1 Samuel 6

nyankole

← Chapter 5 Jump to: Chapter 7 →

1Eshanduukye ya Nyakubaho ekamara omu nsi y'Abafilisiti ameezi mushanju.

2Bwanyima Abafilisiti baayeta abagirwa n'abafumu, baababuuza bati: Tugire tuta eshanduukye ya Nyakubaho? Mutugambire eki turaagyohereze nayo neegaruka owaayo.

3Banu baabagarukamu bati: Ku muraayohereze eshanduukye ya Ruhanga wa Isiraeli, mutagyohereza yonka; kureka mucwe obwengye mugyohereze n'empongano y'okwihaho orubanja. Obwo nibwo muraakire; mukamanya ekizibiire omukono gwe kubarugaho.

4Nabo bababuuza bati: Ni mpongano ki ey'okutwihisaho orubanja, ei turaamwoherereze? Babagarukamu bati: Ebizimba bitaano bya zaabu, n'embeba itaano z'ezaabu, nk'oku omubaro gwa bakama b'Abafilisiti gurikwingana. Manya imwe mwena na bakama baanyu orufu rwabajuumikiire ni rumwe.

5Mbwenu mushemereire kuheesha ebintu birikushushana n'ebizimba byanyu n'ebirikushushana n'embeba ezirikushiisha ensi; mutyo muhe Ruhanga wa Isiraeli ekitiinwa, obundi akaabatuubiza okuhingamirwa omukono gwe; imwe na baaruhanga baanyu n'ensi yaanyu.

6Mbwenu mukaagangaariza ki emitima yaanyu nk'Abanyamisiri na Faraaho abaagangaarize eyaabo? Ku yaabafaafatikaniise, tibararekire abo bantu bakarugayo, bakagyenda?

7Hati nu, nimugire ekigaari kisya mukiteekateekye hamwe n'ente ibiri zirikwontsya ezitakateebwahoga mugamba, muzikomeho ekigaari; kwonka enyana zaazo muzizaakye, zigarukye omuka.

8Mpaho mutware eshanduukye ya Nyakubaho, mugite ahari ekyo kigaari, kandi aha rubaju rwayo muteho akashanduukye akarimu ebintu by'ezaabu ebi murikumwoherereza kuhongyerera ekibi. Bwanyima mugyohereze, egyende.

9Haza mwetegyereze ahu eraatoore. Ku eraahe omuhanda gurikuza owaayo, yaagyema ogwa Betishemeshi, biri Nyakubaho niwe atureeteire aka kabi kahango. Kwonka ku eraabe etagutoire, niho turaamanyire ku ataratuteerize mukono gwe, kureka ku ako kagwe kaabaire ekihikiirizi.

10Abantu baaba nikwo baagira; baareeta ente ibiri zirikwontsya baazikomera aha kigaari, enyana zaazo baazikingiranira omuka.

11Reero baata ahari ekyo kigaari eshanduukye ya Nyakubaho n'akashanduukye akarimu ebintu birikushushana n'embeba n'ebizimba, ebiheesirwe omu zaabu.

12Ezo nte zaashoronga omuhanda rugyendwa nizitoora Betishemeshi, nizigyenda nizijuga zitarikukiikama ha rubaju rwa buryo nari orwa bumosho. Na bakama b'Abafilisiti baagyenda bazikuratiire okuhitsya obu baahikire aha mwatano gwa Betishemeshi.

13Aba Betishemeshi ku baabaire nibagyesha engano zaabo omu ruhanga, baareeba egyo shanduukye, baashemererwa munonga kugireeba.

14Ekigaari ku kyahikire omu musiri gwa Yoshwa owa Betishemeshi, kyayemerera. Aho hakaba hariho eibaare rihango, baashatura ebiti by'ekigaari, baatambiriraho Nyakubaho ezo nte, zaaba ekitambo kye ekicwekize.

15Abaleevi baihaho eshanduukye ya Nyakubaho n'akashanduukye akagiri aha rubaju akaabaire karimu ebintu by'ezaabu, baabita ahari eryo ibaare rihango. Aba Betishemeshi baatambiriraho Nyakubaho ebitambo bicwekize n'ebindi bitambo.

16Abakama bataano b'Abafilisiti ku baakireebire, baagaruka Ekurooni eryo izooba.

17Ebi nibyo bizimba by'ezaabu ebi Abafilisiti baahongyeire Nyakubaho biri empongano y'ekibi. Ekimwe ahabwa Ashidoodi, ekindi ahabwa Gaaza, ekindi ahabwa Ashikelooni, ekindi ahabwa Saati, n'ekindi ahabwa Ekurooni.

18Kandi n'embeba z'ezaabu, nk'oku omubaro gw'endembo z'Abafilisiti zoona ezirikutegyekwa abakama bataano zirikwingana, endembo ezeehinguririziibwe ebigo by'amabaare n'ebirorero ebitazitiriirwe engo. Eibaare rihango eri baahuumwizeho egyo shanduukye ya Nyakubaho, omu musiri gwa Yoshwa owa Betishemeshi, nirikihamya n'okuhitsya eri izooba.

19Nyakubaho akaita abantu makumi mushanju omu Baabetishemeshi, ahabw'okuba bakaringuriza omu shanduukye ye. Abantu baacura munonga ahabwa Nyakubaho kubaitamu abantu baingi.

20Abaabetishemeshi baagira bati: N'oha orikubaasa kwemerera omu maisho ga Nyakubaho Ruhanga ogu orikwera? Kandi ku araaturugyeho, naaza ow'oha?

21Batyo baatuma entumwa aha batuuzi ba Kiriyatiyearimu nibabagira bati: Abafilisiti bagarwire eshanduukye ya Nyakubaho; nimwije mugitware owaanyu.

← Chapter 5 Jump to: Chapter 7 →