Daniel 8

Nuer Bible © Bible Society in South Sudan 1998,2012

← Chapter 7 Jump to: Chapter 9 →

1Kɛ diɔ̱ɔ̱k runi ruëc kua̱r ni Bel-ca-dhar, ɣän Da-ni-yel cua̱ la̱k mi dɔ̱diɛn mi ce̱tnikɛ mëë jio̱l läkikä.

2Rɛy läkä, ɣän cua̱ rɔɔdä nɛn ta̱a̱ däär wec Cu-cɛ̈n in di̱i̱t, kä Ee-lam rɛy läkä ta̱a̱ peek in lot ni Kir Ulay.

3Kä min guecä cua̱ thäk dɛ̈ɛ̈l rɔmä nɛn tëë cuŋä jɔk kiɛɛr. Kä tëë kɛ tuɔ̱ŋ da̱ŋ rɛw. Kɛn tuɔ̱ŋ da̱ŋ rɛw bärkɛ, duundɛ ɣöö bär ni kɛl kä min dɔ̱diɛn, kä jɛn min bääriɛn pithɛ kɛ jɔak.

4Kä min guɛcä thäk dɛ̈ɛ̈l, jɛn gewɛ kɛ kui̱c konyä ca̱ŋ kɛnɛ kui̱c caam kɛ kui̱c cuëëc ɣɔaa. Thil ɛ ley mi cu ko̱rɛ luäŋ, kä thilɛ ley mi dëë rɔ luäŋ kɛ leny kä buɔ̱mdɛ. Kä jɛn la lätdɛ min nhɔkɛ kä bɛ cu buɔ̱m ɛlɔ̱ŋ.

5Kä min ta̱a̱ gui̱c, cu thäk dɛ̈ɛ̈l böwä päl kui̱ konyä ca̱ŋ mi tekɛ tuŋ kɛl mi te kam nyiinkɛ, cuɛ rët kɛ wi̱c muɔ̱ɔ̱n a /ci ciökɛ piny nyɔt.

6Kä cuɛ ben peek in te thäk dɛ̈ɛ̈l rɔmä thi̱n, in tekɛ tuɔ̱ŋ da̱ŋ rɛw mëë nɛ̈ɛ̈nä cuŋä jɔk kiɛɛr. Kä cuɛ riŋ kä thäk dɛ̈ɛ̈l rɔmä kɛ buɔ̱mdɛ kɛɛliw.

7Cua̱ jɛ nɛn makɛ thäk dɛ̈ɛ̈l rɔmä. Kä cuɛ thäk dɛ̈ɛ̈l rɔmä ban kɛ ŋɛ̈ɛ̈ny kä cuɛ jɛ yiɛth, kä cuɛ tuɔ̱ŋkɛ da̱ŋ rɛw töl. /Ken thäk dɛ̈ɛ̈l rɔmä ko̱rɛ lɛ luäŋ, cuɛ thäk dɛ̈ɛ̈l rɔmä yuɔr piny kä cuɛ jɛ rio̱p. Kä cuɛ thil ram mi dee thäk dɛ̈ɛ̈l rɔmä kän kä buɔ̱mdɛ.

8Cu thäk dɛ̈ɛ̈l böwä piith ala mi di̱i̱t, duundɛ ɣöö min di̱t buɔ̱mdɛ, cu tuŋdɛ min di̱i̱t tööl, kä cu tuɔ̱ŋ da̱ŋ ŋuaan do̱ny guäth tuɔ̱ɔ̱ŋ in di̱i̱t, kä luɔtkɛ ni pëk ɣɔaa da̱ŋ ŋuaan.

9Kä cu tuŋ mi tɔt do̱ny tuuŋ kɛl, kä cuɛ pith kui̱c cuëëc kɛnɛ nhiam ɣɔaa kɛnɛ mun in gɔaa.

10Cu tuŋ in tɔt piith a cuɛ räth ni pua̱a̱r. Cuɛ tha̱a̱ŋ nyini nhial kɛnɛ tha̱a̱ŋ ciɛri yuɔr piny kä cuɛ kɛ dɔany kɛ ciökɛ.

11Kä jɛn tuŋ ɛ tɔt ɛmɔ, cuɛ rɔ wä pa̱a̱r kɛ Kuoth in bo̱o̱th rɛ̈m nhial, kä cuɛ muc tin la wëŋkɛ Kuoth woc, kä cuɛ luak Kuɔth ŋar ŋar.

12Kɛ kui̱ nyuɔɔni cua nyin nhial kɛnɛ muc tin waŋkɛ thöp jɛ. Cua thuɔ̱k yuɔr piny, kä cu tuŋ lätkɛ tin cɛ la̱t cua̱ lät ti gɔw.

13Kä cua̱ jääk Kuoth liŋ ruacɛ, kä cu jääk in dɔ̱ŋ jɛ jiök i̱, “A bɛ ku mäni nɛy bi nyuuth ruac kɛ kui̱ mucni tin waŋkɛ kɛnɛ nyuɔɔn in ci da̱k nööŋ, kɛ tho̱p luaak Kuɔth kɛnɛ nyin nhial kɛ ɣöö bakɛ dɔany kɛ ciök?”

14Kä cuɛ ɣä loc wëë i̱, “Bɛ la ni̱n ti bathdɔɔri rɛw wi̱cdɛ kur diɔ̱k, kɛ kɔrɛ ba luak Kuɔth kulɛ nyɔk kɛ lätni.”

15Kä ɣän Da-ni-yel mëë cä la̱k nɛn, cua̱ jɛ go̱r ɛn ɣöö bä luɔtdɛ ŋa̱c. Kä cuɛ tekɛ mi cu ben cuɔ̱ŋ nhiamdä, mi ce̱tkɛ raan.

16Kä cua̱ jɔw ran liŋ lotdä kiɛɛr Ulay cio̱tdɛ wëë i̱, “Gab-ri-yel, luäk wut ɛmɔ kɛ duɔ̱ɔ̱p mi bɛ ŋäc ni luɔt nyuuthä.”

17Kä cu Gab-ri-yel ben gekädä guäth in cuɔ̱ŋä thi̱n, kä mëë cɛ ben, cua̱ dual ɛlɔ̱ŋ kä cua̱ tɛɛth buupä. Kä cuɛ ɣä jiök i̱, “Liŋ ruac ɛmɛ lö gat ran, ɛn nyuuth ɛmɛ ɛ nyuuth kɛ kui̱ guutdä ɣɔaa.”

18Kä min ruacɛ kɛ ɣä, cuɛ puɔ̱nydä kuer ni̱en cua̱ tɛth ni piny kɛ nhiamdä, kä cuɛ ɣä thiap kä cuɛ ɣä jiɛ̈c nhial.

19Kä cuɛ wee i̱, “Liŋɛ, ɣän bä ji̱ la̱t tin bi tuɔɔk kɛ gua̱a̱th gaak, kɛ ɣöö bi guut ɣɔaa tuɔɔk kɛ gua̱a̱thdɛ.

20Kɛ kui̱ tha̱a̱k dɛ̈ɛ̈l rɔmä in tekɛ tuɔ̱ŋ da̱ŋ rɛw mëë ci nɛn, kɛn tɔ̱tɔ̱ bi kɛn a kua̱r Ma-day kɛnɛ Pa-rath.

21Kä thäk dɛ̈ɛ̈l böwä ɛ kuäär Gɛ-rith, tuŋ in di̱i̱t in te kamä nyiinkɛ, ɛ kuäär Gɛ-rith, kä tuŋ in di̱i̱t in te kam nyinkɛ ɛ kuäär in jio̱l.

22Kä kɛ kui̱ tuɔ̱ɔ̱ŋ in ci tööl, min ci gua̱a̱thdɛ tuɔ̱ŋ da̱ŋ ŋuaan do̱ny thi̱n, mɔmɔ lotdɛ ni ɣöö, bi kua̱r da̱ŋ ŋuaan rɔ̱ jiɛc, kä /ci buɔ̱mdiɛn bi pa̱a̱r kɛ buɔ̱m kuäärädɛ.

23Kä kɛ thuɔ̱k ruecädiɛn, guäth in wä dueer pekdiɛn wä cop, bi kuäär mi gua̱n liakä mi gua̱n mɛɛtdä rɔ jiɛc.

24Kä jɛn bi buɔ̱mɛ rɔ rep ɛlɔ̱ŋ, duundɛ ɣöö /cɛ bia buɔ̱m mi bä kä jɛ, kä jɛn bɛ ca̱p mi bi naath däk tok, kä bi lätkɛ tin lätdɛ rɔ lot kɛ jɛ. Jɛn bɛ nɛy ti buɔ̱m buɔ̱ɔ̱m näk, kɛnɛ nɛy tin la nɛɛ Kuɔth.

25Jɛn kuäär ɛmɛ bi nyinkɛ rɔ̱ lot kɛ kac kɛnɛ mɛ̈ɛ̈t, kä bɛ jɛ cari lenyɛ naath. Kä bɛ nɛy ti ŋuan näk kä kui̱c kɛn ɛ, kä bɛ kok ni ɣöö wëë nyiëëny kɛ Kuoth in la bo̱o̱th kua̱ri. Duundɛ ɣöö ba jɛ dup, kä /cɛ bia̱ tet ran.

26Kä ɛn nyuuth in ci nɛnɛ kɛ kui̱ thiaŋ kɛnɛ runwaŋ ɛ thuɔ̱k. Kɛ kui̱ ɛmɔ, ji̱n rɔm la̱k ɛmɔ, kɛ ɣöö bi gua̱a̱thdɛ ben kɛ kɔr ni̱ni ti ŋuan a tɛmɛ ni ɛn täämɛ.”

27Kä inɔ, ɣän Da-ni-yel cuɛ ɣä tiam ɛlɔ̱ŋ, kä cu puɔ̱nydä bɛ̈c kɛ ni̱n, kɛ kɔr ni̱ni cu puɔ̱nydä pual kä cua̱ loc lätni kua̱r. Duundɛ ɣöö cu la̱k ɣä moc lɔc jiääk, kä /ka̱n min lotdɛ ŋa̱c.

← Chapter 7 Jump to: Chapter 9 →