Daniel 2 — Nuer Bible © Bible Society in South Sudan 1998,2012

1Kɛ rɛw runä ruëc Nɛ-bu-kad-nɛ-dhar, jɛn cuɛ la̱k läkikä, mi cu jɛ pën ni̱en.

2Kä inɔ cu kuäär ruac ja̱k ɛn ɣöö ɛ ji̱ kuthni kɛ ti̱t kɛnɛ ji̱ wal, kɛ ji̱ kolaaŋni, kɛ ɣöö ba kuäär ben la̱t luɔt läkädɛ. Kä mëë cikɛ ben cuɔ̱ŋ nhiam kua̱r,

3cu kuäär kɛ jiök i̱, “Ɣän cä la̱k läkikä, kä diɛɛr lɔcdä ɛlɔ̱ŋ, ɣän göörä ɣöö bä luɔtdɛ ŋäc.”

4Kä cu ji̱ kuthni kuäär jiök kɛ thok ji̱ Ä-ram i̱, “Lö kuäär bi jääny kɛ tëk! Lätni ja̱a̱ŋku la̱k bakɔ ji̱ ku lɛ la̱t luɔtdɛ.”

5Kä cu Nɛ-bu-kad-nɛ-dhar ji̱ kuthni loc wëë i̱, “Mɛmɛ ɛ ruac mi thuɔ̱k, duundɛ ɣöö mi /ci yɛn ɛ bi lat ɛn la̱k, kä bia luɔtdɛ lat bä, yɛn ba yɛ ŋuɔ̱k ni dhoon, kä bi dho̱rkun a di̱r juaacni.

6Duundɛ ɣöö mi wä yɛn la̱k kɛnɛ min lotdɛ lat, ɣän bä yɛ moc kɛ muc kä bä yɛ ka̱m luth mi di̱i̱t. Kä ɛ jɛn täämɛ yɛn kuɛ̈ɛ̈ ɣä la̱t la̱k kɛnɛ luɔtdɛ.”

7Kä cu ji̱ kuthni jɛ loc wäkɛ i̱, “Ɛ kuäär lät ja̱a̱ŋkɛ la̱k bakɔ luɔtdɛ kulɛ lat.”

8Kä cu kuäär ɛ loc wëë i̱, “Ɣän ŋa̱cä jɛ, agɔaa ɛn ɣöö, gaŋɛ ni ɣä piny, kɛ ɣöö ŋäc yɛn ɛ cä ruacdä lat,

9mi /ci yɛn ɣä bi la̱r la̱k, ba yɛ duäc. Cia jɛ mat ɛn ɣöö bi yɛn lat ni ka̱a̱cni amäni mi ci ŋɔak rɔ̱ gɛr. Yɛn la̱rɛ ni ɣä la̱k, bä kulɛ ŋa̱c ɛn ɣöö bi yɛn ɣä la̱r luɔtdɛ.”

10Kä cu ji̱ kuthni kuäär loc wäkɛ i̱, “Thilɛ raan wi̱i̱ muɔ̱ɔ̱n mi dee min ci kuäär ɛ thiec luäŋ kɛ lätni! Kɛ ɣöö thilɛ kuäär mi di̱i̱t mi bum mi ci mi ce̱tkɛ nɔ, kɔŋ thiec ni göök ka̱a̱cni kɛ ti̱t kɛnɛ ji̱ kuthni.

11Kɛ ɣöö jɛn min thiec kuäärɛ bumɛ ɛlɔ̱ŋ, thilɛ ram mi dee jɛ luäŋ kɛ lär kuäär, dëë jɛ luäŋ ni kuth, tin /ca nɛn ɛ nath.”

12Kɛ kui̱ ruac ɛmɔ cu kuäär ŋɛ̈ɛ̈ny ɛlɔ̱ŋ, kä cuɛ ruac ja̱k kɛ ɣöö ba nɛy tin pɛl pɛl diaal kä Bɛ̈-bi-lɔn näk.

13Kä cu Nɛ-bu-kad-nɛ-dhar ruac jäk kä raar ɛn ɣöö ba nɛy diaal tin pɛl pɛl näk, kä cua Da-ni-yel kɛnɛ mäthnikɛ go̱r kɛ ɣöö bakɛ wä näk.

14Kä cu Da-ni-yel ruac ni Pɛlä tiitdä kɛ bo̱o̱th yiëëni kua̱r ni Ar-yok mëë ca jäkä raar kɛ ɣöö bɛ ji̱ Bɛ̈-bi-lɔn tin ŋa̱ckɛ ŋɔak wä näk,

15cuɛ jɛ thiec i̱, “Ɛŋu mi lat kuäär ruac ɛmɛ kɛ pɛ̈th ɔ?” Kä cu Ar-yok luɔt ruac la̱t Da-ni-yel.

16Kä cu Da-ni-yel wä rɛc kä kuäär kɛ ɣöö ba jɛ moc kɛ gua̱a̱th mi ro̱ŋ, kɛ ɣöö bɛ luɔt läkä ben la̱t kuäär.

17Kä cu Da-ni-yel loc dhɔrɛ cuɛ min ci tuɔɔk wä la̱t Ɣä-nɛ̈n-yaa kɛnɛ Mi-ca-el kɛ Ä-dhar-yaa tin la mäthnikɛ,

18kä cuɛ ruac kɛ kɛ ɛn ɣöö bikɛ kɔ̱a̱c lɔaac Kuɔth puɔ̱ɔ̱rä thiec kɛ kui̱ gääŋä nɛmɛ, kɛ ɣöö, jɛn kɛnɛ mäthnikɛ /cakɛ bi näk kɛɛl kɛ ji̱ Bɛ̈-bi-lɔn tin pɛl pɛl.

19Kä min ci ɣɔw a wäär cu Kuoth la̱k nyuɔ̱th Da-ni-yel. Kä cu Da-ni-yel Kuoth puɔ̱ɔ̱rä la̱r tɛ̈th lɔaac.

20Kä cu Da-ni-yel wee i̱, “A puɔ̱th tekɛ ciöt Kuɔth puɔ̱ɔ̱rä amäni cäŋ kɛl, kɛ ɣöö pɛl kɛnɛ buɔ̱m kɛ nyinkɛ.

21Jɛn la gɛɛrɛ thaakni kɛnɛ dääkni runi, la wocɛ kua̱r tɔ̱ kä bɛ kua̱r ti kɔ̱ŋ gua̱l gua̱thnikiɛn, kä jɛn kämɛ nɛy tin pɛl ŋäc ŋɔaani, kä kämɛ nɛy tin ŋa̱ckɛ ŋɔak tiit.

22Kä jɛn la nyoothɛ ŋɔak ti kueckɛ ti ga̱ykɛ naath, kä jɛn ŋäcɛ min te rɛy muɔ̱th, kä buay tëë kɛ jɛ.

23Ɣän la̱rä ji̱ tɛ̈th lɔaac kɛnɛ liak lö Kuoth gua̱a̱ri, kɛ ɣöö ci ɣä ka̱m pɛl kɛnɛ buɔ̱m, kä ɛn täämɛ ci ɣä nyuɔ̱th min cakɔ thiec kä ji̱, kä ci nɛy nyuɔ̱th la̱k kua̱r.”

24Kɛ kui̱c ɛmɔ cu Da-ni-yel wä kä Ar-yok ram mëë ci Nɛ-bu-kad-nɛ-dhar ɛ kuany kɛ ɣöö bɛ ji̱ Bɛ̈-bi-lɔn tin ŋa̱ckɛ ŋɔak wä näk, kä cu Da-ni-yel wee i̱, “/Cu ji̱ Bɛ̈-bi-lɔn tin ŋa̱ckɛ ŋɔak näk, naŋ ni ɣä nhiam kua̱r, ɣän bä kuäär wä la̱t luɔt läkä.”

25Kä cu Ar-yok Da-ni-yel nööŋ nhiam kua̱r kɛ pɛ̈th wëë i̱, “Cä ram kɛl jek rɛy pɛ̈ɛ̈cni Juda mi bi luɔt läkä ben la̱r kuäär.”

26Kä cu kuäär ruac kɛ Da-ni-yel, min cɔal kɛ ciötdɛ min dɔ̱ŋ i̱ Bel-tɛ-ca-dhar wëë i̱, “Ji̱n bi ɣä luäŋ kɛ lät mëë cä nɛn kɛ la̱k kɛnɛ min lotdɛ?”

27Cu Da-ni-yel kuäär loc wëë i̱, “Thilɛ ram mi ŋäc ŋɔak kiɛ ti̱et kiɛ gök kiɛ gua̱n jɔɔkni mi dee min gääy kuäär kä cɛ thiec luäŋ kɛ lat,

28duundɛ ɣöö te Kuoth puɔ̱ɔ̱rä thi̱n, mi la nyooth ti ga̱ykɛ naath, cɛ Kuäär ni Nɛ-bu-kad-nɛ-dhar nyuɔ̱th min bi tuɔɔk kɛ ni̱n nhiam ɔ. Täämɛ nɛmɛ ɛ la̱kdu kɛnɛ nyuuth tëë ci nɛn mëë ti tɔ̱ɔ̱cä dhaŋädu.

29Kä min ti̱i̱ tɔ̱ɔ̱cä dhaŋädu lö kuäär, ji̱n la cäri ɛlɔ̱ŋ kɛ kui̱ ŋɔaani ti bi ben, kä ci ram min la nyuth naath tin ga̱ykɛ naath ji̱ cu nyuɔ̱th kɛ ŋɔak tin bi ben.

30Duundɛ ɣöö kɛ kui̱dä, /ka̱n ti ga̱ykɛ naath ti nyuɔ̱th ɣä kɛ ɣöö ɣän lënyä naath diaal tin kɔ̱ŋ kɛ pɛl, mɛmɛ tuɔɔkɛ kɛ ɣöö bi luɔt läkä ben ŋa̱c kuäär, kɛ ɣöö bi cär wecdu ŋa̱c.”

31Kä mɛmɛ ɛ jɛn la̱kdu inɛ, “Min ti̱i̱ guic lö kuäär, curi puɔ̱ny mi di̱i̱t nɛn cuŋä. Kä ta̱a̱ pua̱a̱ny ɛ mɔ buɔyɛ ɛ ɣo̱r a riaawɛ nyin nath, kä jɛn tëë cuŋä nhiamdu kä dual naath kɛ guecdɛ.

32Kä wi̱cdɛ ɛn puɔ̱ny ɛmɔ ɛ da̱a̱p mi lɛy lɛy, kä ca kawdɛ kɛnɛ wuɔ̱ɔ̱kɛ la̱t kɛ ciɛk in bo̱r, kä lɛ̈tdɛ kɛnɛ ɣämdɛ kɛ ciɛk in yian,

33kä ca ciökɛ la̱t kɛ ladiit, kä ca pa̱a̱tkɛ liɔm, tha̱a̱ŋdɛ mɔ ladiit kä tha̱a̱ŋdɛ mɔ mun.

34Kä mëë ti̱i̱ gui̱cdɛ, cua päm ɣar piny, kä /ciɛ raan ɣar jɛ piny ɔ, kä cuɛ pɛn pa̱a̱tni pua̱a̱ny ɛmɔ, pät ladiit kɛnɛ pät muɔ̱ɔ̱n, kä cuɛ kɛ töl ni ŋuɔɔkni.

35Kä ɛ jɛn, cu ladiit, kɛ mun, kɛ ciɛk in bo̱r kɛ ciɛk in yian kɛ da̱a̱p, kɛn diaal cukɛ nuɔr a bikɛ ce̱tnikɛ jil bɛɛl, ti ca kɔ̱m däär döör kɛ mäy. Kä cu jiɔam kɛ lɔk, a bɛ thil tor tor mi cua jek kä kɛ. Duundɛ ɣöö päm ëë tiath ɛn puɔ̱ny, cuɛ piith a bɛ la päm mi di̱i̱t mi cu wi̱c muɔ̱ɔ̱n thiäŋ ni kɛɛliw.

36“Kä mɛmɛ ɛ jɛn la̱k, täämɛ ɣän bä kuäär ku la̱t luɔt läkä.

37Kä lö kuäär ɛ ji̱n kuäär kua̱ri. Ɛ ji̱n ram min ci Kuoth puɔ̱ɔ̱rä jɛ ka̱m kuäär kɛnɛ buɔ̱m kɛ wuɔ̱t kɛnɛ guëth.

38Kä cɛ nɛy diaal la̱th tetniku, gua̱thni diaal tin tekɛ thi̱n, kɛ ley dɔaar diaal kɛnɛ diit nhial. Ci Kuoth ji̱ jakä kuääriɛn kɛn diaal. Lö kuäär ɛ ji̱n ɛn wi̱c dääpä mɔ gɔaa ɛmɔ.

39Kɛ kɔru bi kuäär dɔ̱diɛn ben, mi bi kuɛ̈ɛ̈ ni jɛn kä kuääru, kä bi kuäär in diɔ̱ɔ̱kdiɛn ben bä, min la ciɛk in yian, kä bɛ wi̱c muɔ̱ɔ̱n ruac kɛɛliw.

40Kä bi kuäär in ŋuaandiɛn ben, mi bi buɔ̱m ce̱tnikɛ ladiit. Ce̱tkɛ min la ladiit ŋɔak diaal a riac, bi kuäär ɛmɔ kuääri diaal tin kɔ̱ŋ tiam inɔ.

41Kɛ kui̱ ciökni tëë ci nɛn tin tha̱a̱ŋkiɛn ladiit kä tha̱a̱ŋkiɛn mun, ɛn nɔmɔ ba dääk kuäärä kɛ rɔ, duundɛ ɣöö bi buɔ̱m mi tɔt mi ce̱tkɛ buɔ̱m ladiɛt duɔth thi̱n, ce̱tkɛ min ci mun nɛn /cɛ rɔ liɔm kɛ ladiit.

42Ce̱tnikɛ min yiat cio̱kä tha̱a̱ŋdɛ ladiit kä tha̱a̱ŋ in dɔ̱ŋ mɔ mun, inɔ ɛn kuäär ɛmɛ, bi tha̱a̱ŋdɛ buɔ̱m kä bi tha̱a̱ŋdɛ thil buɔ̱m.

43Kä ce̱tnikɛ mɔ /ca ladiit dee liɔm kɛnɛ mun ɔ mëë ci nɛn, bikɛ rɔ̱ liɔm kɛn naath kɛ kuën, duundɛ ɣöö /cikɛ bi met mat, ce̱tnikɛ min /ci ladiit rɔ dee mat kɛ mun.

44Kä kɛ ni̱n tin ruec kɛ kua̱r tɔ̱tɔ̱, bi Kuoth puɔ̱ɔ̱rä kuäär mi thil mi bi jɛ wany tok, kä kuäär ɛmɔ /ca jɛ bi lɛ ba̱ny nɛy ti kɔ̱kiɛn. Kä bɛ kuääri diaal ti̱ti̱ däk, kä jɛn bɛ te thi̱n ala do̱raar,

45ce̱tkɛ mëë ci nɛn, cua päm ɣar, kä /ci jɛ ɣar raan, kä cuɛ ladiit kɛnɛ ciɛk in bo̱r kɛ ciɛk in yian kɛnɛ da̱a̱p kɛ mun riac. Kuoth in Di̱t ni Jɛn cɛ kuäär nyuɔ̱th min bi tuɔɔk kɛ nhiam. Täämɛ, la̱k ɛ thuɔ̱k, kä luɔtdɛ ɛ jɛn ɛnɔ.”

46Kä cu Kuäär ni Nɛ-bu-kad-nɛ-dhar rɔ ka̱mua̱a̱l nhiam Da-ni-yel kä cuɛ Da-ni-yel ka̱m luth, kä cuɛ ruac thöp kɛ ɣöö ba muc bɛɛl kɛnɛ wäl in kur waŋ kɛ kui̱ Da-ni-yel.

47Kä cu kuäär Da-ni-yel jiök i̱, “Ɛpuc, Kuothdu ɛ Kuoth kuthni, kä ɛ Kuäär kua̱ri, kä jɛn la nyoothɛ ti ga̱ykɛ naath, kɛ kui̱ ɛmɔ ci mi gääy naath ɛ luäŋ kɛ nyuɔ̱th!”

48Kä cu kuäär Da-ni-yel moc kɛ gua̱a̱th mi di̱i̱t, kä cuɛ jɛ moc muc ti ŋuan ti gɔw. Kä cuɛ jɛ jakä rueec Bɛ̈-bi-lɔn kɛɛliw, kä cuɛ la bo̱o̱th ji̱ Bɛ̈-bi-lɔn diaal tin pɛl pɛl.

49Kä cu Da-ni-yel kuäär thiec kɛ kui̱ mäthnikɛ, kä cu kuäär Cad-rak kɛnɛ Me-cak kɛ Ä-bed-nɛ-go kuany ala bööth lätni wec Bɛ̈-bi-lɔn. Kä cu Da-ni-yel cu cieŋ rɛy kal kua̱r.