Daniel 4

Nuer Bible © Bible Society in South Sudan 1998,2012

← Chapter 3 Jump to: Chapter 5 →

1Kä cu Kuäär ni Nɛ-bu-kad-nɛ-dhar ruaacni ti̱ti̱ jäkä naath diaal kɛnɛ döör diaal kɛ nɛy tin ruac kɛ thuk ti gööl wi̱i̱ muɔ̱ɔ̱n wëë i̱, “Ɛ mal tekɛ yɛ!

2Ɣän tɛth lɔcdä kɛ ɣöö bä yɛ la̱t nyuuthni kɛnɛ tin ga̱ykɛ naath tëë ci Kuoth in Di̱t ni Jɛn kɛ la̱t kɛ kui̱dä.

3Kä nyuuthnikɛ di̱tkɛ ɛlɔ̱ŋ, kä lätkɛ tin ga̱ykɛ naath bumkɛ ɛlɔ̱ŋ! Kä kuäärɛ ɛ kuäär mi do̱raar, kä ruecdɛ te thi̱n kä ri̱c diaal amäni cäŋ kɛl.

4“Ɣän Nɛ-bu-kad-nɛ-dhar, ɣän la ciëŋä agɔaa dhɔrä rɛy riäŋä mi di̱i̱t.

5Ɣän cua̱ nyuuth nɛn kɛ la̱k mi cu ɣä jakä dual, kä ɣän mëë ta̱a̱ tɔ̱ɔ̱cä dhaŋädä, cu nyuuth pua̱a̱ny in ci ben wi̱i̱dä ɣä jak kä dual.

6Kä ɣän cua̱ ruac jäkä raar kɛ ɣöö ba ji̱ Bɛ̈-bi-lɔn tin pɛl pɛl nööŋ nhiamdä, kɛ ɣöö ba ɣä ben la̱t luɔt läkä.

7Kä cu ti̱t kɛnɛ göök ka̱a̱cni kɛ ji̱ kuthni kɛnɛ ji̱ kolaaŋni ben, kä cua̱ kɛ la̱t la̱k, duundɛ ɣöö /ken kɛ ɣä luäŋ kɛ lät luɔtdɛ.

8Kɛ jɔak, cu Da-ni-yel ben nhiamdä, kä cua̱ jɛ la̱t la̱k. (Jɛn cɔalkɛ jɛ Bel-tɛ-ca-dhar kɛ ciöt Kuɔthdä, kä jɛn tëë kɛ yiëë kuthni mi gɔaa) cua̱ wee i̱,

9‘Bel-tɛ-ca-dhar, bo̱o̱th ti̱tni, ɣän ŋa̱cä jɛ ɛn ɣöö ji̱n ci thia̱a̱ŋ kɛ yiëë kuthni mi gɔaa, kä thilɛ mi gääy naath mi bum kä ji̱. Kä la̱k in cä nɛn jɛn ɛn, lätni ɣä luɔtdɛ.

10Mɛmɛ ɛ mëë cä nɛn mëë ta̱a̱ tɔ̱ɔ̱cä rɛy dhaŋädä, tëë kɛ jiath mi te ni däär ɣɔaa, kä jɛn bärɛ kɛ bär mi di̱i̱t.

11Ɛn jiath cɛ piith ala mi di̱i̱t kä bumɛ, kä yiɛth wi̱cdɛ ni pua̱a̱r, kä nɛ̈nkɛ jɛ pëkni ɣɔaa diaal.

12Kä ji̱thkɛ tekɛ maan mi di̱i̱t, kä ŋuan dɛykɛ ɛlɔ̱ŋ, kä ɛ jɛn mi̱th ti diaal thi̱n ɔ. Kä jek ley dɔaar diaal ti̱eep thaarɛ, kä lät diit duëlkiɛn karikɛ. Kä tin diaal tin tëk mi̱thkɛ thi̱n.

13“ ‘Kä min caarä nyuuth ɛmɔ tɔ̱ɔ̱cä rɛy dhaŋädä cua̱ jääk Kuɔth Nhial mi tiit ŋɔak, nɛn bëë piny nhial.

14Kä cuɛ ruac kɛ jɔw mi di̱i̱t wëë i̱, “Jɔapɛ jiath, kä tɛ̈mɛ karkɛ piny, wuɔcɛ ji̱thkɛ kä kiɛthɛ dɛykɛ dɔɔr. Kä a ley barkɛ rɔ̱ thaarɛ kä a diit barkɛ rɔ̱ karikɛ.

15Duundɛ ɣöö pa̱lɛ tharɛ kɛnɛ ciökɛ rɛy muɔ̱ɔ̱n, kä göl ɛ jɛ kɛ ladiit kɛnɛ ciɛk in yian, kä a jɛ te rɛy juaacni dɔɔr. Kä ɛ ram ɛmɔ dëmkɛ ikä ɛ thäc puɔ̱ɔ̱rä, kä a jɛ cieŋ kɛɛl kɛ ley dɔaar, rɛy juaacni dɔaar.

16Kä a jɛ /ci cär ce̱tkɛ raan, kɛ run da̱ŋ bärɔw, a jɛ cär kɛ ca̱r leyni.

17Kä cu jääk in gui̱c tiitdä mɛmɛ lat. Cua ŋuk lat ɛ Kuoth in Di̱t ni Jɛn, kɛ ɣöö bi nɛy diaal ɛ kulɛ ŋa̱c. Ɛn ɣöö Kuoth Nhial in leny buɔ̱mdɛ ti diaal ɛ jɛn rueec kuäärä nath. Kɛ ɣöö la kämɛ kuäär ram min go̱o̱rɛ kä la kämɛ jɛ ram in kɔ̱c ni jɛn rɛy nath.”

18“ ‘Kä mɛmɛ ɛ jɛn la̱k ëë cä nɛn ɣän Kuäär ni Nɛ-bu-kad-nɛ-dhar. Täämɛ ji̱n Bel-tɛ-ca-dhar lätni ɣä min lotdɛ, min /ken ji̱ kuäärädä tin pɛl pɛl ɛ luäŋ ɛn ɣöö ba ɣä la̱t luɔtdɛ. Bi jɛ luäŋ pa̱ny, kɛ ɣöö ji̱n ci thia̱a̱ŋ kɛ yiëë kuthni mi gɔaa.’ ”

19Kä cuɛ Da-ni-yel in cɔal kɛ bä Bel-tɛ-ca-dhar wi̱cdɛ yi̱c kɛ gua̱a̱th mi tɔt. Kä cu cärkɛ jɛ moc dual mi di̱i̱t. Kä cu kuäär ɛ jiök i̱, “Bel-tɛ-ca-dhar, a la̱k kɛnɛ luɔtdɛ /ci ji̱ bi jakä dual.” Kä cu Bel-tɛ-ca-dhar ɛ loc wëë i̱, “Kuäärä, dëë go̱r ni mi ku la̱k lɛ lot ni nɛy tin lökɛ ji̱, kä dee luɔtdɛ cu lot ni ji̱ tɛ̈ru!

20Ɛn jiath ëë ci nɛn, min bär kä bum. Yiɛth wi̱cdɛ ni pua̱a̱r, kä nɛ̈nkɛ jɛ pëkni ɣɔaa diaal.

21Ji̱thkɛ tekɛ maan mi di̱i̱t kä ŋuan dɛykɛ ɛlɔ̱ŋ, kä jek ti diaal mi̱eth thi̱n, kä cieŋ ley dɔaar diaal thaarɛ, kä ci diit diaal duëlkiɛn la̱t karikɛ.

22Ɛn jiath ɛmɔ ɛ ji̱n lö kuäär! Ji̱n ci piith a di̱t kä bumi. Ci di̱tdu rɔɔdɛ rep ɛ cɛ räth ni puɔ̱ɔ̱rä, kä ci ruecdu pëk ɣɔaa diaal cop.

23Kä mëë ti̱i̱ cärä läkädu lö kuäär, curi jääk Kuɔth nɛn bëë piny nhial kä wëë i̱, ‘Jɔapɛ jiath piny kä da̱kɛ jɛ, kua tharɛ kɛnɛ ciökɛ lɛ pa̱l rɛy muɔ̱ɔ̱n, kä gölɛ jɛ kɛ ladiit kɛnɛ ciɛk in yian, a jɛ te rɛy juaacni dɔaar. Kä a jɛ dëmkɛ ikä ɛ thäc puɔ̱ɔ̱rä, kä a jɛ cieŋ kɛɛl kɛ ley dɔaar, amäni mi ci run da̱ŋ bärɔw thuuk.’

24Mɛmɛ ɛ jɛn luɔt läkä lö kuäär, kä jɛn ɛ ruac Kuɔth in Di̱t ni Jɛn ci ben kä ji̱ mɔ lö kuäärä.

25Kä ji̱n ba ji̱ woc rɛy nath, kä bi wä cieŋ kɛɛl nikɛ ley dɔaar. Kä ba ji̱ jakä laaki ni wal ce̱tkɛ ɣɔ̱k, kä bi puaak nikɛ thäc puɔ̱ɔ̱rä, kä bi run da̱ŋ bärɔw thuk ni dɔɔr, amäni mi ci jɛ ŋa̱c ɛn ɣöö Kuoth in Di̱t ni Jɛn ɛ jɛn la rueec kuäärä nath ɔ, kä la kämɛ kuäär ram min go̱o̱rɛ.

26Kä min ca lat ɛn ɣöö ba thar jiaath kɛnɛ ciökɛ päl, mɔmɔ lotdɛ ni ɣöö ba kuääru nyɔk kɛ luc ji̱ mi wi̱i̱ jɛ wä ŋa̱c ɛn ɣöö ram in te Nhial ɛ jɛn la rueec ɔ.

27Kɛ kui̱c ɛmɔ lö kuäär ku lui̱kdä liŋ. Ji̱n ri̱t rɔɔdu kä dueerku kɛ lätni cuŋni, kä päl jiäku kä nhɔk ni nɛy tin ciaŋkɛ a jiäk, kɛ ɣöö bi ria̱ŋdu te thi̱n kɛ gua̱a̱th mi bäär.”

28Cu ti diaal ti̱ti̱ tuɔɔk kä Kuäär ni Nɛ-bu-kad-nɛ-dhar.

29Kɛ thuɔ̱k päthni da̱ŋ wälrɛw cuɛ wä ja̱l wi̱i̱ duëël kuäärä min te kä Bɛ̈-bi-lɔn,

30kä cuɛ ruac wëë i̱, “Mɛmɛ /ciɛ jɛn Bɛ̈-bi-lɔn in gɔaa, mëë ta̱a̱thä ɛ ɣän kɛ buɔ̱mdä ala rɛk in di̱i̱t, kɛ kui̱ gɔɔyä wutädä?”

31Kä min ŋot rieetkɛ /kenkɛ ni thuɔ̱k kɛ ben raar thokdɛ, cu jɔw ben ni nhial wëë i̱, “Lö Kuäär ni Nɛ-bu-kad-nɛ-dhar ca ruac ɛmɛ la̱r ji̱ ɛn ɣöö ca kuäär woc kä ji̱!

32Ji̱n ba ji̱ woc rɛy nath, kä bi wä cieŋ kɛɛl nikɛ ley dɔaar. Kä ji̱n bi lak ni wal ce̱tkɛ ɣɔ̱k. Kä bi run da̱ŋ bärɔw thuk dɔɔr amäni mi ci jɛ ŋa̱c ɛn ɣöö Kuoth in Di̱t ni Jɛn ɛ jɛn la rueec kuäärä nath ɔ, kä la kämɛ kuäär ram in go̱o̱rɛ.”

33Kä niɛ wa̱nɔ cua luk Nɛ-bu-kad-nɛ-dhar cu ŋok. Cua jɛ woc rɛy nath, kä cuɛ lak ni wal ce̱tkɛ ɣɔ̱k, kä cua jɛ demikä ɛ thäc nhial, cu mäni mëë ci miemkɛ piith ce̱tnikɛ gɔ̱k cuɔr, kä cu rio̱pkɛ piith ce̱tnikɛ rio̱p diɛɛt.

34Mëë ci run tɔ̱tɔ̱ thuuk, ɣän Nɛ-bu-kad-nɛ-dhar, cua̱ nhial liɛc kä cu ciaaŋdä mëëdan luny kä ɣä. Ɣän cua̱ Kuoth in Di̱t ni Jɛn la̱r tɛ̈th lɔaac cua̱ jɛ liak kä cua̱ jɛ ka̱m luth jɛn ram in do̱raar. Kɛ ɣöö ruecdɛ ɛ ruec mi thil pek, kä kuäär ɛ tëë thi̱n ri̱cni diaal.

35Kä nɛy diaal tin cieŋ rɛy ɣɔaa ce̱tkɛ kɛ lɔar, kä la lätdɛ ni min go̱o̱rɛ kɛ ja̱a̱k nhial kɛnɛ nɛy tin cieŋ wi̱i̱ muɔ̱ɔ̱n. Kä thilɛ ram mi dee jɛ gak, kiɛ dee jɛ thiec i̱, “Ɛŋu mi lätdi?”

36Kɛ jɛn gua̱a̱th ɛ mɔ, ɣän cua̱ loc ciɛɛŋädä, kä cua gɔɔy ciɛɛŋädä kɛnɛ wuɔ̱tdä amäni buɔ̱m kuäärädä luɔ̱c ɣä. Kä cu luëëkä kɛnɛ ruëëckä luäkdä nyɔk kɛ gör, cua̱ loc wi̱i̱ kɔam kuäärädä, kä cua ɣä nyɔk kɛ mät luth mi di̱i̱t.

37Täämɛ ɣän Nɛ-bu-kad-nɛ-dhar liakä Kuoth Nhial kä puanyä jɛ kä ka̱mä jɛ luth, kɛ ɣöö lätkɛ diaal kɛ thuɔ̱ɔ̱k, kä duɔ̱pkɛ diaal kɛ cuŋ. Kä tëë kɛ lua̱ŋ mi locɛ ni nɛy tin kapkɛ rɔ̱ nhial piny.

← Chapter 3 Jump to: Chapter 5 →