Isaiah 30

Kirundi (Bibliya Yera 1951, 1967 (Burundi))

← Chapter 29 Jump to: Chapter 31 →

1Abana b’ibigāba bazobona ibara, ni k’Uhoraho agize, bagīsha inama abandi atari jewe, bakifatanya n’abandi atari Mpwemu wanje, kugira ngo bagereke icaha ku kindi;

2bakava hasi ngo bamanuke muri Egiputa batabajije irivuye mu kanwa kanje; ngo bisunge inkomezi za Farawo, bironkere ubgugamo mu gitūtu ca Egiputa!

3Nuko rero za nkomezi za Farawo zizobatētereza, na bga bgugamo bgo mu gitūtu ca Egiputa buzobambika ibara.

4Kukw abaganwa biwe bar’ i Sowani, n’intumwa ziwe zishitse i Hanesi.

5Bose bazomāramāra kuko bazosanga ar’ abantu batabasha kubagirira ikimazi, batazobatabara, ata kimazi bafise, atar’ ukubatētereza no kubatukisha.

6Imbūri yo ku bikōko vy’i bumanuko. Baca mu gihugu c’ amagorwa n’umubabaro, ah’ intambge y’ingore n’iy’ ingabo zituruka, hakaba n’imamba n’inzoka z’ubumara buturira ziguruka, baremētse indogoba z’imikangara ivy’ ubutunzi bgabo, bashize n’ivy’ itunga ryabo ku mapfupfu y’ ingamiya, kugira ngo baje kubishikanira abantu batazobagirira ikimazi.

7Kuko gutabara kwa Egiputa ar’ ubusa, ata co kumaze: ni co gituma mpīta Rahabu yiyicariye gusa.

8None rero genda, uvyandike ku gisate imbere yabo, uvyandike no mu gitabo, kugira ngo mu bihe bizoza bibabere igishingantahe c’intahava.

9Kukw ar’ ubgoko bg’ibigāba, abana babesha, abana banka kwumva ivyagezwe vy’Uhoraho:

10babarira abamenyi, bati Ntimutumenyere, bakabgira n’aberekwa ibizoba, bati Ntimutubarire ivyo mweretswe vy’ukuri, ariko mutubarire ivyoroshe, muvugishwe ivy’ ibinyoma;

11muve mu nzira mukikame, mukūre Uwera w’ Abisirayeli imbere yacu.

12Ni co gitumye Uwera w’Abisirayeli avuga, ati Ko mukēngereye iryo jambo, mukishimira agahahazo n’ ubugoryi, mukaba ari vyo mwishimikiza,

13ni co gituma ukwo kugabitanya kuzobabera nk’uruzitiro rw’amabuye rurerure rwase umugāga, ruminaraye ruri mu gutemba; guhomvoka kwarwo kuzoba giturumbuka mu kanya isase.

14Kand’ azorusāvya nk’ukw ikibumbano gisāba, iyo bakijanjanze ata kibabarwe; mu tunywenywe twaco ntihasigare n’akajo korahura umuriro mu ziko, canke kodaha utuzi mw ivomo.

15Umwami Uhoraho, Uwera w’Abisirayeli, uku ni ko yari yaravuze, ati Mu guhindukira no mu gutēkāna ni ho muzokirira; mu gutekereza no mu vyizigiro ni ho muzoherwa inkomezi; ariko mwebge ntimwabikunze.

16Yamara mwaravuze, mut’ Oya, ariko tuzoguruka ku mafarasi; kandi koko muzoba muhunga; kandi muti Tuzogendera ku y’impayamaguru; ni koko n’abazoba babirukana babakinagiza bazoba ar’ impayamaguru nyene.

17Abantu igihumbi bazokwirukanwa n’akāyaga k’umuntu umwe; akāyaga ka batanu kazotuma muhunga: gushitsa aho muzosigara mumeze nk’igiti kirekire gishinze ku mpinga y’umusozi, canke nk’ibendera ishinze ku gasozi.

18Ni kubg’ ivyo Uhoraho ashamaje kugira ngw abagirire ubuntu, kandi ni kubg’ ivyo azohaguruka kugira ngw abagirire ikigongwe, kuk’ Uhoraho ar’ Imana ica izibereye; hahirwa abashamaje bamwiteze bose.

19Yemwe bantu b’i Siyoni, ababa i Yerusalemu: ntimuzoba mukirira ukundi; ntazobura kubagirira ubuntu ni yumva ijwi ry’ugutakamba kwanyu; acumva azobishura.

20Kandi nah’ Umwami Imana azobagaburira ivyo kurya vy’amagorwa n’amazi y’amarushwa, arikw abigisha banyu ntibazoba bacihisha ukundi: amaso yanyu azobībonera;

21kandi ni mwakikamira i buryo cank’ i bumoso, amatwi yanyu azokwumva ijambo ribaturutse inyuma rivuga, rit’ Iyi ni yo nzira, mube ari yo mujana.

22Kandi muzotitura ifeza yometse ku bishushanyo vyanyu vy’ibibāzano, n’izahabu yometse ku bishushanyo vyanyu vyavugutiwe mu nkero; muzobishibura rwose nk’ikintu gihumanye, mubibarire, muti Vaho, mugende!

23Kand’ azorekurira imvura imbuto muzobiba mu ndimiro, kand’ imihure ivuye mu ndimiro izoba inovereye yo gutunga amagara: ico gihe imikuku yanyu izorisha ivyanya binini.

24Inka n’indogoba z’imikangara zirima zizorya ivyo kurya birimw’ umunyu, bigosojwe urutaro n’igitemere.

25Ku gisozi cose gishizwe hejuru no ku musozi wose muremure hazoba amasōko n’imigezi y’amazi, ku musi wo gutōtōra abantu rwose, ah’ iminara izosidukira.

26Kand’ umuco w’ukwezi uzomera nk’uw’ izuba, kand’ umuco w’izuba uzokwongerekanywa ibihetangabo ndwi, ungane n’umuco wo mu misi ndwi, ku musi Uhoraho azopfuka ibikomere vy’abantu biwe, akavūra n’inguma yabakubise.

27Eh’ izina ry’Uhoraho riraza rivuye kure, rirurumbamw’ uburake bgiwe, ripfundukamw’ umwotsi w’intunda: iminwa yiwe yuzuye ubushangashirwe, kand’ ururimi rwiwe rumeze nk’umuriro utongora:

28impwemu ziwe zimeze nk’umugezi ushēshe ugashika no mw izosi, ngo zigosoze amahanga urutaro rumara umuguruka: kand’ umujiginya uzimiza uzoba mu binyigishi vy’ amahanga.

29Nuko muzogira indirimbo nk’iyo baririmba mw ijoro ku musi mukuru wera; muzogira n’umunezero wo mu mutima nk’uw’ umuntu afise umwironge aja ku musozi w’ Uhoraho, ngw ashikīre Igitandara c’Abisirayeli.

30Kand’ Uhoraho azotuma ijwi ryiwe ry’icubahiro ryumvikana, azokwerekana ugukubita kw’ukuboko kwiwe mu bushangashirwe bg’uburake, no mu rubeya rw’umuriro utongora, no mu gusegenyuka kw’imvura n’ ikirura n’imināna y’urubura.

31Kukw ijwi ry’Uhoraho rizotuma Abashuri bahababuka, abakubitishe urugāge rwiwe.

32Kand’ ikibando bāgerewe uko kimashuye kwose, ico Uhoraho abamashuza, hazovuga udushako tw’ingoma n’ inanga; kand’ azorwana na bo mu ntambara adasībiza ukuboko.

33Kukw ikirundo c’inkwi citeguwe uhereye kera, mbere citeguriwe umwami; Uhoraho yakigize kirekire kandi kinini; ibigikomanije n’umuriro n’ibigiga vyinshi; impwemu z’Uhoraho zimeze nk’ umugezi w’amazuku ni zo zibidometse.

← Chapter 29 Jump to: Chapter 31 →