Jeremiah 18

Nuer Bible © Bible Society in South Sudan 1998,2012

← Chapter 17 Jump to: Chapter 19 →

1Nɛmɛ ɛ ruac ëë bä kä Yir-mɛ-yaa kä Kuoth Nhial wëë i̱,

2“Wër dhɔr raam mi tääth dha̱a̱ri, ɛn wi̱ni bi rieetkä wä liŋ.”

3Kä cua̱ wä dhɔr raam mi tääth dha̱a̱ri, kä cua̱ jɛ jek tëë lät kɛ mi wil rɔ.

4Kä dhaar in tääthɛ kɛ mun, cuɛ rɔ ŋɛr tetädɛ, kä cuɛ jɛ nyɔk kɛ täth dhaar mi dɔ̱ŋ, mi guicɛ i̱ dee thia̱k ni ta̱thdɛ.

5Kä cu ruac Kuɔth Nhial ben kä ɣä, wëë i̱,

6“Lö dhɔr I-thɛ-rɛl, ɣän cä yɛ dee la̱t ce̱tnikɛ la̱t ɛ ci tääth dha̱a̱ri jɛ la̱tdɛ? Kä nɛ̈nɛ jɛ ta̱a̱ ɔ tekɛ mun tetdä tääthä dha̱a̱ri mɔ, ɛ jɛn ta̱a̱ in tekɛ yɛ tetädä, lö dhɔr I-thɛ-rɛl.

7Mi cä jɛ lar ɛn ɣöö bɛ tekɛ do̱r kiɛ kuäär mi bä yuɔ̱t piny kä bä däk,

8ɛn do̱r ɛ mɔ, mɔ cä ruac kɛ kui̱dɛ mɔ, mi wëë luny jɔk kä dueerkɛ ɣän bä riɛk in cä car i̱ dëë lät kä jɛ päl.

9Kä pekdɛ gua̱a̱th mi cä car ni ɣöö bä do̱r kiɛ kuäär nööŋ nhial kä bä jɛ pith,

10mi wëë duer wä la̱t nhiamdä, kä /cɛ ruacdä bi liŋ, ɣän /cä min gɔaa in cä car kɛ kui̱dɛ i̱ dëë la̱t bi lät kä jɛ.

11Kɛ kui̱c ɛmɔ täämɛ lät ni ruac ɛmɛ ji̱ Juda kɛnɛ ji̱ Jɛ-ru-tha-lɛm ɛn ɣöö laar Kuoth Nhial jɛ i̱, ‘Ɣän rialä da̱k ikä kɛ kui̱dun, kä la̱tdä ca̱p mi jiääk kɛ kui̱dun. Inɔ ɛ ram ɔ ri̱i̱t rɔ kä jiäkɛ, kä rialɛ dupkun kɛnɛ ciɛŋkun ikä.’

12“Duundɛ ɣöö cukɛ wee i̱, ‘Thilɛ jɛ luɔt! Kɔn bakɔ guɔ̱ɔ̱r ni cär kɔ, kä bi ram ɔ la̱t ni ca̱r lɔacdɛ mi jiääk.’ ”

13Kɛ kui̱ ɛmɔ cu Kuoth Nhial wee i̱, “Thiëcɛ rɛy dööri ɛŋa mi ci mi ce̱tkɛ nɛ liŋ? Mi bɛc ɛlɔ̱ŋ ca jɛ la̱t ɛ nya I-thɛ-rɛl.

14A ci pi̱w tin ca rɔ̱ käp ku met thil wi̱i̱ pa̱a̱m kä Lɛ-ba-nɔn? Kä ci waŋ pi̱i̱ni tin kɔ̱a̱c kɔ̱a̱a̱c in bä wi̱i̱ pa̱a̱m met kööt?

15Duundɛ ɣöö ci nɛɛkä ɣä pa̱l ruëëc, wa̱ŋkɛ ni kuth jiɛn wal tin kuɔ̱r kuɔ̱ɔ̱r, tin jakɛ kɛ kä kɔ̱a̱th kɛ kɔ̱a̱a̱th ikä rɛy duɔ̱pnikiɛn, kɛnɛ duɔ̱p tëë wal. Cakɛ jak kä ja̱lkɛ ni gëëk duɔ̱pni a /ci mɔ a rɛy duɔ̱p.

16Kä bikɛ mun ɛ mi jak kä jiäk, ala mi bi te baaŋ amäni cäŋ kɛl. Kä nɛy tɔ̱ bi rët kɛ jɛ mɔ bikɛ ŋɛ̈ɛ̈r, kä bikɛ wuɔ̱thkiɛn tiŋ.

17Ɣän bä kɛ riaw nhiam ji̱ tɛ̈riɛn, ce̱tnikɛ jiɔam kuec känyä ca̱ŋ. Kä bä nyuɔ̱th nikɛ jɔkdä a /ci mɔ a nhiamdä, kɛ cäŋ däkädiɛn.”

18Ɛ jɛn cu naath wee i̱, “Bia, la̱tnɛ ca̱p mi jiääk kɛ kui̱ Yir-mɛ-yaa, kɛ ɣöö /ci ŋuɔ̱t bi lɛ bath kä bo̱o̱th palä, kä /ci luek bi lɛ thil kä ram in pɛl, kä /ci ruac bi lɛ jiɛn kä gök. Bia dua̱cnɛ jɛ kɛ lɛp, kä /cuanɛ tekɛ mi liɛŋnɛ kä ruaacnikɛ.”

19Kä liŋ ɣä, lö Kuoth Nhial, liŋ min latkɛ ɛ ji̱ go̱o̱nyädä.

20Ɛ dëë mi gɔaa ku col kɛ mi jiääk? Kä ŋotdɛ tetkɛ ɣä pul mi bä pɛn thi̱n. Timɛ ɛn ɣöö cä cuɔ̱ŋ nhiamdu ɛ latdä mi gɔaa kɛ kui̱diɛn, kɛ ɣöö bi gakdu päl kɛ kɛ.

21Kɛ kui̱ ɛmɔ päli gaatkiɛn buɔth kä jak nikɛ kä na̱kɛ, kä a mänkiɛn thil gaat kä akɛ la män jɔɔkni. Kä a wutnikiɛn li̱w kɛ juey, kä ɛ ŋuɛ̈tnikiɛn na̱kɛ ko̱o̱r.

22Kä ɛ wiee liɛŋkɛ dho̱rikiɛn, mi wi̱i̱ kɛ wä pärikä kɛ nɛy ti bikɛ wä pɛc! Kɛ ɣöö cikɛ pul mi bä pɛn thi̱n tɛt, kä cikɛ dhuur mi ka̱p kɛ ɣä la̱th piny.

23Kä ŋotdɛ ŋäci jɛ, lö Kuoth Nhial kɛn ca̱a̱pkiɛn diaal tin görkɛ näkdä. /Cu jiäkiɛn pälikä, kä /cu dueerkiɛn woc waaŋdu. Akɛ yuɔ̱rkɛ raar nhiamdu, lät nikɛ kä duɔ̱ɔ̱r kɛ cäŋ gaakdu.

← Chapter 17 Jump to: Chapter 19 →