1 Samuel 26

nyankole

← Chapter 25 Jump to: Chapter 27 →

1Ebyo ku byahwaire, Abaaziifu baija baashanga Saulo Gibea, baamugira bati: Reeba, Daudi ayesherekire omu kibungo kya Hakiila aha burugwa-izooba bwa Yeshimooni.

2Saulo atyo aimuka, ashuuma omu ihamba rya Ziifu aine Abaisiraeli enkumi ishatu enkwata-ngabo, kuza kusherura Daudi omu ihamba rya Ziifu.

3Saulo asiisira omu kibungo kya Hakiila, ekiri aha rubaju rw'omuhanda, aha burugwa-izooba bwa Yeshimooni. Daudi we aguma omu ihamba. Daudi ku yaareebire Saulo amukuratiire omu ihamba,

4yaatuma entatsi, kandi yaahamiza kimwe ku Saulo aizire.

5Bwanyima Daudi yaimuka, yaija, yaahika ahi Saulo ateire orusiisira, yaayetegyereza ahi Saulo abyami na Abuneeri mwene Neeri, omukuru w'eihe rye. Saulo akaba abyami ahagati y'orusiisira, ensiisira z'abamahe zimwehinguriize.

6Bwanyima Daudi yaagira Ahimeleki Omuhiiti, na Abishaayi murumuna wa Yoabu mwene Zeruuya, ati: N'oha oraagyende naanye omu rusiisira ahi Saulo ari? Abishaayi amugarukamu ati: Niinye ndaagyende naiwe.

7Nyekiro Daudi na Abishaayi baahika ahu engabo ziri, baashanga Saulo abyami ahagati y'orusiisira, eicumu rye ritsimbire aha mushego, Abuneeri n'ab'eihe babyami bamwehinguririize.

8Abishaayi agira Daudi ati: Eri izooba Ruhanga omuzigu waawe yaamukuta omu ngaro. Hati ka mmuteere eicumu, rimwogyemu rikwate eitaka, ntamuteire rya kabiri.

9Kwonka Daudi aretsya Abishaayi ati: Otamwita! Mbwenu n'oha owaakubangira omukono ou Nyakubaho yaasiigire amajuta, atagire rubanja?

10Daudi ayongyera agira ati: Nindahira Nyakubaho, Nyakubaho niwe arimweitira, nari eizooba rye rihikye afe, nainga aryaza aha rugamba, agweyo.

11Rubuuza, nyowe okubangira omukono ou Nyakubaho yaasiigire amajuta! Kureka hati ihaho eicumu rimuri aha mushego n'enyungu y'amaizi; haza tugyende.

12Daudi aiha eicumu n'enyungu y'amaizi aha mushego gwa Saulo, batyo bagyenda. Haza tihagira waabareeba, nari owaakimanya, nobu yaakuba owaimutsya omutwe. Manya boona bakaba bagwejegyereire kimwe, Nyakubaho abagwejegyeize obutasisiimuka.

13Bwanyima Daudi akambuka, yaaza seeri, yaayemerera hare aha mutwe gw'orushozi aheetangarikire munonga nabo.

14Reero yaayeta ab'omu ihe na Abuneeri mwene Neeri ati: Ya iwe Abuneeri! Hoona shi toyetaba? Abuneeri amugarukamu ati: Ori oha iwe orikweta omugabe?

15Na Daudi agira Abuneeri ati: Tori omushaija emanzi? Mbwenu n'oha ori nkaiwe omuri Isiraeli? Ahabw'enki shi otaarinda mukama waawe omugabe? Reeba, haaba hariho owaaba aizire kumwita.

16Eki waakora ti kirungi. Nindahira Nyakubaho, ku mwena mushemereire kufa ahabw'okuba timwarinda mukama waanyu, ou Nyakubaho yaasiigire amajuta. Mbwenu reeba eicumu ry'omugabe n'enyungu y'amaizi, ebyaba bimuri aha mushego, ahi biri.

17Saulo amanya eiraka ku riri erya Daudi; amubuuza ati: Mwana wangye Daudi, niiwe orikugamba? Daudi amugarukamu ati: Nyakusinga mukama wangye, niinye ndikugamba.

18Agumizamu ati: Mukama wangye, nompiigira ki, nyowe omwiru waawe? Nkozire ki? Ncumwire ki?

19Mbwenu Nyakusinga mukama wangye, ninkweshengyereza, ohurire eki nyowe omwiru waawe ndikukugambira. Ku araabe ari Nyakubaho onteeraine naiwe, naikirize mmuhongyere. Kwonka ku baraabe bari abantu, Nyakubaho naakabaitse omujumo. Ahabw'okuba eri izooba bancwa aha butaka bw'empungurano obu Nyakubaho yaahaire abantu be, nibangira bati: Irooko, oramye baaruhanga abandi!

20Mbwenu nu, otaikiriza eshagama yangye kusheeshekyera aha butaka bw'abanyamahanga, ahi Nyakubaho atari, ahabw'okuba iwe omugabe wa Isiraeli oizire kumpiiga nyowe omukukuni, nk'orikuhiiga endahi omu nshozi.

21Saulo amugarukamu ati: Mwana wangye Daudi, nkozire kubi. Mbwenu garuka, tinkikukora kubi bundi; ahabw'okuba eri izooba waareeba ku amagara gangye gari ekintu kikuru. Manya nyowe mbaire ekifamutima, naahaba munonga.

22Daudi amugarukamu ati: Nyakusinga, eicumu ryawe ndiri. Ragiira omwe aha batsigazi baawe aije aha, aryakiire.

23Manya Nyakubaho azimuurira buri muntu nk'okuhikiirira kwe n'obwesigwa bwe oku biri. Eri izooba yaaba akundekuriire; kwonka nyowe tinaakwita, iwe ou yaasiigire amajuta.

24Reeba, nk'oku eri izooba naareeba ku amagara gaawe gari ekintu kikuru, n'agangye gabe nikwo gaaba omu maisho ga Mukama; ankize enaku zoona.

25Bwanyima Saulo agira Daudi ati: Mwana wangye Daudi, Ruhanga akuhe omusha! Okore ebintu bikuru, haza bikugyendere gye. Daudi atyo agyenda, na Saulo agarukayo owe.

← Chapter 25 Jump to: Chapter 27 →