Daniel 11 — Nuer Bible © Bible Society in South Sudan 1998,2012

1“Luäkɛ ɣä kɛ ɣöö cä jɛ kɔŋ luäk mëëdan kɛ jio̱l ruëc Dɔr-ya-wɛc mëë la kuäär Ma-day.

2“Kä ɣän täämɛ bä ji̱ la̱r thuɔ̱k. Bi kua̱r da̱ŋ diɔ̱k rɔ̱ jiɛc kä Pa-rath. Kä ŋuaandiɛn bi ria̱ŋ ni jɛn kä kɛn diaal, kä mi wëë buɔ̱m wä jek kɛ ria̱ŋdɛ, bɛ nɛy diaal kuɔ̱ɔ̱th kɛ kuäär Gɛ-rith.

3Kä bi kuäär mi wääth rɔ jiɛc, bɛ ruëc kɛ buɔ̱m mi di̱i̱t kä bɛ la̱t ni min cɛ go̱r kɛ lɔcdɛ.

4Kä min reep buɔ̱mdɛ rɔ, bi kuäärɛ da̱k kä ba jɛ dääk kä pëkni ɣɔaa da̱ŋ ŋuaan, /ci kuäärɛ bi wä kä kuaykɛ, kä /cikɛ bi buɔ̱m kɛ buɔ̱m ëë ruec kɛ jɛ, kɛ ɣöö ba kuäärɛ woc kä ba jɛ ka̱m nɛy kɔ̱kiɛn.

5“Inɔ, bi kuäär I-jëp tekɛ buɔ̱m, duundɛ ɣöö bi ram kɛl kä bööth rɛ̈mdɛ buɔ̱m ni jɛn ɛlɔ̱ŋ kä jɛ kä bɛ kuäär ruac kɛ buɔ̱m mi di̱i̱t.

6Kɛ kɔr runi bikɛ mat la̱t, kä ba nya kua̱r I-jëp kuɛn ɛ kuäär Thi-ri-ya kɛ ɣöö bikɛ tekɛ mal. Duundɛ ɣöö /ci buɔ̱mdɛ bi jääny kä /ci gaatkɛ bi tëk. Kä ɛn ni̱ni, tɔ̱tɔ̱ jɛn ciek kɛnɛ ji̱ maarädɛ kɛ gatdɛ kɛ ram ɔ luäk jɛ mɔ bakɛ thöp.

7“Duundɛ ɣöö bi ram kɛl kä ji̱ maarädɛ rɔ jiɛc mi bia kuäär kɛ gua̱a̱thdɛ. Kä bɛ rɛm kua̱r kuec caam mak, kä bɛ coth ni ti̱ecni tin buɔ̱m buɔ̱m, bɛ nyiëëny kɛ kɛ kä bɛ kɛ joc.

8A cäŋɛ ni kuthkiɛn kɛnɛ kolaaŋkiɛn kɛɛl kɛ kuakiɛn tin di̱t kökdiɛn, tin ca la̱t kɛ ciɛk in bo̱r kɛnɛ da̱a̱p bɛ kɛ naŋ kä I-jëp ɛla pɛ̈ɛ̈c köör. Kä bɛ mak kua̱r a Thi-ri-ya päl kɛ run.

9Kɛ jɔak, bi kuäär Thi-ri-ya I-jëp mac, duundɛ ɣöö bɛ rɔ nyɔk kɛ loc wi̱i̱dɛ.

10“Kä bi gaatkɛ rɔ̱ rialikä kɛ ko̱r, kä bikɛ rɛm mi di̱i̱t dol, kä bikɛ ko̱r kap ɛ bääp kɛnɛ ce̱tkɛ nyɔc mi bääp, kä bi ko̱r wä räth ni ti̱ecni kua̱r I-jëp tin buɔ̱m buɔ̱ɔ̱m.

11Kä bi kuäär I-jëp rɔ jiɛc kɛ ŋɛ̈ɛ̈ny mi di̱i̱t bɛ wä nyiëëny kɛ kuäär Thi-ri-ya, kä bɛ rɛm kua̱r Thi-ri-ya min di̱i̱t in cɛ dol käp, kä bɛ jɛ joc.

12Kä mi wä rɛm mi di̱i̱t käp, bi kuäär I-jëp rɔ liak, kä bɛ nɛy ti bathdɔɔri ti ŋuan näk, duundɛ ɣöö /cɛ bi ŋot kɛ juɔ̱c nath.

13Kɛ ɣöö bi kuäär Thi-ri-ya rɛm mi di̱i̱t mi leny ni rɛm ëë nhiam nyɔk kɛ duɔ̱l. Kä kɛ kɔr runi, bɛ ko̱r kap kɛ rɛm mi di̱i̱t mi tekɛ kuak köör diaal.

14“Kä kɛ kɛn gua̱th tɔ̱tɔ̱, bi nɛy ti ŋuan rɔ̱ luɔ̱c kuäär I-jëp. Amäni nɛy tin nhɔakɛ ko̱r kä nɛɛkun, bikɛ rɔ̱ jiɛc wäkɛ ko̱o̱r kɛ ɣöö bi la̱k cua̱ thuɔ̱k, duundɛ ɣöö bakɛ joc.

15Kä bi kuäär Thi-ri-ya ben, bɛ päny wec lätkä ko̱o̱tni kä bɛ jɛ go̱l, kä bɛ wec in bum käp. Kä /ci rɛm kua̱r I-jëp bilɛ cuɔ̱ŋ nhiamdɛ, a cäŋɛ ni rɛmdiɛn in ca kuany, /cɛ bi tekɛ lua̱ŋ köör.

16Kä bi Thi-ri-ya min mac jɛ, lät ce̱tnikɛ min nhɔkɛ, kä thilɛ ram mi bi cuɔ̱ŋ nhiamdɛ. Kä bɛ cu nyuur ɛn muun ji̱ I-thɛ-rɛl in gɔaa, bɛ cu te tetädɛ kɛɛliw.

17Kä bɛ la̱th ni buɔ̱m kuäärädɛ kɛɛliw cärädɛ, kä bɛ ruac malä lat kɛ kuäär I-jëp. Kä bɛ jɛ moc kɛ nyal mi kuɛɛnɛ, kɛ ɣöö bɛ kuäär I-jëp däk, duundɛ ɣöö /ci ca̱a̱pkɛ rɔ̱ bi lot.

18Kɛ kɔrɛ, bɛ wi̱cdɛ luɔc kä wi̱i̱ jɔak kiɛɛr kä bɛ wi̱i̱ ti ŋuan ka̱n thi̱n. Duundɛ ɣöö bɛ te kuäär rɛ̈m kɛl mi bi jɛ ka̱m piny, ɛ puc bi kuäär rɛ̈m ɛmɔ liakdɛ luɔc ni kä jɛ.

19Kä kuäär Thi-ri-ya bɛ wi̱cdɛ luɔc ti̱ecni röölɛ tin buɔ̱m buɔ̱ɔ̱m, duundɛ ɣöö ba jɛ joc, kä bɛ cua̱ jɛn guutdɛ.

20“Inɔ, bi kuäär mi dɔ̱ŋ rɔ jiɛc guäthdɛ, mi bi thuul tho̱lbo̱kä ja̱k kɛ ɣöö bi kuäär Thi-ri-ya kulɛ ria̱ŋ kɛ yio̱w ti ŋuan. Duundɛ ɣöö ba kuäär ɛmɔ näk kɛ kɔr ni̱ni ti tɔt, /ca jɛ bi näk kɛ gak kiɛ rɛy köör.

21Kä kɛ kɔrɛ, bi kuäär mi dɔ̱ŋ mi /ci ro̱ŋ kɛ ɣöö derɛ la kuäär gua̱a̱thdɛ guäl. Jɛn bɛ kuäär Thi-ri-ya ka̱n kɛ duɔ̱ɔ̱p mɛɛtdä.

22Kä ba rɛm köör mi di̱i̱t näk nhiamdɛ, amäni bo̱o̱th palä Kuɔth in Di̱i̱t.

23Kä mi wä naath mal wä lat kɛ jɛ, bɛ lät mɛɛtdä kɛ döör tin kɔ̱ŋ, kä bɛ tekɛ buɔ̱m kɛ nɛy ti tɔt.

24Kä jɛn kuäär Thi-ri-ya bɛ wi̱i̱ tin ria̱ŋ ria̱a̱ŋ ben mak a thilɛ läär mi cɛ thöp, kä bɛ mi /ken gua̱ndɔɔŋnikɛ jɛ met la̱t la̱t. A bɛ kuak tin cɛ pɛc ko̱o̱r dääkä ji̱ kɔaarɛ. Kä bɛ ca̱a̱p tin derɛ mak ni gua̱th tin buɔ̱m buɔ̱ɔ̱m la̱t, duundɛ ɣöö /cɛ bi jääny kɛ tëk.

25Jɛn bɛ rɔɔdɛ jiɛc kä bɛ rɛm mi di̱i̱t rialikä kɛ ɣöö bɛ ben nyiëëny kɛ kuäär I-jëp, kä bi kuäär I-jëp rɛmdɛ min di̱i̱t kä bum rialikä kɛ ɣöö bɛ nyiëëny kɛ kuäär Thi-ri-ya. Duundɛ ɣöö, ba kuäär I-jëp ca̱p ca̱p mi ba joc ni jɛ,

26ɛ nɛy tin ci mi̱th dhɔr kua̱r. Bikɛ jɛ joc, kä bikɛ rɛmdɛ riaw dɔɔr kä ba nɛy ti ŋuan näk.

27Kä kɛn kua̱r da̱ŋ rɛw tin ci wuɔ̱thkiɛn thia̱ŋ kɛ gua̱n jiäkni, bikɛ nyuur wi̱i̱ tokä kɛl, kä ba rɔ̱ ku mɛ̈t kɛ ruac. Duundɛ ɣöö /ci mɛmɛ rɔ bi lot, kɛ ɣöö bi gua̱a̱th in bi thuuk kɛ jɛ ben kɛ gua̱a̱th in ca lat.

28Kä Thi-ri-ya bɛ loc wi̱i̱dɛ kɛ ria̱ŋ mi di̱i̱t, duundɛ ɣöö bi lɔcdɛ mat ruac in gɔaa lo̱k, kä bɛ lät ce̱tnikɛ min go̱o̱rɛ, kä bɛ cu loc wi̱i̱dɛ.

29“Mi wä gua̱a̱th in ca rialikä ben, bɛ I-jëp ka̱p ko̱r duundɛ ɣöö /cɛ bi ce̱tkɛ mëë ci kɔŋ tuɔɔk kɛ nhiam.

30Kɛ ɣöö, bi babuuri Ki-tim ben nyiëëny kɛ kuäär Thi-ri-ya, kä bi lɔcdɛ baath a bɛ rɔɔdɛ bar. Kä bɛ gaak ɛlɔ̱ŋ, bɛ rɔ luɔ̱c matdä ruac Kuɔth. Kä bɛ liŋ ni luek nɛɛni tin ca ruac Kuɔth pa̱l ruëëc.

31Kä bɛ rɛm jäkä rɛy luaak Kuɔth ba jɛ wä ya̱r kɛnɛ kuakɛ. Kä bikɛ muc tin la waŋkɛ päl, bikɛ gua̱l ni nyinkiɛn tin jiäk tin nööŋkɛ da̱k guäthdiɛn.

32Kä bɛ nɛy tin ca mat ruac lo̱k cu mɛt, kä duundɛ ɣöö bi nɛy tin ŋa̱thkɛ Kuothdiɛn ruacdɛ lo̱k.

33Kä bi nɛy tin ŋa̱ckɛ ŋɔak nɛy ti ŋuan nyuɔ̱th min la thuɔ̱k, duundɛ ɣöö, kɛ kɔr ni̱ni bakɛ näk, kä bikɛ waŋ kɛ mac kä bikɛ cuuc pɛɛcä.

34Kä mi wakɛ na̱a̱k, bi kɛn luäk mi tɔt jek kä Kuoth, kä bi nɛy ti ŋuan ti /ca thuɔ̱k lat rɔ̱ ma̱tkɛ.

35Kä ba tha̱a̱ŋ nɛɛni ti pɛl pɛl näk, ɛ jɛn bikɛ rɔ̱ lɛy ɔ kä bikɛ rɔ̱ lak kä bikɛ gɔw, amäni mi ci gua̱a̱th guutdä ben, kɛ ɣöö ŋotdɛ bɛ ben kɛ gua̱a̱th in ca rialikä.

36“Kä bi kuäär lät ce̱tnikɛ min go̱o̱rɛ. Kä jɛn bɛ rɔɔdɛ kap nhial, kä bɛ rɔɔdɛ guic di̱t ni jɛn kä kuth tin kɔ̱ŋ, kä bɛ ruac a jiäk kɛ Kuoth kuthni. Kä bi ti diaal rɔ lot kɛ jɛ amäni mi ci gua̱a̱th gaak ben, kɛ ɣöö ba min ca lar la̱t.

37Kä /cɛ kuth gua̱ndɔɔŋnikɛ bi luɔ̱th, kiɛ kuoth in nhɔakɛ ɛ män kä thilɛ kuoth mi dɔ̱ŋ mi bɛ luɔ̱th, kɛ ɣöö bɛ jɛ car i̱ di̱t ni jɛn kä kuth diaal.

38Kä bɛ luɔ̱th ni kuoth in la gaŋ gua̱th tin buɔ̱m buɔ̱ɔ̱m kä kɛn kuth ti diaal ti̱ti̱. Bɛ luɔ̱th ni kuoth in kui̱c gua̱ndɔɔŋnikɛ jɛ, bɛ luɔ̱th kɛ tho̱pdɛ kɛ jɛ da̱a̱p kɛnɛ ciɛk in bo̱r kɛ guiy tin di̱t kökdiɛn ala muc.

39Kä bɛ gua̱th tin buɔ̱m buɔ̱ɔ̱m mak kɛ buɔ̱m kuthni ti kɔ̱ŋ. Kä bɛ nɛy tin cɔalkɛ jɛ i̱ kuäär moc kɛ ria̱ŋ mi di̱i̱t, kä bɛ kɛ jak kä ruëëc wi̱i̱ni ti ŋuan kä bɛ kɛ moc muɔ̱n kɛ gua̱a̱th yio̱o̱nikiɛn.”

40“Kɛ gua̱a̱th guutdä, bi kuäär I-jëp ɛ mak. Duundɛ ɣöö bi kuäär Thi-ri-ya jɛ ban ce̱tnikɛ ruɔth, kɛ thurbiɛɛlikɛ kɛnɛ jiöŋköörikɛ kɛ babuurikɛ tin ŋuan. Kä bɛ wi̱i̱ ti ŋuan mak, kä bɛ kɛ can piny ce̱tnikɛ nyɔc.

41Kä jɛn kuäär Thi-ri-ya bɛ ränh ni muun in gɔaa, kä bɛ nɛy ti bathdɔɔri ti ŋuan näk. Duundɛ ɣöö bi Ɛ-dɔm kɛnɛ Mo-ab kɛ tha̱a̱ŋ muɔ̱ɔ̱n ji̱ Am-on kään tetnikɛ.

42Kä bɛ wi̱i̱ ti ŋuan käp, kä /ci I-jëp bi kään tetädɛ.

43Kä bi da̱a̱p kɛnɛ ciɛk in bo̱r kɛ kuak I-jëp diaal tin dit kökdiɛn la nyinkɛ, kä bɛ ro̱l Kuc kɛnɛ ro̱l Lib-ya käp bä.

44Kä bi lɔcdɛ jiath kɛ ruac in ba lat nhiam ɣɔaa kɛnɛ cam ɣɔaa, bɛ ko̱r tɛr kä bɛ nɛy ti ŋuan näk kɛ kui̱ ruaacni tɔ̱tɔ̱.

45Kä bɛ kɛmɛ kuäärädɛ in di̱i̱t yiath piny kam yiëër kɛnɛ luak Kuɔth. Kä bɛ li̱w ɛn wi̱ni a thilɛ ram mi bi jɛ luäk.”