Numbers 13

nyankole

← Chapter 12 Jump to: Chapter 14 →

1Nyakubaho akagambira Musa ati:

2Tuma abantu baze kutata ensi ya Kanaani, ei ndikuha Abaisiraeli. Oihe omu buri ruganda rwa baishebo omushaija omwe omutume; kandi abe ari omwebembezi w'omuri orwo ruganda.

3Musa atyo abatuma bari omu ihamba rya Parani, nk'oku Mukama yaaragiire. Boona abaatumirwe bakaba bari abantu bakuru omu Baisiraeli.

4Kandi aga nigo maziina gaabo: Omu b'oruganda rwa Reubeeni, Shaamua mwene Zaakuri;

5omu b'oruganda rwa Simeoni, Shafati mwene Hoori;

6omu b'oruganda rwa Yuda, Kalebu mwene Yefuune;

7omu b'oruganda rwa Isakaari, Igali mwene Yosefu;

8omu b'oruganda rwa Efuraimu, Hoshea mwene Nuuni;

9omu b'oruganda rwa Benyamiini, Paluti mwene Raafu;

10omu b'oruganda rwa Zebuluuni, Gaadieli mwene Soodi;

11omu b'oruganda rwa Yosefu (nikwo kugira ngu omu b'oruganda rwa Manaase), Gaadi mwene Suusi;

12omu b'oruganda rwa Daani, Amieli mwene Geemaali;

13omu b'oruganda rwa Asheri, Seturi mwene Mikaeli;

14omu b'oruganda rwa Nafutaali, Nahibi mwene Vofisi;

15omu b'oruganda rwa Gaadi, Geueli mwene Maaci.

16Ago nigo maziina g'abashaija bu Musa yaatumire kutata egyo nsi. Haza Musa yaayeta Hoshea mwene Nuuni eiziina Yoshwa.

17Musa yaabatuma kutata ensi ya Kanaani, kandi yaabagira ati: Mwinamukye, mutoore ogwa Negebu, reero mutembe ensi y'ebibungo.

18Mureebe oku egyo nsi eri, yaaba abantu abagitwiremu bari ab'amaani, nari abatagaine, nainga bari bakye nari baingi.

19Kandi n'ensi ei batwiremu ku eraabe eri nungi nari mbi; n'endembo zi batwiremu ku ziraabe ziri ensiisira, nari ebigo bigumire;

20egyo nsi ku eraabe neeyeza, nari etarikweza; nainga ku eraabe eine ebibira, nari etabiine. Mube emanzi, mureete aha bijuma by'omuri egyo nsi. Haza obwo bunaku bukaba buri obw'eitogyera ry'emizaabibu.

21Batyo baagyenda, baatata egyo nsi, okwiha omu ihamba rya Ziini okuta Rehobu, haihi n'aharikutaahirwa omuri Hamati.

22Bainamuka, baaza Negebu, baahika Heburooni, ei Ahimaani na Sheshai na Talumai, baijukuru b'Abaanaki baabaire batwire. (Heburooni rukaba rumazire emyaka mushanju rwombekirwe, Zoani orw'omuri Misiri rutakombekirwe).

23Mpaho baahika omu ruhanga rwa Eshekooli, baatemayo eitaagi ririho omugimba gw'ebijuma by'omuzaabibu, abashaija babiri baaguheeka aha mugamba; kandi baareeta amakomamahanga n'emitiini.

24Omwanya ogwo baagweta oruhanga rwa Eshekooli ahabw'omugimba ogu Abaisiraeli baatemireyo.

25Ku haahingwireho ebiro makumi ana, abo bashaija baagaruka, nibaruga kutata ensi.

26Baayetuurira Musa na Arooni n'eihanga ry'Abaisiraeli ryona, ahari Kadeshi omu ishamba rya Parani, baabareetera amakuru, hamwe n'eihanga ryona. Kandi baabooreka ebijuma bi baihire omuri egyo nsi.

27Baamugambira bati: Tukahika omu nsi ei waatutumiremu; neehimintika amate n'obwoki, kandi ebi nibyo bijuma byayo.

28Kwonka abantu abatwire omuri egyo nsi n'ab'amaani; n'endembo zaayo zeehinguririzibwe engo z'amabaare, kandi ni mpango munonga. Ekindi tukareebayo baijukuru b'Abaanaki.

29Abaamaleki batwire omu nsi ya Negebu; reero Abahiiti, Abayebusi n'Abaamori batwire omu nsi ey'ebibungo; kandi Abanyakanaani batwire aha rubaju rw'enyanja n'omu myegyeego ya Yorudaani.

30Kwonka Kalebu yaacureeza abantu abari omu maisho ga Musa, yaagira ati: Ka tuzeyo ahonaaho, tugikubuure, ahabw'okuba nitubaasiza kimwe kugisingura.

31Abu yaabaire agiireyo nabo baagira bati: Titurikubaasa kuzayo tukarwanisa abo bantu, ahabw'okuba nibatukiza amaani.

32Batyo baareetera Abaisiraeli enkuru mbi y'egyo nsi ei baatatsire, baabagira bati: Ensi ei twagiiremu kutata n'ensi erya abagitwiremu; n'abantu boona abu twareebireyo n'ebikaaka;

33tukareebayo abantu ebikaaka, beene Anaki, abaakomookire aha Banefili. Tukeereeba turi nk'eseenene; haza kwo omu maisho gaabo nikwo twabaire turi.

← Chapter 12 Jump to: Chapter 14 →