Daniel 7

Nuer Bible © Bible Society in South Sudan 1998,2012

← Chapter 6 Jump to: Chapter 8 →

1Kɛ ruɔ̱n ruëc kua̱r Bɛ̈-bi-lɔn ni Bel-ca-dhar in jio̱liɛn, cu Da-ni-yel la̱k läkikä mëë tëë tɔ̱ɔ̱cä rɛy dhaŋädɛ. Kä cuɛ la̱k ɛmɔ gɔ̱a̱r piny.

2Kä cu Da-ni-yel wee i̱, “Ɣän Da-ni-yel cua̱ nyuuth nɛn läkädä kɛ wäär, cu jiɔam, puɔ̱t pëkni nhial da̱ŋ ŋuaan, kä cuɛ pi̱ baar wäl ɛlɔ̱ŋ,

3kä cu ley da̱ŋ ŋuaan ti di̱t päl raar rɛy yiëër, kä te ley ɔ kɛ cäkdɛ mi rɛlɛ kä tin kɔ̱kiɛn.

4Kä ley in jio̱liɛn cäätdɛ kɛ lony kä tëë kɛ gɔ̱k ti ce̱tkɛ gɔ̱k cuɔr. Kä cua̱ te gui̱cdɛ, amäni min cua gɔ̱kɛ nɛn ca rɔ̱ guth, kä cua jɛ kap nhial piny cuɛ cuɔ̱ŋ kɛ ciök da̱ŋ rɛw ce̱tkɛ raan, kä cua jɛ moc kɛ ca̱r mi ce̱tnikɛ ca̱r ran.

5Kä cu ley in rɛwdɛ lɛni jɔɔc cäätdɛ kɛ kuaylɛt. Kä cua jɛ kap nhial peek kɛl kä te thokdɛ kɛ nyiët da̱ŋ diɔ̱k kamni lɛckɛ, kä cua jɛ jiök i̱, ‘Jiɛc ni rɔ nhial, bër mi̱thnikɛ ri̱ŋ amäni mi ci ria̱ŋ!’

6Kɛ kɔr kä mɛmɛ min ta̱a̱ gui̱cdɛ cu ley in diɔ̱ɔ̱kdiɛn ben cäätdɛ kɛ kuac. Kä jɛn tëëkɛ gɔ̱ɔ̱k da̱ŋ ŋuaan jɔɔkdɛ ce̱tkɛ dit, kä jɛn tëë kɛ wuɔ̱th da̱ŋ ŋuaan. Kä ca buɔ̱m ka̱m jɛ.

7Kɛ kɔr kä ti̱ti̱ cua̱ ley in ŋuaandiɛn lɛni nɛn bä nhiamdä rɛy läkädä kɛ wäär, ɛ ley mi bɛc bɛc mi jak naath kä dual kä jɛn bumɛ ɛlɔ̱ŋ. Tëë kɛ lɛc ladiɛt ti di̱t ti la camɛ ni min cɛ näk, kä la dɔnyɛ min ci duɔth kɛ ciökɛ. Kä jɛn tëë kɛ dääk mi di̱i̱t kɛ ley tin cä kɔŋ nɛn kɛ nhiam, jɛn tëë kɛ tuɔ̱ŋ da̱ŋ wäl.

8Kä min ta̱a̱ gui̱c tuɔ̱ŋni, cu tuŋ mi dɔ̱ŋ päl, ɛ tuŋ mi tɔt, cuɛ päl dääriɛn, kɛ ɣöö bɛ kulɛ tekɛ gua̱a̱th, cua tuɔ̱ŋ da̱ŋ diɔ̱k ka̱m raar kä tuɔ̱ŋ tin nhiam. Kä ɛn tuŋ ɛmɔ tëë kɛ nyin ti ce̱tkɛ nyin ran, kɛ thok mi ruac ni liakä.”

9“Kä min ta̱a̱ gui̱c, cua̱ kɔamni kuäärä nɛn cakɛ la̱th guäth, kä cu Ram in do̱raar nyuur wi̱i̱ kɔam kuäärädɛ. Kä buɔy bieynikɛ ce̱tnikɛ cak, kä buɔy miem wecdɛ ce̱tnikɛ lath. Kä kɔmdɛ bo̱lɛ ce̱tnikɛ mac kä ciök kɔamdɛ pɛtkɛ ala mac.

10Kä te nhiamdɛ kɛ kir maac mi lo̱ny ce̱tkɛ pi̱w. Kä la̱tkɛ jɛ ikä ɛ ja̱a̱ŋ ti bathdɔɔri ti ŋuan kä te nɛy ti bathdɔɔri ti kur wäl kä kuɔ̱r cuŋä nhiamdɛ. Kä cua luk nyuɔ̱ɔ̱r i̱ nɔ, kä ca buɔkni lɛp.

11Kä cua̱ gui̱c kɛ ɣöö tuŋ rɔalɛ kɛ rieet liakä ti latdɛ kɛ jɔw mi di̱i̱t. Kä min ta̱a̱ gui̱c cua ley näk, kä cua puɔ̱nydɛ däk a cua ri̱ŋdɛ waŋ kɛ mac.

12Kä kɛ kui̱ leyni tin kɔ̱kiɛn, cua woc ni buɔ̱mdiɛn kä cukɛ te teekä kɛ gua̱a̱th mi tɔt.

13Kä min guɛcä nyuuthni kɛ wäär, cua̱ kɛl mi ce̱tkɛ raan nɛn bëë kɛɛl kɛ pua̱a̱r nhial, Kä cuɛ ben wëë kä Ram in do̱raar, kä cua jɛ nöŋ jɛ nhiamdɛ.

14Kä cua jɛ ka̱m wuɔ̱t kɛ buɔ̱m kɛnɛ ruec, kɛ ɣöö bi naath kɛnɛ döör diaal tin ruac kɛ thuk gööli jɛ lätikä. Kä bi ruecdɛ cua̱ ruec mi do̱raar mi /ci bi met thuuk, kä kuäärɛ la ni kɛl mi /ca bi met däk.”

15“Kɛ kui̱dä ɣän Da-ni-yel cu yiëëdä bɛ̈c rɛydä, kä cu la̱a̱kä ɣä moc kɛ dual mi di̱i̱t.

16Kä cua̱ ram mi te cuŋä ɛn wa̱nɔ thiec kɛ min lot ti diaal ti̱ti̱ jɛ. Kä cuɛ ɣä la̱t min lot ti diaal ti̱ti̱ jɛ wëë i̱,

17‘Kɛn ley da̱ŋ ŋuaan tin di̱t kɛ kuääri da̱ŋ ŋuaan ti di̱t ti bi ben nhial rɛy ɣɔaa.

18Duundɛ ɣöö bi nɛy tin ŋa̱thkɛ ni Kuoth in Di̱t ni Jɛn ruec jek, kä ba kuäär ɛmɔ käp amäni cäŋ kɛl niɛ täämɛ a wee wä.’

19“Kä cua̱ jɛ go̱r ɛn ɣöö bä thuɔ̱k ŋa̱c kɛ kui̱ lɛ̱̈ɛ̱̈ in ŋuaandiɛn. Min tekɛ dääk kɛ ley diaal tin kɔ̱kiɛn, min dual naath kɛ jɛ ɛlɔ̱ŋ, min tekɛ lɛc ladiɛt kɛnɛ rio̱p yieethä min yian, jɛn ley in la cam min cɛ näk, kä la dɔnyɛ min ci duɔth kɛ ciökɛ.

20Kä göörä ɣöö bä thuɔ̱k ŋa̱c kɛ kui̱ tuɔ̱ŋnikɛ da̱ŋ wäl tin te wi̱i̱dɛ amäni tuŋ in dɔ̱diɛn in ci päl, min cu tuɔ̱ŋ da̱ŋ diɔ̱k thuɔ̱c raar, jɛn tuŋ in tekɛ nyin kɛnɛ thok min ruac ni liakä, min ce̱t di̱t ni jɛn kä tin kɔ̱ŋ.

21Kä min ta̱a̱ gui̱c jɛn tuŋ ɛmɔ cuɛ nyiëëny kɛ nɛy tin ŋa̱thkɛ Kuoth kä cuɛ kɛ joc,

22amäni mëë cu Ram in do̱raar ben. Kä cuɛ luk ben luk cuɛ nɛy tin la nɛɛ Kuɔth in Di̱t ni Jɛn ka̱m cuɔ̱ɔ̱ŋ, kä cu gua̱a̱th ben kɛ ɣöö bi nɛɛ Kuɔth Kuäär ka̱n.

23“Kä cuɛ ɣä la̱t luɔt kä mɛmɛ wëë i̱, ‘Kä kɛ kui̱ lɛ̱̈ɛ̱̈ in ŋuaandiɛn, bɛ tekɛ kuäär mi ŋuaandiɛn wi̱i̱ muɔ̱ɔ̱n, kä bɛ tekɛ dääk kɛ kuääri diaal tin kɔ̱kiɛn, kä bɛ wi̱c muɔ̱ɔ̱n däk ni kɛɛliw bɛ jɛ dɔany nikɛ ciökɛ a bɛ jɛ dup.

24Kä kɛ kui̱ tuɔ̱ŋni da̱ŋ wäl, rɛy kuäärä mɛmɛ bi kua̱r da̱ŋ wäl rɔ̱ jiɛc thi̱n, kä bi kuäär mi dɔ̱ŋ lɔ̱ɔ̱ ben kɔɔriɛn. Kä jɛn kuäär ɛmɔ bɛ tekɛ dääk kɛ kua̱r tëë nhiam, kä bɛ kua̱r da̱ŋ diɔ̱k woc.

25Kä jɛn kuäär ɛmɔ bɛ ruac ɛ jiäk kɛ Kuoth in Di̱t ni Jɛn, kä bɛ nɛɛ Kuɔth in Di̱t ni Jɛn cuc, kä bɛ jɛ ɣɔ̱n ɛn ɣöö gɛɛrɛ gua̱th ti̱mä kɛnɛ ŋuɔ̱t kä ba nɛɛ Kuɔth la̱th tetädɛ kɛ run da̱ŋ diɔ̱k kɛ nuth.

26Kɛ kɔrɛ bi luk nyuur luɔ̱kɛ luk, kä ba buɔ̱mdɛ cu woc kä jɛ, kä ba jɛ cu däk amäni cäŋ kɛl.

27Kä ba kuäär kɛnɛ buɔ̱m kɛ di̱t kuäärä wec muɔ̱ɔ̱n kɛɛliw ka̱m nɛy tin ŋa̱thkɛ Kuoth in Di̱t ni Jɛn. Kä bi kuääriɛn cua̱ kuäär mi do̱raar, kä bi kua̱r diaal kɛ lätikä, kä bakɛ luɔ̱th.’

28“Cuɛ cua̱ jɛn thuɔ̱k duɔ̱ɔ̱rä ɛn nɔmɔ. Kä kɛ kui̱dä ɣän Da-ni-yel, cu cärkä ɣä moc dual mi di̱i̱t, kä ci nhiamdä rɔ juan, duundɛ ɣöö cä mɛmɛ käp kɛ wi̱cdä.”

← Chapter 6 Jump to: Chapter 8 →