Jeremiah 31

Nuer Bible © Bible Society in South Sudan 1998,2012

← Chapter 30 Jump to: Chapter 32 →

1Kä cu Kuoth Nhial wee i̱, “Kɛ jɛn gua̱a̱th ɛ mɔ bi ɣän a Kuoth thukni duëli I-thɛ-rɛl diaal kä bi kɛn a nɛɛkä.”

2Kä cu Kuoth Nhial wee i̱, “Nɛy tëë ci kään li̱th cikɛ nhök jek rɛy dɔaar. Kä mëë go̱o̱r I-thɛ-rɛl lɔ̱a̱ŋ,

3cu Kuoth Nhial rɔ nyuɔth ni nänä ruacɛ. Ɣän nhɔakä ji̱ kɛ nhök mi thil pek. Kɛ kui̱ ɛmɔ cua̱ ŋot nikɛ mi ka̱a̱pä nhökdä kɛ ji̱.

4Bä jɛ nyɔk kɛ pi̱eth, kä bä jɛ la̱t, lö nya I-thɛ-rɛl! Kä bia yi̱k yi̱knikun nyɔk nikɛ läth, kä bia wä duth nikɛ nɛy tin tɛth lo̱ckiɛn kɛɛl.

5Kä bi ka̱a̱k wal kɛ kui̱ kɔaŋ lɛni nyɔk kɛ pi̱eth, wuɔ̱thni päämni Tha-mɛ-ria. Kä bi puɔ̱ɔ̱r pi̱eth thi̱n, kä bi lo̱ckiɛn tɛɛth kɛ dɛykiɛn.

6Kɛ ɣöö bɛ tekɛ cäŋ mi bi ciöt kɛ ga̱a̱ŋ, wi̱i̱ pa̱a̱m Ɛ-pa-rim i̱, ‘Jiacɛ rɔ̱, wanɛ kä Kuoth Nhial ni Kuothdan wi̱i̱ pa̱a̱m Dha-yɔn.’ ”

7Kä mɛmɛ ɛ min ci Kuoth Nhial ɛ lar wëë i̱, “Këtdɛ Je-kɔb diit tɛthä lɔaac kɛ jɔw mi di̱i̱t, kapɛ jiööthkun nhial kɛ kui̱ bo̱o̱thä dööri. Latdɛ jɛ kä liakɛ jɛ wiaa i̱, ‘Ci Kuoth Nhial nɛɛkɛ kän, tin ci kään kä I-thɛ-rɛl.’

8Kä guicɛ ɣän bäkɛ wä nööŋ ni muun kuec caam, kä bä kɛ wä ruɔ̱ɔ̱l ni pëk ni ɣɔaa tin na̱n na̱a̱n. Ciöör kɛnɛ ŋöt, kɛ pay daap kɛnɛ ruët. Buɔ̱n mi di̱i̱t bɛ luny ɛn wanɛ mɛ.

9Kä bikɛ luny jɔk kɛ wiee, kä bikɛ ja̱l nikɛ pal min luɔ̱ɔ̱cä kɛ jɔk. Ɣän bäkɛ naŋ nikɛ gua̱a̱th mi tekɛ pi̱w, nikɛ duɔ̱ɔ̱p mi cuŋ cuŋ kɛ ɣöö /ci kɛn kɔ̱a̱th bi lɛ kɔ̱thikä. Kɛ ɣöö ɛ ɣän gua̱n I-thɛ-rɛl, kä Ɛ-pa-rim gatdä min kɛ̱̈ɛ̱̈.

10“Kä liɛŋɛ min ci Kuoth ɛ lat, lö döör diaal, kä wiaa latdɛ jɛ ni jio̱kni yiëri tin na̱n. Kä larɛ jɛ i̱, ‘Ram mëë kith ji̱ I-thɛ-rɛl bɛ kɛ nyɔk kɛ ruɔ̱l. Kä bɛ kɛ gaŋ ce̱tnikɛ min la yieen deet detkɛ a gaŋ.’

11Kɛ kui̱ ɛmɔ ci Kuoth Nhial I-thɛ-rɛl luɛl, kä cɛ jɛ kän tetni nɛɛni tin lɛ̱̈ny kɛ jɛ kɛ buɔ̱m.

12Bikɛ ben kä bikɛ wä ki̱et nikɛ jɔw mi di̱i̱t, wi̱i̱ pa̱a̱m Dha-yɔn. Kä bi lɔcdiɛn tɛɛth kɛ muc Kuɔth Nhial. Bi lo̱ckiɛn tɛɛth kɛ kui̱ bɛɛl, kɛ kɔaŋ kɛnɛ liɛth, amäni det kɛnɛ ɣɔ̱k bä. Kä bi tëkdiɛn cu ce̱tnikɛ kak dɛɛni wal mi te wi̱c yiëër. Kä /ci kɛn rɔ̱ bi lɛ nyɔk kɛ cuɔ̱c.

13Kä bi nyier la̱t duth nikɛ tɛ̈th lɔaac, kä bi ŋuɛ̈tni kɛnɛ dɔŋ lo̱ckiɛn cu tɛɛth. Kä bä jiath lɔaacdiɛn cu jak kä tɛ̈th lɔaac. Ɣän bä kɛ bum, kä bä kɛ moc tɛ̈th lɔaac kɛ gua̱a̱th jiɛthä lɔaacdiɛn.

14Kä bä bööth palädiɛn moc kɛ ŋɔak ti ŋuan. Kä bi nɛɛkä cu tekɛ ŋɔak ti ŋuan,” ruac ni ɣän Kuoth Nhial.

15Kä cu Kuoth Nhial mɛmɛ lar wëë i̱, “Ca lul liŋ kä Rama, wiee kɛnɛ pa̱r mi di̱i̱t. Re-cɛl wiee ɛ kɛ kui̱ gankɛ, kä jɛn lo̱kɛ cuɔ̱m, kɛ ɣöö ci gaatkɛ thil.”

16Kä cu Kuoth Nhial wee i̱, “Ku wiee ka̱p cuɔ̱ŋ. A mer /ci lɛ lo̱o̱ny waaŋdu. Ba ji̱ culikɛ kɛ kui̱ la̱tdu, bikɛ luny jɔk muun gua̱n tɛ̈r.

17Kɛ kui̱c ɛmɔ ta̱yɛ kɛ ŋa̱th bi gaatkun luny muun wecdiɛn ɛmɛ,” ruac ni ɣän Kuoth Nhial.

18Kä ɣän cä wiee I-thɛ-rɛl liŋ min wëë i̱, “Ci ɣä duäc, kä cä ŋɔak ŋa̱c, kɛ ɣöö ca̱tdä kɛ kɔ̱a̱l mi /ka̱n ŋi̱eec, luuc ni ɣä jɔk kɛ ɣöö dɔ̱ŋ bä kään. Kɛ ɣöö ɛ ji̱n Kuoth Nhial ni Kuothdä.

19Kɛ ɣöö mëë cä bath dupdu, ɣän cä rɔ ri̱t dueerikä. Kä kɛ kɔr kä mëë cä jiääkdɛ ŋa̱c cu lɔcdä jiääk. Kä cua̱ pöc ɛlɔ̱ŋ kä cua̱ tekɛ buar, cä pöc ɛlɔ̱ŋ kɛ dueer tëë cä la̱t ni ŋuɛɛtädä.”

20“Ciɛ jɛn I-thɛ-rɛl min la gatdä min nhɔakä? Ciɛ jɛn gatdä min tɛth lɔcdä kɛ jɛ? Ɛ cäŋ ɛ min la ruacä ɛ jiäk kɛ kui̱dɛ, ɣän ŋuɔtdä kɛ mi tiɛmä jɛ. Kä inɔ lɔcdä carɛ ni jɛ, ɣän ɛ puc bä jɛ pälikä.

21“Lätni duɔ̱pku kä ti bi la ŋici kɛ, cuŋni jiɛn thi̱n kɛ kui̱du. Kä tit dup tin di̱tkiɛn, tin la jäl kɛ ji̱. Ku luny jɔk lö nya I-thɛ-rɛl, luny ni däär wi̱i̱niku.

22Ɛ bi ku yi̱i̱c amäni nɛy, lö nyam mi /thil ŋa̱th? Kui̱ kä ɣöö Kuoth cɛ mi gɔaa pay cak wi̱i̱ muɔ̱ɔ̱n, ɛn ɣöö ciek bɛ wut lɛ gaŋ ɛ jɛn,” ruac ni ɣän Kuoth Nhial.

23Kä cu Kuoth Nhial in la Ruey Ɣɔaa ni Kuoth I-thɛ-rɛl mɛmɛ lar wëë i̱, “Bi kɛn rieet ti̱ti̱ lɛni nyɔk kɛ lär mun Juda kɛnɛ rɛy wi̱i̱nikɛ, mi wa̱a̱ kɛ nyɔk kɛ luuc jɔk bikɛ wee i̱, ‘Ci Kuoth Nhial ji̱ poth, lö ciëëŋnda min thuɔ̱k, lö päm in rɛl gɔɔydɛ rɔ.’

24Kä bi Juda kɛnɛ wi̱i̱kɛ diaal te ni kɛɛl, kä bi puɔ̱ɔ̱r bɛɛl kɛnɛ yiëën ɣɔ̱ɔ̱k cieŋ ni kɛɛl.

25Kɛ kui̱ kä ɣöö bä mun moc kɛ ria̱ŋ mi di̱i̱t, kä bä yiey diaal tin cuc moc kɛ lɔ̱a̱ŋ.”

26Kä inɔ ɣän bä keer kä bä guic, kä bi niendä cua̱ mi gɔaa kä ɣä.

27Kä cu Kuoth Nhial ɛ lar wëë i̱, “Nɛ̈nɛ jɛ ci ni̱n thia̱k tin bä thok duëël I-thɛ-rɛl kɛnɛ thok duëël Juda pith thi̱n kɛ kuay nath kɛnɛ ley.

28Kä bi mɛmɛ tuɔɔk ɛ puc ce̱tnikɛ mëë la guiɛcä kɛ, kɛ ɣöö bäkɛ däk, kä bäkɛ töl piny, kä bäkɛ yäk, kä nöŋä kɛ jiäk. Ce̱tnikɛ nɔ bä, ɣän bä kɛ rialikä kä bäkɛ yop.

29Kä kɛ kɛn ni̱ni tɔ̱tɔ̱ /cikɛ bi lɛ wee i̱, ‘Mëë ci gua̱ni nath duer la̱t, bɛ mäni gaatkiɛn bikɛ li̱w kɛ jɛn duer ɛmɔ bä.’

30Duundɛ ɣöö bi ramɔ li̱w nikɛ duerɛ pa̱ny. Ramɔ bi duer la̱t ɔ bɛ li̱w nikɛ duer in cɛ la̱t ɛ jɛn.”

31Kä cu Kuoth Nhial mɛmɛ lar wëë i̱, “Nɛ̈nɛ jɛ ci ni̱n thia̱k tin bä mat ruac in thia̱k la̱t thi̱n kɛ thok duëël I-thɛ-rɛl kɛnɛ thok duëël Juda,

32kä /cɛ bi ce̱tkɛ mat ruac ëë cä la̱t kɛ gua̱nikiɛn mëë nööŋä kɛ raar muun I-jëp ɛ cua̱ kɛ käp ni tetdä, kä cu kɛ mat ruacdä ŋar ŋar ɛ cäŋ ɛ mëë ɛ ɣän gua̱ndiɛn bä.

33Duundɛ ɣöö ɛn ruac ɛ bä lat kɛ thok duëël I-thɛ-rɛl kɛ kɔr ni̱ni ti̱ti̱ mɔ ɣän bä ŋutkä la̱th rɛydiɛn kä bä kɛ gɔ̱a̱r ni rɛy lo̱cnikiɛn, kä bi ɣän a Kuothdiɛn kä bi kɛn a nɛɛkä.

34Kä /ci raan gua̱n thieekädɛ kɛnɛ däman bilɛ ŋi̱eec a wëë i̱, ‘Ŋäcni Kuoth Nhial’, kɛ kui̱ kä ɣöö kɛn diaal ba ɣä ŋa̱c ɛ kɛn nikä gaat ti tɔatni amäni dɔŋkiɛn. Kɛ kui̱c kä ɣöö ɣän bä dueerkiɛn päl, ɛ puc /cä kɛ bi nyɔk kɛ ti̱em.” Ruac ni ɣän Kuoth Nhial.

35Kä cu Kuoth Nhial min jak cäŋ kä lɛp kɛ cäŋdäär, kä ci pay kɛnɛ kuɛl rialikä kɛ ɣöö bikɛ lɛ̈p kɛ wäär, min wääl pi̱ bäpdiit ɛ ba muaŋ, min cɔal kɛ ciötdɛ i̱ Kuoth Nhial in la Ruey Ɣɔaa nɛmɛ lar i̱.

36“Mi wä ciaŋ ŋɔaani tin cä rialikä thil nhiamdä, ɛ jɛn bä bi kuay gan I-thɛ-rɛl ku thil kä ɣöö bi kɛn a do̱r nhiamdä amäni cäŋ kɛl.”

37“Kä mi /ca pua̱a̱r bi luäŋ kɛ thëm, kä ca pek piɛny muɔ̱ɔ̱n bi ŋa̱c ni kɛɛliw, ɣän /cä kuay gan I-thɛ-rɛl bi päl ɛ tɛk, ɛni mi ca kɛn diaal ti̱ti̱ la̱t ɛ jɛn bäkɛ pälɔ,” ruac ni ɣän Kuoth Nhial.

38“Kä nɛ̈nɛ jɛ ni̱n a bëëni tin ba nyɔk ni wec kɛ täth Kuoth Nhial. Bɛ tok ni kä cuut Ɣä-nan-el bi wä mäni thok kal in te gɔŋtɔtdä rɛ̈ɛ̈k.

39Kä bi keŋ thëm wä ni pääm Ga-reb, kä bɛ rɔ wä gɔ̱ŋ ni kä Go-at.

40Kɛ ta̱p kunyä nath ni kɛɛliw amäni ka̱a̱k diaal kɛnɛ tɔ̱ɔ̱r Kid-ron a räth ni thok gɔŋtɔtdä jiöŋkööri min te kui̱ känyä ca̱ŋ, jɛn gua̱a̱th ɛmɔ ni kɛɛliw bɛ la mi rɛl gɔɔydɛ rɔ kɛ kui̱ Kuɔth Nhial. Kä /thilɛ mi bi jɛ lɛ woc ɛn gua̱a̱th ɛmɔ amäni cäŋ kɛl,” ruac ni ɣän Kuoth Nhial.

← Chapter 30 Jump to: Chapter 32 →