Jeremiah 42

Nuer Bible © Bible Society in South Sudan 1998,2012

← Chapter 41 Jump to: Chapter 43 →

1Kä inɔ cu bööth rɛmni diaal kɛ Yo-ɣa-nan gat Ka-re-ɛ̈k kɛnɛ Ä-dhar-yaa gat Ɣo-ca-yaa kɛ nɛy diaal ni kä min tɔt amäni min di̱i̱t ben

2kä cukɛ gök ni Yir-mɛ-yaa jiök i̱, “Mal thiecda ni liŋ, pal Kuoth Nhial Kuothdu kɛ kui̱da kɛnɛ kui̱ ka̱a̱ni diaal ti̱ti̱, (kɛ ɣöö ci duɔth ni kɔn nɛy ti tɔt ti̱ti̱ kä nɛy ti ŋuan, ce̱tkɛ mɔ nɛɛni kɔ kɛ nyinku mɔ.)

3Kä ɛ Kuoth Nhial ni Kuothdu malkɔ nyuɔ̱th duɔ̱ɔ̱p in dëë kɔ wä kɛ jɛ, kɛnɛ mɔ dëë kɔ la̱t ɔ.”

4Kä cu gök ni Yir-mɛ-yaa kɛ jiök i̱, “Ɣän cä ruacdun liŋ. Nɛ̈nɛ jɛ, ɣän bä Kuoth Nhial ni Kuothdun pal ce̱tnikɛ min cia thiec, kä bä yɛ la̱r mɔ bi Kuoth Nhial ɛ lar kɛ kui̱dun ɔ. Ɣän /cä duɔ̱ɔ̱r kɛl bi teey kä yɛ.”

5Kä cukɛ Yir-mɛ-yaa jiök i̱, “Ɛ puc bi Kuoth a neen mi thuɔ̱k kɛ kui̱da mi wëë kään ɛ /cakɔ bi la̱t ni tin diaal tin bi Kuoth Nhial ni Kuothdu kɛ la̱r ji̱ kɛ kui̱da mɔ.

6Ɛ cäŋ ɛ mi gɔaa kiɛ mi jiääk ba kɔ jɔw Kuɔth Nhial ni Kuothda luɔ̱th min ja̱kɔ ji̱ kä jɛ kä dɔ̱ŋ bɛ gɔaa kɛ kɔ mi wakɔ jɔw Kuɔth Nhial ni Kuothda wä luɔ̱th.”

7Kɛ thuɔ̱k ni̱ni da̱ŋ wäl, cu riet Kuɔth Nhial ben kä Yir-mɛ-yaa.

8Ɛ jɛn cuɛ Yo-ɣa-nan gat Ka-re-ɛ̈k kɛnɛ bööth rɛmni diaal, tëë tekɛ jɛ kɛɛl, kɛ naath diaal a känɛ jɛ nikä mi tɔt amäni mi di̱i̱t cɔl.

9Kä cuɛ la̱r kɛ ɛn ɣöö ci Kuoth Nhial ni Kuoth I-thɛ-rɛl min cia ɣä jäk kä jɛ kɛ ɣöö bä ruacdun naŋ nhiamdɛ wee i̱,

10“Mi wä yɛn te muun ɛmɛ, ɣän bä yɛ kap nhial /cä yɛ bi luɔc piny. Ɣän bä yɛ pith kä /cä yɛ bi yut, kɛ ɣöö ɣän cä mëë jiääk ëë cä lät kä yɛ päl.

11/Cuarɛ dual kɛ kuäär Bɛ̈-bi-lɔn, /cuarɛ jɛ luth, kɛ ɣöö ɣän a kɛɛl kɛ yɛ, bä yɛ luäk, kä bä yɛ ka̱m raar tetnikɛ.

12Ɣän bä yɛ pälikä, kä bɛ yɛ ciɛŋ agɔaa, kä bɛ yɛ jak kä cieŋ muundun ɛmɛ.

13Duundɛ ɣöö mi wä yɛn ɛ lar i̱, ‘Kɔn /cakɔ bi tey ɛn muun ɛmɛ’, a /cia jɔw Kuɔth Nhial ni Kuothdun bi luɔ̱th,

14kä lar yɛnɛ i̱, ‘Eey, kɔn bakɔ wä muun I-jëp, guäth in cakɔ ko̱r bilɛ nyɔk kɛ nën, kä cakɔ jɔw kaaŋä bi lɛ nhɔk kɛ li̱eŋ kiɛ ci buɔth kɔ bi lɛ nyɔk kɛ näk bakɔ wä cieŋ ɛn thɔ̱ŋi.’

15Kä ɛ jɛn kua ruac Kuɔth Nhial liŋ lö ka̱a̱n Juda. Kä mɛmɛ ɛ min ci Kuoth Nhial in la Ruey Ɣɔaa ni Kuoth I-thɛ-rɛl ɛ lar wëë i̱, ‘Mi bi yɛn wä kä I-jëp, a bia wä cieŋ ɛn wi̱ni,

16ɛ jɛn bi ko̱r in bar yɛn rɔ̱ kɛ jɛ yɛ wä jek ɛn thɔ̱ŋɔ muun I-jëp. Ɛn wi̱ni yɛn bia li̱w.

17Nɛy diaal tin ci rɔ̱ riet dup I-jëp, tin wä cieŋ ɛn wi̱ni, bi kɛ li̱w kɛ ko̱r, kɛnɛ buɔth kɛ liaw. Thilɛ ram mi bi duɔth kä kɛ a tëk, kä min jiääk in bä nöŋkɛ.’ ”

18Kɛ kui̱ ɛmɔ cu Kuoth Nhial in la Ruey Ɣɔaa ni Kuoth I-thɛ-rɛl wee i̱, “Ce̱tnikɛ mëë ci ŋɛ̈ɛ̈nydä ben kä ji̱ Jɛ-ru-tha-lɛm, bi ŋɛ̈ɛ̈nydä ben kä yɛ bä mi wä yɛn wä kä I-jëp. Bi yɛn cua̱ nɛy ti ca päl, ti jiäk ti ca lam kä ca kuɛth. Kä /cia gua̱a̱th ɛmɛ bi lɛ nyɔk kɛ nën.

19Ci Kuoth Nhial yɛ la̱r mɛmɛ lö ka̱a̱n Juda, wëë i̱, ‘/Cuarɛ lɛ wä kä I-jëp.’ Kua jɛ ŋa̱c agɔaa ɛn ɣöö cä yɛ la̱r lär ɛn walɛ,

20kä cia wä raar kä cääk mi bi naŋ ni tëkdun. Kɛ ɣöö ci yɛn ɣä jäk kä Kuoth Nhial ni Kuothdun laar yɛn ɛ i̱, ‘Pal Kuoth Nhial ni Kuothdu kɛ kui̱da. Kä mɔ bi Kuoth Nhial ni Kuothda jɛ la̱r ji̱ kɛ kui̱da mɔ lärni jɛ kɔ bakɔ jɛ la̱t.’

21Kä ɛn wa̱lɛ cä jɛ la̱r yɛ, kä /ken yɛn jɔw Kuɔth Nhial ni Kuothdun luɔ̱th kɛ kɛn tin diaal tin cä la̱r yɛ.

22Kä kɛ kui̱c ɛmɔ täämɛ kua jɛ ŋa̱c agɔaa kɛ thuɔ̱k yɛn bia li̱w kɛ ko̱r kɛnɛ buɔth kɛ liaw ɛn muun go̱rɛ ɣöö bia cieŋ thi̱n ɔ.”

← Chapter 41 Jump to: Chapter 43 →