1 Samuel 4

nyankole

← Chapter 3 Jump to: Chapter 5 →

1Abaisiraeli bakahurura kurwanisa Abafilisiti, baasiisira Ebenezeri; Abafilisiti nabo baasiisira Afeki.

2Abafilisiti baatengyera Abaisiraeli orugamba. Orugamba ku rwahamire, baasingura Abaisiraeli baabaitamu abantu nk'enkumi ina omu irwaniro.

3Engabo ku zaagarukire omu rusiisira, abakuru b'Abaisiraeli baabuuzana bati: Ahanki Nyakubaho yaikiriza ku tusingurwa Abafilisiti eri izooba? Mbwenu ka twihe Shiilo eshanduukye y'endagaano ya Nyakubaho, tugireete aha, agume naitwe, atujune abazigu.

4Batyo batuma abantu Shiilo, baihayo eshanduukye y'endagaano ya Mukama Ruhanga w'amahe osingami ahari baakerubi. Kandi beene Eeli bombi, Hofuni na Finehaasi, baija hamwe n'egyo shanduukye y'endagaano ya Ruhanga.

5Eshanduukye y'endagaano ya Nyakubaho ku yaahikire omu rusiisira, Abaisiraeli boona baateera munonga akaari, ensi yaijura obwaku.

6Abafilisiti ku baahuriire okwamuza kw'abarikuteera akaari, baagira bati: Orwo rwari rwingi oruri omu rusiisira rw'Abaheburaayo n'orw'enki? Reero Abafilisiti ku baamanyire ngu eshanduukye ya Nyakubaho eizire omu rusiisira,

7baatiina, baagira bati: Hariho Ruhanga oizire omu rusiisira! Baatonzya bati: Ebi shi twakareeba! Eki tikikabahoga!

8Ebishi twareeba enaku! Mbwenu n'oha oraatujune baaruhanga aba ab'amaani? Aba nibo baaruhanga abaitsize Abanyamisiri enfu z'emiringo mingi omu ihamba.

9Imwe Bafilisiti 'mwe, mugume muhamire nk'abashaija mutakaaba abahuuku b'Abaheburaayo, nk'oku babaire bari abahuuku baanyu. Muhame nk'abashaija, murwane!

10Batyo Abafilisiti baarwana kimanzi, baasingura Abaisiraeli, buri muntu yaahungira omu ka ye. Baabaitamu abantu baingi. Abaisiraeli baafamu abarwani obukumi bushatu abarikugyendesa ebigyere.

11Eshanduukye ya Ruhanga yaanyagwa, na batabani ba Eeli bombi Hofuni na Finehaasi baitwa.

12Omushaija w'omu Baabenyamiini akacwa omu ngabo, yaija Shiilo eryo izooba, ebijwaro bye bitaagukire, n'eitaka rimuri omu mutwe.

13Obu yaahikayo, Eeli akaba ashutami aha kitebe aha rubaju rw'omuhanda, amaisho agahangire enkiro; ahabw'okuba akaba ayemereize omutima ahabw'eshanduukye ya Ruhanga. Ogwo mushaija ku yaahikire omu rurembo yaagambira abaamwo enkuru, baaborooga.

14Na Eeli ku ahurira abarikuborooga abuuza ati: Beitu orwo rwari n'orw'enki? Ago magingo ogwo mushaija aija naayehuuta, abiteera Eeli.

15Obwo Eeli akaba ahikize emyaka makumi mwenda na munaana ya bukuru, n'amaisho ge gaahumire atakihweza.

16Mpaho ogwo mushaija agira Eeli ati: Niinye naaruga aha rugamba eri izooba mpungire. N'onu amubuuza ati: Bibaire bita, mwana wangye?

17Owaareeta enkuru amugarukamu ati: Abafilisiti baabinga Abaisiraeli, kandi baabaitamu abantu baingi munonga. Batabani baawe bombi Hofuni na Finehaasi baafa, n'eshanduukye ya Ruhanga yaanyagwa.

18Ku yaagambire ati eky'eshanduukye ya Ruhanga, Eeli yaahuruutuka aha kitebe, yaagwa agarami aha rubaju rw'eirembo, yaahendeka ebitsya, yaafa, ahabw'okuba akaba ari omugurusi kandi naayeremeera. Akaba amazire emyaka makumi ana naategyeka Abaisiraeli.

19Omu bunaku obwo, mukaamwana wa Eeli, muka Finehaasi, akaba aine enda arangariire kuzaara. Ku yaahuriire ngu baanyaga eshanduukye ya Ruhanga kandi ngu ishezaara na iba baafa, yaafukama yaazaara, ahabw'okuba ebisha bikamukwatira aho.

20Ku yaabaire ari haihi kufa, abakazi abaabaire nibamuzaaza, baamugira bati: Otatiina, ahabw'okuba waazaara omwojo. Kwonka we tiyaagira ki yaabagarukamu, nobu kwakuba okukyeetaho.

21Ogwo mwana yaamweta Ikabodi amakuru ngu Isiraeli yaafeerwa ekitiinwa; ahabw'eshanduukye ya Ruhanga kunyagwa n'ahabwa ishezaara na iba kufa.

22Yaagira ati: Isiraeli yaafeerwa ekitiinwa, ahabw'okuba eshanduukye ya Ruhanga yaanyagwa.

← Chapter 3 Jump to: Chapter 5 →