Daniel 12

Nuer Bible © Bible Society in South Sudan 1998,2012

← Chapter 11 Jump to:

1“Kɛ jɛn gua̱a̱th ɛ mɔ bi jääk Kuɔth ni Mi-ka-el in la gääŋ nɛɛniku in di̱i̱t rɔ jiɛc. Kä bɛ tekɛ gua̱a̱th pärä mi /ken met tuɔɔk ni mëë ku döör rɔ̱ tok. Duundɛ ɣöö ɛn guäth ɛmɔ ba nɛɛku kän, kɛn nɛy diaal tin ca ciöötkiɛn jek a ca gɔ̱r rɛy buɔk.

2Kä bi nɛy ti ŋuan kä nɛy tëë ci li̱w jiɛɛn li̱th, bi tha̱a̱ŋkiɛn wä teekä mi do̱raar, kä bi tha̱a̱ŋkiɛn wä guäth po̱cä kɛnɛ da̱k mi do̱raar.

3Kä bi nɛy tin pɛl pɛl buay nikɛ buay puɔ̱ɔ̱rä, kä bi nɛy tin ca naath bo̱th kɛ cuŋ, bikɛ riaaw ce̱tnikɛ ciɛr amäni cäŋ kɛl.

4Duundɛ ɣöö, ji̱n Da-ni-yel ku rieet ti̱ti̱ lɛ käp kɛ rɛydu, kä a bok te gääkä amäni gua̱a̱th guutdä. Kä bi nɛy ti ŋuan riŋ nhiam kä riŋkɛ jɔk, kä bi jiäk rep ni rɔ̱.”

5Kä ɣän Da-ni-yel min cä guic, cua̱ nɛy da̱ŋ rɛw nɛn tekɛ cuŋä, te ram kɛl cuŋä kui̱ kiɛɛr kä cuŋ min dɔ̱ŋ peek in dɔ̱ŋ.

6Kä cu ram kɛl ruac kɛ wut in ci rɔ rony kɛ bi̱i̱ in ca mɛn agɔaa min te cuŋä wi̱i̱ pi̱i̱ni wëë i̱, “Kä bɛ ku mäni nɛy ba kɛn ti ga̱ykɛ naath ti jak kä thuɔ̱ɔ̱k?”

7Kä cu ram min ci rɔ rony kɛ bi̱i̱ in ca mɛn ɛgɔaa min te cuŋä wi̱i̱ pi̱i̱ni tet cuëëcdɛ kɛnɛ tët caamdɛ tar nhial. Kä cua̱ jɛ liŋ yaacɛ rɔ kɛ ciöt Kuɔth in do̱raar ɛn ɣöö, bi mɛmɛ tuɔɔk kɛ run da̱ŋ diɔ̱k kɛ nuth, mi wä buɔ̱m nɛɛni Kuɔth wä thuɔ̱k, bikɛn ti diaal ti̱ti̱ cu thuɔ̱k.

8Cua̱ ruac ɛmɔ liŋ, duundɛ ɣöö /ka̱n min lotdɛ ŋa̱c, inɔ, cua̱ wee i̱, “Kuäärä, ɛŋu mi bi la thuɔ̱kdiɛn kɛn ti̱ti̱ diaal?”

9Kä cuɛ wee i̱, “A wä ni ji̱n dupdu lö Da-ni-yel kɛ ɣöö ruac ŋotdɛ ɛ tɛ̱̈ɛ̱̈ amäni gua̱a̱th guutdä ɣɔaa.

10Kä ba nɛy ti ŋuan lɛy, kä bakɛ lak a puɔth, duundɛ ɣöö, bi ji̱ nyuɔɔni ŋot nikɛ lätni nyuɔɔnikiɛn. Kä thilɛ gua̱n nyuɔɔni mi bi luɔt kä mɛmɛ ŋa̱c ɛ ni nɛy tin pɛl ba luɔt kä mɛmɛ ŋa̱c ɔ.

11Nikɛ gua̱a̱th in ca wocni muc tin la waŋkɛ, kä ba tin jiäk la̱th guäthdiɛn, ba run ti bathdɔɔr kɛl wi̱cdɛ kur rɛw wi̱cdɛ jiɛn bäŋuan.

12Tɛ̈th lɔaac akɛ nɛy tin bi pek ni̱ni ti bathdɔɔr kɛl wi̱cdɛ kur diɔ̱k wi̱cdɛ jiɛn diɔ̱k wi̱cdɛ dhieec cop.

13Duundɛ ɣöö, a wä ni ji̱n dupdu amäni guut. Ji̱n bi li̱w kä bi cuɔ̱ɔ̱ŋdu jek kɛ gua̱a̱th guutdä ɣɔaa mi wä naath rɔ̱ wä jiɛc li̱th.”

← Chapter 11 Jump to: