Isaiah 58

Kirundi (Bibliya Yera 1951, 1967 (Burundi))

← Chapter 57 Jump to: Chapter 59 →

1Semerera cane, woye kwigarura; rangurura ijwi ryawe nk’inzamba, ubarire abantu banje ibicumuro vyabo, n’inzu ya Yakobo ivyaha vyabo.

2Mugabo bandondera uko bukeye, banezererwa kumenya inzira zanje; nk’ihanga ryakora ivy’ ukugororoka, ntirireke ivyagezwe vy’ Imana yabo, ni ko bansaba ivyagezwe vyo kugororoka, bakanezererwa kwēgēra Imana.

3Barabaza, bati Mbeg’ igituma twisonzesha, nturuhe ubibona, ni ku ki? Igituma twibabaza, nawe ukavyirengagiza, ni ku ki? Erega mbiterwa n’uko ku musi wanyu wo kwisonzesha mupfa kwikorera ivyanyu, mugakoresha nabi abakozi banyu bose.

4Rāba ico mwisonzeshereza n’amahāne n’ imitongano no gukubitana ibipfunsi vyo kugiriranira nabi; ereg’ ukwisonzesha kwanyu kwo mur’ iyi misi si kwo kwotuma ijwi ryanyu ryumvikana mw ijuru.

5Non’ ukwisonzesha nshima, mugira ngo kumeze gurtyo? Mugira ngo n’umusi wo kwibabarizamwo, no kujondamika umutwe nk’urufunzo, no kwisasira amagunira n’umunyota? Mbeg’ ivyo ni vyo mwita kwisonzesha, n’ umusi jewe Uhoraho nnezererwa?

6Mbeg’ uku si kwo kwisonzesha nshima? S’ukubohora abantu ingoyi z’ukugiriranira nabi, no guhamburura imigozi abatwazwa igitugu, no kurekura impahazwa ngo zīdegemvye, mukavuna ivy’ ugutwaza igitugu vyose?

7Mbega s’ugutanga ivyo kurya vyawe ukagaburira abashonje, ukazana aboro birukanywe ukabashira mu nzu yawe? Wabona ūgenda gusa ukamwambika, ntiwirengagize mwene wanyu?

8Maze rer’ umuco wawe uzoca utambika nk’umutwenzi, amagara yawe asubire atotahare vuba; ukugororoka kwawe kuzokuja imbere, kand’ ubgiza bganje buzoba bukwimirije.

9Maze ni watabaza, jewe Uhoraho nzokwitaba; ni watakamba, nzovuga, nti Ndi hano. Ni wakūra ugutwaza igitugu hagati muri wewe, no gutūngira abandi urutoke, n’ibiyāgo bibi,

10ugahebera umushonji ivyo wari kurya, ugahāza impahazwa: umuco wawe uzorasira mu mwiza, kand’ umwiza wawe uzohinduka nko ku murango w’amashōka;

11kandi jewe Uhoraho nzokwama nkurōngōra, nzohāza ubugingo bgawe mu gihe c’ikigatwa, nguhe kunonoka mu magufa yawe; kand’ uzomera nk’indimiro ikwegewemw’ umwuzi, kand’ uzoba nk’isōko y’ amazi idakama.

12Kand’ ahār’ imisaka kera hazosubira kwubakwa; bazokwubaka ku matanguriro yariho mu bindi bihe; kand’ uzokwitwa Uwica ibirengero, n’Ūsibūra inzira zija mu ngo.

13Ni wakūra ikirenge cawe, ngo ntukandagire isabato, ukareka gukora ivyo wigombeye ku musi wanje wera, arik’ ukita isabato umusi w’umunezero, mber’ umusi wanje wera ukawita uw’ icubahiro, ukawubaha, ntukore ivyo ugomba ubgawe, ntiwironderere gukora ivyawe, ntiwirirwe mu bijandijandi vy’ubusa,

14nuk’ uzonnezererwa jewe Uhoraho; nanje nzoguha kugenda ujandagira ku mpinga z’ imisozi yo mu gihugu; kandi nzogutungisha ishamvu ya sogokuruza Yakobo: kukw akanwa kanje, jewe Uhoraho, ari ko kabivuze.

← Chapter 57 Jump to: Chapter 59 →