Daniel 9

Nuer Bible © Bible Society in South Sudan 1998,2012

← Chapter 8 Jump to: Chapter 10 →

1Kɛ ruɔ̱n ruëc Dɔr-ya-wɛc gat Ä-ɣɛ̈c-we-roc in nhiam, kä kɛ di̱eth ɛ raan rööl Ma-day mëë cua jakä kuäär rɛy kuäärä Bɛ̈-bi-lɔn.

2Kɛ ruɔ̱n ruëcdɛ min jio̱l, ɣän Da-ni-yel cua̱ jɛ ŋa̱c rɛy buɔkni ce̱tnikɛ rieet Kuɔth Nhial tëë nyuthɛ gök ni Yir-mɛ-yaa ɛn ɣöö bi Jɛ-ru-tha-lɛm te däkä kɛ run ti jiɛn bärɔw.

3Inɔ ɣän cua̱ wi̱cdä luɔ̱c Kuäär ni Kuoth kɛ pal kä cua̱ mi̱th thɛk kä cua̱ ciɛŋ ni bieyni cuali, kä cua̱ wi̱cdä moc ŋɛ̈th kɛ kui̱ jiɛthä lɔaac.

4Kä cua̱ Kuoth Nhial ni Kuothdä pal kä cua̱ dueerkä lat wa̱a̱ i̱, “Aɣ, Kuäär ni Kuoth, ji̱n di̱tdi kä luɔ̱thkɛ ji̱, kä kääpi mat ruac kɛnɛ nhök mi thil pek kɛ nɛy tin nhɔakɛ ji̱ kä ka̱pkɛ ŋuɔ̱tku.

5Cakɔ duer, kä cakɔ jiäk la̱t, cakɔ nyuɔɔn la̱t, kä cakɔ loc jɔk dupdu, kä cakɔ luëëku kɛnɛ ŋuɔ̱t ya̱r.

6/Ka̱n kɔ ruac ja̱a̱ŋniku ni göök liŋ, tëë ruac kɛ ciötdu nhiam kua̱rikɔ, kɛnɛ ruëëckɔ kɛ gua̱ndɔɔŋnikɔ amäni ji̱ wec diaal.

7“Gɔɔy ɛ duuŋdɛ lö Kuäär ni Kuoth. Duundɛ ɣöö kɔn cakɔ tekɛ buar ɛn walɛ kɔn ji̱ Juda kɛnɛ Jɛ-ru-tha-lɛm kɛ ji̱ I-thɛ-rɛl diaal tin kɔ̱ŋ, tin te thiäkä kɛnɛ tin nɔ̱a̱n. Rɛy wi̱i̱ni diaal tin cikɛ kiɛth thi̱n kɛ ɣöö cakɔ ji̱ lät kä ti jiäk.

8Ci buar kɛnɛ pöc kɔ kum lö Kuoth Nhial kɛɛl kɛ kua̱rkɔ kɛnɛ ruëëckɔ, kɛ gua̱ndɔɔŋnikɔ, kɛ ɣöö cakɔ ji̱ duer duer.

9Kä ji̱n Kuothda ti̱i̱kɛ kɔ̱a̱c lɔaac kɛnɛ pälikä, a cäŋ cakɔ rɔ̱ luɔ̱c ji̱.

10Kä /ken kɔn jɔw Kuɔth Nhial ni Kuothdan liŋ, kä /ken kɔn ŋuɔ̱tkɛ tëë ca la̱t kɔn ɛ ja̱a̱ŋkɛ ni göök tit.

11Ji̱ I-thɛ-rɛl diaal cikɛ ŋuɔ̱tku töl, kä cikɛ rɔ̱ ri̱t kä ji̱ kä /kenkɛ jɔwdu luɔ̱th. Kɛ kui̱ ɛmɔ, ci kuëth kɛnɛ bit kɛ ya̱c tin ca gɔ̱r rɛy ŋuɔ̱tni Muthɛ in la ja̱ŋ Kuɔth, cikɛ pɛn wi̱i̱da, kɛ ɣöö cakɔ ji̱ duer duer.

12Ci ruac ëë ca lat kɛ kui̱da kɛ ruëëckɔ jakä thuɔ̱k, kɛ ɣöö cikɔ nöŋ da̱k ɛ di̱i̱t ɛmɛ. Kɛ ɣöö thilɛ mi ce̱tkɛ nɛmɛ, mi ca lät kä Jɛ-ru-tha-lɛm ɛ, mi ca kɔŋ la̱t wi̱i̱ muɔ̱ɔ̱n.

13Ce̱tnikɛ min ca gɔ̱r rɛy ŋuɔ̱tni Muthɛ, ci rik diaal ti̱ti̱ ben kä kɔ, kä ŋotdɛ /ci nɛy nhök Kuɔth Nhial ni Kuothda go̱r, a bakɔ rɔ̱ ri̱t kä dueerkɔ, kä bakɔ nhɔk ni thuɔ̱kdu.

14Kɛ kui̱ ɛmɔ, /ken Kuoth Nhial lɛ gaal kɛ no̱ŋda rik ti̱ti̱. Kɛ thuɔ̱k Kuoth Nhial ni Kuothda gɔaaɛ kä lätkɛ diaal tin lätdɛ. Kä ŋotdɛ /ken kɔn jɛ luɔ̱th.

15“Täämɛ lö Kuoth Nhial ni Kuothda mëë no̱o̱ŋ nɛɛkɛ raar muun I-jëp kɛ buɔ̱m mi di̱i̱t, kä curi ciötdu jakä ŋa̱ckɛ amäni walɛ, kɔn cakɔ duer kä cakɔ ti jiäk la̱t.

16Kä kɛ ti̱etdu kɛ gɔɔydu lö Kuäär ni Kuoth, pal nɛy ni ji̱, ku ŋɛ̈ɛ̈nydu kɛnɛ waŋ lɔaacdu päl kɛ kui̱ wecdu ni Jɛ-ru-tha-lɛm wi̱c pa̱a̱mdu min rɛl rɔ. Kɛ kui̱ dueerikɔ kɛnɛ dueer gua̱ndɔɔŋnikɔ ca Jɛ-ru-tha-lɛm kɛnɛ nɛɛku moc kɛ buar kä nɛy diaal tin thieek kɛ kɔ.

17Kä kɛ kui̱ ɛmɔ, lö Kuothda, ku pal kɛnɛ pa̱r ja̱a̱ŋniku liŋ, kä kɛ kui̱ cio̱tädu lö Kuäär, locni luaakdu mëë ca kɔŋ däk thi̱n.

18Gäŋ ji̱thdu lö Kuothdä, kä liŋ ɣä. Bër lɛp nyinku kä nɛn riɛk in ta̱kɔ thi̱n riɛk wec in pal kɛ ji̱ thi̱n. /Cakɔ ji̱ pal kɛ kui̱ kä ɣöö gɔw nɛy, palkɔ ji̱ kɛ kui̱ kɔ̱cä lɔaacdu min di̱i̱t.

19Aɣ Kuäär ni Kuoth, li̱ŋni, lö Kuäär ni Kuoth päli nɛy ikä, li̱ŋni kä lätni duɔ̱ɔ̱r! Kɛ kui̱ gɔɔyädu lö Kuothdä kɛnɛ kui̱ nɛɛniku kɛ wecdu, tin ciölkɛ ji̱.”

20Kä mëë ruacä kä palä kä latdä dueerkä kɛnɛ dueer nɛɛnikä ni ji̱ I-thɛ-rɛl kä thiëëcä Kuoth Nhial ni Kuothdä kɛ kui̱ pa̱a̱mdɛ min rɛl rɔ.

21Kä min palä cu jääk ni Gab-ri-yel ëë cä kɔŋ nɛn kɛ la̱k ben kä ɣä kɛ pɛ̈th kɛ gua̱a̱th thiaŋ in la thöpkɛ muc tin waŋkɛ.

22Kä cuɛ ruac kɛ ɣä wëë i̱, “Da-ni-yel, täämɛ ɣän cä ben kɛ ɣöö bä ji̱ ben moc kɛ pɛl kɛnɛ ŋäc ŋɔaani.

23Kɛ min tooki pal, cua ji̱ loc, ɣän ba̱a̱ kɛ ɣöö bä jɛ ben la̱r ji̱ kɛ ɣöö ji̱n ci nhök jek kä Kuoth. Kɛ kui̱ ɛmɔ car ruac, kä ŋäcni luɔt läkä.

24“Kɛ run ti kur ŋuaan wi̱cdɛ jiɛn bäŋuan ba jɛn pek gua̱th in ba lony ni nɛɛku kɛnɛ wecdu min rɛl rɔ kä duer kɛnɛ jiäk. Ba dueer päl, kä bi ciaŋ päärä cu ben, kä bi ruaacni go̱o̱kä kɛnɛ nyuuth cua̱ thuɔ̱k, ba luak Kuɔth in rɛl gɔɔydɛ rɔ cu nyɔk kɛ lëy.

25Ŋäcni nɛmɛ kä liŋɛ, nikɛ gua̱a̱th in ca lat ni ruac kɛ nyɔak ta̱th Jɛ-ru-tha-lɛm amäni gua̱a̱th in bi ben kɛ kuäär in ci Kuoth ɛ mɛk, bi pek gua̱th ɛmɔ la run ti jiɛn ŋuaan wi̱cdɛ bäŋuan. Kä kɛ kɔr runi ti kur ŋuaan wi̱cdɛ jiɛn diɔ̱k wi̱cdɛ ŋuaan, ba wec nyɔk kɛ ta̱th kɛ caari kɛ, kä duundɛ ɣöö bi gua̱a̱th ɛmɔ a gua̱a̱th rikä.

26Kä kɛ kɔr runi ti kur ŋuaan wi̱cdɛ jiɛn diɔ̱k wi̱cdɛ ŋuaan, ba kuäär in ci Kuoth ɛ mɛk näk, kä bɛ thil mi tekɛ jɛ, kä ba wec kɛnɛ luak Kuɔth ben däk ɛ rɛm kua̱r in bi ben. Kä bi guut wec cu ben ce̱tkɛ nyɔc, kä bi ko̱r cu te thi̱n amäni guut. Bɛ cua̱ jɛn da̱k in ca lar.

27Kä jɛn kuäär ɛmɔ, bɛ mat ruac mi bum la̱t kɛ nɛy ti ŋuan kɛ run da̱ŋ bärɔw. Kä kɛ run da̱ŋ diɔ̱k kɛ nuth runi tɔ̱tɔ̱, jɛn bɛ muc tin thöpkɛ kɛnɛ muc tin waŋkɛ ka̱p cuɔ̱ŋ. Kä bɛ gua̱a̱th mucni tɔ̱tɔ̱ guäl kɛ mi jiäk, kä bɛ ti jiäk la̱t amäni mi ci Kuoth ruac ka̱p cuɔ̱ŋ min bi pɛn kä ram in no̱o̱ŋ da̱k.”

← Chapter 8 Jump to: Chapter 10 →