moc kɛ ciööt ti kɔ̱ŋ. Cuɛ Da-ni-yel cɔl i̱ Bel-tɛ-ca-dhar, kä cuɛ Ɣä-nɛ̈n-yaa cɔl i̱ Cad-rak, kä cuɛ Mi-ca-el cɔl i̱ Me-cak, kä cuɛ Ä-dhar-yaa cɔl i̱ Ä-bed-nɛ-go.

8Duundɛ ɣöö cu Da-ni-yel ɛ lo̱k ɛn ɣöö bɛ rɔɔdɛ ya̱r kɛ mi̱th kua̱r kɛnɛ kɔaaŋkɛ, cuɛ bo̱o̱th ji̱ kɔaar kua̱r thiec mi derɛ jɛ nhök ɣöö /cɛ rɔɔdɛ bi ya̱r.

9Kä cu Kuoth bo̱o̱th ji̱ kɔaar kua̱r moc nhök kɛnɛ kɔ̱a̱c lɔaac kɛ Da-ni-yel.

10Kä cu bo̱o̱th ji̱ kɔaar kua̱r ruac kɛ Da-ni-yel wëë i̱, “Ɣän luɔ̱thä ɣöö bi kuäärä mëë moc yɛ kɛ mi̱th kɛnɛ kɔaaŋ ji̱ nɛn nuäni rɛy ŋuɛ̈tni tin la ri̱cniku. Kɛ ɛnɔ ji̱n bi nöŋ ni ɣä riɛk mi bi kuäär ɛ ŋok ni wi̱cdä.”

11Kä cu Da-ni-yel ruac kɛ gääŋ ëë ci Ac-pɛ-nadh bo̱o̱th ji̱ kɔaar kua̱r ɛ kuëny jɛ kɛnɛ Ɣä-nɛ̈n-yaa kɛ Mi-ca-el kɛnɛ Ä-dhar-yaa wëë i̱,

12“Ɣɔ̱n kɔ kɛ ni̱n da̱ŋ wäl, moc ni kɔ kɛ wal tin tɔ̱ɔ̱c ti bakɔ cam kɛnɛ pi̱ tin ca̱a̱r ti bakɔ math.

13Kɛ kɔrɛ bia ta̱a̱da kɛnɛ ta̱a̱ ŋuɛ̈tni tin camkɛ mi̱th ti̱lä kua̱r guic, bia cu lät kɛ min cia nɛn.”

14Kä cuɛ ruac ɛ mɔ liŋ, cuɛ kɛ ɣɔ̱n kɛ ni̱n da̱ŋ wäl.

15Kä kɛ thuɔ̱k ni̱ni da̱ŋ wäl cuɛ jɔɔc ɛn ɣöö cu gɔw ni pua̱nykiɛn kä pua̱ny ŋuɛ̈tni diaal tëë camkɛ ni mi̱th ti̱lä dhɔaar kua̱r.

16Kä cu gääŋ mi̱thkiɛn kɛnɛ kɔaaŋkiɛn cua woc, kä cuɛ cua la kämɛ nikɛ wal tin tɔ̱ɔ̱c ɛla mi̱ethdiɛn.

17Kä kɛn ŋuɛ̈tni da̱ŋ ŋuaan tɔ̱tɔ̱, cu Kuoth kɛ moc ŋäc ŋɔaani kɛnɛ tiit kɛ tëë diaal tëë ca ŋi̱i̱cnikɛ, kä cuɛ kɛ moc kɛ pɛl, kä cu Da-ni-yel tekɛ muc mi la ŋäcɛ ni luɔt la̱a̱kni diaal kɛnɛ nyuuthni.

18Kä mëë ci gua̱a̱th ëë ci kuäär ɛ lat ɛn ɣöö ba naŋ nikɛ thuɔ̱k, cu Ac-pɛ-nadh bo̱o̱th ji̱ kɔaar kua̱r kɛ nööŋ nhiam Nɛ-bu-kad-nɛ-dhar.

19Kä cuɛ ruac kɛ kɛ, kä cuɛ thil raan kä kɛn diaal mi cu pa̱a̱r kɛ Da-ni-yel kɛnɛ Ɣä-nɛ̈n-yaa, kɛ Mi-ca-el kɛnɛ Ä-dhar-yaa. Kɛ kui̱c ɛmɔ cukɛ lät rɛy kal kua̱r.

20Kä nyin pɛlä diaal kɛnɛ ŋäc ŋɔaani mëë ci kuäärɛ thiec nikɛ, cuɛ kɛ jek lënykɛ göök ka̱a̱cni kɛnɛ ti̱t rɛy kuäärädɛ ni kä wäl.

21Kä cu Da-ni-yel te ɛn wi̱ni amäni ruɔ̱n ruëc kua̱r ni Ko-rɛc in jio̱liɛn.

Jump to: Chapter 2 →