Jeremiah 50 — Nuer Bible © Bible Society in South Sudan 1998,2012

1Mɛmɛ ɛ ruac ëë ci Kuoth Nhial ɛ lat kɛ kui̱ Bɛ̈-bi-lɔn, kɛnɛ kui̱ muɔ̱ɔ̱n ji̱ Kɛ̈l-da-ya kɛ thok go̱kä ni Yir-mɛ-yaa, wëë i̱,

2“Lätni jɛ nɛy diaal rɛy dööri diaal, lät ni jɛ kɛ, lat nyuuthni kä /cu duɔ̱ɔ̱r tëë larɛ i̱, ‘Ba Bɛ̈-bi-lɔn naŋ, kä ba kuoth Bɛl moc kɛ pöc, kä ba kuoth Mɛ-ro-dak moc kɛ buar, kä bi kuth Bɛ̈-bi-lɔn diaal dual.’

3“Kɛ ɣöö ci do̱r ben pek kuec caam mi bi jɛ mak, min bi mundɛ jak kä doth baaŋ, kä bɛ thil ram mi bi cieŋ thi̱n. Kä bi ji̱kɛ kɛnɛ leykɛ rɔ̱ bar rɛydɛ.

4“Kɛ kɛn ni̱n tɔ̱tɔ̱, kɛ jɛn gua̱a̱th ɛmɔ, cu Kuoth Nhial ruac ɛn ɣöö, bi ji̱ thukni duëli kuec caam kɛnɛ ji̱ Juda ben kɛɛl, kä bikɛ ja̱l kɛ wiee min bäkɛ. Kä bi kɛn Kuoth Nhial ni Kuothdiɛn go̱r.

5Kä bi kɛ duɔ̱ɔ̱p in wä kä Dha-yɔn thiec, kä bikɛ wä thi̱n, kä bikɛ wee i̱, ‘Bia, la̱tnɛ mat ruac mi ci bi met thuuk kä ca bi pa̱l ruëëc kɛ Kuoth Nhial.’

6“Ci nɛɛkä cu ce̱tnikɛ ti ci bath. Kä ci yiëënkiɛn kɛ cu buath jɔ̱ɔ̱r, a wä kɛ yi̱ec ni wuɔ̱thni päämni. Ci kɛn wä yi̱ec wuɔ̱thni päämni kɛnɛ rët, cikɛ luakdiɛn cu pa̱l ruëëc.

7Kä tin diaal tin jek kɛ cakɛ cam, kä lar ji̱ tɛ̈riɛn jɛ i̱, ‘Thilɛ kɔ duer, kɛ ɣöö ci kɛn duer lät kä Kuoth Nhial in la yieendiɛn in thuɔ̱k, Kuoth in ŋääth gua̱ndɔɔŋnikiɛn ɛ.’

8“Bar ɛ rɔ̱ raar däär Bɛ̈-bi-lɔn, kä wiaa raar muun ji̱ Kɛ̈l-da-ya, kä jakɛ rɔ̱ kä ce̱tkɛ tut deet böwni nhiam deet.

9Kɛ ɣöö, nɛnɛ ɣän jiɛ̈cä döör ti ŋuan kɛnɛ wi̱i̱ ti di̱t, ti bi ben nyiëëny kɛ Bɛ̈-bi-lɔn, kä bi kɛ ben wi̱i̱ni kuec caam. Kä bikɛ a ji̱ tɛ̈rɛ ti di̱t, kä bikɛ jɛ käp. Kä ce̱t kui̱n kui̱ndiɛn nikɛ wut köör mi ŋäc ca̱a̱p köör kä /ci luny jɔk a ken raan näk.

10Kä ji̱ Kɛ̈l-da-ya ba kɛ pɛc, kä ba ram mi pɛɛc jɛ jakä jek ŋɔak thi̱n,” ruac ni Kuoth Nhial.

11“Ɛ cäŋ kuɛ̈ɛ̈ ŋa̱th, kä kuɛ̈ɛ̈ rɔ̱ liak, lö yɛn nɛy tin pɛ̈cɛ nɛɛkä, kä cäŋ ɛmɔ kuɛ duth dɔ̱l yɛn ce̱tnikɛ jua̱ljio̱k ɔ, kä kuɔm yɛn ce̱tkɛ jio̱ŋko̱o̱ri,

12bi muɔɔrun pöc ɛlɔ̱ŋ ɛn ram in daap yɛ bɛ tekɛ pöc. Kä bɛ la jɔak kä döör diaal, bɛ la därdɔaar mi kööt ɛ wi̱w kä tekɛ tur.

13Kɛ kui̱ gaak Kuɔth Nhial kɛ jɛ, /cɛ bi tekɛ nɛy ti cieŋ thi̱n, duundɛ ɣöö ba gua̱a̱th mi ca päl ni baaŋ. Kä bi ram mi wä rët kɛ Bɛ̈-bi-lɔn cu ga̱a̱c, kä bɛ cu kuiw kɛ kui̱ däkädɛ min cɛ nɛn.

14Rialɛ rɔ̱dunikä bëëri kɛ kui̱ köörun kɛ Bɛ̈-bi-lɔn, gölɛ jɛ, kä yɛn diaal tin ca bäärikiɛn gɔ̱ŋ, kuɛ̈ɛ̈ kɛ ba̱r kɛ kuen kueeni a thil kɛl mi doth, kɛ ɣöö, cikɛ dueer lät kä Kuoth Nhial.

15Wiaa kökɛ jɛ tuɔ̱ŋni diaal, kɛ ɣöö cɛ rɔ luär. Ci cuutnikɛ cu pɛ̈ɛ̈n, kä ci pa̱nynikɛ tɛɛth, kɛ ɣöö, mɛmɛ ɛ tɔ̱ɔ̱ŋ Kuɔth Nhial. Nöŋɛ jɛ tɔ̱ɔ̱ŋ, kä la̱tdɛ jɛ ce̱tnikɛ mëë cɛ kɔŋ la̱t.

16Tɛ̈mɛ kɛ raar kä Bɛ̈-bi-lɔn kɛn puɔ̱ɔ̱r bɛɛl kɛnɛ nɛy tin la ŋëër bɛɛl. Kä kɛ kui̱ gua̱n tɛ̈r, bi ramɔ loc ni kä nɛɛkɛ, kä bi ramɔ rɔ bar ni muundɛ pa̱ny.

17“Kä ca I-thɛ-rɛl kak ce̱tnikɛ det tin la da̱kɛ piny ɛ lony. Kä ci kuäär A-thi-ri-ya kɛ däk ni jio̱l, kä täämɛ ci Nɛ-bu-kad-nɛ-dhar kuäär Bɛ̈-bi-lɔn kɛ lɛ ɣɔak piny.

18Kɛ kui̱c ɛmɔ, cu Kuoth Nhial in la Ruey Ɣɔaa ni Kuoth I-thɛ-rɛl wee i̱, ‘Nɛ̈nɛ jɛ, ɣän nöŋä kuäär Bɛ̈-bi-lɔn kɛnɛ mundɛ da̱k, mi ce̱tnikɛ da̱k ëë cä lät kä A-thi-ri-ya.

19Ɣän bä I-thɛ-rɛl nyɔk kɛ luc ta̱a̱dɛ kä, bɛ mi̱eth jek kä Kar-mɛl kɛnɛ Ba-can, kä ba tin diaal tin go̱o̱rɛ jak kä ro̱ŋ pääm Ɛ-pa-rim kɛnɛ Gil-yad.

20Kɛn ni̱ni tɔ̱tɔ̱ ɛn guäth ɛmɔ, cu Kuoth Nhial ɛ lar ɛn ɣöö ba dueer I-thɛ-rɛl go̱r, kä thilɛ mi bi jek, kä ba dueer Juda go̱r, kä thilɛ mi ba jek. Kɛ ɣöö ɣän bä nɛy tëë ci kään pälikä.’

21“Jiɛ̈cɛ rɔ̱ nhial, wiaa nyiëënyɛ kɛ ji̱ muɔ̱ɔ̱n Mɛ-ra-tha-yim, kä wiaa nyiëënyɛ kɛ ji̱ Pɛ-kod, na̱kɛ kɛ, amäni ram min jɔakdiɛn la̱tdɛ tin diaal tin cä la̱r yɛ,” ruac ni ɣän Kuoth Nhial,

22“Te wiee köör rɛy wec, kɛnɛ da̱k mi di̱i̱t ɛlɔ̱ŋ.

23Kä cua buɔ̱m ɣɔaa ni kɛɛliw ku lɛ to̱l i̱di! Kä ci Bɛ̈-bi-lɔn ku lɛ da̱k i̱di rɛy dööri diaal!

24Ɣän cä dhuur la̱t kɛ kui̱du lö Bɛ̈-bi-lɔn kä cɛ ji̱ käp, kä /keni jɛ ŋa̱c. Ca ji̱ jek, kä ca ji̱ käp, kɛ ɣöö ci jiäk lät kä Kuoth Nhial.

25Ci Kuoth Nhial yio̱w köörɛ ka̱m raar, kä cɛ yio̱w gaakdɛ nööŋ raar. Kɛ ɣöö Kuäär ni Kuoth Nhial in la Ruey Ɣɔaa tëë kɛ la̱t mi bɛ la̱t kɛ kui̱ Kɛ̈l-da-ya.

26Bia nyiëënyɛ kɛ jɛ kɛ pek diaal. Lɛ̈pɛ gua̱th tɔ̱wni bɛɛlkiɛn, duɔl ɛ kɛ piny ce̱tnikɛ bun bɛɛl, kä da̱kɛ kɛ, akɛ thil ti doth kä kɛ.

27Näkɛ ŋuɛ̈tnikɛ diaal, ɛ kɛn diaal wa ŋuɔ̱t. Riɛk akɛ kɛ, kɛ ɣöö ci cäŋdiɛn ben, gua̱a̱th däkädiɛn.

28“Liɛŋɛ nɛy tin ci rɔ̱ bar, tin ci rɔ̱ lëny muun Bɛ̈-bi-lɔn, lat kɛn ɛ rɛy Dha-yɔn ɛn ɣöö ci Kuoth Nhial ni Kuothdan rɔ col. Cɛ col kɛ kui̱ nɛɛnikɛ.

29“Cɔalɛ ji̱ kuen kueeni kɛ ɣöö ba Bɛ̈-bi-lɔn mak, kɛn nɛy tin ka̱pkɛ bääri kɛn diaal tin ŋa̱ckɛ la̱t bäärä, kuɛ̈ɛ̈ pua̱t gölɛ jɛ, a jɛ thil ram kɛl mi kac. La̱tdɛ jɛ ce̱tnikɛ lätkɛ, a jɛ la̱tkɛ, kä jɛ ce̱tkɛ pek lätnikɛ. Kɛ ɣöö lätdɛ ni liak kɛ kui̱ Kuɔth Nhial ni Kuoth I-thɛ-rɛl.

30Kɛ kui̱c ɛmɔ, ba ŋuɛ̈tnikɛ diaal näk rɛy duɔ̱pnikɛ, kä ba rɛmdɛ ni kɛɛliw nor ɛn cäŋ ɛmɔ,” ruac ni ɣän Kuoth Nhial.

31“Nɛnɛ, ɣän gakä kɛ ji̱ lö ram mi liak rɔ, kɛ ɣöö ci cäŋdu ben, gua̱a̱th in bä däk ni ji̱.

32Bi ram min liak rɔ kɔ̱th kɔ̱thikä kä bɛ tɛɛth, kä thilɛ ram mi bi jɛ kap nhial. Kä ɣän bä wec ɛmɛ döp mac, kä bɛ kɛ pɛt amäni gua̱th diaal tin göl kɛ jɛ,” ruac ni ɣän Kuoth Nhial in la Ruey Ɣɔaa ni Kuɔth I-thɛ-rɛl.

33“Kä cu Kuoth Nhial in la Ruey Ɣɔaa mɛmɛ lat ɛn ɣöö ca ji̱ I-thɛ-rɛl ciɛŋ a jiäk, kä ca ji̱ Juda ciɛŋ a jiäk kɛɛl kɛ kɛ. Ci nɛy tëë naŋ kɛ kɛ ala pɛ̈ɛ̈c kɛ yian piny ɛ bum, kä pën kɛ kɛ wä.

34Kä lueeliɛn bumɛ, kä cɔalkɛ ciötdɛ i̱ Kuoth Nhial in la Ruey Ɣɔaa. Ɛ puc bɛ ruacdiɛn ka̱mkɛ kɛ ɣöö dɔ̱ŋ bɛ wi̱c muɔ̱ɔ̱n moc lɔ̱a̱ŋ, kuɛ la ɣöö, /ci ji̱ Bɛ̈-bi-lɔn bi tekɛ lɔ̱a̱ŋ.

35“Ko̱r akɛ ji̱ Kɛ̈l-da-ya,” ruac ni Kuoth Nhial, “Kä ko̱r akɛ ji̱ Bɛ̈-bi-lɔn, kɛnɛ ruëëckɛ, kɛ ji̱kɛ tin pɛl pɛɛl.

36Ko̱r akɛ ji̱ ca̱a̱pni kɛ ɣöö dɔ̱ŋ bikɛ a dɔa̱a̱r! Kä ko̱r akɛ wutni köörɛ kɛ ɣöö dɔ̱ŋ ba kɛ nor!

37Ko̱r akɛ ji̱ jiöŋköörikɛ kɛnɛ ji̱ thurbiɛɛlikɛ, amäni rɛm köör dööri diaal tin te rɛydɛ, kɛ ɣöö dɔ̱ŋ dee kɛ ce̱tnikɛ män. Ko̱r akɛ kuakɛ diaal kɛ ɣöö dɔ̱ŋ ba kɛ pɛc!

38Kä bi kɛ tekɛ riɛk pi̱i̱ni, kɛ ɣöö bikɛ kööt ɛ ɣak! Kɛ ɣöö ɛ mun kuthni tin la kuth jiɛn.

39“Kɛ kui̱c ɛmɔ, bi cieŋ ni ley dɔaar kɛnɛ ya̱a̱k rɛy Bɛ̈-bi-lɔn, kä bi wuɔ̱t cieŋ thi̱n bä. Kä /cɛ bilɛ tekɛ raan amäni cäŋ kɛl, kä /ca jɛ bi nyɔk kɛ ciëŋ ɛ raan bëëri diaal.

40Bɛ ce̱tnikɛ mëë ci Kuoth Thɔ-dɔm kɛnɛ Go-mo-ra kɛ wi̱i̱ ji̱ thieekädiɛn däk, ci Kuoth Nhial ɛ lar ɛn ɣöö /ci raan bi lɛ cieŋ thi̱n. Thilɛ gat ran mi bi rɔ nyɔk kɛ ja̱l thi̱n.”

41“Guɛcɛ jɛ, bi naath ben kui̱c caam. Döör ti buɔ̱m buɔ̱ɔ̱m kɛnɛ kua̱r ti ŋuan bi kɛ jiɛɛn ni pekni wec muɔ̱ɔ̱n diaal.

42Bikɛ ben kɛ bääri kɛnɛ mutni, kɛ nɛy ti jiäk ti, thil pälikä. Kä ce̱t jɔwdiɛn nikɛ wuɔ̱w pi̱i̱ni bäpdiit. Cikɛ kɔt jio̱kni jiöŋkööri, ca rɔ car ce̱tnikɛ tuɔ̱ŋ köör makɛ ji̱, lö nya Bɛ̈-bi-lɔn!

43“Kä mëë ci kuäär Bɛ̈-bi-lɔn ruac liŋ kɛ kui̱diɛn, cuɛ tetkɛ la̱th buɔ̱ɔ̱rɛ kɛ dual. Ci dual ɛ käp ce̱tnikɛ ciek mi te mäc,

44“Nɛnɛ, ɣän bä kɛ jak kä bar kɛ rɔ̱ ɛ kɛ pɛ̈th kä jɛ ce̱tnikɛ lony mi ri̱i̱ŋ raar rɛy ruɔ̱p Jɔr-dɛn mi ban tɔ̱ɔ̱r la̱k deet, ɣän bäkɛ jak kä barkɛ rɔ̱ ni kä kɛɛl kɛ jɛ. Kä bä ram mi bi jɛ ruac kuany ce̱tnikɛ min göörä. Kɛ ɣöö ɛŋa mi ce̱tkɛ ɣä? Kä ɛŋa mi bi ɣä cɔl? Kä ɛ yieen deet in mith bi cuɔ̱ŋ nhiamdä mɔ?

45Kɛ kui̱c ɛmɔ, liɛŋɛ min ci Kuoth Nhial ɛ car kɛ kui̱ Bɛ̈-bi-lɔn, kɛnɛ tin bɛ̈c bɛ̈ɛ̈c tin cɛ rialikä kɛ kui̱ muɔ̱ɔ̱n ji̱ Kɛ̈l-da-ya, mëë larɛ ɣöö ɛ puc cäŋ ɛ ni gaatkiɛn tin tɔatni ba kɛ naŋ ala pɛ̈ɛ̈c. Ɛ puc ɛ puc, bi naath ga̱a̱c ɛlɔ̱ŋ kɛ da̱k in ca däk ni rɛ̈k deetkiɛn.

46Kɛ lieŋ pɛɛnä Bɛ̈-bi-lɔn, bɛ piny lath kä ba wieediɛn liŋ rɛy dööri diaal.”