Jeremiah 23

Nuer Bible © Bible Society in South Sudan 1998,2012

← Chapter 22 Jump to: Chapter 24 →

1Kä cu Kuoth Nhial wee i̱, “Riɛk akɛ yiëën deet tin ci det nɛɛnikä riaw kä dɔɔr!”

2Kɛ kui̱ ɛmɔ cu Kuoth Nhial in la Ruey Ɣɔaa ni Kuoth I-thɛ-rɛl nɛmɛ lar kɛ kui̱ yiëëni deet tin yiënkɛ nɛɛkä wee i̱, “Ci yɛn detkä riaw dɔɔr, kä ci yɛn kɛ buath raar, kä /ken yɛn kɛ tit. Kä nɛ̈nɛ jɛ ɣän bä yɛ tit kɛ kui̱ lät jiäknikun.

3Ɣän bä duɔth deetkä ma̱a̱t rɛy wi̱i̱ni diaal tin cäkɛ riaw kä thi̱n, bä kɛ luɔ̱c guäth lo̱kdiɛn, kä bikɛ rɔ kuay ɛlɔ̱ŋ.

4Kä bä kɛ moc yiëën ti bikɛ tit, kä thilɛ mi bi lɛ dual kɛ kɛ, kiɛ mi bi kɛ jak kä ga̱y, kä thilɛ mi bi lɛ bath, ruac ni ɣän Kuoth Nhial.”

5Kä cu Kuoth Nhial wee i̱, “Ci gua̱th thia̱k, mi bä kaar mi gɔaa jiɛc kä Dee-bid thi̱n, mi bi ruëc ala kuäär kä bɛ lät kɛ pɛl, kä bɛ thuɔ̱k kɛnɛ cuŋ lat rɛy rööl.

6Rɛy ni̱nikɛ ba Juda kän kä bi I-thɛ-rɛl cieŋ kɛ mal. Kä ba ciötdɛ cɔl i̱, ‘Kuoth Nhial ɛ cuɔ̱ɔ̱ŋda.’ ”

7Kɛ kui̱ ɛmɔ cu Kuoth Nhial wee i̱, “Nɛnɛ ci ni̱n cop tin /ci naath bi lɛ ya̱c thi̱n i̱, ‘Ce̱tnikɛ ciöt Kuɔth Nhial in tëk mëë no̱o̱ŋ ji̱ I-thɛ-rɛl raar ro̱o̱l I-jëp,’

8duundɛ ɣöö bikɛ wee i̱, ‘Ce̱tnikɛ ciöt Kuɔth Nhial in tëk mëë no̱o̱ŋ kuay dhɔaar I-thɛ-rɛl kä bo̱th kɛ raar muun kuec caam kɛnɛ wi̱i̱ diaal tëë cä kɛ naŋ thi̱n.’ Kä bikɛ cu cieŋ muundiɛn.”

9Kä kɛ kui̱ göökni, ci lɔcdä jiath ɛlɔ̱ŋ cɛ wä lath ni cɔ̱wkä diaal. Ɣän cä ce̱tnikɛ ram mi ci yɔ̱ŋ kɛ kɔaŋ, ram mi ci kɔaŋ jɛ naŋ, kɛ kui̱ Kuɔth Nhial, kɛnɛ kui̱ rieetnikɛ tin rɛl gɔɔydiɛn rɔ.

10Ci mun thia̱a̱ŋ kɛ dhööm kɛ kui̱ kä ti̱ti̱ pär mun, kä ci wal dɔaar kööt. Kɛ ɣöö guur go̱o̱k ni jiäk, kä lät kɛn ni dueer kɛ buɔ̱mdiɛn.

11“Kä nɛnɛ gök kɛnɛ bo̱o̱th palä thilɛ kɛ kuoth, nɛ̈ɛ̈nä jiäkiɛn ni dhɔrä.

12Kɛ kui̱ ɛmɔ bi dupkiɛn, ce̱tnikɛ duɔ̱ɔ̱p mi cäät naath rɛy muɔ̱th, min bikɛ buath raar kä bikɛ jak kä pɛn. Kä ɣän bä kɛ nöŋ riɛk kɛ ruɔ̱n duäcädiɛn,” ruac ni ɣän Kuoth Nhial.

13“Ɣän cä jiäk göökni Tha-mɛ-ria nɛn, latkɛ ruac go̱o̱kä kuɔth Baal, kä ca nɛɛkä ni ji̱ I-thɛ-rɛl riaw kä dɔɔr.

14Duundɛ ɣöö cä mi jiäk ni jɛn nɛn, kä go̱o̱k Jɛ-ru-tha-lɛm. Cikɛ dhɔm kä lat kɛn ni ka̱a̱cni, kä com kɛn ni la̱a̱t jiäkni, kɛ ɣöö thilɛ ram mi bi rɔ lɛ ri̱t kä lätkɛ tin jiäk, ci kɛn diaal cu ce̱tnikɛ Thɔ-dɔm kä ɣä, kä ci ji̱kɛ cu ce̱tnikɛ Go-mo-ra.”

15Kɛ kui̱ ɛmɔ cu Kuoth Nhial in la Ruey Ɣɔaa nɛmɛ lar kɛ kui̱ göökni i̱, “Nɛnɛ, ɣän bä kɛ mi̱eeth kɛ tor jiaath, kä bä kɛ jak kä mathkɛ ni pi̱w lueŋä, kɛ ɣöö ci ciaŋ göökni Jɛ-ru-tha-lɛm tin thil kuoth wä muun kɛɛliw.”

16Kä cu Kuoth Nhial in la Ruey Ɣɔaa wee i̱, “/Cu ruac göökni tɔ̱ bi ji̱ la̱t ruac go̱o̱kä mɔ liŋ, tɔ̱ ba ji̱ thiäŋ kɛ ŋa̱th kä mi thil luɔt tɔ̱. Lat kɛn ni nyuuthni cärädiɛn, /ci kɛ ti bä raar thok Kuɔth Nhial.

17La kɛn nɛy tin lökɛ ruac Kuɔth Nhial a jio̱k i̱, ‘Bɛ gɔaa kɛ yɛ,’ kä jiökɛ nɛy tin bum wuɔ̱thkiɛn kä guɔ̱ɔ̱rkɛ ni cär lo̱cnikiɛn i̱, ‘Thilɛ riɛk mi bi yɛ jek.’ ”

18Kä kuɛ la ŋa kä kɛ mɔ ci ruac ben go̱r kä Kuoth Nhial ɔ, mɔ ci ruacdɛ ben liŋ ɔ kä ci jɛ tit ɔ?

19Kä nɛ̈nɛ thul Kuɔth Nhial! Gakdɛ cɛ wä raar ɛ ruɔth mi bi wuɔ̱th nɛɛni tin jiäk ɛlɔ̱ŋ.

20Ɛn gak Kuɔth Nhial /cɛ bi loc jɔk amäni mi cɛ min caarɛ thuk kɛ lätni. Kɛ ni̱n tɔ̱ bi ben tɔ̱ bia jɛ ŋa̱c agɔaa.

21Ɣän /ka̱n go̱o̱k ti̱ti̱ ja̱k, kä ŋotdɛ wurkɛ kɛ ruacdiɛn. Ɣän /ka̱n ruac kɛ kɛ kä ŋotdɛ latkɛ ruac go̱o̱kä.

22Duundɛ ɣöö mi cikɛ ruac ben go̱r kä ɣä, dee kɛ ruaacnikä la̱t nɛɛkä, kä dee kɛ kɛ luɔ̱c jɔk dupdiɛn in jiääk, kɛnɛ lätkiɛn tin jiäk.

23Kä cu Kuoth Nhial wee i̱, “Ɛ ɣän Kuoth mi te thiekä, a /ci mua Kuoth mi te nänä?

24A dee raan rɔ ku tɛ̱̈ɛ̱̈ guäth mi /ca ŋäc mi cä jɛ dee nɛn thi̱n? Kä /ci ɣän nhial kɛnɛ piny ku thiäŋ?

25Ɣän cä ruac göökni liŋ tin latkɛ ruaacni go̱o̱kä ka̱a̱cni kɛ ciötdä, wä kɛ i̱, ‘Ɣän cä läk läkikä, cä läk läkikä!’

26A bɛ ku mäni nɛy bɛ te lo̱cni göökni ka̱a̱cni ti latkɛ ruaacni ka̱a̱cni go̱o̱kä kɛ cär lo̱cnikiɛn ɔ,

27tin car kɛ jɛ ɛn ɣöö dëë nɛɛkä jak kä pa̱lkɛ ciötdä ruëëc kɛ la̱a̱kiɛn tin lät kɛn kɛ kä rɔ̱, ce̱tkɛ mëë ci gua̱ni ciötdä pa̱l ruëëc kɛ kui̱ kuɔth Baal?

28Ɛ gök in tekɛ la̱k lat la̱a̱kdɛ, kä ɛ ram in kääp ruacdä lat jɛ kɛ thuɔ̱kdɛ. Ɛŋu mɔ dee jil te kɛɛl kɛ bɛl ɔ?

29A ci ruacdä ku ce̱tkɛ mac, kɛnɛ dey in la päm a tiath ni ŋëëtni?

30Kɛ kui̱ ɛmɔ, ɣän gakä kɛ go̱o̱k tin ca ruacdiɛn jak kä ruacdä kamnikiɛn.

31Kä nɛnɛ, ɣän gakä kɛ go̱o̱k tin lat kɛ ruacdiɛn kä bikɛ wee i̱, ‘Ruac ni ɣän Kuoth Nhial.’

32Kä ɣän gakä kɛ nɛy tin latkɛ ruac go̱o̱kä kɛnɛ la̱a̱k kacä, lät kɛn nikɛ ka̱a̱cni, kä buathkɛ nɛɛkä raar kɛ ka̱a̱cnikiɛn kɛnɛ nyɔɔpdiɛn, kä /ka̱n kɛ ja̱k kä /ka̱n kɛ kuany. Kä thilɛ luɔt mi ci nɛy ti̱ti̱ jɛ jëk thi̱n, ruac ni ɣän Kuoth Nhial.”

33“Kä mi wä raan ji̱ thiec kä kɛn nɛy ti̱ti̱, mi ɛ gök kiɛ ɛ bo̱o̱th palä i̱, ‘Ɣa̱c Kuɔth Nhial in thiɛk ɛ lee ŋu?’ Bikɛ loc i̱, ‘Ɣa̱c mi thiɛk ŋu kä, kä ɣän bä yɛ yiäk.’

34Kä kɛ kui̱ go̱kä kiɛ bo̱o̱th palä kiɛ ram kɛl kä naath mɔ bi wee i̱, ‘Ɣa̱c Kuɔth Nhial mi thiɛk ɔ,’ ɣän bä ɛn ram ɛmɔ duäc kɛnɛ ji̱ dhɔaarɛ.

35Kä nɛmɛ ɛ jɛn min bi yɛn ɛ lat kamnikun, bi ram ɔ jɛ la̱t gua̱n thieekädɛ kä bi ram ɔ jɛ la̱t däman i̱, ‘Ɛŋu la luɔc Kuɔth Nhial ɔ?’ Kiɛ ‘Ɛŋu ci Kuoth Nhial ɛ lat ɔ?’

36Kä duundɛ ɣöö /cia rɔ̱ bi nyɔk kɛ ruac i̱, ‘Ɣa̱c Kuɔth Nhial in thiɛk’ kɛ ɣöö ɣa̱c in thiɛk ɛ riet ran, kä cia rieet Kuɔth in tëk ni Kuoth Nhial in la Ruey Ɣɔaa ni Kuothdan ya̱r.

37Kä nɛmɛ ɛ min bi thiec ni gök i̱, ‘Kuoth Nhial cɛ ji̱ loc i̱di?’ Kiɛ ‘Ɛŋu mi ci Kuoth Nhial jɛ lat?’

38Duundɛ ɣöö mi wi̱i̱ jɛ jiök i̱, ‘Ɣa̱c Kuɔth Nhial mi thiɛk,’ ɛ jɛn min ci Kuoth Nhial jɛ lar, kä kɛ ɣöö ci rieet ti̱ti̱ lat i̱, ‘Ɣa̱c Kuɔth Nhial mi thiɛk,’ kä cä yɛ jiök i̱, ‘/Cuarɛ wee i̱, “Ɣa̱c Kuɔth Nhial mi thiɛk.” ’

39Kä kɛ kui̱ ɛmɔ, kɛ thuɔ̱k ɣän bä yɛ pa̱l ruëëc kä bä yɛ yuɔr raar nhiamdä, kɛɛl kɛ wec ëë cä ka̱m yɛ kɛnɛ guurikun.

40Ɣän bä yɛ nöŋ thil luthä kɛnɛ pöc mi /ca bi met pa̱l ruëëc.”

← Chapter 22 Jump to: Chapter 24 →