bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Nuer
/
Nuer Bible © Bible Society in South Sudan 1998,2012
/
Daniel 5
Daniel 5
Nuer Bible © Bible Society in South Sudan 1998,2012
← Chapter 4
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 6 →
1
Kä cu kuäär ni Bel-ca-dhar mi̱eth mi di̱i̱t rialikä kɛ kui̱ ruëëcni kɛ ti bathdɔɔr, kä cuɛ maath kɛ kɔaŋ kɛɛl kɛ kɛ.
2
Kä min ci kɔaŋ puɔ̱nydɛ thiäŋ cu Bel-ca-dhar ruac ja̱k kɛ ɣöö ba jɛ wä nöŋ kuak dääpä kɛnɛ ciɛk in bo̱r tëë ci gua̱n ni Nɛ-bu-kad-nɛ-dhar kɛ ka̱m raar rɛy luaak Kuɔth kä Jɛ-ru-tha-lɛm, kɛ ɣöö bi kuäär kɛnɛ ruëëckɛ kɛ mänkɛ kɛnɛ luɔɔmkɛ ben maath kɛ kɛ.
3
Kä cukɛ kuak dääpä kɛnɛ kuak cikä min bo̱r tëë ca naŋ raar rɛy luaak Kuɔth in te kä Jɛ-ru-tha-lɛm tëë cu kuäär kɛnɛ ruëëckɛ, kɛ mänkɛ kɛnɛ luɔɔmkɛ kɔaaŋ math kɛ kɛ nööŋ.
4
Kä cukɛ kɔaŋ math, kä cukɛ kuth dääpä kɛnɛ ciɛk in bo̱r, kɛ ciɛk in yian kɛ ladiit kɛnɛ kuth jiɛn kɛ pääm liak.
5
Niɛ täämɛ cu yiɛt tetdä ran jɔɔc, kä cuɛ tok kɛ mi gɔ̱rɛ puɔ̱ny duëël kuäärä thiäkä cuuŋä lɛmbärä. Kä kuäär nɛnɛ tet min gɔ̱rɛ.
6
Kä cu nhiam kua̱r rɔ juan kä cu cärkɛ jɛ jakä dual. Kä cuɛ ciökɛ nuäŋ, kä lathɛ mua̱a̱lkɛ.
7
Kä cu kuäär wiee kɛ jɔw mi di̱i̱t kɛ ɣöö ba göök ka̱a̱cni kɛnɛ ti̱t kɛ ji̱ kolaaŋni kɛ ji̱ kuthni diaal nööŋ. Kä cu kuäär ji̱ Bɛ̈-bi-lɔn tin pɛl pɛl jiök i̱, “Ram ɔ bi gɔ̱a̱r ɛmɛ kuɛn ɔ kä bi luɔtdɛ lat ɔ ba jɛ kum kɛ bi̱i̱ mi di̱t kökdɛ kɛnɛ kuat ŋua̱a̱k mi da̱a̱p, kä jɛn bɛ la ram min diɔ̱ɔ̱k nath rɛy kuäärä.”
8
Kä cu nɛɛ kua̱r tin pɛl pɛl diaal ben rɛc, duundɛ ɣöö /ken kɛ min ca gɔ̱r luäŋ kɛ kuën kä /ken kɛ kuäär luäŋ kä lät min lotdɛ.
9
Kä cu kuäär ni Bel-ca-dhar dual kɛ dual mi di̱i̱t kä cu nhiamdɛ rɔ juan ɛlɔ̱ŋ, kä cu ruëëckɛ ga̱a̱c.
10
Kä min ci man kua̱r ruac kua̱r kɛnɛ ruëëckɛ liŋ, cuɛ ben rɛc guäth in la̱tkɛ mi̱eth thi̱n. Kä cu man kua̱r wee i̱, “Bi jääny kɛ tëk lö kuäär! Cu cärku jak kä muɔckɛ ji̱ dual kä a nhiamdu /ci rɔ juan.
11
Tëë kɛ wut mia̱a̱ thi̱n ɛn wa̱nɔ rɛy kuäärädu, mi thiäŋ kɛ yiëë mi gɔaa, ni̱ni kuäärä guur, cua jek tëë kɛ ŋäc mi ro̱ŋ, kɛnɛ pɛl mi ce̱tnikɛ pɛl kuthni. Kä cu guur ni Nɛ-bu-kad-nɛ-dhar ɛ jak kä bo̱o̱th ti̱tni kɛnɛ göök ka̱a̱cni kɛ ji̱ kuthni kɛnɛ ji̱ kolaaŋni.
12
Kɛ ɣöö tëë kɛ yiëë mi thuɔ̱k, kɛnɛ ŋäc ŋɔaani kɛ tiit kɛnɛ lua̱ŋ latdä luɔ̱ɔ̱tni la̱a̱kni, kɛnɛ ma̱r ma̱a̱ri kä luäŋɛ rik kɛ lat, kɛ kui̱c ɛmɔ jäkni Da-ni-yel in cɔl kuäärɛ i̱ Bel-tɛ-ca-dhar kä ram mi wä jɛ cɔl. Jɛn bɛ ji̱ ben la̱t luɔt kä min ca gɔ̱r.”
13
Kä cua Da-ni-yel nööŋ nhiam kua̱r. Kä cu kuäär Da-ni-yel jiök i̱, “Ɛ ji̱n Da-ni-yel, ram kɛl kä pɛ̈ɛ̈c, tëë ci gua̱a̱r in la kuäär kɛ nööŋ kä Juda?
14
Ɣän cä ji̱ liŋ ɛn ɣöö ti̱i̱ kɛ yiëë thukä, kɛ ŋäc ŋɔaani kɛnɛ tiit kɛ pɛl mi ro̱ŋ tekɛ kɛ ji̱.
15
Täämɛ ca nɛy tin pɛl pɛl kɛnɛ ji̱ kuthni nööŋ nhiamdä kɛ ɣöö ba min ca gɔ̱r ben kuɛn kä bikɛ ɣä la̱t min lotdɛ, duundɛ ɣöö /ken kɛ min lot mɛmɛ jɛ luäŋ kɛ lat.
16
Duundɛ ɣöö cä liŋ ɛn ɣöö la latdi luɔt kä duɔ̱ɔ̱r kä thuuki rik. Täämɛ mi wi̱i̱ mɔ ca gɔ̱rɔ luäŋ kɛ kuën kä bi ɣä la̱t luɔtdɛ, ba ji̱ moc kɛ bi̱i̱ mi di̱t kökdɛ, kä ba kuat dääpä la̱th ŋuääkdu, kä ba ji̱ jakä diɔ̱ɔ̱k nath rɛy kuäärä.”
17
Kä ɛ jɛn cu Da-ni-yel ɛ loc ni nhiam kua̱r wëë i̱, “A mucku tekɛ ji̱ kiɛ tho̱pnikɛ ram mi dɔ̱ŋ! Kuɛ la ɣöö bä min ca gɔ̱r kuën kuäär kä bä min lotdɛ la̱t jɛ.
18
Kuoth Nhial in Di̱t ni Jɛn cɛ guur ni Nɛ-bu-kad-nɛ-dhar ka̱m kuäär mi bum kä tekɛ ti̱el mi di̱i̱t lö kuäär.
19
Kä kɛ kui̱ kuäärä mëë cɛ ka̱m jɛ, cu naath diaal kɛ döör diaal kɛ nɛy tin tekɛ thuk ti gööl dual kɛ jɛ. Kä cuɛ nɛy tin go̱o̱rɛ näkdiɛn näk, kä cuɛ nɛy tin go̱o̱rɛ päliɛn a tëk, päl a tëk, kä kapɛ nɛy tin go̱o̱rɛ i̱ bɛ kap nhial kap nhial, kä locɛ nɛy tin go̱o̱rɛ i̱ locɛ piny, luɔc ni piny.
20
Kä mëë cɛ rɔ kap nhial, a ci wi̱cdɛ buɔ̱m kɛ liak, cua jɛ woc wi̱i̱ kɔam kuäärädɛ kä cua wuɔ̱tdɛ woc kä jɛ.
21
Kä cua jɛ woc rɛy nath, kä cua ca̱rɛ jakä ce̱tkɛ ca̱r leyni. Kä cuɛ wä cieŋ ni kɛɛl kɛ muɔ̱li dɔaar, kä cuɛ lak ni wal ce̱tnikɛ yaŋ, kä cuɛ puaak nikɛ thäc nhial, amäni mëë cɛ ŋa̱c ɛn ɣöö Kuoth Nhial ɛ jɛn ruaac kuäär nath ɔ, la kämɛ kuäär ram min go̱o̱rɛ.
22
Kä ji̱n Bel-ca-dhar in kula gatdɛ /keni rɔ luɔc piny, cäŋɛ ni min ŋäci ti diaal ti̱ti̱!
23
Curi kap ni rɔ nhial a lenyi Kuäär ni Kuoth puɔ̱ɔ̱rä! Cua nööŋ ni kuak luaak Kuɔth nhiamdu, kä cu ji̱n yɛnɛ ruëëcku, kɛ mänku kɛnɛ luɔɔmku math nikɛ kɔaaŋ. Kä cuarɛ cu liak ni kuth yieethä min yian kɛnɛ da̱a̱p kɛ ciɛk in bo̱r kɛnɛ ladiit kɛ jiɛn kɛnɛ pääm tin /ci nen kä /ci li̱ŋ kä /ca ŋɔak ŋäc, kä /ka̱nɛ Kuoth in buɔ̱mdɛ mɔ yiëëdun, kä te duɔ̱pkun diaal kɛ jɛ lɛ ka̱m luth.
24
“Kɛ kui̱ ɛmɔ cu tet ɛmɔ ben kä jɛ kɛ ɣöö bɛ mɛmɛ ben gɔ̱r.
25
Kä min ca gɔ̱r puɔ̱ny duëël ɛ, ‘MƐ-NE, MƐ-NE, TƐ-KƐL kɛnɛ PAR-THIN’.
26
Mɛmɛ ɛ min lot ruac ɛmɛ jɛ, MƐ-NE lotdɛ ni ɣöö Kuoth cɛ ni̱n kuäärädu kuɛn, kä cɛ jɛ moc pek.
27
TƐ-KƐL lotdɛ ni ɣöö ji̱n ca ji̱ thɛm kɛ theem kä ca ji̱ jek ala mi puɔl puɔl.
28
PƐ-RETH lotdɛ ni ɣöö kuääru ca jɛ da̱a̱k kä ca jɛ ka̱m ji̱ Ma-day kɛnɛ ji̱ Pa-rath.”
29
Kä cu Bel-ca-dhar ruac ja̱k kä cua Da-ni-yel rony kɛ bi̱i̱ mi di̱t kökdɛ kä cua ŋuäkdɛ moc kɛ kuat dääpä, kä cua ruac lat kɛ kui̱dɛ, kä cua jɛ jakä diɔ̱ɔ̱k nath rɛy kuäärä.
30
Kä kɛ jɛn wäär ɛ mɔ pa̱ny cua Bel-ca-dhar kuäär ji̱ Bɛ̈-bi-lɔn näk.
31
Kä cu Dɔr-ya-wɛc raan Ma-day kuäär ka̱n, kä tëë kɛ run ti jiɛn bäkɛl wi̱cdɛ rɛw.
← Chapter 4
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 6 →
All chapters:
1
2
3
4
5
6
7
8
9
10
11
12