Numbers 18

nyankole

← Chapter 17 Jump to: Chapter 19 →

1Nyakubaho akagambira Arooni ati: Iwe na batabani baawe n'ab'omuryango gwa baashwenkuriimwe muryajunaanwa ebiriba bishobire omu Mwanya Ogurikwera. Kandi iwe na batabani baawe abu oine muryajunaanwa eby'obuhongyerezi bwanyu.

2Ogume oijane beene waanyu ab'omuryango gwa Leevi, ab'oruganda rwa shoimwe, bakwatanise naiwe kukukwatsa eby'obuheereza, iwe na batabani baawe abu oine, mwaba muri omu maisho g'eihema ry'eby'obuhamya.

3Bagume bakuheereze, kandi bakore emirimo yoona ey'omu ihema; kwonka batarihika haihi ebintu by'omu Mwanya Ogurikwera, nari eitambiro, imwe nabo mutakaafa.

4Bagume bakwatanise naiwe, bareeberere eihema ry'okubugabuganiramu, nibakora eby'obuheereza byamwo byona, kwonka hatarigira owaahika haihi naimwe.

5Mbwenu imwe mugume mureeberere emirimo y'Omwanya Ogurikwera n'ey'eitambiro, kashanga erekye kugaruka kugwera Abaisiraeli.

6Kandi reeba, nyihire beene waanyu Abaleevi omu Baisiraeli, bari omutoijo gu muhairwe, ogumpongyeirwe, kuguma nibakora emirimo y'obuheereza omu ihema ry'okubugabuganiramu.

7Mbwenu iwe na batabani baawe abu oine mugume mukore omurimo gwanyu gw'obuhongyerezi, ogw'ebikwatiraine n'eitambiro kandi n'ebiri omunda y'omukingo. Ebyo mube nibyo mwaguma nimukora, biri emirimo yaanyu y'obuhongyerezi. Kwonka ondiijo weena otari muhongyerezi oribyetaasyamu, aitwe.

8Bwanyima Nyakubaho akagambira Arooni ati: Reeba, naakuha ebintu byona ebiihirwe aha bi bampongyeire, niyo mitoijo y'Abaisiraeli yoona ehongirwe. Naabikuha kuba omugabo gwawe na batabani baawe, ogu muraagume nimutunga.

9Ebintu byona ebirikwera buzima, ebihongirwe ebitarikwokibwa, bigume bibe ebyanyu; buri mutoijo gwabo gwona, buri mutoijo gwabo ogw'esaano, buri mpongano yaabo ey'ekibi, na buri mpongano yaabo y'okubaihisaho orubanja; ebi bantoijera bibe ebirikwera munonga ahariiwe na batabani baawe.

10Mugume mubiriire omu mwanya ogurikwerera kimwe, oyetwa omushaija weena naikirizibwa kubiryaho. N'ebirikwera ahariimwe.

11Ebi nabyo n'ebyanyu: emitoijo ei bareetsire n'endiijo yoona ey'Abaisiraeli ezongazongiibwe. Naabikuha na batabani baawe na bahara baawe abu oine; mugume mubitungye ebiro byona. Omuntu weena ow'omu ka yaawe oshemeire, naikirizibwa kubiryaho.

12Amajuta amarungi munonga, na viino enungi munonga, n'engano enungi munonga, emiganuro ei bantoijera, Nyowe Nyakubaho naagikuha.

13Ebijuma byona ebiriguma nibibanza kuhiisa omu nsi yaabo, ebi batoijera Nyakubaho, bigume bibe ebyawe, kandi weena ow'omu ka yaawe oshemeire, naikirizibwa kubiryaho.

14Ekintu ky'omuri Isiraeli kyona ekihongyeirwe kimwe Ruhanga, kigume kibe ekyawe.

15Ekiigura-nda kyona ekiine omubiri, yaaba ky'omuntu, nari ky'enyamaishwa, eki bahongyera Nyakubaho kigume kibe ekyawe. Kwonka shi omujigaijo gw'omuntu ogume ogucungure, kandi ocungure n'ogw'enyamaishwa ezirikuzira.

16Haza obuguzi bwabyo, obw'okubicungura bihikize okwezi kumwe bizairwe, obubarire aha mpiiha itaano z'efeeza, nk'orurengo rw'empiiha y'Omwanya Ogurikwera oku ruri, orurikuhitsya ebigabari makumi abiri.

17Kwonka omujigaijo gw'ente nari ogw'entaama nainga ogw'embuzi otarigicungura; ahabw'okuba n'erikwera. Eshagama yaayo oryaguma ogimiisiire eitambiro, ebishaju byayo obyotsye, bibe empongano eyokiibwe, kuba ekisooroora kirikugwisa gye Nyakubaho.

18Kwonka enyama zaayo zibe ezaawe, nk'enkoro ezongazongiibwe, n'ekivune kya buryo oku biba ebyawe.

19Emitoijo yoona erikwera, ei Abaisiraeli batoijera Nyakubaho, naagikuha na batabani baawe na bahara baawe abu oine, kuguma nimugitunga ebiro byona. Egyo n'endagaano etarikuhinduka ey'ebiro byona, eragainwe naiwe na baijukuru baawe omu maisho ga Nyakubaho.

20Kandi Nyakubaho akagambira Arooni ati: Toritunga itaka ry'okuhungura omu nsi yaabo, nobu kwakuba okubagana nabo omugabo. Nyowe niinye mugabo gwawe, kandi obuhunguzi bwawe omu Baisiraeli.

21Abaleevi naabaha kimwe kya ikumi kyona ekitoijwa omuri Isiraeli kuba ekyabo ky'obuhunguzi ahabw'emirimo ei bakora nibaheereza omu ihema ry'okubugabuganiramu.

22N'ahabw'ekyo okwiha hati Abaisiraeli batarihika haihi eihema ry'okubugabuganiramu, bakacumura, bakafa.

23Kureka Abaleevi bagume bakore emirimo y'obuheereza omu ihema ry'okubugabuganiramu; ekirishoba nibo barikijunaanwa. Ekyo kibe ekiragiro ky'obutwire omu busingye bwanyu bwona. Kandi bataritunga eitaka ry'okuhungura omu Baisiraeli.

24Manya kimwe kya ikumi, eki Abaisiraeli batoija kukihongyera Nyakubaho, naakiha Abaleevi kuba ekyabo ky'obuhunguzi. N'ahabw'ekyo nikyo naabagirira nti bataritunga eitaka ry'obuhunguzi omu Baisiraeli.

25Nyakubaho akagira Musa ati:

26Kandi gambira Abaleevi oti: Ku muriiha aha Baisiraeli kimwe kya ikumi eki naabaha kuguma nimubanogoraho kuba obuhunguzi bwanyu, naimwe mugume mukiiheho kimwe kya ikumi kyakyo kuba omutoijo gw'okutoijera Nyakubaho ogwa kimwe kya ikumi ekya kimwe kya ikumi.

27Haza ogwo mutoijo gwanyu guryababarirwa nk'ogw'engano erugire omu ihuuriro, kandi nk'ogwa viino nsya eyaaruga omu inyuukiro.

28Nikwo muraagume nimutoijera Nyakubaho omutoijo ogurugire aha bimwe bya ikumi byanyu byona ebi munogora aha Baisiraeli, mukaihiraho Nyakubaho omugabo gw'okuha Arooni omuhongyerezi.

29Aha biconco byona ebi murireeterwa, mugume mukoreho ekirikuragiirwa kutoijera Nyakubaho, nimukiiha aha birungi munonga, nimuhayo ebicweka byabyo ebyeziibwe.

30N'ahabw'ekyo obagambire oti: Ku muriguma mwaheza kuhayo ebicweka byabo ebirungi munonga, ebiritsigaraho bibarwe ku byaba eby'Abaleevi, nk'ebirugire omu ihuuriro, nari omu inyuukiro.

31Kandi nimwikirizibwa kubiriira ahantu hoona, imwe n'ab'omu maka gaanyu; ahabw'okuba n'ebihembo ebi muheebwa ahabw'emirimo ei mukora nimuheereza omu ihema ry'okubugabuganiramu.

32Mbwenu ku muribiihaho ebirungi munonga mwabitoija, timurigiibwaho rubanja rw'ekibi ahabwabyo. Kwonka mutarihagaza ebyo bintu by'Abaisiraeli ebirikwera, mukafa.

← Chapter 17 Jump to: Chapter 19 →