Jeremiah 40

Nuer Bible © Bible Society in South Sudan 1998,2012

← Chapter 39 Jump to: Chapter 41 →

1Kä cu riet Kuɔth Nhial ben kä Yir-mɛ-yaa kɛ kɔr gua̱th ëë ca jɛ lony yienä ɛ Nɛ-bu-dhar-dan min la bo̱o̱th ga̱a̱ŋni kä Rama, mëë naŋkɛ jɛ a ca jɛ yian kɛ kuat kɛɛl kɛ pɛ̈ɛ̈c diaal tëë naŋ kɛ kä Jɛ-ru-tha-lɛm kɛnɛ Juda, kä cua jɛ pɛ̈c kä Bɛ̈-bi-lɔn.

2Kä cu bo̱o̱th ga̱a̱ŋni Yir-mɛ-yaa naŋ kä cuɛ jɛ jiök i̱, “Kuoth Nhial ni Kuɔthdu cɛ ruac ɛ jiääk ɛ mi lat kɛ kui̱c gua̱th ɛmɛ.

3Ci Kuoth Nhial ɛ nööŋ ce̱tnikɛ mëë cɛ lar. Kɛ ɣöö cia duer lät kä Kuoth Nhial, kä /ken yɛn jɔwdɛ luɔ̱th, ɛ jɛn ci ŋɔak ti̱ti̱ tuɔɔk kä yɛ mɔ.

4Kä täämɛ guicɛ ɣän bä ji̱ lony kä kuatni tin ca yiɛn tetku ɛn walɛ. Mi guici jɛ gɔaaɛ i̱ ban wä kä Bɛ̈-bi-lɔn kɛɛl, kä bër, kä ɣän bä ji̱ wä tit agɔaa. Kä mi jiäkɛ ɛn ɣöö ban wä kä Bɛ̈-bi-lɔn kɛɛl, /cu bä. Guicɛ, kɛn wi̱i̱ diaal tekɛ nhiamdu. Wër guäthɔ guici gɔaa kɛ ji̱ mɔ kɛ ɣöö bi wä thi̱n.

5Kä mi bi duɔth, loc ni kä Gɛ-dɛ̈l-yaa gat Ä-ɣi-kam gat Ca-pan min ci kuäär Bɛ̈-bi-lɔn ɛ kuany ala rueec wi̱i̱ni Juda, kä bi cu cieŋ kɛɛl kɛ jɛ rɛy nath, kiɛ wër guäthɔ cari mɔ i̱ deri wä thi̱n.” Kä inɔ cu bo̱o̱th ruëëcni jɛ moc mi̱th kɛnɛ muc, kä cuɛ jɛ jak kä wä.

6Kä cu Yir-mɛ-yaa wä kä Gɛ-dɛ̈l-yaa kä Midh-pa, kä cuɛ cieŋ kɛɛl kɛ jɛ rɛy nɛɛni tëë ci duɔth muun Juda.

7Mëë ci bööth rɛmni kɛnɛ nɛɛkiɛn diaal tëë te gëëkni wec jɛ liŋ ɛn ɣöö ci kuäär Bɛ̈-bi-lɔn Gɛ-dɛ̈l-yaa gat Ä-ɣi-kam gat Ca-pan kuany ala rueec muɔ̱ɔ̱n, kä cɛ wutni, kɛnɛ män kɛ gaat tëë la can muun kä /ka̱n naŋ pecä kä Bɛ̈-bi-lɔn ka̱m jɛ.

8Cukɛ ben kä Gɛ-dɛ̈l-yaa kä Midh-pa, I-ca-mel gat Nɛ-thɛ̈n-yaa, kɛ Yo-ɣa-nan gat Ka-re-ɛ̈k, kɛ Thɛ-ra-yaa gat Tɛ̈n-ɣu-mɛth gat Eepay raan Nɛ-to-paa, kɛnɛ Yɛ̈-ä-dhɛ̈n-yaa raan ji̱ Maaka, kɛnɛ nɛɛkiɛn.

9Kä cu Gɛ-dɛ̈l-yaa gat Ä-ɣi-kam gat Ca-pan rɔ ya̱c kɛ kɛnɛ nɛɛkiɛn wëë i̱, “/Cuarɛ dual kɛ lätni ji̱ Kɛ̈l-da-ya kä ŋɔak. Cieŋ ɛ muun kä la̱tdɛ kuäär Bɛ̈-bi-lɔn ikä, bi gɔaa ni jɛn kɛ yɛ.

10Mi ɛ kui̱dä, ɣän bä cieŋ kä Midh-pa, bä lät kɛ kui̱dun nhiam ji̱ Kɛ̈l-da-ya tin bi ben kä kɔ. Mi ɛ kui̱dun, yɛn la̱tdɛ rɔ̱ kä kɔaŋ dɛɛni wal ma̱y kɛ dɛy jiɛn amäni liɛth, kä bia kɛ tɔ̱w rɛy kuaknikun kä bia cieŋ rɛy wi̱i̱ni tin cia ka̱n.”

11Ce̱tnikɛ nɔ bä, mëë ci ji̱ Juudh tëë te kä Mo-ab kɛnɛ Am-on kɛ Ɛ-dɔm kɛ wi̱i̱ tin kɔ̱ŋ ɛ liŋ ɛn ɣöö tëë kɛ nɛy ti ci kuäär Bɛ̈-bi-lɔn kɛ ba̱ny kä Juda, kä cɛ Gɛ-dɛ̈l-yaa gat Ä-ɣi-kam gat Ca-pan kuany ala kuääriɛn,

12inɔ cu ji̱ Juudh diaal luny jɔk gua̱thni tëë ca kɛ juɔc thi̱n, kä cu kɛ luny muun Juda, kä Gɛ-dɛ̈l-yaa kä Midh-pa. Kä cukɛ rɔ̱ lät kä kɔaaŋ ti ŋuan kɛ bɛl ma̱y.

13Täämɛ Yo-ɣa-nan gat Ka-re-ɛ̈k kɛnɛ bööth rɛmni diaal tëë te gëëkni wec, cukɛ ben kä Gɛ-dɛ̈l-yaa kä Midh-pa.

14Kä cu kɛ jɛ jiök i̱, “Ji̱n ŋäci jɛ ɛn ɣöö Baa-lith min la kuäär ji̱ Am-on cɛ I-ca-mel gat Nɛ-thɛ̈n-yaa ja̱k kɛ ɣöö bɛ ji̱ ben näk?” Duundɛ ɣöö /ken Gɛ-dɛ̈l-yaa gat Ä-ɣi-kam gat Ca-pan ruacdiɛn ŋäth i̱ ɛ thuɔ̱k.

15Kä inɔ cu Yo-ɣa-nan gat Ka-re-ɛ̈k ruac kɛ Gɛ-dɛ̈l-yaa kɛ tɛ̱̈ɛ̱̈ kä Midh-pa wëë i̱, “Jak ni ɣä kä wä, bä I-ca-mel gat Nɛ-thɛ̈n-yaa wä näk, kä thilɛ ram mi bi jɛ ŋa̱c. Kɛ ɣöö go̱o̱rɛ ɣöö bɛ ji̱ näk, bɛ ji̱ Juudh diaal tin te gekädu cu riaw, kä bi duɔth nath tin ci kään kä Juda cu thuuk kɛ lia̱a̱.”

16Duundɛ ɣöö /ken Gɛ-dɛ̈l-yaa gat Ä-ɣi-kam Yo-ɣa-nan gat Ka-re-ɛ̈k jiök i̱, “Ci mɛmɛ bi la̱t, kɛ ɣöö latdi ni kac kɛ kui̱ I-ca-mel.”

← Chapter 39 Jump to: Chapter 41 →