Daniel 6

Nuer Bible © Bible Society in South Sudan 1998,2012

← Chapter 5 Jump to: Chapter 7 →

1Cu Dɔr-ya-wɛc ɛ nhɔk ɛn ɣöö bɛ kuäärɛ kuëny nɛy ti kuɔ̱r kɛl wi̱cdɛ jiɛn da̱ŋ rɛw ti bi ruëc rɛy kuäärä kɛɛliw,

2ti ca wi̱cdiɛn kuëny kua̱r da̱ŋ diɔ̱k ti te Da-ni-yel rɛydiɛn, kä cua kua̱r tɔ̱tɔ̱ la̱th pinydiɛn kɛ ɣöö /ci kua̱r tɔ̱tɔ̱ kuäär bi lɛ mac.

3Kä kɛ pɛ̈th cu Da-ni-yel rɔɔdɛ nyoth ɛn ɣöö gɔaa ni la̱tdɛ kä kua̱r diaal tin kɔ̱ŋ, kɛ ɣöö tëë kɛ yiëë thukä. Kä cu kuäär ɛ go̱r ɛn ɣöö bɛ Da-ni-yel la̱th wi̱i̱ kuäärä kɛɛliw.

4Kä cu kua̱r kɛnɛ ruëëc jɛ ɣɔ̱n ɛn ɣöö görkɛ ca̱p mi dëë woc ni Da-ni-yel kɛ ciaŋ la̱tdɛ min lätdɛ rɛy kuäärä. Duundɛ ɣöö cuɛ thil duɔ̱ɔ̱p mi cua gɔny ni jɛ, kä cuɛ thil mi jiääk mi cu Da-ni-yel ɛ la̱t, kɛ ɣöö jɛn ɛ ram mi gɔaa, kɛ ɣöö tëë kɛ yoop, thilɛ talaaŋ mi cua jek kä jɛ.

5Kä kɛ jɔak cu wutni tin kɔn wee i̱, “Thilɛ duɔ̱ɔ̱p mi banɛ jek mi banɛ gɔny ni Da-ni-yel ɛ ni mi jek kɔn ɛ kɛ duɔ̱ɔ̱p ŋuɔ̱tni Kuɔthdɛ.”

6Kä cu kua̱r kɛnɛ ruëëc ben kä kuäär, kä cukɛ jɛ jiök i̱, “Bi jääny kɛ tëk lö kuäär ni Dɔr-ya-wɛc!

7Ci kua̱r diaal, kɛnɛ ruëëc diaal, kɛ luëëk diaal kɛ bööth mat kɛ ɣöö ji̱n kuäär bi ŋut la̱t, mi ba lat ɛn ɣöö ram ɔ bi tekɛ kuoth mi palɛ mɔ kiɛ raan kɛ rɛy ni̱ni ti jiɛn diɔ̱k tɔ̱ bi ben tɔ̱, ɛni mi palɛ ni ji̱ lö kuäär, jɛn ba jɛ yuɔr kɔ̱a̱k lonyni.

8Täämɛ lö kuäär, ɛ ŋut gɔ̱a̱rkɛ kä thanyɛ, kɛ ɣöö /ca jɛ bi gɛr a jɛ ce̱tnikɛ ŋut ji̱ Ma-day kɛnɛ ji̱ Pa-rath, min /ca bi met to̱l.”

9Kɛ kui̱ ɛmɔ cu kuäär ni Dɔr-ya-wɛc warɛgak thany kä cua gɔ̱r.

10Kä mëë ci Da-ni-yel ɛ ŋa̱c ɛn ɣöö ca warɛgak thany, cuɛ wä dhɔrɛ duëël in te nhial min lɛp wernyinikɛ rɔ̱ peek Jɛ-ru-tha-lɛm. La kämɛ rɔ mua̱a̱l palɛ Kuothdɛ ni kä diɔ̱ɔ̱k kɛ cäŋ kɛl, liakɛ Kuothdɛ ce̱tnikɛ mëë la lätdɛ ni wen.

11Kä cu wutni tɔ̱tɔ̱ ben cukɛ Da-ni-yel ben jek palä kä thieecɛ Kuothdɛ kɛ luäk.

12Kä cukɛ ben kä kuäär, cukɛ ruac kɛ jɛ kɛ kui̱ warɛgakä mëë cɛ gɔ̱r wäkɛ i̱, “Kuäär! /Keni warɛgak gɔ̱r kä ciɛ thany, ɛn ɣöö ram mi wä Kuoth wä pal kiɛ raan kɛ ni̱n ti jiɛn da̱ŋ diɔ̱k ɛ ni mi palɛ ni ji̱ lö Kuäär, jɛn ram ɛ mɔ ba jɛ yuɔr rɛy kɔ̱a̱k lonyni?” Kä cu kuäär ɛ loc i̱, “Ruac ɛmɔ jɛn a ni thi̱n ce̱tnikɛ ŋut ji̱ Ma-day kɛnɛ ŋut ji̱ Pa-rath min /ca dee met to̱l.”

13Kä cukɛ ruac kua̱r loc i̱, “Täämɛ Da-ni-yel min la ram kɛl kä pɛ̈ɛ̈c Juda, /cɛ ruacdu tit lö kuäär, a cäŋ ɛ ni warɛgak ëë ci thany, /cɛ jɛ luth, ŋotdɛ la pal ni jɛn kä diɔ̱ɔ̱k kɛ cäŋ kɛl.”

14Kä mëë ci kuäär ruac ɛmɛ liŋ, cu lɔcdɛ jiääk ɛlɔ̱ŋ. Kä cuɛ jɛ go̱r ɛn ɣöö bɛ Da-ni-yel luäk, cu mäni kony ca̱ŋ cuɛ duɔ̱p diaal ɣɔ̱n ti derɛ luäk ni Da-ni-yel.

15Kɛ kɔrɛ cu nɛy tin ca̱p kɛ ca̱p ben kä kuäär, kä cukɛ jɛ jiök i̱, “Ŋäcni jɛ lö kuäär ɛn ɣöö ce̱tnikɛ ŋut ji̱ Ma-day kɛnɛ ji̱ Pa-rath, thilɛ warɛgak mi ci kuäär ɛ gɔ̱r kä cɛ thany mi ba gɛr.”

16Kä cu kuäär ruac ja̱k, cua Da-ni-yel nööŋ kä cua jɛ yuɔr kɔ̱kä in te loony thi̱n. Kä cu kuäär Da-ni-yel jiök i̱, “A Kuothdu min la pali kä lätikä mal ji̱ kän!”

17Kä cua päm nööŋ kä cua jɛ kum ni thok kɔ̱a̱k in te loony thi̱n, kä cu kuäär jɛ thany kɛ thäänydɛ kɛnɛ thääny ruëëcnikɛ, kɛ ɣöö thilɛ mi ba lɛ gɛr kɛ kui̱ Da-ni-yel.

18Kä cu kuäär loc dhɔɔrɛ kä cuɛ wä thɛɛk kɛ wäär kɛɛliw, cuɛ thil mi̱eth mi cua nöŋ jɛ, kä /ken waŋdɛ wä ni̱en.

19Inɔ cu kuäär rɔ jiɛc ni po̱o̱tdä kä cuɛ wä kɔ̱a̱k lonyni kɛ pɛ̈th.

20Mëë cɛ ben thiäkä kɔ̱a̱k in te Da-ni-yel thi̱n, cuɛ Da-ni-yel cɔl kɛ jɔw jiɛthä lɔaac mi di̱i̱t wëë i̱, “Aɣ Da-ni-yel, ja̱ŋ Kuɔth in tëk, ji̱n ci Kuothdu min ŋääthi kä lätikä ji̱ luäŋ kɛ ka̱n jɔɔk kä loony?”

21Kä cu Da-ni-yel kuäär jiök i̱, “Bi jääny kɛ tëk lö kuäär!

22Kuothdä cɛ jääkdɛ ja̱k cɛ thuk lonyni ben kum kɛ ɣöö /cikɛn ɣä bi cam, kɛ ɣöö ca ɣä jek thilɛ ɣä bɛ̈l nhiamdɛ, kä amäni nhiamdu bä lö kuäär, thilɛ duer mi cä la̱t.”

23Kä cu kuäär lɔcdɛ tɛɛth ɛlɔ̱ŋ kä cuɛ ruac lat kɛ ɣöö ba Da-ni-yel ka̱m raar rɛy kɔ̱kä. Kä cua Da-ni-yel ka̱m raar nikä kɛɛl rɛy puɔ̱ɔ̱l, kä cuɛ thil gua̱r mi cua jek puɔ̱ɔ̱nydɛ, kɛ ɣöö cɛ ŋa̱thdɛ la̱th kä Kuoth.

24Kä cu kuäär ruac ja̱k, kä cua nɛy tin ca Da-ni-yel gɔany nööŋ, kä cua kɛ yuɔr rɛy kɔ̱a̱k lonyni kɛɛl kɛ mänkiɛn kɛnɛ gaatkiɛn. Kä a ŋotkɛ /ka̱n rɛy kɔ̱kä ni cop, cu lony pɛn kä kɛ, cukɛ cɔ̱wkiɛn töl ni ŋëëtni.

25Kä cu kuäär ni Dɔr-ya-wɛc naath diaal kɛnɛ döör diaal ti ruac kɛ thuk gööli rɛy ɣɔaa kɛɛliw gɔ̱a̱r warɛgak wëë i̱, “A mal tekɛ yɛn diaal!

26Cä ruac ɛmɛ lat ɛn ɣöö nɛy diaal tin te rɛy kuäärädä, bikɛ tekɛ luth kɛnɛ dual kɛ Kuoth Da-ni-yel. Kɛ ɣöö jɛn ɛ Kuoth mi tëk, mi te thi̱n amäni cäŋ kɛl. Kä /ci kuäärɛ bi met da̱k, kä ruecdɛ thilɛ jɛ pek.

27Jɛn la luäkɛ naath kä la känɛ naath, kä lätdɛ nyuuthni ti ga̱ykɛ naath ro̱o̱l nhial kɛnɛ piny. Kä cɛ Da-ni-yel kän kä buɔ̱m lonyni.”

28Kä ɛ jɛn cu Da-ni-yel ɛmɛ ku cieŋ agɔaa ɛlɔ̱ŋ ni̱ni kuäärä Dɔr-ya-wɛc kɛnɛ ni̱n kuäärä Ko-rɛc raan Pa-rath.

← Chapter 5 Jump to: Chapter 7 →