Numbers 28

nyankole

← Chapter 27 Jump to: Chapter 29 →

1Nyakubaho akagambira Musa ati:

2Ragiira Abaisiraeli kandi obagire oti: Ebi muntambira n'ebyokurya bi muntoijera mubyokize, n'eby'ebisooroora by'okungwisa gye, mugume mubintoijere omu bunaku bwabyo obwatairweho.

3Kandi obagire oti: Eki nikyo kitambo kicwekize eki muraagume nimutambira Nyakubaho buri izooba: Empaya nto ibiri z'entaama, ezihikize omwaka gumwe, ezitaine kamogo, kuba ekitambo ky'ebiro byona.

4Omwana gumwe gw'entaama mugume mugutambe omu kasheeshe, n'ogundi omu mwabazyo.

5Kandi mutoije kimwe kya ikumi ky'encuro y'esaano y'obunono kuba omutoijo gw'esaano ejwangiibwemu kimwe kya kana ky'egaloni y'amajuta g'emioliva eshekwire.

6Kibe ekitambo kicwekize eky'ebiro byona, ekyaragiriirwe aha Rushozi Sinaayi kuba ekisooroora kirikugwisa gye, ekitambiirwe Nyakubaho kicwekize.

7Buri kitambo ky'omwana gw'entaama ekiraatambwe, kigume kigyenderweho eky'okunywa kya kimwe kya kana ky'egaloni. Ogwo mutoijo gw'eky'okunywa ogwa viino y'amakuuta, ogutoijeirwe Nyakubaho, gugume gushukwe omu Mwanya Ogurikwera.

8Ogundi mwana gw'entaama mugutambe omu mwabazyo. Nk'oku mutwarize omutoijo gw'esaano ey'omu kasheeshe, n'ogw'eby'okuginyweraho, mube nikwo mwagutamba, kuba ekitambo kicwekize, eky'ekisooroora kirikugwisa gye Nyakubaho.

9Aha kiro kya Sabato: empaya nto ibiri z'entaama z'omwaka gumwe, ezitaine kamogo, na bibiri bya ikumi by'encuro y'esaano y'obunono kuba omutoijo gw'esaano ejwangiibwemu amajuta g'emioliva, kandi n'omutoijo gw'ebyokunywa.

10Ekyo nikyo kitambo kicwekize eky'okutambwa buri Sabato, otabariiremu kitambo kicwekize eky'obutoosha, hamwe n'omutoijo gw'okukinyweraho.

11Aha kiro ky'okuboneka kw'ameezi gaanyu, mugume mutambire Nyakubaho ebitambo bicwekize ebi: enimi nto ibiri, empaya emwe y'entaama, n'empaya nto mushanju z'entaama ezihikize omwaka gumwe, ezitaine kamogo.

12Aha buri nimi mutoijereho bishatu bya ikumi by'encuro y'esaano y'obunono kuba omutoijo gw'esaano ejwangiibwemu amajuta; kandi aha mpaya y'entaama mureetereho bibiri bya ikumi by'esaano y'obunono bibe omutoijo gw'esaano ejwangiibwemu amajuta,

13n'aha buri mwana gw'entaama mutoijereho kimwe kya ikumi ky'esaano y'obunono ejwangiibwemu amajuta kuba omutoijo gw'esaano. Bibe ekitambo ky'ekisooroora kirungi, ekitambiirwe Nyakubaho kicwekize.

14Emitoijo y'ebyokunywa ebe kimwe kya kabiri ky'egaloni ya viino ahabw'enimi; kimwe kya kashatu ky'egaloni ahabw'empaya y'entaama, na kimwe kya kana ky'egaloni ahabw'omwana gw'entaama. Ebyo nibyo bitambo bicwekize ebya buri kwezi, okumara ameezi g'omu mwaka goona.

15Kandi bongyereho empaya emwe y'embuzi kuba empongano y'ekibi ehongyeirwe Nyakubaho, egume etambwe etarikubarirwa omu bitambo bicwekize eby'obutoosha, n'omu mitoijo y'ebyokunywa.

16Ekiro kya ikumi na bina eky'okwezi kw'okubanza, n'ekiro ky'Okuhingurwaho kwa Mukama;

17kandi ekiro kya ikumi na bitaano ky'okwo kwezi n'eky'obugyenyi; bagume bamare ebiro mushanju nibarya emigaati etatumbisiibwe.

18Aha kiro ky'okubanza mugume mugire ekiteerane ekirikwera, kandi mutarikoreraho omurimo gwona ogurikurusya,

19kureka mutoijereho ekitambo kicwekize eki muraagume nimutambira Nyakubaho buri izooba, enimi ibiri z'ebimasha, empaya emwe y'entaama, n'empaya nto mushanju z'entaama, ezihikize omwaka gumwe

20Eby'emitoijo y'esaano y'obunono ejwangiibwemu amajuta bitwazibwe biti: Bishatu bya ikumi by'encuro mugume mubitoijere aha nimi; bibiri bya ikumi aha ngondoore y'entaama;

21na kimwe kya ikumi kuguma nimukitoijera ahari buri emwe, ahari ezo mpaya nto mushanju z'entaama;

22kandi empaya emwe y'embuzi kuba empongano y'ekibi, kubakarabira imwe.

23Ebyo mugume mubitambe bitabariirwe ha kitambo kicwekize, eky'omu kasheeshe, eky'okuguma kiri ekitambo kicwekize eky'ebiro byona.

24Nikwo muraagume nimutoija buri izooba, okumara ebiro mushanju ebyokurya by'ekitambo kicwekize eky'ekisooroora ky'okugwisa gye Nyakubaho. Bigume nibitoijwa, nibyongyerwa aha kitambo kicwekize eky'obutwire bwona, n'aha mutoijo gw'ebyokunywa.

25Reero aha kiro kya mushanju, mugire ekiteerane ekirikwera, kandi mutarikora omurimo gwona ogurikurusya.

26Aha kiro ky'emiganuro, ku muriba nimutoijera Nyakubaho omutoijo gw'esaano y'omweza, aha bugyenyi bwanyu bwa Wiiki, mugire ekiteerane ekirikwera, kandi mutarikoreraho omurimo gwona ogurikurusya;

27kureka mutambe ekitambo kicwekize eky'ekisooroora kirikugwisa gye Nyakubaho: enimi ibiri z'ebimasha, engondoore emwe y'entaama, n'empaya nto mushanju z'entaama ezihikize omwaka.

28Emitoijo yaabyo ey'esaano y'obunono ejwangiibwemu amajuta ebe bishatu bya ikumi by'encuro ahabwa buri nimi; bibiri bya ikumi ahabwa buri ngondoore,

29na kimwe kya ikumi ahabwa buri emwe ahari ezo mpaya nto mushanju z'entaama;

30mutaireho n'empaya emwe y'embuzi, kubakarabira imwe.

31Mutabazire kitambo ky'obutoosha ekicwekize, hamwe n'omutoijo gwakyo ogw'esaano, mugume mubitambe hamwe n'omutoijo gwabyo ogw'ebyokunywa, kandi mureebe ngu tibiine kamogo.

← Chapter 27 Jump to: Chapter 29 →