1 Samuel 12

nyankole

← Chapter 11 Jump to: Chapter 13 →

1Samueli akagambira Abaisiraeli ati: Reeba, byona ebi mungambiire, mbiikiriize, naabateeraho omugabe w'okubategyeka.

2Hati omugabe niwe arikubeebembera, nyowe nkuzire, naamezire enju; n'ekindi, reeba, batabani bangye bari hamwe naimwe. Mbeebembeire okwiha omu butsigazi bwangye, okuhitsya eri izooba.

3Mbwenu reeba, ndi aha: Nimunyomesereze omu maisho ga Nyakubaho n'ag'ogu ou yaasiigire amajuta. Ndanyagire ente y'oha, nari endogoya y'oha? Nainga ndaryangataniise oha? N'oha ou ndahatsire nari ou ndariireho enguzi kuunyita amaisho? Nimuunyomesereze, haza mbibarihe.

4Baamugarukamu bati: Tokaturyangatanisaga, nobu kwakuba okutuhata nari okunyaga ekintu ky'omuntu.

5Nawe abagira ati: Nyakubaho niwe mujurizi w'okubashinja, n'omusiigwa we nawe n'omujurizi eri izooba, kuhamya ku mutaine ki mwashanga nyagire. Nabo baamugira bati: Eego, niwe kareebi.

6Mpaho Samueli agambira abo bantu ati: Nyakubaho owaataireho Musa na Arooni, akaiha baashwenkuriimwe omuri Misiri, niwe kareebi.

7Mbwenu nu, nimwemerere, nteekurane naimwe omu maisho ga Nyakubaho eby'amaani ebi Mukama yaakozire kubajuna na baashwenkuriimwe.

8Yakobo n'ab'eka ye ku baagiire Misiri, Abanyamisiri baabahata, baashwenkuriimwe baatakira Nyakubaho. Nawe yaatuma Musa na Arooni baabaiha omuri Misiri, baabata omuri egi nsi kugituuramu.

9Kwonka bakeebwa Nyakubaho Ruhanga waabo; nawe yaabarekurira Sisera omukuru w'eihe rya Yabini omugabe wa Hazori, n'Abafilisiti, n'omugabe wa Moabu, baabarwanisa.

10Reero baatakira Nyakubaho nibagira bati: Ai Nyakubaho, tucumwire, twakwimuura, twaramya Baabaali na Ashitarooti. Mbwenu nitukweshengyereza, otujune abazigu baitu, tubone kukuramya.

11Mpaho Nyakubaho yaayohereza Yerubaali na Baraki na Yefuta na Samueli, baabajuna abazigu baanyu ababehinguririize, mwatuura buhooro.

12Mbwenu ku mwareebire Nahashi omugabe w'Abaamoni yaija kubarwanisa, mwangira muti: Ngaaha! Nitwenda omugabe abe niwe yaatutegyeka; haza kunu Mukama Ruhanga waanyu ari omugabe waanyu.

13Mbwenu reeba, omugabe ou mwashabire mukamutoorana, Nyakubaho amubahaire kubategyeka.

14Ku muraagume nimutiina Nyakubaho, mwamuheereza, mwatega okutu ebi arikubagambira, mutaagomera biragiro bye, kandi imwe n'omugabe orikubategyeka mwakuratira Mukama Ruhanga waanyu, biryaba gye.

15Kwonka ku muryanga kutega okutu ebi Mukama arikubagambira, mwagomera ebiragiro bye, omukono gwe guryabarwanisa, nk'oku gwarwaniise baashwenkuriimwe.

16Mbwenu nimwemerere, mwereebere eki Nyakubaho yaaza kukora.

17Hati t'obunaku bw'eigyesha ry'engano? Mbwenu nyowe naaza kushaba Nyakubaho, ahindise enkuba, agwise enjura; mubone kumanya kandi mureebe ku ekicumuro ki mwamucumwirebo nimweshabira omugabe kiri kihango.

18Samueli atyo ashaba Nyakubaho, n'onu ayohereza enkuba n'enjura eryo izooba, abantu boona batiina munonga Nyakubaho na Samueli.

19Reero boona bagira Samueli bati: Itwe abairu baawe nitukweshengyereza, otushabire ahari Mukama Ruhanga waawe, turekye kufa; ahabw'okuba ebibi byaitu tubyongyeireho n'eki eky'okweshabira omugabe.

20Na Samueli agambira abo bantu ati: Mutatiina. Nobu muraabe mwakozire ebibi ebyo byona, kwonka mutarereera kukuratira Nyakubaho, kureka mugume nimumuheereza n'omutima gwanyu gwona.

21Kandi mutateishuka, mukakuratira ebitaine muhoho, ebitarikubaasa kubagasira, nobu kwakuba okubajuna, ahabw'okuba tibiine mujamo.

22Manya Nyakubaho, ahabw'eiziina rye erikuru, tarikwija kutsigaho eihanga rye, ahabw'okuba akasiima kubahindura eihanga rye ahabwe.

23Kandi naanye nikikabure! nyowe okucumura ahari Nyakubaho nkareka kubashabira, kureka niinyija kuguma nimbahabura omuhanda murungi kandi oguhikire.

24Kimwe kyonka, mutiine Nyakubaho, mumuheereze n'obwesigwa, n'omutima gwanyu gwona, nimwijuka ebintu bikuru ebi yaabakoreire.

25Kwonka ku muraagumizemu nimukora ebibi, imwe n'omugabe waanyu muryacwekyerera.

← Chapter 11 Jump to: Chapter 13 →

Recommended Reading

Commentary 1 Samuel Commentaries → Devotional 1 Samuel Devotional Guide → Get This Bible nyankole Study Bible →