Isaiah 51

Kirundi (Bibliya Yera 1951, 1967 (Burundi))

← Chapter 50 Jump to: Chapter 52 →

1Ni munyumve, yemwe abakurikirana ukugororoka, yemwe abarondera Uhoraho: mwitegereze igitandara mwasatuweko, n’inganzo mwimbgemwo.

2Mwitegereze Aburahamu sogokuruza, na Sara yabavyaye; kuko hamwe Aburahamu yar’ akir’ umwe rudende namuhamagaye, nkamuha umugisha, nkamugwiza.

3Kuko jewe Uhoraho namaze Siyoni umubabaro; namaze umubabaro imisaka yaho yose, kand’ ubugaragwa bgaho nabugize nka Edeni, n’ubgeranyange bgaho nabugize nk’itongo ryanje, jewe Uhoraho; hazobonekamw’ umunezero n’uguhimbarwa, bo n’ishimwe n’ijwi ry’inanga.

4Bantu banje, ni munyumvirize; hanga ryanje, muntege ugutwi; kukw icagezwe kizova kuri jewe, kandi nzoshinga amateka yanje ngw abe umuco w’amahanga.

5Ubugororotsi bganje buri hafi, agakiza kanje karaserutse, amaboko yanje azocira amahanga amateka; ababa ku kiyaga bazonyitega, kand’ ukuboko kwanje ni kwo bazokwizigira.

6Ni mwunamurire amaso yanyu mw ijuru, mwitegereze no kw isi hasi: kukw ijuru rizokamangana nk’umwotsi, n’isi izosāza nk’umwambaro, n’abayibako bazopfa nk’isazi: arikw agakiza kanje kazokwamah’ ibihe bidashira, kand’ ukugororoka kwanje ntikuzogira iherezo.

7Yemwe abazi ivy’ ukugororoka, ihanga rifise ivyagezwe vyanje mu mitima yanyu, ni munyumve: ntimugatinye ibitutsi vy’abantu, canke ngo murandurwe imitima n’ ugucokora kwabo.

8Kukw inyenzi zizobarya nk’umwambaro, n’ ifukunyi izobarya nk’ubgoya bg’ intama: arik’ ukugororoka kwanje kuzokwamah’ ibihe bidashira, n’ agakiza kanje uk’ urunganwe ruzogenda rukurikirana.

9Ikangure, ikangure, wambare inkomezi, ewe wa kuboko kw’ Uhoraho; ikangure nko mu misi ya kera, nko ku runganwe rw’ibihe vyashize, uko rwagenda rukurikirana. Mbega si wewe wahimbaguye Rahabu, ugasogota ca gisato c’amahēro?

10Si wewe wakamije ikiyaga, amazi maremare yo mw idamba; ugahindura i bgina bgo mu kiyaga kuba inzira ngw abācunguwe bayicemwo?

11Nukw abācunguwe n’Uhoraho bazogaruka, bashike i Siyoni baririmba; umunezero utazoshira uzohora ku mitwe yabo; bazoronka umunezero n’uguhimbarwa, kand’ umubabaro no gusuhuza umutima bizohunga vyambuke.

12Ni jewe, ni jewe nyene mbahūmuriza; uri nde utinya umuntu, kand’ azopfa; n’umwana w’ umuntu, kand’ azohinduka nk’ivyatsi?

13ukibagira Uhoraho Umuremyi wawe, ari we yagaranzuye amajuru, agashirah’ amatanguriro y’isi; maz’ ukīriza umusi utinya uburake bg’ūhahaza, iyo yiteguye guhonnya: non’ uburake bg’ūhahaza buri hehe?

14Abāfashwe mpiri bakambukanwa bazorekurwa vuba; ntibazopfa ngo baje muri rwa rwobo, kand’ ivyo kurya vyabo ntibizobura.

15Kuko jewe nd’ Uhoraho Imana yawe, ntera ikiyaga gusuriranya, imipfunda yaco ikabomborana: Uhoraho Nyen’ ingabo ni ryo zina ryanje.

16Kandi nshize amajambo yanje mu kanwa kawe, ngutwikirije igitūtu c’ukuboko kwanje, kugira ngo ngaranzure ijuru risha, nshireh’ amatanguriro y’isi nsha, mbarire ab’i Siyoni, nti Mur’ abantu banje.

17Ikangure, ikangure, vyuka uve hasi, ewe Yerusalemu, uwo Uhoraho yasomesheje ku gikombe c’uburake bgiwe; wanyoye ku gakarabo ari ko gikombe c’ukudandabagiranya, uracīrāngūza.

18Mu bana wavyaye bose ntiharih’ uwo kukurōngōra; kandi mu bo wareze bose nta wo kugufata ukuboko.

19Ibi vyompi ko bigushitseko, ni nde azokuririra? Ko haje ibitongozi n’ugusangangurwa, bo n’inzara n’inkota, nokuremesha nte?

20Abana bawe bararavye, bahindikiranye ku mayirabiri hose, nk’impongo iguye mu mutego; bamazwe n’uburake bg’Uhoraho, ni kwo guhana kw’ Imana yawe.

21None rero ni wumve ibi, wa mpahazwa we, uborewe utanyoye vino:

22uku ni k’Umwami wawe Uhoraho agize, ari we Mana yawe ibūranira abantu bayo, at’ Ehe nkūye ca gikombe c’ukudandabagiranya mu kuboko kwawe, ni ko ka gakarabo, ari ko gikombe c’uburake bganje; ntuzosubira kukinywak’ ukundi:

23ngiteretse mu kiganza c’abaguhahaza, c’abākubarira, bat’ Ubika inda, tuguceko; nawe ugatega mu mugongo hawe nko hasi, canke nk’inzira, ngo bahahite.

← Chapter 50 Jump to: Chapter 52 →