Isaiah 11

Kirundi (Bibliya Yera 1951, 1967 (Burundi))

← Chapter 10 Jump to: Chapter 12 →

1Ku gishitsi ca Isayi hazobaduka agashami, kand’ umunago wanaze mu mizi yiwe uzokwama.

2Mpwemu w’Uhoraho azoba kuri we, impwemu y’ubgenge n’iy’ ugutahura, impwemu yo kuja inama n’iy’ ubushobozi, impwemu y’ukumenya Uhoraho n’iy’ ukumwubaha.

3Ikizomuhimbara n’ukwubaha Uhoraho; ntazocira urubanza ku bipfa kubonekera amaso yiwe, kandi ntazorushinga ku vyo apfa kwumvisha amatwi;

4arikw azocira aboro imanza zibereye, kand’ azoshinga urw’ abaciye bugufi bo mw isi mu kuri: azokubitisha isi inkoni ivuye mu kanwa kiwe, kand’ abanyakibi azobīcisha impwemu ziva mu minwa yiwe.

5Ubugororotsi buzomubera umukanda mu rukenyerero, mber’ ukwizigirwa kuzomubera umukanda mu mafyinga.

6Ibingira rizobana n’umwagazi w’intama, n’ingwe izoryamana n’umwagazi w’impene, n’inyana n’umugunza w’intambge n’ishūri ishishe bizobana, kand’ umwana mutoya ni we azobishorera.

7Inka izorishanya n’igikōko citwa idubu: izazo zizoryama hamwe, kand’ intambge izorisha ubgatsi nk’inka.

8Umwana yonka azokinira ku mwobo w’imamba, n’umwana acutse azoshira ukuboko ku mwimba w’imvuvyi.

9Hose ku murwa wanje wera ntihazoba hakir’ ibiryana cank’ ivyica; kuko kumenya Uhoraho kuzoba kwuzuye mw isi, nk’ukw amazi abugereye mu kiyaga.

10Maze kur’ uwo musi igishitsi ca Isayi kizoba gihagaritswe no kubera amoko ibendera, ico gishitsi ni co amahanga azobariritsa: kand’ uburuhukiro bgiwe buzogira icubahiro.

11Kandi kur’ uwo musi Umwami Imana azotuma ukuboko ubugira kabiri, kugarukana amasigarira y’abantu biwe, abazoba bagisigaye, abakūre muri Ashuri no muri Egiputa n’i Patirosi n’i Kushi no muri Elamu n’i Shinari n’i Hamati no mu bizinga vyo mu kiyaga.

12Kand’ azoshingira amahanga ibendera, akoranirize hamwe abāri birukanywe bo mu Bisirayeli, akumakumire hamwe Abayuda bagiye isābagire, abakūye ku mfuruka zine z’isi.

13Ishari ry’Abefurayimu na ryo rizoshira, n’urwanko rw’Abayuda ruzokūrwaho: Abefurayimu ntibazoba bakigirira Abayuda ishari, kand’ Abayuda ntibazoba bakigirira Abefurayimu urwanko.

14Bazohwikira Abafilisitiya b’i burengerazuba, babagwe ku gakanu, bazokwifatanya banyage ab’i burasirazuba; bazorāmvura ukuboko bacakire Abanyedomu n’Abanyamowabu; Abamoni bazobayoboka.

15Uhoraho azokamya rwose ikigobe c’ikiyaga ca Egiputa, azozana umuyaga wiwe ururumba, abāngīrire ukuboko rwa Ruzi, arukubite arucemw’ imigezi ndwi, maz’ ajabutse abantu batarinze gukūra inkweto.

16Kandi hazoba inzira y’iroro y’amasigarira y’abantu biwe, abazoba bagisigaye, iva muri Ashuri, nk’iyo Abisirayeli bābonye hamwe bādūga bava mu gihugu ca Egiputa.

← Chapter 10 Jump to: Chapter 12 →