Isaiah 65

Kirundi (Bibliya Yera 1951, 1967 (Burundi))

← Chapter 64 Jump to: Chapter 66 →

1Nabaririkijwe n’abatānyibaza; nabonywe n’abatāndondeye; nabariye ihanga ritāmbaje izina ryanje, nt’ Ehe rāba, ndi hano.

2Nirirwa ntegeye amaboko ihanga rigarariza, bagendera mu nzira zitari nziza, bakurikira ivyabo vyiyumviro.

3N’abantu bahora banshinyaguriza imbonankubone, bagatangira ibimazi mu bigabiro, bakosereza imibavu ku bicaniro vyubakishijwe amatafari;

4bakicara hagati y’imva, bakarāra mu bitabo ahihishije; bakarya inyama z’ingurube, kandi mu nzavya zabo hakabamw’ umufa w’inyama z’ibizira;

5bakavuga, bati Hagarara ukwawe, ntunyegēre, kuko jewe nkurusha kuba uwejejwe. Ben’ abo bambera umwotsi wo mu mazuru, n’umuriro wīriza umusi waka.

6Eh’ ivyo biranditswe imbere yanje, sinzohora, ariko nzobibasubizako, mbere nzobasubiriza mu nkōko.

7Ibigabitanyo vyanyu ubganyu, ni k’ Uhoraho agize, nzobibasubirizakw icarimwe n’ibigabitanyo vya ba sogokuruza banyu, bosereza imibavu ku misozi, bakantukira ku turambi: ni co gituma nzobasubiriza mu nkōko ibikwiranye n’ ibikorwa vyabo.

8Uku ni k’Uhoraho agize, ati Nk’ukw ihando ry’umuzabibu riboneka ko ririmw’ umutobe, bakavuga, bati Ntuwurandure, kuk’ ugifise ikimazi, uko ni ko nanje nzogira, kubg’ abasavyi banje, noye kubarandura bose.

9Nzokwironkera uruvyaro muri Yakobo, n’ūzoragwa imisozi yanje muri Yuda; abo nitoranirije bazoharagwa, n’abasavyi banje bazohaba.

10Maz’ i Sharoni hazoba icanya c’intama, kand’ ikiyaya c’i Akori kizoba ivyagiro ry’ inka, n’uburuhukiro bg’abantu banje bandondeye.

11Ariko mwebge abantaye jewe Uhoraho, mukibagira umusozi wanje wera, mugatereka Gadi, mugaturiraniriza Meni;

12nanje nzobashirirah’ inkota, mwese muzokwunamira kwicwa: kukw igihe nahamagara mutitavye, n’igihe navuga mutumvise; ariko mugakora ivyo mbona kw ari bibi, mukitoraniriza ibitannezera.

13Nuko rero, uku ni k’Uhoraho Imana agize, ati Rāba, abasavyi banje bazorya, ariko mweho muzokwicwa n’inzara; abasavyi banje bazonywa, ariko mweho muzokwicwa n’inyota; abasavyi banje bazonezerwa, ariko mweho muzomāramāra:

14rāba, abasavyi banje bazoririmbishwa n’ umunezero wo mu mitima, ariko mweho muzorizwa n’intuntu yo mu mitima, muborozwe n’ukw imitima yanyu isābijwe n’umubabaro.

15Kand’ izina ryanyu muzorisigarana abo nitoranirije, barigire umuvumo, bat’ Urakicwa n’Uhoraho Imana! Maz’ abasavyi banje bazokwitwa irindi zina.

16Nuk’ uwo mu gihugu yisabīra umugisha n’awusabe Imana y’ukuri, kand’ uwo mu gihugu arahira, n’arahire Imana y’ukuri; kukw amagorwa ya mbere yibagiranye, agahishwa inyonga zanje.

17Kuko rāba, ndarema ijuru risha n’isi nsha; ivya mbere ntibizokwibukwa, kandi ntibizoruha vyiyumvirwa.

18Ariko munezerwe, muze muhore muhimbawe n’ivyo ndema; kuko rāba, ndema Yerusalemu ngo mpagire umunezero, n’abantu baho ngo ndabagire akanyamuneza.

19Kandi nzohimbarwa n’i Yerusalemu, nnezerwe n’abantu banje: kand’ ijwi ryo kurira ntirizohumvikana ukundi, cank’ ijwi ryo kuboroga.

20Ntihazokwongera kubamw’ abapfa bakir’ inzoya, cank’ umutāma adasozereye imyaka yiwe; kuk’ umwana azopfa amaze imyaka ijana, kand’ ūkenyutse ntashitse ijana azoba yavumwe.

21Bazokwubaka amazu bayīberemwo, kandi bazotera uruzabibu, bīrīre inzabibu zarwo.

22Ntibazokwubaka ngw abandi binjire; ntibazorima ngw abandi babirye: kuko nk’ukw imyaka y’igiti ingana ari kw abantu banje bazoramba, kand’ abo nitoranirije bazoshitsa igihe kirekire banezererwa igikorwa c’amaboko yabo.

23Ntibazoruhira ubusa, kandi ntibazovyara abo kugesezwa, kuko bazoba ar’ uruvyaro jewe Uhoraho nahezagiye, bo n’abazobakomokako.

24Maze batarampamagara nzobitaba, kandi bakivuga nzokwumva.

25Ibingira n’umwagazi w’intama bizorīshanya; intambge izorīsha ubgatsi nk’inka; kand’ umukungugu ni wo uzoba ivyo kurya vy’inzoka. Ntibizoryana canke ngo bigire ico vyica ku musozi wanje wera iy’ uva ukagera, ni k’Uhoraho agize.

← Chapter 64 Jump to: Chapter 66 →