bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Nuer
/
Nuer Bible © Bible Society in South Sudan 1998,2012
/
Daniel 3
Daniel 3
Nuer Bible © Bible Society in South Sudan 1998,2012
← Chapter 2
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 4 →
1
Cu Kuäär ni Nɛ-bu-kad-nɛ-dhar puɔ̱ny täth kɛ da̱a̱p, mi bärɛ nhial ɛ jua̱th tetni ti jiɛn bäkɛl, kä ɣäp ɣääpdɛ kɛ jua̱th tetni da̱ŋ bäkɛl. Kä cuɛ jɛ la̱th dɛɛkä rɛy tɔ̱ɔ̱rä Dura, rɛy ciëŋ Bɛ̈-bi-lɔn.
2
Cu Kuäär ni Nɛ-bu-kad-nɛ-dhar ruac ja̱k kɛ ɣöö bi bööthkɛ diaal rɔ̱ dol guäth kɛl, ruëëc kɛnɛ bööth kɛ midhi̱i̱ri, kɛnɛ kua̱r, kɛ nɛy tin ka̱pkɛ yio̱w, kɛ luëëk kɛnɛ kua̱r luɔ̱ɔ̱kni amäni tha̱a̱ŋ bööthni diaal tin kɔ̱kiɛn tin te rɛy wec kɛ ɣöö bikɛ ben guäth leyä pua̱a̱ny in cɛ la̱th nhial.
3
Kä mëë ci bööth diaal rɔ̱ dol kä cikɛ ben cuɔ̱ŋ nhiam pua̱a̱ny kɛ ɣöö ba jɛ lɛy,
4
cu ram in lat ruac jɔwdɛ kap nhial jio̱kɛ naath i̱, “Nɛmɛ ɛ min ca lar i̱ bia la̱t lö ji̱ dööri diaal kɛnɛ yɛn nɛy tin ruac kɛ thuk gööli,
5
mi wä yɛn jɔw kaaŋä kɛ buɔ̱l kɛ kuew kɛnɛ thuɔmni ti gööl liŋ, guɔŋɛ rɔ̱ kä palɛ puɔ̱ny in ca täth kɛ da̱a̱p ɛ Kuäär ni Nɛ-bu-kad-nɛ-dhar kä cɛ la̱th nhial.
6
Kä ram mi /ken rɔ ka̱m mua̱a̱l ɛ palɛ puɔ̱ny in ca täth, ba ram ɛmɔ yuɔr rɛy maac mi pɛt.”
7
Kɛ kui̱c ɛmɔ mëë wä naath diaal jɔw tuɔ̱ɔ̱ŋ in ca kuoth, kɛnɛ kuew kɛ thom kɛnɛ kaaŋni kɛ jiööth thuɔmni tin kɔ̱ŋ liŋ, ɛn wan ɔ cu döör diaal, kɛ naath diaal tin ruac kɛ thuk ti gööl rɔ̱ goŋ, cu kɛn diaal puɔ̱ny dääpä min ci Kuäär ni Nɛ-bu-kad-nɛ-dhar ɛ cuŋ pal.
8
Kä cu tha̱a̱ŋ ji̱ Bɛ̈-bi-lɔn rɔ̱ jiɛc cua ji̱ Juudh ben gɔany.
9
Kä cu kɛ Kuäär ni Nɛ-bu-kad-nɛ-dhar jiök i̱, “Bi jääny kɛ tëk lö kuäär!
10
Kä ji̱n lö kuäär ci ruac kɛ ɣöö mi wä raan jɔw tuɔ̱ɔ̱ŋ wä liŋ kɛnɛ jiööth buɔ̱li kɛ kaaŋni kɛnɛ thom kɛ kuew kiɛ jiööth thuɔmni diaal, bɛ rɔ goŋ kä bɛ puɔ̱ny in ca täth kɛ da̱a̱p pal.
11
Kä ram mi /ken rɔ goŋ kä /ken puɔ̱ny in ca täth pal, ba ram ɛ mɔ yuɔr rɛy maac mi pɛt.
12
Tëë kɛ ji̱ Juudh ti ci kuany wuɔ̱thni kɔamni rɛy wec Bɛ̈-bi-lɔn, ala Cad-rak kɛnɛ Me-cak kɛ Ä-bed-nɛ-go. Kɛn /ca ji̱ luth lö Kuäär. Kɛn /cikɛ kuoth lätikä, kä /cikɛ puɔ̱ny in ca täth kɛ da̱a̱p min ci cuŋ pal.”
13
Kä cu Nɛ-bu-kad-nɛ-dhar ŋɛ̈ɛ̈ny ɛlɔ̱ŋ kä cuɛ ruac ja̱k kɛ ɣöö ba Cad-rak kɛnɛ Me-cak kɛ Ä-bed-nɛ-go wä nööŋ nhiamdɛ, kä cua wutni tɔ̱tɔ̱ nööŋ nhiamdɛ.
14
Kä cu Nɛ-bu-kad-nɛ-dhar kɛ thiec wëë i̱, “Ɛ thuɔ̱k inu lö Cad-rak yɛnɛ Me-cak kɛ Ä-bed-nɛ-go ɛn ɣöö /ci yɛn kuthkä luth kä /ci yɛn puɔ̱ny in cä täth kɛ da̱a̱p in cä cuŋ pal?
15
Täämɛ mi cia rɔ̱ rialikä, mi wiaa jiööth kaaŋni kɛnɛ thuɔmni kɛ buɔ̱l kɛ kuew wä liŋ, a bia rɔ̱ ka̱m mua̱a̱l kä bia puɔ̱ny in cä täth pal, bɛ cua mi gɔaa. Kä mi /cia jɛ bi pal, ba yɛ yuɔr rɛy maac in pɛt kɛ pɛ̈th. Kä bɛ kula Kuoth in mith bi yɛ kän tetädä mɔ?”
16
Kä cu Cad-rak kɛnɛ Me-cak kɛ Ä-bed-nɛ-go kuäär loc wäkɛ i̱, “Thilɛ mi bakɔ luɔ̱c ji̱ mi bakɔ gaŋ ni rɔ̱ kɛ jɛn ruac ɛmɛ lö Nɛ-bu-kad-nɛ-dhar.
17
Kä mi Kuothda min lät nɛy ɛ ikä tëëkɛ lua̱ŋ kɛ ɣöö bɛ kɔ kän, bɛ kɔ kän rɛy maac ɛmɛ, kä bɛ kɔ kän tetädu lö kuäär.
18
Mi ciɛ jɛn ɛnɔ, kä ŋäcni jɛ bä lö kuäär ɛn ɣöö, kɔn /cakɔ kuthku bi lätikä, kä /ci nɛy puɔ̱ny dääpä min ci cuŋ bi pal.”
19
Kä min ci Nɛ-bu-kad-nɛ-dhar ŋɛ̈ɛ̈nydɛ di̱t, cuɛ nhiamdɛ juan, kä cu guecdɛ rɔ gɛr kɛ kui̱ Cad-rak kɛnɛ Me-cak kɛ Ä-bed-nɛ-go. Kä cuɛ lëth maac jakä rëpkɛ nikä bärɔw ɛ bɛ leny ni lëth in tekɛ jɛ ni wen.
20
Cuɛ lathkëërikɛ ti buɔ̱m buɔ̱ɔ̱m jiök kɛ ɣöö bikɛ Cad-rak kɛnɛ Me-cak kɛ Ä-bed-nɛ-go yian kä bikɛ kɛ yuɔr rɛy maac in pɛt.
21
Kä cua kɛ yian kä te bieynikiɛn, puɔ̱ɔ̱nydiɛn luɔ̱ɔ̱t, kɛnɛ thuruaali kɛ kuɔ̱mni kɛnɛ bieynikiɛn tin kɔ̱ŋ kä cu kɛn kɛ yuɔr rɛy maac in pɛt.
22
Kä kɛ ɣöö ci kuäär ruac lat ɛn ɣöö ba lëth maac rep, cu mac wutni tin kapkɛ Cad-rak kɛnɛ Me-cak kɛ Ä-bed-nɛ-go waŋ kɛ lewdɛ.
23
Kä cu Cad-rak kɛnɛ Me-cak kɛ Ä-bed-nɛ-go pɛn rɛy maac kä ca kɛ yian.
24
Kä cu Kuäär ni Nɛ-bu-kad-nɛ-dhar rɔ jiɛ̈c nhial kɛ pɛ̈th kɛ ga̱a̱c. Kä cuɛ luëëkɛ thiec wëë i̱, “Ɛ /cikɛ kua̱ wutni da̱ŋ diɔ̱k tin canɛ yuɔr maac ɛ ca yian?” Kä cukɛ jɛ loc wäkɛ i̱, “Ɛ thuɔ̱k canɛ jɛ la̱t lö Kuäär.”
25
Kä cu kuäär wee i̱, “Kä ɣän nɛ̈ɛ̈nä wutni da̱ŋ ŋuaan ti /ka̱n yian kä jälkɛ rɛy maac, kä thilɛ mi lätdɛ kä kɛ, kä jɔc ŋuaandiɛn ce̱tkɛ jääk.”
26
Kä cu Nɛ-bu-kad-nɛ-dhar ben thi̱ek in thia̱k kɛ gua̱a̱th in pɛt mac thi̱n, cuɛ wëë i̱, “Cad-rak kɛnɛ Me-cak kɛ Ä-bed-nɛ-go bia raar yɛn la̱a̱t Kuɔth in Di̱t ni Jɛn in leny buɔ̱mdɛ ti diaal! Bia wanɛ mɛ.” Ɛ jɛn cu Cad-rak kɛnɛ Me-cak kɛ Ä-bed-nɛ-go ben raar rɛy maac in pɛt.
27
Kä cu ruëëc kɛnɛ bööth kɛ luëëk kua̱r ben guäth kɛl, kä cu kɛn ɛ nɛn ɛn ɣöö, ci mac thil lua̱ŋ mi waaŋɛ wutni tɔ̱tɔ̱, cäŋɛ ni miemkiɛn /ken mac kɛ nyɔt, kä thilɛ tol mi ci jɔɔc puɔ̱ɔ̱ny bieynikiɛn a cäŋɛ ŋuäny maac /cɛ jɔc pua̱nynikiɛn.
28
Kä cu Nɛ-bu-kad-nɛ-dhar wee i̱, “A liak tekɛ Kuoth Cad-rak kɛnɛ Me-cak kɛ Ä-bed-nɛ-go mëë ci jääkdɛ ja̱k, kä cuɛ ja̱a̱ŋkɛ tin ŋa̱thkɛ ni jɛ ben kän. Kä cukɛ ruac kua̱r lo̱k, cukɛ thöp ni pua̱nykiɛn kɛ ɣöö lo̱k kɛn ɣöö bikɛ kuoth dɔ̱diɛn pal kä bikɛ jɛ lätikä mi /ci mua Kuothdiɛn.
29
Kɛ kui̱c ɛmɔ, ɣän latdä jɛ ɛn ɣöö, pekdɛ naath kiɛ do̱r kiɛ thok ɔ bi duɔ̱ɔ̱r mi jiääk lat ɔ kɛ kui̱ Kuɔth Cad-rak kɛnɛ Me-cak kɛ Ä-bed-nɛ-go, ba ram ɛmɔ ŋuɔ̱k ni dhoon, kä bi dho̱rkiɛn la ni di̱r jiäkni. Kɛ ɣöö thilɛ Kuoth mi dɔ̱ŋ mi dee raan kän kɛ duɔ̱ɔ̱p mi ce̱tkɛ ɛnɛ.”
30
Kä cu kuäär Cad-rak kɛnɛ Me-cak kɛ Ä-bed-nɛ-go kap nhial ala ruëëc ti di̱t rɛy wi̱i̱ni Bɛ̈-bi-lɔn.
← Chapter 2
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 4 →
All chapters:
1
2
3
4
5
6
7
8
9
10
11
12