Daniel 10

Nuer Bible © Bible Society in South Sudan 1998,2012

← Chapter 9 Jump to: Chapter 11 →

1Kɛ diɔ̱ɔ̱k runi ruëc kua̱r Pa-rath ni Ko-rɛc, cu ruac ben kä Da-ni-yel min cɔalkɛ bä i̱ Bel-tɛ-ca-dhar. Jɛn ruac ɛ thuɔ̱k, kä ruacɛ kɛ kui̱ köör mi di̱i̱t. Kä cu Da-ni-yel luɔt ruac ŋa̱c, kɛ ɣöö ca nyuɔ̱th jɛ rɛy läkä.

2Kɛ jɛn gua̱a̱th ɛ mɔ, ɣän Da-ni-yel ta̱a̱ pärä mi di̱i̱t kɛ juɔkni da̱ŋ diɔ̱k.

3Kä thilɛ mi̱eth mi gɔaa mi camä, cuɛ thil ri̱ŋ kiɛ kɔaŋ mi cua̱ la̱th thokdä, kä /ka̱n puɔ̱nydä yi̱r kɛ kɛn juɔkni da̱ŋ diɔ̱k tɔ̱tɔ̱.

4Kä kɛ cäŋ kä jiɛn da̱ŋ rɛw wi̱cdɛ ŋuaan kä pay in jio̱l, mëë ta̱a̱ cuŋä wi̱i̱ kiɛɛr in di̱i̱t (ala kir Ti-gɛ-rith),

5cua̱ guic, kä cua̱ wut mi tekɛ bi̱i̱ mi gɔaa kɛ la̱a̱k dääpä mi lɛy lɛy mi cɛ yiɛni lɛ̈tdɛ nɛn.

6Kä puɔth puɔ̱nydɛ ce̱tdɛ nikɛ ciɛk, kä jaŋ nhiamdɛ ce̱tnikɛ yiel nhial, kä räŋ nyinkɛ ce̱tnikɛ mac patariɛy, kä bil ɣa̱a̱mkɛ kɛnɛ wuɔ̱ɔ̱kɛ ce̱tnikɛ ciɛk in yian mi ca toth, kä jɔwdɛ ce̱tdɛ nikɛ jɔw nɛɛni ti ŋuan ɛlɔ̱ŋ.

7Ɛ ɣän Da-ni-yel kä rɔa ɛ nëë nɛɛn nyuuth, /ken nɛy tëë te kɛɛl kɛ ɣä jɛ nɛn, a cäŋ ɛ mëë cɛ kɛ kuer dual mi di̱i̱t ɛlɔ̱ŋ, kä cukɛ rɔ̱ bar a cukɛ rɔ̱ wä tɛ̱̈ɛ̱̈.

8Kä ɛ jɛn cu duɔth ni ɣän kä rɔa, guɛcä nyuuth ɛ di̱i̱t ɛ mɔ. Cu buɔ̱mdä thil, cu nhiamdä buay ce̱tkɛ ram mi ci li̱w, cua̱ thil lua̱ŋ.

9Kä cua̱ jɔwdɛ liŋ ruacɛ, kä mëë cä ruacdɛ liŋ cuɛ puɔ̱nydä ŋɛr cua̱ tɛɛth buupä.

10Kä duundɛ ɣöö cuɛ tekɛ tet mi cu ɣä jiɛ̈c nhial, kä cuɛ ɣä jakä yiathä mua̱a̱lkä kɛnɛ tetkä piny.

11Kä cuɛ ɣä jiök i̱, “Da-ni-yel in nhɔakɛ ɛlɔ̱ŋ, liŋ ruaacni tin bä la̱t ji̱. Cuŋni kɛ ciöku, kɛ ɣöö ɣän ca ɣä jäk kä ji̱.” Kä min ŋotdɛ lätdɛ ɣä rieet ti̱ti̱, cua̱ jiɛc kä lathɛ ɣä.

12Kä cuɛ ɣä jiök i̱, “/Cu dual Da-ni-yel, kɛ ɣöö nikɛ cäŋ ëë nhiam mëë go̱o̱ri ŋäc ŋɔaani mëë jaki rɔ kä kui̱c nhiam Kuɔthdu, ji̱n ca ruacdu liŋ, ɣän ba̱a̱ kɛ kui̱ ruacdu.

13Duundɛ ɣöö cu jääk in gaŋ kuäär Pa-rath gaak kɛ ɣä kɛ ni̱n ti jiɛn da̱ŋ rɛw wi̱cdɛ kɛl. Inɔ, cu Mi-ka-el kuäär ja̱a̱kni ɣä ben luäk, kɛ ɣöö ca ɣä gaŋ piny ɛn wi̱ni kɛɛl kɛ kuäär Pa-rath.

14Ɣän ba̱kɛ kɛ ɣöö bä ji̱ ben luäk kɛ ŋäc kä min bi tuɔɔk kä nɛɛku kɛ ni̱n tɔ̱ bi ben tɔ̱. Kɛ ɣöö ɛn nyuuth ruacɛ kɛ gua̱a̱th ɔ bi ben ɔ kɛ nhiam.”

15Kä min lätdɛ ɣä rieet ti̱ti̱, cua̱ wi̱cdä guɔ̱l piny kä /cä rɔɔdä luäŋ kɛ ruac.

16Kä cu mi ce̱tkɛ raan thokdä thiap, kä cua̱ thokdä lɛp kɛ ɣöö bä ruac, kä cua̱ ram in te cuŋä nhiamdä jiök i̱, “Kuäärä, kɛ kui̱ nyuuthä mɛmɛ, ci puɔ̱nydä bɛ̈c, kä cä thil buɔ̱m.

17Ji̱n kuäärä dee ja̱ŋdu kulɛ ruac kɛ ji̱ i̱di? Kä ɣän lathɛ ni ɣä, ɣän ci buɔ̱mdä thuuk, kä ci yieykä joor.”

18Kä cu mi ce̱tkɛ raan ɣä nyɔk kɛ thiëp, kä cuɛ ɣä jakä bum.

19Kä cuɛ ɣä jiök i̱, “/Cu dual ji̱n ram in nhɔakɛ ɛlɔ̱ŋ, ca ji̱ kän. Bumni kä bum lɔcdu!” Mëë cɛ ruac kɛ ɣä cua̱ tekɛ buɔ̱m, kä cua̱ jɛ jio̱k i̱, “Ruacni lö Kuäärä, kɛ ɣöö ci ɣä jakä bum.”

20Kä cuɛ ɣä jiök i̱, “Ji̱n ŋäc i̱ jɛ ɛŋu mi bäkɛ ɣä kä ji̱? Täämɛ ɣän bä loc jɔk bä wä nyiëëny kɛ jääk in la gääŋ kuäärä Pa-rath, kä mi wa̱a̱ wä thuɔ̱k kɛ ko̱rɛ, bi jääk jääk in la gääŋ kuäärä Gɛ-rith ben.

21Duundɛ ɣöö ɣän ba̱kɛ kɛ ɣöö bä ji̱ ben la̱r min ca gɔ̱r kä bok thuɔ̱ɔ̱kni. Kä thil ram kɛl mi bi ɣä luäk kɛ ko̱riɛn kɛn ja̱a̱k ti̱ti̱, ɛni Mi-ka-el min la jääk ji̱ I-thɛ-rɛl.

← Chapter 9 Jump to: Chapter 11 →