1 Samuel 1

nyankole

Jump to: Chapter 2 →

1Hakaba haribo omushaija omu nsi ya Ramataimuzofimu ey'omu nsi ya Efuraimu ey'ebibungo, orikwetwa Elukaana, mwene Yerohaamu, mwijukuru wa Eluhu, mutabani wa Tohu ya Zuufi Omuefuraimu.

2Akaba aine abakazi babiri, omwe naayetwa Haana n'ondiijo Penina; Penina azaire abaana, kwonka Haana atazaire.

3Mbwenu ogwo mushaija buri mwaka akaba aruga omu rurembo rw'owaabo aza Shiilo kuramizayo Mukama Ruhanga ow'amahe n'okumutambira ebitambo. Kandi okwo niyo Hofuni na Finehaasi beene Eeli baabaire bari abahongyerezi ba Nyakubaho.

4Aha izooba ri Elukaana yaabaire atambiraho ekitambo, akaba aha omukazi we Penina emigabo n'abatabani boona n'abahara.

5Kwonka nobu araabe yaabaire akunda Haana, akaba amuha omugabo gumwe gwonka, ahabw'okuba Nyakubaho akaba amwimire oruzaaro.

6Reero muka iba amurahura kumugwisa kubi, ngu ahabw'okuba Nyakubaho akamwima oruzaaro.

7Byagumizamu bityo buri mwaka. Haana ku yaabaire aza omu nju ya Nyakubaho, muka iba amurahura. Haana arira, aremwa n'okurya.

8Elukaana iba amubuuza ati: Haana noorizibwa ki? Ekirikukuzibira kurya ni ki? N'enki ekikucuncubaize? Mbwenu nyowe tindikukukirira abaana b'aboojo ikumi?

9Mbwenu eizooba rimwe ku baabaire bari Shiilo baaheza bati kurya n'okunywa; Haana yaimuka. Obwo Eeli omuhongyerezi akaba ashutami aha kitebe aha ruti rw'omuryango gwa Nyaruju ya Nyakubaho.

10Haza yaashaba Nyakubaho aine obujune bwingi kandi naarira munonga.

11Yaahiga naaraganisa ati: Ai Mukama Ruhanga w'amahe, buzimazima ku oraareebe okubonabona kw'omuzaana waawe, waanyijuka, nyowe omuzaana waawe wampa omwana w'omwojo, naanye ndyamukuhongyera, abe owaawe ebiro byona ebi arimara omu nsi, n'orumweiso tirurimuraba mu mutwe.

12Ku yaagumiizemu naashaba Nyakubaho, Eeli yaaguma naamureeba aha minwa.

13Haana ogwo akaba naashabira aha mutima, eminwa neeyetengyetsa, kwonka eiraka rye ritarikuhurirwa. Nikyo Eeli yaatekateekyeire ngu asinzire;

14akamugira ati: Noija kuherera hi n'esindo? Ku ocwa viino!

15Haana amugarukamu ati: Ngaaha, mukama wangye. Nyowe ndi omukazi oine obujune bwingi, tiinywaire viino, nobu kyakuba ekirikusinza kyona; kureka naaba nintuurira Nyakubaho enaku ezindi aha mutima.

16Otagira ngu nyowe omuzaana waawe ndi omukazi ofiire omutima, kureka ebi naaba ningamba, mbireeteirwe okugira amaganya maingi n'okutuntuzibwa.

17Eeli nawe amugira ati: Gyenda n'obusingye! Ruhanga wa Isiraeli akuhe eki waamushaba.

18N'onu amugarukamu ati: Nyowe omuzaana waawe, kagume nongirira embabazi. Mpaho ogwo mukazi agyenda, arya, tagaruka kureebwa aine enaku aha maisho.

19Bakaimuka kare omu kasheeshe, baaza omu maisho ga Nyakubaho baamuramya, bwanyima baagaruka owaabo Raama. Elukaana yaateerana n'omukazi we Haana; haza Nyakubaho yaamwijuka.

20Ku haahingwireho ebiro, Haana yaabaka enda yaagizaaramu omwana w'omwojo, yaamweta Samueli; ahabw'okuba akagira ati: Nkamushaba Nyakubaho.

21Mbwenu ogwo mushaija Elukaana n'ab'eka ye boona ku yaagiire kutambira Nyakubaho ekitambo ekya buri mwaka,

22Haana tiyaazayo, yaagira iba ati: Omwana ku aricuuka nibwo ndimutwara, nkamumurikira Nyakubaho; akagumayo ebiro byona.

23Elukaana iba amugarukamu ati: Kora eki orikusiima, otegyereze okuhitsya obu orimucuutsya. Nyakubaho naakahikiirize eki waaraganiise. Ogwo mukazi aguma aho, ayorora omwana we okuhitsya obu yaamucuukize.

24Ku yaamucuukize, yaamutwara n'enimi ehikize emyaka eshatu, n'encuro y'esaano y'obunono, n'endyanga ya viino, yaamuhitsya Shiilo, yaamuta omu nju ya Nyakubaho akiri muto.

25Batyo baita enimi, omwana baamureetera Eeli.

26Nyina yaamugira ati: Mukama wangye, nk'oku okiri ohuriire, niinye mukazi ori owaabaire ayemereire aha omu maisho gaawe naashaba Nyakubaho.

27Manya ogu niwe mwana ou naashabire Nyakubaho, akahurira okushaba kwangye, akamumpa.

28Mbwenu naamumuhongyera. Ebiro byona ebi arimara omu nsi, agume ari omuhongyeirwe. Batyo baaramizayo Nyakubaho.

Jump to: Chapter 2 →